Nei, heyrðu mig nú!

Mér fannst endalausar spekúlasjónir um hvort Sigmundur Ernir hafi verið fullur eða ekki fullur hálf hallærislegar.

Og ég lét það í ljós eins og mín er von og vísa, alltaf rífandi kjaft.

En ég verð að éta þessa skoðun mína ofan í mig af því forsendur eru breyttar.

SE þvertekur fyrir að hafa smakkað áfengi á fimmtudeginum þegar Icesave-umræðan fór fram.

Nú hefur verið sagt til hans eins og var í raun borðleggjandi að myndi gerast af því maðurinn er þingmaður og ekki einkamál hans hvað hann gerir í vinnunni.

Það er tvennt sem ég sé aðfinnsluvert.

Í fyrsta að hann skuli segja ósatt.  Við erum breyskar manneskjur, líka á Alþingi (sumir myndu segja að þar væri breyskleikastuðullinn hærri en á öðrum vinnustöðum).

Það er ekkert að því að játa á sig mistök og dómgreindarleysi og biðjast afsökunar.  Málið væri þar með dautt.

En það sem er í öðru lagi og öllu alvarlega er sú staðreynd að þingmenn skuli vera í boði banka í sukkpartíum, mati og drykk og golfi eða hverju sem er.

Átti ekki að afleggja þennan ósið á nýja Íslandi?

Hvern fjandann er þingmaður að gera í boði MP-banka?

Og hvað er MP-banki að meina með vildarvinasukki á þessum krepputímum?

Sigmundur Ernir:

Segðu satt og láttu það ekki henda þig aftur að fara í partý í boði banka eða annarra fjármálastofnana.

Ekki fara í strætó einu sinni nema að borga það sjálfur.

Opna augun - svona dómgreindarbrestir eiga að heyra sögunni til.

Almenningur hefur nákvæmlega núll prósent tolerans fyrir svona athæfi.

Athugasemdir

[Einar Örn Einarsson, 26.8.2009 kl. 11:39]

Jenný mín.

Ég kvitta undir þessa færslu þína. Skáldið sagði " Vér undirtökum" að vísu englasöng, en það er næsta víst að við erum ekki beint englar, ég og þú. En samt. Vér tökum undir orð yðar hvað téðan þingmann varðar í gullkálfadansi, daðri og drykkju.

[, 26.8.2009 kl. 12:15]

Einmitt - eins og talað út úr mínu hjarta

[Birna Dis Vilbertsdóttir (IP-tala skráð) 26.8.2009 kl. 12:17]

Hvað er Þingmaður að gera í golfboð og fyllirí í boði  banka? Spillingin er enn á fullu ,

[Ásthildur Cesil Þórðardóttir, 26.8.2009 kl. 12:50]

Ég sagði reyndar annarsstaðar að skömmin væri hans, og hans eins, þ.e. að mæta fullur í vinnuna.  En ég tek heilshugar undir þessar vangaveltur þínar Jenný með hvað maðurinn var að gera við þessar aðstæður.  Hann þarf að gera okkur grein fyrir því svo sannarlega.

[Guðni Þór Björnsson, 26.8.2009 kl. 12:53]

Sama spilling, nýtt fólk.

[Jóna Kolbrún Garðarsdóttir, 26.8.2009 kl. 14:30]

Er það nema von hversu vel er gert við bankamennina?  Þeir hafa þingmennina ennþá í vasanum. 

[Ásdís Sigurðardóttir, 26.8.2009 kl. 14:36]

Endalaus spilling alls staðar. Hélt einhver að þetta mundi taka enda ef skipt yrði frá hægri til vinstri? ekki ég.