Össur í skjóli nætur

Ég bloggaði um húmorinn hans Össurar í gær, held ég, varðandi Júlíus Vífil.  Mér fannst það krúttlegt hjá karli.  Ég er ekki aðdáandi Össurar, mér er eiginlega slétt sama um hann sem stjórnmálamann,  en hann er litríkur karakter og svo er hann geðbrigðamaður.

En ég ætla ekki að gera hann að umtalsefni hér frekar, heldur þær undarlegu bloggfærslur um bloggfærslu Össurar (blogg, blogg, blogg og í allar áttir blogg).  Hér skrifar hver samsærispostulinn á fætur öðrum um þau undarlegheit að Össur skuli hafa skrifað pistilinn um nótt.  Össur reit sína færslu rétt tæplega 02,00 eftir miðnætti, og það er allt í einu orðið aðalmálið.  Einhver leiddi getum að því að karlinn væri í glasi.  Hinir ganga ekki svo langt heldur gefa það óbeint í skyn.

Halló - ég er edrú, enda óvirkur alki, þó það nú væri, og ég blogga á öllum tímum sólarhrings, nánar tiltekið, þegar það hentar mér.  Ég er næturhrafn og mér líður vel í næturkyrrðinni.  Stundum, ekki oft reyndar, er ég andvaka og þá blogga ég gjarnan.  Aldrei hefur hvarflað að mér að það dytti einhverjum í hug að vera að velta sér upp úr hvenær fólk bloggar.  Verður maður ekki að fara að taka klukkuna út af síðunni?

Mér finnst í fínu lagi að fólk hafi skoðanir á því sem ráðherrann setur frá sér.  Ekkert að því að gagnrýna hann eins og alla aðra í bloggheimum, en að vera með svona pillur er ekki sanngjarnt.  Kannski er Össur bara næturmaður eins og ég og fílar í botn að sitja í næturkyrrðinni og láta gamminn geysa og drekkur kók eða kaffi á meðan hann hamast á lyklaborðinu.

So fucking what?

Annars hló ég nú að færslunni á eyjan.is þar sem fjallað var um "tippsí Össur" hitt finnst mér verra, þegar verið er að gera fólk "grunsamlegt" bara vegna þess að fólk er ósátt við skoðanir viðkomandi.

Allir edrú og í góðum málum? Ha?

Og skamm bara.

Úje.

Eitthvað fyrir Íslendinga?

Þetta er fíflafærsla.

Ég vissi ekki að Taílendingar væru þjóðsöngsnöttarar.  Ekki að ég hafi yfirhöfuð vitað nokkuð um afstöðu þeirra til þjóðsöngva yfirhöfuð, enda alls ekki nógu vel upplýst um þetta land sem ég myndi heimsækja ef ekki væri vegna þess að það eru æði mörg lönd á óskalistanum nú þegar, og ekki víst að mér endist aldur til að tæma hann. Svo er auðvitað ákveðin skordýrahræðsla að skemma fyrir mér ferðalöngun í augnablikinu.

"Taílenskir þingmenn eru ekki sérlega hrifnir af breytingum, sem  hershöfðingjar vilja gera á fánalögum landsins. Samkvæmt lagafrumvarpinu eiga ökumenn m.a. að stöðva bíla sína tvisvar á dag til að votta fánanum og þjóðsöngnum virðingu sína."

Ég fór nefnilega að hugsa um hvernig þetta yrði í umferðinni hérna hjá okkur, og hversu brjálæðislega fyndið það yrði að horfa á Íslendinga í stressinu. stöðva rennireiðirnar og hlusta andaktugir á meðan Guðsvorslandið hljómaði í eyrum okkar allra.

Annars á ég ekki að tjá mig um þjóðsöngva.  Ég er heiðin og forstokkuð í sambandi við flest sem lýtur að þjóðernishefðum.  Það þýðir ekkert að skamma mig fyrir það, ég er fædd svona. 

Mér fannst frábært þegar Spaugstofan tók þjóðsönginn í vor og breytti textanum.  Ég get alveg hugsað mér að láta rappann, bítlann og skrykkjann.  Nánast ekkert á að vera hafið yfir húmor. Ekki Óli, ekki kirkjan og þá alls ekki þjóðsöngurinn.

Jæja, verð að drífa mig, er að fara í messu

Guð geymi.

Úje

Stöðvað til að hlusta á þjóðsönginn

Kimminn og fleira

Kim Larsen klikkar ekki, ég veit það þó ég hafi ekki farið að sjá hann í gær.  Ég nennti því ekki, var í öðru meira akút, þ.e. að setja upp jólagardínur.

Við eigum a.m.k. tvenn sameiginlegt við Kim Larsen, en við höfum bæði búið á Sofiegården á Christianshavn.  Ójá.  Hann, meðan það var hálfgert hreysi fyrir útigangsmenn og töffara, ég þegar það var orðinn flottur stúdentagarður fyrir nerði.

Við eigum líka Dalles Varehus, sameiginlegt, ég og Kimminn.  Ég hef verslað þar margoft.  Hann hefur sungið um það.

Ég var að lesa í fréttablaðinu, um könnun sem gerð var í Bretlandi, um hvaða látinn einstakling fólk vildi helst sjá snúa aftur og viti menn, Bretarnir settu Díönu í fyrsta sæti (frumlegir) en Jesú í sjötta.  Ef ég fengi að óska mér, myndi ég setja Jesú í fyrsta og segja honum að fara og tala við Jón Val og útskýra fyrir honum inntak kristindómsins.

En ég myndi setja John Lennon til vara.

Ég er knock out. 

Úje og farin að leggja mig.

Kim Larsen hélt uppi fjöri

Frunsur og brotnar neglur!

 

Frost í dag víðast hvar.  Já, já, segið mér fréttir.

Ég vaknaði fyrir allar aldir með Jenný Unu Eriksdóttur, og hárið á mér hefur verið límt við andlitið á mér síðan.  Ég get ekki snert nokkurn skapaðan hlut án þess að fá straum.  Mér er kallt.

Það myndi toppa ástandið á þessum frostkalda degi ef ég fengi frunsur og brotnar neglur.

Toppurinn á tilverunni.

Annars bara góð.

Góðann daginn.

Læt fylgja með eina mynd af Jenný Unu þegar hún var pínulítil og hafði stolist upp á borð.

Krútt.

Víða talsvert frost í dag

Drasl dagsins

Ég er svo þreytt að ég stend varla í lappir.  Hvoruga.  Dreg ýsur en það er það lengsta sem ég kemst þegar fiskur er annars vegar þessa dagana.  Kjöt, kjöt, kjöt, alltaf kjöt.  Ég vissi að ég myndi ekki höndla það að fara að heiman, strax við tvítugt, en ég lét gossa og velti mér upp úr syndsamlegum steikum hvern dag.  Hefði betur verið heima fram að þrítugu og látið foreldra mína ljúka uppeldinu.  Við erum mis fljót til þroska.

Hér hafa mublur verið bornar inn og út.  Öllu drasli sem ekki er bráðnauðsynlegt hefur verið hent.  Hér er ekki arða af óþarfa innan veggja, nema auðvitað undirrituð.  Minimalisminn orðinn algjör á heimilinu, nánast búin að ná hámarki, en því er náð, skv. Ibbu vinkonu minni, þegar við þurfum að ná í ausuna niður í kjallara.

Ég er búin að setja upp jólagardínur í eldhúsi, óróa og gyðingaljós.  Ég er svo líbó.

Eldaði góðan mat.

Jenný er í heimsókn.

Ég grét af sorg yfir lögunum í Laugardagslaginu.  Er þetta það besta sem við höfum upp á að bjóða? GMG:

Nóg um það.  Er farin að laga te.  Svo er það lúll.

Úje.

 

Össur er einfaldlega dúllurass!

Ég var að lesa bloggið hans Össurs og ég fékk krúttkast.  Maðurinn er megadúlla, það má hann eiga. Hann fer mikinn og segir að sexmenningarnir í fyrrverandi meirihluta Sjálfstæðisflokksins hafi eyðilagt REI og GGE dæmið.  Hvað um það, það er ekki pistillinn sem slíkur sem henti mér í vegg af hlátri, heldur það að ráðherrann skuli kalla Júlíus Vífil, FÍFIL!

Hér er Fífill

Um Fífil

Frá FÍFLI

Til Fífils

Ójá

Hérna eru herlegheitin.

Slagvilla, minn afturendi.

Ónei.

Farin að elda.

Lalalala

Ég er klofinn persónuleiki

Ég er gamall hippi, í hugsun en ekki í útliti. Ég er of skveruð fyrir mussur og klossa.  Miðað við reynslu og fyrri störf, ætti ég að hoppa hæð mína yfir "Ekki kaupa deginum", blogga hvatningarblogg um að kaupa ekki örðu í dag og vekja athygli á neyslubrjálæðinu, sem ég reyndar geri oft.  En ég get það ekki að þessu sinni, því í dag ætla ég að sjoppa eins og ég hef orku til.

Ég er klofinn persónuleiki, ég sver það.  Ég myndi t.d. aldrei hengja mig í krana í mótmælaskyni eða leggjast á götuna til að leggja áherslu á gott málefni.  Ástæðan er einföld, ég tæki mig ekki nógu vel út hangandi í krana.  Væri hrædd um að gallabuxurnar myndu krullast upp á kálfa, eða að dragtarpilsið myndi hífast upp um of nálægt júnóvott.  Enginn stíll yfir því og ég vil alltaf koma vel fyrir.  Líka í mótmælaaðgerðum.  Þess vegna mótmæli ég af alefli heima í stofu (stofukommi?).

Klofningur huga míns kemur fram í ótal myndum.  Ég elska t.d. lömbin, litlu og sætu ofurheitt.  Á myndum eru þau dúllur dauðans, en á mínum matardisk eru þau jafnvel enn fallegri og ég fæ næringarlega fullnægingu þegar ég sting í þau hníf og gaffli.

En í dag mun ég vaða um eins og hippi á trippi um musteri Mammons.  Ég var einmitt að hugsa um að það væri ógeðslega flott ef flest allir myndu nota daginn til að kaupa ekki örðu, því meira pláss fyrir mig og mitt fólk. Og á meðan ég veð um allt með minn innkaupavagn, mun ég sýna stuðning í huganum. 

Það er alltaf verið að gera manni erfitt fyrir.  Þessi "Ekki kaupa dagur" er flott hugmynd, en ég legg til að hann verði settur á annan dag á árinu.  T.d. Föstudaginn Langa eða Jóladag.  Sounds like a plan?

Er farin að gera innkaupalista elsku lufsurnar mínar.

Úje og amen í buddunni.

Túdú- Tékklisti Jennýjar

 

Á morgun hendi ég út tveimur sófum og tek inn einn þokkalega stóran í staðinn.

Á morgun ætla ég bara að lesa slúðurfréttir í blöðunum til að hamingjujafna.

Á morgun ætla ég ekki að aga nokkurn annan en sjálfa mig. (Stolið úr deginum í dag).

Ég ætla að vera í jólaskapi frá morgni til kvölds.

Ég ætla að heimsækja frumburð eða hún mig.

Ég ætla að vera með hana Jenný Unu, var að grenja út barn hjá foreldrum.

Ég ælta að tala við Maysuna mína í London og Oliver líka, heyra hann segja "Amma Jenný", vitið þið að það er hægt að segja þessi tvö orð þannig að maður fletjist út á vegg í krúttkasti og fara svo að grenja úr söknuði?  Jú, jú, alveg hægt.

Ég ætla að lesa AA-bókina til hamingjuauka og bættrar heilsu.

Ég ætla að láta eins og fífl á milli þátta.

Ég ætla að jólast eins og m-f.  Ekki nema mánuður til stefnu.  Flýta sér.

Dem, það er ekki pláss fyrir meira.

Tjékk, tékk, tékk.

Bítmíbætmídóntsúmí.

Úje

 

 

Guðmundur í Byrginu kominn á kreik

Guðmundur í Byrginu ætlar ekki að gera það endasleppt.

Nú hefur hann kært einhvern náunga fyrir þjófnað en sá gerði sér lítið fyrir og fór í Götusmiðjuna á Efri-Brú og náði í dót sem tilheyrði Byrginu, fyrir u.þ.b. 2 milljónir króna.  Starfsfólk Götusmiðjunnar afhenti manni þessum góssið í góðri trú.

Guðmundur í Byrginu hefur kært þennan þjófnað sem stuld á eigum Byrgisins. 

Halló, er ekki nokkuð ljóst að það er vægast sagt á reiki hvað tilheyrir hverjum í Byrgisósómanum?

Það er ljótur blettur á íslenskri meðferðarsögu að líf og heilsa fjölda manna og kvenna var látinn í hendurnar á trúarsöfnuði Guðmundar.  Reyndar eiga trúfélög ekki að sjá um meðferð á veiku fólki.  Það ætti að liggja ljóst fyrir en gerir það ekki, a.m.k. nægjanlega að mínu mati.

En af hverju lætur maðurinn ekki kyrrt liggja?  Var þetta ekki orðið gott?

Sjá nánar á visir.is

 

Forseti fólksins - eða fyrirtækjanna?

 

Rosalega finnst mér forvarnardagurinn sem forsetinn átti frumkvæði að, vera gott framtak.

Þá er það frá.

Ég hélt að ég dytti niður dauð, þegar ég var að horfa á myndbandið með forsetanum sem sýnt var í skólum landsins, ávarpið hans til æsku þjóðarinnar, í tilefni dagsins.  Sjáið og njótið.

Í upphafi máls segir hann okkur að lyfjafyrirtækið Actavis hafi stutt framtakið dyggilega.  Svo, til að það fari nú ekki fram hjá neinum, þá endurtekur hann sönginn í lok ávarpsins.

Mér finnst forsetaembættið og önnur þau störf sem teljast til æðri embætta í þessu landi,  alls ekkert heilög.  Ég ber enga óttablandna virðingu fyrir valdsmönnum og að sama skapi finnst mér sjálfsagt að gagnrýna þetta fólk og auðvitað á almenningur að veita aðhald.

Ég hef verið glöð með Ólaf, og ég er sérstaklega ánægð með konuna hans.  Hún er töffari hún Dorrit.

En nú finnst mér þetta vera að koma gott hjá Ólafi Ragnari.  Mér finnst það ekki forsetans að þylja upp prívat styrktaraðila út í bæ.  Það sem hann sagði í ávarpinu missti algjörlega marks eftir að hann auglýsti lyfjarisann.

Það er ekki lengur hægt að gera nokkurn skapaðan, hræranlegan, lifandi hlut orðið, í þessu þjóðfélagi, öðru vísi en að tengja það Bónus, Glitni, Kaupþingi og hvað þau nú heita öll þessi milljarðafyrirtæki.  Gott mál ef ríku fyrirtækin vilja styrkja þjóðþrifamál, en geta þau ekki auglýst framlag sitt sjálf?  Peningadýrkunin er orðin allsráðandi í útrásarfylleríinu. 

Hefur Actavis aldrei heyrt um að vinstri höndin eigi ekki að vita hvað sú hægri gerir?

Hefur Ólafur Ragnar eitthvað misskilið sitt hlutverk sem forseti þjóðarinnar?

Getur það verið, að fólk ofmeti mikilvægi sitt eftir mikla setu í einkaflugvélum auðmannanna?

Svei mér ef það er ekki kominn tími á að kjósa aftur.

Eins og mér finnst hann Óli flottur.

Dem, dem, dem!