FLORENS LIFIR ENN GÓÐU LÍFI...

...meðal íslenskra kvenna ef marka má skoðanakönnun sem Capacent gerði fyrir Jafnréttisráð.  Í 8 tilfellum af 10 reikna karlar með hærri launum fyrir starf en konur. 

"Áhugi ungmennanna á að gegna ákveðnu starfi er hins vegar nokkuð mismunandi en meðal karla hafa flestir áhuga á að verða smiðir (33,7%) eða lögfræðingar (31,5%) en hjá konum er hjúkrunarfræðingur í fyrsta sæti (37,9%) og læknir í öðru sæti (36,4%). Fæstir karlar hafa hins vegar áhuga á starfi launagjaldkera (2,9%) og hjúkrunarfræðings (5,3%). Konur hafa hins vegar minnstan áhuga á starfi verðbréfamiðlara (5,2%) og kerfisstjóra (6,4%)."

Mér finnst nokkuð merkilegt að enn skuli konur setja hið hefðbundna starf hjúkrunarfræðings í fyrsta sæti. Karlarnir kjósa smiðsstarfið eða lögfræðina sem kemur mér hins vegar ekki á óvart. 

Lítið virðist breytast í viðhorfum kynjanna til framtíðarstarfa.  Skoðanir og vilji ungs fólks er enn ákaflega fyrirsjáanlegur.  Ætli það fari að glitta í frjálslegra og óheðfbundnara val hjá bæði konum og körlum einhvern tímann á þessari öld?

Karlar vilja verða smiðir og lögfræðingar en konur hjúkrunarfræðingar eða læknar

IKEARAPPORT

Ég fór í rúllugardínu-havaríð eins og ég ætlaði mér og eins og lesendur mínir vita þá rapportera ég alltaf (ég meina í þetta eina skipti sem ég hef farið í IKEA á árinu þangað til núna) þegar ég fer í þessa þunglyndisaukandi verslun af sænskum uppruna.  Eins og síðast þá fór ég eftir smáræði og kom heim með alla smávörudeildina.  Síðast fór ég til að kaupa sturtuhengi en gleymdi því og keypti nánast allt annað sem nöfnum tjáir að nefna.  Núna fór ég til að kaupa rúllugardínu og gleymdi henni en keypti mottur í staðinn.  Ég segi svona, það hefði verið flott ef það hefði æxlast þannig.  Nú var húsbandið með í för og hann stýrði mér að rúllugardínunum (arg) og engin þeirra var brúkleg að mínu mati þannig að nú bíðum við fram yfir helgi og Inga-Lill getur bara verið andvaka í nætursólinni þangað til.  Ég fer ekki með húsbandinu aftur í IKEA það er ekki hægt að kaupa neitt "óvart" þegar hann er með í för.  Hann þekkir á mér hillusvipinn og stímir eins og freigáta af stað með mig í eftirdragi um leið og hann sér hann birtast á fésinu á mér.

MÉR ER SVO SAMA...

 

 

...þótt Hive hafi brotið gegn fjarskiptalögum þegar fyrirtækið hringdi ítrekað í bannmerkt símanúmer í símaskrá í þeim tilgangi að kynna vörur sínar og þjónustu.

Mér er hins vegar ekki sama um að Hive sem hýsir símann minn skuli ekki vera búið að laga græjuna eftir sólarhrings bilun.  Halló, halló krakkar... hringja minna í fólk í símaskrá...gera við síma hjá Jenny Önnu í staðinn.  ARG....

Hive braut gegn fjarskiptalögum

ÞAÐ ER BROSTIÐ Á MEÐ SUMRI..

..en þangað til í dag var vor í hausnum á mér og sumarið var í fjarlægri framtíð.  Ég held að það sé vegna þess að stóran hluta ársins er maður að bíða eftir sumrinu.  Ég hefði þess vegna getað beðið það af mér ef ekki væri vegna þess að ég mundi allt í einu í dag að sænsk vinkona mín, hún Inga-Lill er að koma næstu helgi í SUMARFRÍ til mín.  Þá seytlaði sumarið inn í vitund mína.  Merkilegt.  Annars er kalt, það verður að segjast eins og er.  Það er heldur ekki við öðru að búast við búum hér en ekki á Spáni.

Inga-Lill vinkona mín hefur verið í lífi mínu í yfir hartnær 30 ár.  Ég veit reyndar ekki hvernig lífið væri án hennar.  Ég vann stórt í happdrættinu þegar ég hitti hana.  Hún er prótótýpan af vinkonu, sálarlegur tvíburi og hún fer aldrei, sama á hverju gengur.  Hún ætlar að dvelja hjá okkur í hálfan mánuð. Úje.

Inga-Lill býr á Skáni.  Við sveitaveginn rétt fyrir utan Ystad.  Hinum megin við götuna er stórt engi þar sem rauður valmúinn blómstrar og gömul kirkja stendur í blómahafinu og það er bara svo fallegt!  Það er sá galli á gjöf Njarðar að sænsku flugukvikindin, þessar sem eru eins og fiskiflugur eru þarna í gengdarlausu magni á sumrin og ætla að æra mann með stöðugum árásum á andlitið á manni.  Þess vegna finnst mér best að horfa á heimilið hennar Ingu-Lill á mynd þegar fluguárstíðin gengur í garð.  Haust og vor eru fínir heimsóknartímar til þessarar bestuvinkonu minnar.

Nóg um það.  Nú tel ég niður, Sveriges alletiders flicka är på väg.

ÖSSUR ER SKEMMTILEGUR KARL...

..tilfinngaríkur og oft töluvert montinn.  Í dag hefur hann verið að springa úr monti.  Össur hefur ekki látið sig muna um að hrópa ókvæðisorð að "samherjunum" VG og þá einkum og sér í lagi að Steingrími J. sem hann segir hafa klúðrað möguleikanum á vinstri stjórn. Samt er það augljóst þegar maður sér Össur í fréttunum að hann er eins og köttur sem hefur komist í rjóma, hann getur ekki leynt því hvað hann er ánægður með þróun mála. Kolbrún Halldórsdóttir upplýsti í Íslandi i dag í kvöld að hún hefði fengið SMS frá Össuri á kosninganótt þar sem hann sagði hana hafa klúðrað möguleikanum á vinstri stjórn. 

Nú veit ég ekki hversu lengi þessar viðræður Samfylkingarinnar og Sjálfstæðisflokks hafa staðið, þær virðast  handsalaðar.  Haft er eftir Össuri í Mogganum:

„Það sem við erum að gera núna felst m.a. í ákveðinni textavinnu og þó henni sé ekki lokið lít ég ekki svo á að það ríki nein óvissa um þetta,” sagði hann í samtali við blaðamann mbl.is nú í kvöld. „Það er mjög góður andi í þessum viðræðum og ég met það svo, sem nokkuð sjóaður stjórnmálamáður að okkur miði hratt og vel áleiðis enda er greinilegt að það er fullur vilji til að greiða úr þeim vandamálum sem upp koma,” sagði hann.

Hann segir líka að nú sé verið að sameina það besta úr báðum flokkum (the best of both worlds?).

Ég óska þeim velgengi við stjórnarmyndunarviðræðurnar og viðurkenni fúslega að mér finnst DS mun skárri kostur en ef Framsókn hefði setið áfram.  Ég hef litið á Samfylkinguna sem samherja og þess vegna finnst mér þetta ansi kaldar kveðjur frá Samfylkingu til VG.

Annars nenni ég þessu stjórnmálabloggi ekki mikið lengur.  Ætlaði að láta eiga sig að sinni en ég gat hreinlega ekki á mér setið þegar ég heyrði montröflið í Össuri.  Sorrygæs.

Dramb er falli næst!

 

ÉG LIFÐI AF....

 

..þvottahúsferðina þrátt fyrir að hafa lent þar í skæðum ævintýrum.  Það kom maður frá Orkuveitunni til að loka rafmagninu hjá fólki í húsinu (sem betur fer ekki mér) og ætlaði bara að æða í það þarna niðri að mér ásjáandi.  Hann fræddi mig um þetta pakk sem greiðir ekki sitt rafmagn á réttum tíma og gerir það að verkum að hann er eins og hundsspott út um allar trissur.  Hm...ég marg reyndi að stoppa manninn af og benti honum á að skilja eftir miða svo viðkomandi fólk gæti hringt þegar það kæmi heim.  Ókídókí sagði hann eftir hálftíma þras við mig rétt eins og ég væri skuldarinn, ég geri það þá en það er eins gott fyrir þetta fólk að borga á morgun sagði hann ógnandi við mig.  Úff ég svona meðvirk eins og ég er enda á hæli með þessu áframhaldi.  Mér leið eins og börðum hundi.  Konan sem átti að loka hjá skellihló þegar ég sagði henni frá þessu og sagðist ganga frá þessum rúmlega 3000 kalli á morgun (vá hvernig er maðurinn við fólk sem skuldar mörg rafmögn? hehe).

Ég sá sem sagt ekki könguló gott fólk, ekki eitt einasta kvikindi en rykrotturnar voru fjórar og andstyggilegar allar saman.  Þarna voru líka þrjár eðlur, grænar að lit.

Okokok..ég er að ljúga þessu með eðlurnar, þær voru ekki þrjár heldur ein og sú var blá að lit.  Ég hélt nottla á kvikindinu á meðan húsbandið smellti af.

Síjúgæs!

AMMA-BRYNJA FÆR..

(H)rós dagsins fyrir að vera flottasta amman í heiminum (fyrir utan mig nottla). Hún Brynja sem er gömul vinkona mín frá því í gamla daga er nú tengdó hennar Maysu minnar og hin amman hans Olivers. Svona kemur fólk oft svo skemmtilega inn í líf manns á ný.  Brynja notar hvert tækifæri sem hún fær til að heimsækja Oliverinn, Maysuna og Robba í London, taka myndir og setja inn á barnaland svo maður geti slegið á söknuðinn eftir barnabarninu. Ekki ónýtt að eiga eina ömmu-Brynju í lífinu.

Þetta eru EKKI sígós sem Maysan heldur á.  Þetta er bara léleg eftirlíking. Frruusss.

Nú ætlar Brynja mín að vera hjá Oliver á tveggja ára afmælisdeginum hans þ. 12. maí og halda þar uppi merkjum fjölskyldunnar. Mér líður alltaf vel þegar amma-Brynja er hjá krökkunum.  Færir þau nær mér og svo veit ég að ég fæ góðar myndir þegar hún kemur heim. Svo er ekki verra að Oliverinn fær til sín ömmuna sem honum þykir svo vænt um. Smútsj. elsku Brynja mín.

Við amma-Brynja erum ekki sammála í pólitík.  Þess vegna höfum við rætt möguleikann á að læsa hvor aðra inni á kjördag svo þetta falli slétt hehe.  Segi sonna.

KARTÖFLUÓÐALIÐ HEIMA

Nú hefur Árni M. Mathiesen, fjármálaráðherra keypt sér óðal að Kirkjuhvoli í Þykkvabæ og flutt þangað lögheimilið sitt.  Þegar ég sá fréttina hélt ég að hinn kartöflubóndinn, nafni hans úr Vestmannaeyjum væri að flytja búferlum en auðvitað var það ekki svo.  Árni þarf að sinna sínu fólki og er innmúraður Eyjamaður.  Ætli það sé nýjasta innstöffið hjá elítunni að eiga sveita- og þéttbýlisheimili?  Rosalegt veldi er á þessu fólki.  Það fylgir fréttinni að ÁM ætli að halda áfram að búa í Hafnarfirði jafnframt og dveljast þar lungann úr árinu.

Ég tek fram að ég er ekki öfundsjúk hef ekki áhuga á óðali uppi í sveit.  Né heldur geng ég með stóra drauma um að verða rík (nema þá í andlegum skilningi).  Mér finnst fréttin bara undirstrika þetta bil milli ríkra og snauðra sem hefur stækkað og stækkað í tíð núverandi ríkisstjórnar, bil sem verður óbrúanlegra eftir því sem núverandi valdhafar fá lengri tíma til að gera og skera (niður). 

Í almáttugs bænum gefum þessum körlum frí.  Þeir eru ekki tengdir við líf venjulegs fólks enda sést það glöggt þegar þeir mæta þreytulegir til kosningafunda í sjónvarpi. Eins og þeir séu að mæta af leiðri skyldu.  Árni sat í Kastljósinu með sinn "mérersvostórlegamisboðiðsvip" og Jón við hliðina á honum eins og herptur handavinnupoki í verulegri klemmu.

Sendum D og B í tímabært leyfi, langt leyfi.

Árni flytur lögheimili í Þykkvabæ

BYRGIÐ - STUTT OG LAGGOTT

Eða það ætla ég rétt að vona en rannsókn á kærum fyrrum vistmanna Byrgissins er lokið hjá Sýsla á Selfossi. Kærurnar hafa verið sendar ríkissaksóknara. 

Það verður fróðlegt að fylgjast með því hvert þetta mál kemst allt saman.  Vonandi læra yfirvöld af þessu sorglega dæmi um Byrgið og þeirri "meðferð" sem þar átti sér stað að það er ekki vænlegt til árangurs að láta áhugasamtök sjá um áfengis- og fíkniefnameðferðir.  Nú hefur ekki heyrst frá Byrgisgvendi nokkuð lengi.  Hann er auðvitað ábyrgur ásamt þeim sem létu hann hafa peninga til starfseminnar, þrátt fyrir að viðvörunarbjöllur hafi hringt.  Þetta hefur verið fjárhagslegt himnaríki perranna....í boði Framsóknar.

Byrgisrannsókn lokið

STUNDUM ER BETRA AÐ ÞEGJA!

Framsóknarbloggarinn Sveinn Hjörtur segir kjaftasögu á blogginu sínu í dag um samskipti sín og Steingríms J. Sigfússonar eftir Kastljóssþáttinn í gærkvöldi.  Hann segist ekki geta haft sumt eftir en tíundar annað og fullyrðir að Steingrímur J. hafi misst sig við sig.  Það má nefna það í framhjáhlaupi að Sveinn Hjörtur er á fullu upp vinsældalistann á blogginu, kjaftasögur hafa alltaf verið vinsælar á Íslandi. 

Mér finnst eitt að segja skoðanir sínar um menn og málefni sem eru til umfjöllunar hverju sinni.  En að koma með samtöl sem einhver segist hafa átt við nafngreindan þennan eða hinn er algjörlega glórulaust og fyrir neðan allar hellur.  Ég man ekki til þess að nokkur maður hafi hafi skrifað um samskipti sín við fólk undir þessum formerkjum áður.  Ég las reyndar pistil eftir Helgu Sigrúnu, framsóknarkonu og  þingmannsefni úr Reykjanesbæ, þar sem hún tíundaði bjórdrykkju eins frambjóðenda Samfylkingarinnar þegar hún bloggaði um fund sem hún hafði setið. 

Er þessi rætni í Framsóknarflokknum landlægur andskoti?