EIGINMANNSRAUNIR

Ég var að lesa einhverstaðar, að giftir karlar væru lélegri í húsverkunum en þeir sem væru í sambúð.  Þetta er niðurstaða stórrar rannsóknar sem gerð var í USA.  Það er oft verið að rannsaka hluti sem þegar eru fyrirliggjandi.  Það hefði verið nóg fyrir þessa Dúdda í Ameríkunni að hringja nokkur símtöl og fá úr þessu skorið.

Ég hefði getað sagt þessu fólki heilmargt.  Á minni löngu æfi hef ég átt þrjá eiginmenn (já þeir eru allir lifandi, ekki hugsa ljótt á sunnudögum), ég veit að það er slatti af húsböndum, en hvað get ég gert, ég ER guðsgjöf til mannkyns og hef reynt að deila mér eins vel og ég hef vit til.

Blekið var ekki þornað á vígsluvottorðunum þegar mínir menn fengu tuskuofnæmi.  Þeir fóru að taka á sig allverulegan sveig fram hjá þvottavélum, ryksugum, hreingerningarefnum og skrúbbum.  Þegar taka átt íbúðir í gegn þurftu þeir allir að skreppa út í sjoppu og komu rétt mátulega til baka, til að geta farið út með ruslið.

Ef ég hefði hinsvegar ekki verið svona fyrirsjáanlega borgaraleg í hegðun og verið í óvígðri sambúð (bara tilhugsunin fær mig til að roðna) í staðinn fyrir að hlaupa eins og hauslaus hæna upp að altarinu í hvert skipti sem hillti undir samruna, þá væru þessir menn allir með hússtjórnarpróf upp á vasann.

Úr hússtjórnarskóla Jennýjar Önnu Baldursdóttur.

Og ég væri þá sennilega ekki að ljúga ykkur full hérna á sunnudagsmorgni þegar ég með réttu á að liggja á bæn og biðja um fyrirgefningu syndanna.

Svona getur kona verið vond.

Sunnudagur til syndar og svefnleysis.

Úje

 

Athugasemdir

[Birna Dis Vilbertsdóttir (IP-tala skráð) 2.9.2007 kl. 09:57]

Góð að venju.

[Katrín Snæhólm Baldursdóttir, 2.9.2007 kl. 10:03]

Satt segirðu með rannsóknirnar....merkilegur fjandi að þurfa að rannsaka vísindalega það sem er augljóst. Mátt setja mitt númer á listann. Geta hringt í mig til að fá samanburðarniðurstöður. Er með eintak sem gerir heimilisstörf og straujar skyrtur. Fer aldrei út í sjoppu.

[Ásdís Sigurðardóttir, 2.9.2007 kl. 11:15]

Einmitt, eins og það þurfi að rannsaka svona augljósa hluti, greinilega fullt af eiginmönnum í USA sem vilja frekar vinna yfirvinnu við rannsóknir heldur en að fara heim og hjálpa konunni. Flestur finnst nú að þegar búið sé að ganga upp að altarinu þá geti þeir tekið upp líf hins einstæða karls, það er bara í tilhugalífinu á meðan þeir eru að landa marhnútnum sem þeir sýna sparihliðarnar. Reyndar hef ég átt 3 eins og þú, syndugri konur vart hægt að finna en okkur, og hafa þeir sem betur fer hlýtt mér að mestu leyti, semsagt þá leyfði ég þeim ekki að taka of mikinn þátt í þessu, vildi ráða þessu sjálf.

[Hildigunnur Rúnarsdóttir, 2.9.2007 kl. 11:32]

hehe

Mér þætti reyndar gaman að vita hvort hafi verið tekið tillit til aldursdreifingar gifts fólks versus fólks í sambúð í þessari rannsókn. Einhvern veginn segir mér eitthvað að fólk sem er í sambúð sé almennt frekar yngra og karlar sem taka lítinn þátt í heimilisverkum séu frekar eldri og líklegri til að vera giftir.

(minn kall (sem ég er NB gift) er MIKLU duglegri í heimilisstörfum en ég :D )

[Ásthildur Cesil Þórðardóttir, 2.9.2007 kl. 11:50]

Minn karl er duglegur að taka til og þrífa.  Hann hefur alltaf verið þannig.  En svo hefur það frekar aukist en hitt. 

[Kristín Katla Árnadóttir, 2.9.2007 kl. 12:00]

Ja minn karl getur aldeilis verið duglegur að þrífa

[Jóna Á. Gísladóttir, 2.9.2007 kl. 12:59]

LOL. lovjú asninn þinn

[Hrönn Sigurðardóttir, 2.9.2007 kl. 13:48]

.....mátt stinga mínu númeri að þeim, þegar þeir hringja í þig. Get sagt þeim ýmislegt, m.a. um fjáraustur í heimskulegar rannsóknir!!!

knús á þig

[Laufey Ólafsdóttir, 2.9.2007 kl. 14:31]

Híhí! Skál í botn! ...þetta með sunnudaginn þeas, hef auðvitað ekki hundsvit á hinu! Er alræmdur einleikari