Þetta er alls ekki frétt um Borgahreyfinguna!

Ekki í fyrsta sinn sem ég gef mér að ég viti hvað standi í frétt með því að lesa bara fyrirsögnina.

"Hljóp tvo hringi" las ég og þá taldi ég víst að fréttin væri um þingmannaþrennu Borgarahreyfingarinnar sem er alltaf á hlaupum undan kosningaloforðunum.

Sillí mí.

Ég sá um leið og ég opnaði fréttina og hugsaði málið að auðvitað ætti þetta ekki við um þau Birgittu, Þór og Margréti.

Þau hafa nefnilega hlaupið í mun fleiri hringi en tvo.

Mér er því bæði ljúft og skylt að biðjast forláts.

Jamm.

Hljóp tvo hringi

Horfi á skrásettningu sögunnar í beinni

Einn afdrifaríkasti þingfundur sögunnar er að hefjast klukkan níu eða eftir þrjár mínútur.

Klukkan tíu verður atkvæðagreiðsla.

Ég ætla að sitja þar til yfir líkur yfir sjónvarpinu, sjá, heyra og meðtaka.

Þingfundur hefst með því að formenn flokka flytja stutt ávörp.

Sem þeir hafa auðvitað legið yfir enda mun hvert orð verða í sögubókum framtíðarinnar.

Spennan liggur í því að heyra hvernig lýðskrumarar þingsins greiða atkvæði.

Og þeir sem eiga Icesave með öllum þeim óverra sem á okkur dynur.

Þá á ég við Sjálfstæðisflokk og Framsókn.  Einkabankaflokkana.

Jább, komin með kaffið í hönd.

Nú skal horft á söguna skrásetta.

Þingfundur hefst klukkan 9

Sigmundarmálið ekki Sigmundarmál þegar upp er staðið?

Ég vona að þessi óheppilega uppákoma varðandi Sigmund Erni fái nú skjóta greftrun.

Nóg komið.

En af því að allt hefur logað vegna málsins og allir haft á því skoðun, ég líka og þær fleiri en eina, þá er best að taka það fram að ég er búin að sjá enn einn vinkil á málinu.

Sigmundarmálið hefur nefnilega mest lítið með Sigmund sjálfan að gera svona eftir á að hyggja.

Það er vont og skammarlegt að mæta fullur í vinnuna. 

Það er þó hægt að bæta skaðann með því að láta það ekki gerast aftur og gera svo hreint fyrir sínum dyrum.

Það sem upp úr stendur í þessu Sigmundarmáli er því ekki Sigmundur sjálfur heldur vinnufélagarnir.

Sem kölluðu frammí fimmtíuogátta sinnum, sagt og skrifað á meðan þingmaðurinn hélt ræðuna sína.

Svo hlógu þessir mannvinir að ástandi þingmannsins og drógu hann sundur og saman í háði.

Og í staðinn fyrir að láta þar staðar numið fóru þessir fordómalausu og alltumvefjandi vinnufélagar í andsvör út í það endalausa.

Til að fá þingmanninn til að gera sig að enn meiri kjána.

Ég hef unnið á mörgum vinnustöðum í gegnum tíðina.

Ég man aldrei eftir svona óþverraskap varðandi samstarfsfólk sem missteig sig á einhvern máta.

Varaþingforsetinn Ragnheiður Ríkharðsdóttir fer svo með málið inn á forsetanefndarfund og tíundar þá ætlun sína í Mogganum.

Ekki koma og halda því fram að ég sé meðvirk með SER.

Það er ekki þannig.

Get alveg viðurkennt það sjónarmið sem rökrétt að fyllerí í vinnunni kalli á afsögn.

En Alþingi Íslendinga er ekki staður sem ég vildi vinna á ætti ég í erfiðleikum.

Nebb, þá vildi ég heldur vinna í ormagryfju hálfvitahrepps.

Sigmundur Ernir baðst afsökunar

Lausnamiðuð aðgerð á hverfandi greiðsluvilja - arg

Það er til siðs að finna ný orð yfir hugtök og aðgerðir þegar farið er að slá í þau gömlu.

Eins og Félagsmálastofnun sem var fyrir nokkrum árum breytt í hina hátimbruðu Félagsþjónustu, með áherslu á þjónustu. (Sé alveg fyrir mér félagsráðgjafa bukkandi sig og beygjandi fyrir "kúnnunum á meðan þeir skrifa ávísanir til hægri og vinstri í ÞJÓNUSTUDEILDINNI).  Félagsmálastofnunarheitið var orðið svo neikvætt.

Orð eins og lausnamiðaðar aðgerðir koma út á mér tárunum. 

Grípur fólk til aðgerða með það í huga að sneiða fram hjá lausninni? 

Alveg: Nei, nei, nei, þetta má ekki enda með lausn!  Ég held ekki.

Núna er nýjasta orðið greiðsluvilji.  Fyrirgefið, skortur á greiðsluvilja!

Nei, það er ekki verið að tala um banka- og útrásardólgana sem ekkert vilja borga heldur er verið að tala um fólkið, kreppuþolendurna 99% íslensku þjóðarinnar. 

Ég kann best við að kalla skóflu, skóflu.

Þegar ráðherrar, bankastórar og forstjórar þeirra stofnana sem hafa að gera með skuldir fólks segja að greiðsluviljinn sé að hverfa, líka hjá þeim sem eru í skilum, þá skil ég það á einn veg:

Lýðurinn (ó fyrirgefðu Lýður, ég er að tala um okkur hin, ekki þig) vill ekki borga, ekki einu sinni þeir sem það geta.

Lúmsk leið til að bora því inn í þjóðarsamviskuna að viljinn til að standa í skilum sé í sögulegu lágmarki.

Kannski er það ekki svo skrýtið að fólk sé mögulega í litlu stuði til að brosa og borga.

Gæti til dæmis átt rætur sínar að rekja til þeirrar staðreyndar að alvöru "Lýðurinn" sá sem sekur er um sukk, svínarí og græðgi hafi ENGAN greiðsluvilja og hafi aldrei haft og það sem meira er virðist komast ágætlega upp með það.

Þar má nota þetta nýyrði um skort á greiðsluvilja.  Ekki um þrautpíndan almenning ef ykkur væri sama.  Það er blaut tuska framan í fólk sem stendur frammi fyrir skelfilegum vanda vegna kreppunnar og hrunsins.

En hvað um það, blogglýðurinn er alltaf rífandi kjaft, leggur heilu fyrirtækin í einelti.

Meira helvítis pakkið.

Svo er þetta lið með hverfandi greiðsluvilja til að bíta höfuðið af skömminni.  Frussssss

Ómægodd, komið með lausnamiðaða aðgerð á siðleysi almennings.  Annars þarf þorri hans að leita til Félagsþjónustunnar og það er ekki gott mál.

Þeir gætu þjónustað okkur yfir móðuna miklu svei mér þá. 

Þvílíkt rugl.

 

Greiðsluviljinn að hverfa

Heimurinn vs þeir!

Ég hef aldrei skrifað eitt orð um Lýð Guðmundsson og skrifa ávallt undir nafni þannig að ég tek ekki til mín rausið í manninum í Kastljósinu í kvöld.

Bloggheimar eru ömurlegir - búhú, fjölmiðlar líka - búhú - skilanefndirnar vilja koma fyrirtækinu í þrot - búhúhúhú.

Rosalega er heimurinn vondur við Existu.  Þetta er lögreglumál.

Ég get ekki tekið fleiri svona viðtölum eins og við Lýð í kvöld og svo við Hreiðar Má fyrr í vikunni geðheilsu minnar vegna.

Það hreinlega drepur í mér trúna á manneskjuna að horfa á þessa menn kenna öðrum um eigið klúður.

Þeir koma í Armanigallanum í sjónvarpið og eru með friggings attitjúd.  Fólk kann ekki að meta þá, enginn skilur að þeir hafa ekkert gert af sér.

Heimurinn vs þeir. 

Þetta eru menn í svo litlum tengslum við íslenskan raunveruleika að ég efast um að þeir nái nokkurn tímann að sjá fyrir sér afleiðingarnar af öllu bankasukkinu.

En ég gat ekki annað en hlegið geðveikislega (spurning um það eða skella í mig arsenikki) þegar ég sá í fréttum í kvöld að stjórn Exista hafi verið endurkjörin og varamaður var sjálfkjörinn en hann er Róbert Tjengis.

Hver þarf leikhús eða bíómyndir?

Við lifum í ógeðslega súrrealísku leikriti sem ætlar engan enda að taka.

Robert Tjengis, eruð þið ekki að fokking kidda mig?

Eru ekki fleiri stórþjófar á lausu það sár vantar fólk um allt íslenska fjármálakerfið?

Garg.

Fréttin.

Fengum langmesta höggið

Íslenska leiðin - "the en-word"

Þegar íslenskir stjórnmálamenn eru króaðir út í horn eins og SER þá er viðkvæðið alltaf það sama.

Ég gerði mistök... EN (eins og núna, ég neytti víns EN fann ekki á mér.  Leim).

Væri ekki hægt að klippa "enið" aftanaf og segja: Ég gerði mistök.  Punktur Basta.

Bankarnir hrundu, guð blessi Ísland, við gerðum smá mistök EN það var heimskreppa.

En, en, en.  Þvílík ábyrgðarfælni í gangi á þessu landi hjá stjórnvöldum.

Mér finnast mistökin hans Sigmundar Ernis ekkert stórkostlega alvarleg varðandi rauðvínsþambið, að minnsta kosti ekkert til að setja neyðarlög út af.

Í besta falli eru þau hallærislegt dómgreindarleysi.

Það er hins vegar erfiðara að horfa fram hjá því að maðurinn var að borða og drekka með MP-banka.

Þar er hann kominn á hálan ís.

En í leiðinni fýsir mig að vita hvort alþingsmenn séu í því svona almennt og yfirleitt að væna og dæna með bönkum og öðrum fjármálastofnunum?

Mér dettur ekki í hug að það sé bara SER sem það hefur gert.

Og í Þórs nafni leynifélagsfrömuðir og ofstækismenn.

Farið nú ekki í að alkahólistavæða þingmanninn af ykkar alkunna spekingsskap og "sérfræðikunnáttu" og veina; meðferð, meðferð.

Fólk drekkur aktjúallí stundum á röngum stað og stund án þess að vera í þörf fyrir slopp.

Þetta segi ég sem útúrmeðferðuð með þriggja ára edrúmennsku á mínu fagra baki.

Á eigin vegum með stuðningi fólks sem svipað er ástatt um en engu helvítis heilagleika kjaftæði með innblöndun guðs, Billa og Bobs.

Ég hef heldur enga löngun til að breyta neinum öðrum en sjálfri mér og ætla að vera fullkomlega ábyrg á lífi mínu jafnt á góðum tímum og slæmum.

Enda það i och för sig ærið verkefni að vasast í eigin breyskleika.

Þar kem ég sko ekki að tómum kofanum, börnin mín södd og sæl.

Næsta mál á dagskrá takk.

Jamm.

Fékk sér léttvín með mat

Nei, heyrðu mig nú!

Mér fannst endalausar spekúlasjónir um hvort Sigmundur Ernir hafi verið fullur eða ekki fullur hálf hallærislegar.

Og ég lét það í ljós eins og mín er von og vísa, alltaf rífandi kjaft.

En ég verð að éta þessa skoðun mína ofan í mig af því forsendur eru breyttar.

SE þvertekur fyrir að hafa smakkað áfengi á fimmtudeginum þegar Icesave-umræðan fór fram.

Nú hefur verið sagt til hans eins og var í raun borðleggjandi að myndi gerast af því maðurinn er þingmaður og ekki einkamál hans hvað hann gerir í vinnunni.

Það er tvennt sem ég sé aðfinnsluvert.

Í fyrsta að hann skuli segja ósatt.  Við erum breyskar manneskjur, líka á Alþingi (sumir myndu segja að þar væri breyskleikastuðullinn hærri en á öðrum vinnustöðum).

Það er ekkert að því að játa á sig mistök og dómgreindarleysi og biðjast afsökunar.  Málið væri þar með dautt.

En það sem er í öðru lagi og öllu alvarlega er sú staðreynd að þingmenn skuli vera í boði banka í sukkpartíum, mati og drykk og golfi eða hverju sem er.

Átti ekki að afleggja þennan ósið á nýja Íslandi?

Hvern fjandann er þingmaður að gera í boði MP-banka?

Og hvað er MP-banki að meina með vildarvinasukki á þessum krepputímum?

Sigmundur Ernir:

Segðu satt og láttu það ekki henda þig aftur að fara í partý í boði banka eða annarra fjármálastofnana.

Ekki fara í strætó einu sinni nema að borga það sjálfur.

Opna augun - svona dómgreindarbrestir eiga að heyra sögunni til.

Almenningur hefur nákvæmlega núll prósent tolerans fyrir svona athæfi.

Má biðja yfirgrillmeistara frjálshyggjunnar að grjóthalda saman á sér þverrifunni?

Icesave, ég veit ekki hversu oft ég hef hamrað þetta orð á lyklaborðið.  Svei mér ef ég þarf ekki að endurnýja stafina hjá mér. 

Hér eftir mun ég breyta til og kalla þessa hugarafurð klikkhausanna í Landsbankanum Klakavörn (jafn mikið öfugmæli og hið enska nafn).

Get ekki meira.

En..

Að brandarakarlinum Hannesi H. Gissurarsyni.

Hann var í útvarpinu í morgun, þessi yfirgrillmeistari frjálshyggjunnar.

Ef eitthvað kæmi af viti frá þessum frjálshyggjufrömuði sem btw predikar um óhefta markaðshyggju og lágmarks afskipti ríkisins úr öruggu sæti opinbers starfsmanns, þá færi ég að verða alvarlega áhyggjufull.

Nú prédikar yfirgrillmeistarinn nýja speki.

Ef einhver á að biðjast afsökunar á einhverju þá er það Steingrímur J. og þeir sem gerðu Icesave-samningana.

Jabb, kveiktu endilega í húsi og gagnrýndu svo glataðar vinnuaðferðir slökkviliðsins.

Slökkviliðið er auðvitað aðal sökudólgurinn í þessu subbumáli öllu.

Hannes Hólmsteinn þú getur ráðið þig á Þorrablót og árshátíðir mín vegna með þín frábæru skemmtiatriði enda fer ég aldrei á svoleiðis samkomur.

En þar fyrir utan þá vil ég biðja þig kurteislega að grjóthalda saman á þér þverrifunni og skammast þín.

Takk fyrir kærlega.

Fylgst náið með framvindu Icesave

Skoðið, njótið og uppskerið meltingartruflanir

Icesave er að nálgast endalokin er fyrirsögn viðtengdrar fréttar.

Ég er hins vegar á því að nú sé Icesave rétt að byrja.  Við eigum eftir að borga óskapnaðinn.

Icesave, Kaupþing, Straumur og Glitnir eru minnisvarðar um skelfilegasta tímabil Íslandssögunnar á síðari tímum.

Ég er enn að velta fyrir mér hvernig þetta gat gerst?  Hvernig stjórnvöld gátu látið þetta gerast því ég hef engar væntingar til fjárglæframannanna sjálfra, glæpamenn ganga eins langt og þeim er fært að komast.

Ég birti Kaupþings myndbandið í síðustu færslu.  Þar gefa hugmyndasmiðir græðgivæðingarinnar áróðursmeisturum þúsundáraríkis Hitlers ekkert eftir í hugmyndaauðgi.

Svo sá ég myndbandið hér fyrir neðan á netinu (inni hjá Agli Helga) og nappaði því.

Vona að það fari sem víðast.

Það er greinilega hægt að múgsefja heila þjóð.

Nánast.

Ég lýsi mig reyndar saklausa af grægishegðuninni, gróðærið fór að mestu leyti fram hjá mér.  Fyrir það er ég óendanlega þakklát.

Hef alveg nóg á samviskunni þó það bætist ekki við á mitt skrautlega syndaregistur.

En skoðið myndbandið.

Við megum ekki láta þessa andlegu vanheilsu ná tökum á þjóðinni aftur.

Guð á galeiðu, fjalli og bryggju segi ég bara.

Skoðið, njótið og uppskerið meltingartruflanir.

Nálgast endalokin í umræðum um Icesave

Á pari með Mússólíni eða Móður Theresu?

Ég er búin að horfa á innanhússmyndband Kaupþings aftur og aftur.

Það er hér fyrir neðan en það hefur farið eins og eldur í sinu um netheima og víða um heim.

Sem er auðvitað ekkert undarlegt þegar bandið er skoðað.

Þetta myndband fyllir mig óhug.

Ég veit að það er kannski ekki pólitískt rétt að segja upphátt það sem mér finnst en af því ég er á skjön og ská þá læt ég það fjúka.

Þetta myndband er uppbyggt eins og áróður í mynd frá Hitlers-Þýskalandi eða frá Ítalíu Mússólínis.

Guðakomplexinn og mikilmennskubrjálæðið nær nýjum hæðum.

Boðskapurinn augljós:

Kaupþing getur allt.

"Kaupthinking" er að hugsa öðru vísi og hærra, við getum allt.

Kennedy, Martin Luther King og móðir Theresa eru sum af þeim stómennum sem sýnd eru í myndbandinu.

Ergó: Kaupþingsfólkið er á pari með mikilmennum sögunnar.

Mér finnst hins vegar þeir vera á pari við þekktustu oflætissjúklinga mannkyns.

Er það nema von að illa hafi farið og að íslenska þjóðin sitji nú uppi með afleiðingar geðveikinnar og oflætisins.

Eftir því sem ég horfi oftar á þetta sönnunargagn vitfirrts mikilmennskubrjálæðis og græðgi þá fyllist ég æ meiri óhug.

Því þetta getur allt endurtekið sig.

Sú staðreynd að hvorki eftirlitsstofnanir eða stjórnvöld stöðvuðu geðveikina gerir mig skelfingu lostna.

Aldrei aftur.

Vona ég.

Gamalt Kaupþingsmyndskeið vekur athygli