ERU EKKI EINVHERJIR ÞARNA ÚTI...

...sem hafa í heiðri orðatiltækið (málsháttinn) "í upphafi skyldi endirinn skoða"?  Þetta er einn af mínum uppáhalds og ég les alltaf endirinn á spennubókum áður en ég fer að lesa fyrir alvöru.  Þetta geri ég til að geta notið bókarinnar í rólegheitum og þurfa ekki að vera stressa mig yfir sögulokum.

Ástæða þess að ég er að röfla um þetta svona snemma á laugardagsmorgni er einföld.  Ég get ekki verið ein um nota þessa aðferð.  Þið Harry Potter lesendur sem eruð búnir að grafast fyrir um endi bókarinnar, skellið sögulokunum hérna í athugasemdakerfið hjá mér.  Hverjir dóu?  Gefið mér sóðaleg smáatriðin.

Skvísmí.

CHÉ GUEVARA Á RÆMU

Mér finnst ekki leiðinlegt a það eigi að fara að gera mynd um Ché Guevara.  Myndin verður tekin upp á spænsku og mun heita Guerilla.   Benico Del Toro verður í hlutverki Ché.

Ég elska sannsögulegar myndir og þó ég sé búin að lesa gat á allt í pappír sem fjallar um karlinn þá er alltaf hægt að bæta við sig smá í viðbót.

Ég fer nærri því á frumsýninguna.

Envímí!

Benicio Del Toro leikur Ché Guevara

ÉG BÍÐ SPENNT..

..eftir því hver niðurstaðan verður fyrir Hamish Howitt eiganda kráar í Blackpool í Englandi en hann er kærður fyrir að virða að vettugi reykingabannið sem tók gildi í Englandi þann 1. júlí s.l.  Howitt segir:

„Ég er ekki reiðubúinn að reka viðskiptavini mína út í rok og rigningu svo þeir geti notið réttar síns til að reykja. Kráareigandinn hefur stofnað stjórnmálaflokkinn Fight Against Government Suppression, eða FAGS, sem er algengt slanguryrði yfir sígarettur í Bretlandi."´

Það verður áhugavert að fylgjast með þessu.  Ég bíð líka spennt eftir viðbrögðum hjá íslenskum pöbba- og kaffihúsagestum þegar kólnar í veðri og þeir þurfa að standa norpandi í ískulda, stormi og ofankomu úti á gangstéttum bæjarins.  Munið þið veturinn sem leið?  Sást ekki út úr augunum.  Muhahahahaha

Súmítú.

Rétturinn til að reykja á krám fyrir mannréttindadómstól

FJÖLDAHYSTERÍA BÚIN TIL

 

Rosalega er þetta Harry Potter fár farið að taka á sig óhugnanlegar myndir.  Allir spila með í þessari markaðssetningu og nú búa hjálparlínur í Bretlandi sig undir að fá hringingar frá örvæntingarfullum aðdáendum HP-bókanna eftir að síðasta bókin kemur út í kvöld.  Það er talin hætta á að lesendum bókarinnar finnst þeir hafa misst einhvern náinn þegar bókaflokknum lýkur.

Þetta er í besta falli brosleg múgsefjun í gangi allsstaðar í kringum okkur.  Í versta falli óhemju sorgleg vegna allra þeirra sem eru að missa einhvern náinn á hverjum degi, eiga ekki að borða og búa við stöðugar stríðsógnir og sjúkdóma.

Þegar grannt er skoðað verður þessi ballett allur svo skeflilega kjánalegur.

 

Breskar hjálparlínur búa sig undir hringingar frá örvæntingafullum Harry Potter lesendum

FREKJA OG HROKI STANGAVEIÐIFÉLAGS RVK

 

Nú get ég bara ekki orða bundist.  Aðgerðir Stangaveiðifélags Reykjavíkur hafa tekið á sig mynd öfgafullra ofsókna á hendur Pólverjum sem félagið segir í tugavís stunda veiðiþjófnað í íslenskum ám.  Félagar eru hvattir til að stöðva þá og halda þeim á meðan beðið er eftir lögreglu og taka af þeim myndir ef kostur er.  Þetta bendir Einar Skúlason, framkvæmdastjóri Alþjóðahúss á m.a. í þessari frétt.

Rosalega yrðum við Íslendingar glaðir ef einhverjir legðu okkur svona í einelti.

Pólverjar eru 2% þjóðarinnar.  Sumir Íslendingar ættu að skammast sín, það er á hreinu.

Umræðan um veiðiþjófnað öfgafull

TRÚAROFSTÆKI - HREINN HRYLLINGUR

 

Það er eitthvað svo öfugsnúið við hugtakið "sæmdarmorð".  Á bak við það eru ófáar hryllingssögur kvenna eins og í þessu tilfelli þar sem faðir tvítugrar stúlku og föðurbróðir hennar voru dæmdir í lífstíðarfangelsi fyrir að myrða hana í janúar á s.l. ári.  Þriðji maðurinn var einnig dæmdur í lífstíðarfangelsi fyrir morðið.

Stúlkunni hafði verið nauðgað og henni misþyrmt illilega áður en hún dó.  Faðir hennar og frændur fengu mann til verknaðarins en ástæða þess var að stúlkan var ástafangin af manni sem fjölskyldunni líkaði ekki við. 

Trúarofstæki fyrirfinnst í öllum trúarbrögðum.  Þarna fær það á sig hina ljótustu mynd.

 

Dæmdir í lífstíðarfangelsi fyrir sæmdarmorð

FORGANGURINN Á HREINU!

 

Mér er slétt sama hvað brennivín kostar.  Ekki bara af því að ég er óvirkur alki og kaupi það ekki lengur, heldur líka vegna þess að á meðan ég drakk, bæði bjór og rauðvín, þá pældi ég aldrei í hvað mjöðurinn kostaði.  Ég hefði heldur ekki elt tilboð á vínum milli búða, eins og gjarnan er gert þegar matvörur eiga í hlut.  Þeir sem eiga í erfiðleikum með áfengi, kaupa það einfaldlega án tillits til.  Svo mér er nokk sama.

Forgangurinn á lækkunum rennur illa niður hjá mér.  Hvað með matarverðið?  Allir þurfa að borða og við erum með dýrasta matinn í allri Evrópu (og þótt víðar væri leitað). Það er akútmál.  Venjulegt fólk er að sligast undan matarkostnaði.

Gætu þessir frómu alþingismenn náð þverpólitískri samstöðu um það mál áður en þeir fara í gæluverkefni af þessum toga?  Hvað er minn þingmaður hún Katrín Jakobsdóttir eiginlega að hugsa? Hinir koma mér hins vegar ekki á óvart með þessu.

Forgangsraða forkræingátlád.

Pólitísk samstaða um lækkun áfengisverðs

STINGURINN MEÐ ATTITJÚD

Alltaf gaman að lesa nýjar fréttir af tónlistarmönnum sem maður hefur mætur á.  Ég hef alltaf haft gaman af Sting og því sem hann hefur verið að gera.  Ég hef örugglega látið hann á stall - sem mannveru, sem er töluvert út í hött með fólk yfirleitt, enda stendur enginn undir slíku til lengdar.

Þegar maður les svo um tvisvar í sömu vikunni að Sting hagi sér eins og DIVA, reki kokkinn sem þurfti barneignarfrí (ojbara) og mæti svo með sinn eigin matreiðslumeistara út að borða, þá fer að síga á manni brúnin.  Mig langar ekki nokkurn skapaðan, hræranlegan, lifandi hlut að dást að ofdekruðum stjörnum.  Ég skil vel hæfileikalítið fólk sem gerir út á athygli til að komast á forsíður blaðanna en fólk sem maður telur sæmilega viti borið á ekki að láta sér detta svona hegðun í hug.  Sama hver er.

Hvað er að karlinum?  Af hverju leigir/kaupir hann sér ekki matsölustað og lætur elda í andlitið á sér?  Djö... frekja að ætla að leggja undir sig eldhús á veitingastað úti í bæ.

Vona að honum hafi verið gefið þrususpark í afturendann og út meððasama. 

Sting mætti með eigin matreiðslumann á veitingastað

TOMMI TOGVAGN - KRÚTTSPRENGJA

Æi krúttið hann Pierce Brosnan ætlar að ljá Tomma Togvagni rödd sína.  Oliver dúllan mín í Londres elskar Tomma.  Það er ekki víst að hann verði eins hrifin af frasanum "ég heiti Tommi, Tommi Togvagn" úr munni Bondarans en það kemur í ljós. 

Merkilegt hvað þessir jálkar fá alltaf skemmtileg verkefni.

Æmbívilderedandbítreid!

Tommi Bond

AFMÆLISSNÚRA ÚJE

Tíminn flýgur.  Í dag er ég níu mánaða snúra.  Heill meðgöngutími liðinn í edrúmennskunni og mér aldrei liðið betur.  Lífið verður bara innihaldríkara og skemmtilegra.  Jesús minn.  Nú verður haldið upp á afmælið.  Er að drífa mig niður í Laugardalshöll þar sem gestir bíða mín og við byrjum á að opna afmælið kl. 08,00 með marsi sem Lúðrasveitin Svanur tekur af sinni alkunnu snilld.

Ekki alveg kannski en einu sinni í mánuði, fyrsta árið leyfi ég mér að finna svolítið til mín. Síðan tek ég þetta á misserunum bara.  En muna Jenny, muna, einn dag í einu.  Sígandi lukka er best.  Með hægðinni hefst það osfrv. osfrv.

Lofjúgæs.