Leita í fréttum mbl.is

Færsluflokkur: Kvikmyndir

Takk Helgi Felixson!

Ég horfði á Kastljósið í kvöld, á viðtalið við Helga Felixson, höfund heimildarmyndarinnar Guð blessi Ísland.

Við fengum að sjá glefsur úr myndinni, þ.e. úr viðtölum við Björgólf Thor, Bjarna Ármanns og Jón Ásgeir.

Helgi lét kameruna rúlla þegar Jón Ásgeir vissi ekki af.

Aðspurður sagðist hann ekki hafa getað komist að sannleikanum öðruvísi. 

Örugglega má til sanns vegar færa að það sé ekki góð latína að gera hluti svona, þ.e. að taka upp án vitneskju viðmælandans og ég hef séð nokkur blogg þar sem fólk fer á samskeytunum yfir því.

Ég segi hins vegar: Takk Helgi.  Þetta þurfum við að sjá!

Nú setur Jón Ásgeir heljarinnar pressu á Helga, hann á að eyða viðtölunum, klippa þau út og jafnvel eyða myndinni.

Þarna fer maður sem er vanur að vera með fulla stjórn á ímyndinni.

Bölvaður hræsnarinn.

Og Björgólfur Thor - kannski fæ ég stefnu í hausinn en fyrirgefið, hann er frumgerðin af viðrini.

Hvernig getur þessi maður hafa komið Icesvemálinu til leiðar - hann virkar á mig eins og...

Sleppum því.

Bjarni Ármannsson hefur ekki tilfinninguna af að vera með peninga.  Bara tölur á blaði.

Eins konar táknmyndir.  Honum finnst erfitt að skilgreina hvað hann er að meina.

Ég get hins vegar sagt Bjarna og hinum fíflunum tveimur að við sem þurfum að pikka upp nótuna eftir svallið sjáum peninga fyrir það sem þeir eru.

Krónur og aura sem lýsa æ oftar með fjarveru sinni úr buddunni.

Peningaskortur er beinharður raunveruleiki stórs hluta þjóðarinnar.

Reikningar hlaðast upp, angistin vex.

Þess vegna á að sýna ykkur eins og þið eruð.

Mér finnst gott að Helgi Felixson lagði á sig að ná ykkur á mynd.

Enginn ykkar sýnir iðrun, amk. fer lítið fyrir henni. Skammist ykkar.

Úps - ég er kurteis í dag.

Enn einn alþjóðlegur kurteisisdagurinn hjá mér sko.


mbl.is Vill að viðtölum verði eytt
Tilkynna um óviðeigandi tengingu við frétt

Lappalaus Húsi - nó biggí

Ég á helling af vinkonum sem eeeeelska Húsa lækni. (Ekki ég - ónei - frusssssss).

Myndu keyra yfir fólk til að komast að honum  þrátt fyrir að vera dagfarsprúðar með afbrigðum alla jafna.

Þekki líka kerlingar sem slökkva á síma, taka dyrabjöllur úr sambandi, fara í ríkið og kveikja á kertum til að eiga sínar einkastundir með þessum kjaftfora og bæklaða lækni.

Hann er ekki bara bæklaður á fæti maðurinn - hann er andlegur skarnahaugur og væri atvinnulaus ef hann væri til í alvörunni.

Vinkonur mínar eru löngu búnar að gleyma þessu smáatriði - þ.e. að Húsi er ekki til nema í sjónvarpinu.

Ég var líka ástfangin af hommanum Richard Camberlane í Turnfuglunum, eða hvað sá þáttur nú hét.

Húsi er að hugsa um að hætta af því að "bæklunin" á læknisómyndinni er farin að hafa áhrif á lappir og mjaðmir raunheimamannsins Hugh Laurie.

Húsi minn, konum sem fíla þig á annað borð er nákvæmlega sama hvort þú haltrar eða ekki.  Hættu því bara.

Hvað þær (mig) varðar máttu vera lappalaus.

Bara að þú fórnir ekki þínum skítakarakter, kvenfyrirlitningunni og almennri skítmennsku.

Það er í lagi að vera sjónvarpspersónu skíthæll og kvenhatari.

Ég hef meiri áhyggjur af raunheimaösnunum sem ekki verður þverfótað fyrir.

Úje.


mbl.is Of erfitt að leika Dr. House
Tilkynna um óviðeigandi tengingu við frétt

Veðmál um svefn eða skó

The%20Shining

Talandi um kvikmyndir.  Úff, ég er í vandræðum.

Málið er að ég horfi ekki á hryllingsmyndir nema með örfáum undantekningum.

Ég lenti nefnilega í skelfilegri upplifun þegar ég bjó í Gautaborg um árið og leigði mér "Shining".

Mikið rosalega hræddi hún mig sú mynd.

Ómæ hvað Jack Nicholson var mikill ógeðismaður í þeirri rullu.

Samt man ég ekki mikið úr myndinni nema hversu hrædd ég var, andrúmsloft illsku og svo man ég að konan hans Jack í myndinni var eins og hún væri að deyja úr berklum eða eitthvað.  Alveg ferlega þreytuleg konan.

Ég veit að ég er ekki í lagi en eftirköstin af því að horfa á þessa mynd voru langvarandi og skelfileg fyrir mig.  Nema hvað.

Ég þorði ekki að sofna í myrkri í fleiri mánuði á eftir.

En málið gerðist alvarlegra en svo því þetta þróaðist út í það að geta ekki sofið við ljós heldur.

Ég hætti einfaldlega að sofa á tímabili.

Í hausinn á mér komu aftur og aftur flashback úr myndarfjandanum.

Here´s Johnny var eitt.

Þegar Jack var á barnum með manninum frá helvíti var önnur.

En þetta vandamál með myndina hefur elt mig uppi.

Ég hef nefnilega veðjað við hinn helminginn af kærleiks að ég þori alveg að sjá hana núna þrjátíu árum síðar eða svo.

Hann vil meina að ég sé ennþá skíthrædd og taugaveikluð og muni verða andvaka fram að jólum.

Ég í öllum mínum hortugheitum þverneita því og hef veðjað við hann um málið.

Þess vegna er mér þessi vandi á höndum.

Hvort er mikilvægara?

Að sofa eða vinna rándýru stígvélin sem veðmálið gengur út á?

Sjitt.


mbl.is Verða kvikmyndir leigðar út og seldar á YouTube?
Tilkynna um óviðeigandi tengingu við frétt

Algjört einkaframtak án innblöndunar

Nýju myndina um hrunið sem verður frumsýnd 9. október og heitir "Guð blessi Ísland", ætla ég að sjá, það er á hreinu.

Þá verður liðið ár frá þeim degi sem allt hrundi svona formlega þó auðvitað hafi allt farið í vaskinn löngu áður en okkur starfsmönnum á plani haldið í ástandi hins hamingjusama hálfvita eins lengi og nokkur kostur var.

Ég ætla að sjá hana þó ekki væri nema nafnsins vegna sem er auðvitað tilvísun í orð Geirs Haarde þegar hann bað guð fyrir okkur þann 7. október í fyrra vansællar minningar.

Ég hef reyndar alltaf skilið þetta ákall Geirs á guð.

Maðurinn vissi auðvitað að hann og hans hómís voru gjörsamlega ófærir að bjarga nokkrum sköpuðum hlut og þá var ekkert eftir nema ákall á hinn almáttuga.

Sem mér finnst ekki hafa tekið neitt sérstaklega vel í bón Geirs Hilmars.

En hvað gat Geir gert?

Ekki gat hann beðið VG um að bjarga okkur.

Það hefði verið pólitísk sjálfsmorð.

En hið pólitíska sjálfsmorð var auðvitað framið án hjálpar nokkurs manns eða máttar.

Algjört einkaframtak án innblöndunar.

Gvöð blessi Kolbeinsey, hún er að hverfa í sjó.


mbl.is Þetta er bara allt farið í steik
Tilkynna um óviðeigandi tengingu við frétt

Bestasta forsetafrúin

Dorritt 

Ég var laumuaðdáandi Dorritar.

Þangað til á Olimpíuleikunum í fyrra að ég gerðist öflugur og yfirlýstur aðdáandi hennar, þ.e. ég kom út úr skartgripahvelfingunni og bloggaði um hana aftur og aftur í öflugu krúttkasti.

Hún var svo mikið krútt með fánann í Kína.

Hún borgaði líka fyrir sig sjálf og það hefðu margir, eins og eiginmaður menntamálaráðherrans fyrrverandi mátt gera, þá var nefnilega útrásin enn í fullu gildi (héldum við) og hann hjá Kaupþingi.

Svo sagði hún að Ísland væri stórasta land í heimi.

Þá kolféll ég fyrir þessari konu.

Viðurkenni reyndar að þegar hjónin rifust í blaðaviðtali fór ég aðeins niður fyrir frostmark í hrifningunni en áttaði mig svo á því að Dorrit lagði sitt lóð á vogarskálarnar gagnvart minni genetísku óbeit á konungum og forsetum en ég tel svoleiðis fyrirkomulög vera smáborgaralega tímaskekkju.

Viðtalið skoraði nefnilega hátt á aulahrollsskalanum.  Manni langaði alveg til að það væru engin forsetahjón á skerinu á því mómenti.

En Dorrit er vel tengd.  Það er ekki kjaftur sem er eitthvað í peninga- og listaheiminum sem hún þekkir ekki.

Fólk skal ekki vanmeta framlag þessarar konu gagnvart Íslendingum.

Ég meina allt þetta þekkta lið hleður á sig skartgripum þar er Dorrit á heimavelli og hún hefur komið mörgum listamanninum til aðstoðar.

Ég er á því að leggja niður forsetaembættið enda er það bölvaður ekkisens hégómi og svo má ráða Dorrit til PR-starfa og almennra reddinga.

Og hér er ég ekki að grínast.  Þessi kona hefur verið okkur betri en enginn.

Dorrit er bestasta forsetafrúin sem við höfum átt til þessa.

Það má viðurkennast hvað sem fólki annars finnst um eiginmanninn víðförla.

Áfram Dorrit.

Meiningin var annars að blogga um ökklann eða eyrað í viðhorfi fólks til Dorritar áður en ég missti mig í mæringarnar.

Hvar er hin hófsama lína fólks í skoðunum á fólki eins og Dorrit?

Konan sem talað er við í fréttinni missir sig af hrifningu og þakklæti.

Aðrir fá nánast hjartastopp af neikvæðni bara við að heyra nafni hennar hvíslað.

Halló - höldum okkur í hófsemdinni (jájá, ég hef nefnlilega svo mikið efni á að prédika þar).

Úje.


mbl.is Dorrit fékk Kate Winslet
Tilkynna um óviðeigandi tengingu við frétt

Ég held að ég láti leggja mig inn!

 skólataska

Ég nenni ekki að vera í fári vegna ástandsins á Íslandi.

Amk. tek ég mér frí frá því til klukkan 14,32 og verð í góðu skapi þangað til.

Svo brjálast ég.

En.. Ég er að verða gömul, nú eða þá að lyktarskyn mitt hefur bilað í bankahruninu.

Ég er ofsótt af allskyns lykt sem tengir mig við atburði í lífi mínu, suma skemmtilega, aðra síðri.

Ég fæ reglulega lyktarkast sem tengir mig inn á spítalann á Spáni þar sem ég lá nánast milli heims og helju fyrir nokkrum árum.

Hún er svona: Ólívuolíumatarlykt, sótthreinsiefni, blönduð líkamslykt og blómaangan.

Oj.

Svo fæ ég reglulega lyktrænar heimsóknir frá bernsku minni.

Ég seldi stundum Mánudagsblaðið (þann sorasnepil) á laugardögum.

Þá voru allir, svei mér þá, að bóna í Vesturbænum.   Húsmæður hljóta að hafa haft sameiginlega stundarskrá, ég sverða.  Lyktin af Mjallar og Sjafnarbóni er yfirgengilega sterk.  Það er ljúft.

"Ekki vaða yfir nýbónað gólfið krakki"; hljómaði um göturnar þegar ég tróð mér inn til að selja.

Það var meira framboð en eftirspurn á smáfólki á þessum tímum og því ekki verið að vanda sig neitt sérstaklega í samskiptum við þessi kvikindi.

Ég seldi merki fyrir allskonar líknarfélög og það var gert á sunnudögum.

Þá voru allir (sama stundarskrá aftur) að steikja sunnudagsverð fyrir hádegi.

Hryggur, grænar, rauðkál og sósa.

Halló hvað þessi óholli málsverður lyktaði vel.

Stundum finn ég lykt af vori og sumri úr Vesturbænum (það var allt öðru vísi þar en annars staðar), sú lykt er milljónsinnum betri en árstíðalyktin í dag.

Ætli það komi ekki til af hreinni náttúru, ómenguðu grasi og minni bílaumferð?

Æi, ég veit það ekki, en núna hellist yfir mig lyktin af nýrri skólatösku, brakandi leðurlykt.

Andskotans ófriður er þetta.

Ég held að ég láti leggja mig inn.

P.s. Popplyktin úr Tjarnarbíó getur komið þegar minnst varir.

Síðasti bærinn í dalnum og allur sá ballett.

Ómæ.


Darth Vader í símanum

Ég vildi óska þess að ég og fleiri hefðum aðstöðu til að mynda okkur skoðun um ESB út frá forsendum sem ekki eru litaðar af flokkslínum.

Ég hringsnýst í kringum sjálfa mig í þessu máli, veit ekki hvað snýr upp og niður á umræðunni.

Veit sem sagt ekki hvort ég er með eða á móti.

Jóhanna vill setja aðildarviðræður í forgang, kannski er það ágætt bara, þá komumst við að minnsta kosti að því hvað aðildin inniheldur í plús og mínus.

Ég veit ekki með ykkur, en ég er varla búin að ná því að það skuli kosið um helgina.

Úrvinnslugeta höfuðsins á mér er orðin frekar hægt eftir allt sem á hefur dunið.

Ég veit að minnsta kosti hvað ég ætla að kjósa, þarf ekki að velta því lengur fyrir mér.

Svo er bara að reyna að halda haus í gegnum komandi hremmingar.

Annars er ég enn nánast raddlaus.

Hef þó rödd sem er ryðguð og ljót, nánast skelfileg í myrkri.

Elskulegur tengdasonur minn svaraði í símann í gær þegar ég hrindi til að tala við dóttur mína.

Hann kallaði:

Sara; Darth Vader er í símanum.

Jájá.

Eddie Izzard er með þetta.  ÓMÆGODDDD.

 


mbl.is ESB-viðræður í júní?
Tilkynna um óviðeigandi tengingu við frétt

Það var kátt...

Þar sem ég sat og reytti hár mitt yfir málfundaæfingum þingmanna Sjálfstæðisflokks í gærkvöldi og nótt, var ég að hugsa um að það þyrfti dauðan mann til að þola fíflaganginn í þeim og að missa ekki eitthvað miður fallegt út úr sér.

Dauðir menn tala ekki og þeir finna heldur ekki til í eyrunum svo vitað sé.

Svo eftir að Árni söng,  Arnbjörg hló að eigin hnyttni og krúttlegheitum (jeræt) kom Katrín í ræðustól, og sagði það sem ég hefði viljað segja.

"Hættið svo þessu helvítis væli".

Ég var reyndar búin að segja þessa setningu stundarhátt hér í stofunni heima og fleira miður fallegt og ég fann til mikillar samkenndar með Katrínu.

Það voru sem betur fer engin vitni að einræðum mínum við þingmenn Sjálfstæðisflokksins.  Eins gott.

Katrín baðst síðan afsökunar á orðbragðinu en sjálfstæðismenn fóru nánast á límingunum vegna orðavals þingmannsins.

"But no worry".

Það er búið að ræsa út búsáhaldabyltinguna.

Allir sem vettlingi geta valdið rjúka nú niður á Austurvöll.

Sjálfstæðiflokkurinn fær ekki leyfi frá þjóðinni til að koma í veg fyrir breytingarnar á stjórnarskránni.

Og svo mega þeir væla hver um annan þveran þegar þeim verður það ljóst.

Þeir geta grátið fljóti, en ég vil að þeir geri það heima hjá sér.


mbl.is „Hættið þessu helvítis væli"
Tilkynna um óviðeigandi tengingu við frétt

Sisterhúddið

 kvennadagur

Alþjóðlegi baráttudagur kvenna er á morgun.  Vá hvað tíminn flýgur, maður varla búin að snúa sér við og þá er komið ár!

Það eru spennandi tónleikar í Þjóðmenningarhúsinu á morgun kl. 17,00 og þar verða konur í öllum hlutverkum.

Skemmtilegt.

En..

Það var ekki eins skemmtilegt að horfa á bíómynd gærkvöldsins á RÚV.

Mynd um konur gerð af konum og ég hélt að þarna væri töff mynd um hipp og kúl konur.

Halló, það hefði átt að standa sem viðvörun að þetta væri mynd upp á 19 klúta og mörg eggvopn.

Mig langaði satt best að segja að myrða einhvern,  myndin var svo klisjukennd.  Hefði jafnvel reynt að beita einhverju á einhvern til að fremja eitthvað með eggvopninu.  Úff.

Nafnið á myndinni var það eina sem sló í gegn hjá mér:

"Divine secrets of the Ya Ya sisterhood".

Sandra Bullock og meðleikkonur hennar voru beint upp úr klisjupottinum.

Móðir hatar dóttur en elskar hana samt og vice versa.

Ég gæti gargað.

Af hverju er alltaf verið að halda að manni þessari ranghugmynd um skelfilega erfið samskipiti mæðra og dætra?

Ég keypti þetta kjaftæði fyrir mörgum árum og borgaði tugþúsundir króna hjá sálfræðingi til þess eins að komast að því sem mig hafði alltaf grunað, að mamma mín er frábær.

Stelpurnar mínar þurfa vonandi ekki að leggja í mikil fjárútlát til að komast að því að ég er æðisleg.  Sú staðreynd ÆTTI að minnsta kosti að garga í andlitið á þeim.

Ekki horfa á svona myndir stelpur.

Þarna er ekki verið að spegla líf alvöru kvenna.

Nú nema sisterhúddið auðvitað, það er til.

Ég er í mörgum sisterhúddum.

Og elska hvert einasta eitt.

Súmí.


mbl.is Konur í öllum hlutverkum
Tilkynna um óviðeigandi tengingu við frétt

"Tortímandinn" II

 tormtimandinn

"Heimildir" Moggans herma að Davíð sé á leið í framboð á Suðurlandi.

Davíð plús Moggi plús heimildir:  Nokkuð öruggt myndi ég ætla.

Ég tek þessu fagnandi auðvitað.

Það kemur til að því að enn munu nokkrar krónur hringla í ríkiskassanum sé hann hristur.

Það getur auðvitað ekki gengið.

Er þá ekki alveg tilvalið á fá sjálfan "Tortímandann" til að klára málið?

Ég hefði haldið það.

Ég hélt að Heiða vinkona mín og ræðuskörungur morgundagsins væri að grínast þegar hún bloggaði um að fólk væri í alvöru að fagna framboði Davíðs.

En því miður, það er fólk þarna úti sem enn hefur ekki sett atburði í samhengi.

Ekki frekar en Davíð sjálfur.

Það alvarlega við þetta annars farsakennda mál er að þetta fólk gæti komið Davíð að völdum.

Og fyrir það þurfum við að búa fái forheimskunin og foringjadýrkunin útrás í kjörklefanum.

Ég held að ég sé farin að skilja söguna betur.

Og mig langar ekki til að hún endurtaki sig.


mbl.is Davíð í framboð á Suðurlandi?
Tilkynna um óviðeigandi tengingu við frétt

Næsta síða »

Höfundur

Jenný Anna Baldursdóttir
Jenný Anna Baldursdóttir

Bara eins og ég kem fyrir af skepnunni.  Er með róttæka vinstri slagsíðu, með fagurgrænu ívafi ásamt femínískum töktum þegar við á.  Ég bít ekki.  Eða bít ég?  Það fer tvennum sögum af því. 

jennfo.baldursdttir@gmail.com

Heimsóknir

Flettingar

  • Í dag (19.3.): 0
  • Sl. sólarhring:
  • Sl. viku: 13
  • Frá upphafi: 0

Annað

  • Innlit í dag: 0
  • Innlit sl. viku: 13
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.