Ingibjörg who?

Bíðið aðeins, kannist þið ekki við þessa konu?  Ingibjörg heitir hún.  Ég var að pæla í hvar ég hef séð ana, hm... hugs.... ég held að hún hafi einhvern tímann búið hérlendis.

Ingibjörg, Ingibjörg, Ingibjörg...

Æi já það er hún sem er flutt úr landi.

Jájá, allt í góðu með það.

Annars er Ingibjörg flott kona og þræl klár en maður er nú í stjórnarandstöðu og þá er um að gera að nota allan fjandann.

Segi svona.

Hún kemur örgla heim með haustinu.

Alltílagibless.

Utanríkisráðherra á ferð og flugi

Þjóðverjablús

Þessi frétt um Bretann sem fékk bætur frá breskri ferðaskrifstofu vegna þess að of margir Þjóðverjar voru á hótelinu og öll skemmtidagskrá var á þýsku, kallar á Þjóðverjabrandara.

Ég kann enga.  Ég held að allir brandarar um þjóðerni geti verið vafasamir en auðvitað á ekkert að vera hafið yfir húmor.

En af Þjóðverjum ganga ákveðnar sögur.  Hvort sem mönnum líkar betur eða verr.

Einn af mínum mörgu eiginmönnum vann í Fríhöfninni.  Það klikkaði aldrei að Þjóðverjarnir vissu upp á krónu hvað þeir áttu að fá til baka.  Klikkaði aldrei.

Annar af mínum fjölmörgu eiginmönnum rak heimagistingu.  Undantekningalaust tóku Þjóðverjarnir allt lauslegt með sér af morgunverðarborðinu.  Það klikkaði heldur aldrei.

Þetta segir mér bara eitt.  Það er engu logið um þýska nýtni og og sparsemi.

Það er bara hið besta mál.

Reyndar var ég á hóteli á Mallorca fyrir fullt af árum síðan með Maysuna og Söruna litlar.  Þar var hópur af Þjóðverjum.  Ég kunni ljómandi vel við þá sem ég varð málkunnug.

Allir þeir sem ég kynntist og fleiri til borðuðu hverja máltíð á hótelinu.  Keyptu matarkort áður en þeir lögðu af stað.

Þetta skil ég ekki, enda nánast bara Þjóðverjar og einn og einn Hollendingur í matsalnum.

Allir hinir voru í tilraunastarfsemi út um alla eyju.

En mikið rosalega held ég að Bretinn hafi verið pirraður.  Og satt best að segja skil ég hann smá.

Úje.

Fær bætur vegna of margra Þjóðverja

"Skítugar" meyjar

 

Ég sá þessa frétt í fyrradag.  Ég krullaðist upp, hárin risu á höfði mér af pirringi og ég reyndi að útiloka vitneskjuna sem er að finna í fréttinni, úr hausnum á mér.

Maður verður veikur af minna.

Hvernig í ósköpunum getur dómari ógilt hjónaband milli fólks (í þessu tilfelli múslímar, só?) vegna þess að hann telur að konan hafi narrað manninn í hjónaband með því að þykjast vera hrein mey?

Og hvað í andskotanum á það að þýða að það skuli yfirhöfuð verið fjallað um konur eins og varning sem hefur verið notaður en á að vera nýr?

Þarna er vegið að kvenfrelsi einn ganginn enn. 

Það er hægt að kaupa Babyborn dúkkur með CV.  Það verður kannski krafan í framtíðinni, að það liggi fyrir vottað einlífi frá til þess bærum yfirvöldum, að enginn hafi farið inn á undan væntanlegum kaupanda, þegar múslímar í Evrópu ná sér í kvonfang?

"En talsmaður ráðuneytisins sagði að úrskurður dómstólsins byggðist ekki á trúarlegum forsendum eða siðferðilegum heldur ákvæðum franskra laga um að hjónaband megi ógilda ef maki hafi logið til um „grundvallaratriði“ í sambandinu."

Þá er komið að spurningunni um hvort kynferðisleg reynsla fyrir hjónaband sé "grundvallaratriði" í sambandi fólks á Vesturlöndum.  Ég hélt ekki að við værum á leiðinni til myrkra miðalda.  Reyndar þarf ekki að fara svo langt aftur.

Fyrirgefið fjórtán sinnum, en mér finnst að þeir sem trúarbragða vegna líta á konur sem búfénað, eigi ekki að fá grænt ljós á þá hugmyndafræði frá gestaþjóðum sem vinna í átt að auknu jafnrétti.

 Að taka þátt í þessu rugli er gjörsamlega útúr kú og setur fordæmi sem þá væntanlega kallar á fleiri skilnaði þeirra sem vilja skipta út eign og fá sér nýja.

Andskotinn kolvitlaus.

Nenni varla að taka fram að ég er fjölmenningarsinni, í bestu meiningu hugtaksins og ég hef svo sannarlega ekkert á móti fólki frá öðrum menningarheimum, en svona meðvirkni er engum til góðs.

Hjónaband ógilt í Frakklandi vegna ósannsögli um meydóm

Hvor meget koster en dansk uden?

Heimurinn er ógeðslega lítill.  Það er alltaf að verða meira og meira á hreinu.

Varðandi árásina í sjoppunni á horninu og Colbjörnsensgade og Isgegade nú í vikunni, hm... mynduð þið trúa því að ég hafi búið á þessu horni hinum megin við götuna?

Jebb, það gerði ég og skammast mín ekki.

Það var sumarið 1968 þegar ég var 17 ára.  Á milli hóteldjobba í Kóngsins, þar sem maður bjó á vinnustað, fékk ég að búa í hálfan mánuð heima hjá honum Per vini mínum og systir hans Susanne.  Mamman var í útlöndum.  Þarna voru sko hippapartí þegar komið var heim af skemmtistaðnum Carusellen.

Þarna á 1. hæðinni lærðist mér í fyrsta skipti hversu heimurinn er vondur og miskunnarlaus við suma.  Mér var sagt að konurnar fyrir neðan gluggann væru mellur.  Ég gapti niður í kok þannig að sjá mátti meltingu á morgunmat "live".

Ég hékk hálf út um gluggann og forviða fylgdist ég með og þar kom að, að maður einn, öldungur að mér fannst, en hefur sennilega verið milli þrítugs og fertugs, skoðaði úrvalið á horninu með gagnrýnum augum og leit síðan upp í gluggann þar sem fíbbblið ég hékk til hálfs út um hann og hann hálfhrópaði til mín: Hvor meget koster en dansk uden?

Ég skellti viðkomandi glugga fast aftur og fékk síðan fyrirlestur um hvað dansk uden og fransk uden, hétu á fagmáli.

P.s. Það er svo alvarlegra mál og ekki hlægjandi að því, að þarna sá ég mannlega eymd í sinni bitrustu mynd.  Ofbeldi á konum, neyslu og aðra niðurlægjandi meðferð.

Hananú!

Híróhító hittir Massímótó

 

Það vita allir að í Japan er hver fermeter dýrmætur og fólk býr nánast í frímerkjastórum íbúðum víðast hvar. 

Algjör skápabúskapur og þá er ég ekki að tala um homms and lesses, börnin góð, meira alvöru skápa.

Svo segir sagan, má vera að það séu lygimál, að japanskar konur séu smáar, hljóðlátar og afskaplega kurteisar.  Kurteisi mun vera þjóðaríþrótt. (Væri hugmynd að senda íslensku þjóðina í hollum til Japan og læra listina kurteisi?).

En heimilislaus kona í Japan bjó í skáp á heimili ókunnugs manns í heilt ár án þess að hann yrði hennar var.

Eftir að matvæli fóru að hverfa kom maðurinn upp eftirlitsmyndavélum og þá fannst þessi hljóðláta kona.

Híróhító dauðbrá þegar hann sá Massímótó á mynd og hrópaði stundarhátt: Halló Hafnarfjörður það er kona í kústaskápnum!

Mér finnst þetta fjári smart að hafa geta látið fara svona lítið fyrir sér og það svona lengi.

Og sorglegt í leiðinni.  Að þurfa skríða inn í skáp hjá vandalausum og híma þar í heila 12 mánuði.

En ég vorkenni þessum manni lítið sem ekkert.  Ég meina, hann var hamingjusamlega ómeðvitaður um konuna í kassanum.

En ég vildi að þetta hefði endað með að HANN hefði hent sér á hnén og beðið HENNAR og þau lifað hamingjusöm til æviloka.

Köttur út í mýri and so f..

Er það rugl í mér, en eru ekki alltaf að berast geggjaðar fréttir frá Japan?

Mig fer að langa alvarlega til þessa lands.  Mér hefur reyndar alltaf dreymt um að fara þangað, en þetta ýtir undir hungrið.

Farin að safna yenum.

Óhó.

Kerlingin Rice

 

Ég er ekki í alsælu vegna kerlingarinnar Rice sem ætlar að heimsækja utanríkisráðherrann í dag.

Hvað er hún að vilja hingað?  Jájá, það mun heita vinnuferð.  Öllu má nú nafn gefa.

Útlitið getur blekkt.  Aldrei myndi mér detta í hug ef ég sæi þessa konu á förnum að hún væri kaldrifjuð og miskunnarlaus.  Að henni fyndist réttlætanlegt að pynta fólk til að ná fram játningu.

Mér líst vel á sýnikennslu með vatnspyntingarbekk sem Samtök hernaðararnstæðinga ætla að hafa á Austurvelli í dag kl. 17.  Kerlan Rice er boðin sérstaklega velkomin.

En sárast af öllu er að ríkið á bak við hana skuli teljast til kærustu vina Íslendinga með stríðsmaskínu sína og mannslíf á samviskunni.

Mér er í alvörunni óglatt.

Pest?  I don´t think so.

Sviðsetja vatnspyntingar á Austurvelli

Siglandi samlokur

 

Á hverju ári, um þetta leyti, er ég lostin sömu lönguninni.  Mig dreymir um tjaldferðir. 

Já, ég veit, köngulóafóbíska ég nýt þess að sofa í tjaldi.  Eða gerði síðast þegar ég lagðist í útilegu, en þar var 1992.

Þessi ástríða mín er gjörsamlega úr karakter, en hvað get ég sagt?

Eins og ég hef oftlega nefnt þá hef ég átt MARGA eiginmenn.  Sá næstsíðasti var ferðavænn og tjaldglaður.  Svona wash and wear týpa.  Við fórum um fjöll og firnindi með dæturnar.

Þessi núverandi vinnur hins vegar, leynt og ljóst gegn ferðalögum þar sem gist er í lökum, eins og hann orðar það.  Honum verður ekki haggað. 

Kannski er ég einfaldlega of gömul fyrir tjaldferðalög, jeræt.  Aldrei liðið betur.

Húsbandið hefur ekki sterka röksemdafærslu fyrir andúð sína á tjöldum.

Hann gisti í tjaldi 196tíuogeitthvað þegar hann var að spila í Húsafelli um verslunarmannahelgi.  Kommon, lífið hefur þróast síðan þá og viðleguútbúnaður líka.

Hann heldur því fram að eftir rigningarnótt hafi hann vaknað við að samlokur með skinku og osti hafi synt fram hjá sér í tjaldinu, á leiðinni eitthvað.  Það gerði útslagið.

Só?

Hann neitar sem sagt að hoppa inn í nútímann í tjaldheimum.  Við stefnum á Hótel Freysnes í Skaftafelli síðsumars, til frábærustu hótelstjórnenda á landinu.

Þangað til eru það svalirnar, Elliðárdalurinn og Heiðmörkin.

Á ég bágt??? Nei ég á andskotann ekkert bágt.

Újeeeee

Tónlistarhúsið ekki tilbúið - GMG

Er það nema von að Paul Vallely, blaðamaður breska blaðsins Independent, spyrji hvort allir ættu að flytja til Íslands.

Við erum hamingjusamasta þjóð á heimsbyggðinni.  Ótrúlega glöð þjóð.

Svo fremi þú sért hvítur, kristinn, blá- eða gráeygður, á réttum aldri og með pedigríið á hreinu, bjóðum við þig velkominn.

Við munum snobba fyrir þér og um leið og þú stígur á grýtta íslenska jörð munum við spyrja hvernig þér líki landið.  Og þú munt ekki svara eins og Ringo sem sagði "give me a break, ég var að lenda", heldur munt þú segja "ég elska þetta land" og henda þér flötum í stórgrýtið og smalla í þér beininn.  Og þá munum við í móttökunefndinni falla á okkar hreinræktuðu hné og þakka þér grátandi.

Paul veltir fyrir sér hvers vegna hamingjuþjóðin hérna úti í ballarhafi er eins lukkuleg og friðsöm og raun ber vitni.  Hm... Þekkja þeir Dómsmálaráðherrann?  Vita þeir um gas-gas-gasmann?

Markaðssetningin á Íslandi er greinilega algjört sökksess.

Paul heldur því fram að velferðarkerfið sé þróað.  Hm.. það passar ekki alveg.  Það eru miklir erfiðleikar á Akranesi

Paul fabúlerar áfram, getur verið að hvalveiðar geri okkur hamingjusöm?  Ég veit ekki með ykkur en mín hamingja hefur aðallega með skort á alkahóli að gera.

Kannski erum við svona happý af því ég fór í meðferð og nokkrir til viðbótar.  Veit fólk hvurs lags guðs gjöf til mannkyns edrúmennska undirritaðrar er?  Nei, vanþakklæti, vanþakklæti.

Við erum að tala um biggtæm framlag til friðar og spektar í hinum vestræna heimi, gott fólk og allt Vogi að þakka.

Ég hef ákveðið að við munum lenda í 2. sæti á laugardaginn.  Af hverju galdra ég okkur ekki í það 1.?  Jú það er ástæða fyrir því.

Tónlistarhúsið verður ekki tilbúið næsta vor

Ættu allir að flytja til Íslands?

Af átakasvæðinu

Það verður ekki á vígvöllinn logið. Ég sver það, það er ekki búandi hér í Breiðholtinu.  Hverjum dettur eiginlega í hug að byggja upp í sveit?  Ók, átakasvæðið er ekki sveit en þegar Breiðholtið var byggt var það svo sannarlega ekki miðsvæðis.

Og ég endaði hér.  Enginn veit sína æfina.  Sjálfur vestur- og miðbæingurinn þurfti að éta ofan í sig hástemmdar yfirlýsingar um að fara ekki lengra "út úr" bænum en sem næmi Rauðarárstíg, ef hjá því væri komist, fór gott lengra en það, alla leið upp í Seljahverfi og það er allt helvítis Laugaveginum að kenna, vegna næturóeirða fyrir neðan gluggann minn um árabil.

En mér er ekki svo leitt sem ég læt.  Það keyrði enginn bíll á minn húsvegg.  Það ældi enginn á tröppurnar og það reyndi enginn að beita mig ofbeldi í nótt.  Þá vitið þið það.

Vitið þið að Seljahverfið er eitt grænasta svæði borgarinnar?  Hér er sumarið að koma, allt að grænka og fyrir utan eldhúsgluggann minn stendur fallegast tré í heimi og laufgast svo hratt að ég get nærri því sé það gróa.  Nei, ég er ekki á sýru.

En hvað um það, mig langar aftur á heimaslóðir.  Það býr svo lengi að fyrstu gerð.  Ég er með heimþrá í vesturbæinn og miðbæinn.  Frumburður býr í vestur, sú yngsta í miðbæ.

Ég upplifi mig eins og í sveitadvöl.  Eða það held ég, var aldrei send í sveit og ég þakka mínum sæla fyrir það.  Hrædd við kindur og allt.

En ég vildi sum sé tilkynna ykkur að það var ekki keyrt á minn húsvegg hér í Breiðholtinu í nótt.  Einhver annar hlaut það hnoss.

Yfir og út frá átakasvæðinu.

Ók á hús í Breiðholti

Bannað fullorðnum?

 

Þegar stelpurnar mínar voru litlar, krúsuðum ég og þáverandi, um landið með tjald og fyrirkomulag.

Það var stórskemmtilegt og dæturnar elskuðu það.  Við tjölduðum í Atlavík í 30 stiga hita, Í Skaftafelli á Seyðisfirði,  Ásbyrgi, nefnið það, við drápum þar niður tjaldhæl, ef undan eru skildir Vestfirðir, ég á þá eftir.

Á tjaldstæðunum var mikið af fjöslkyldufólki og auðvitað ungar manneskjur á eigin vegum líka.

Svona eftir á að hyggja, þegar ég les fréttina um aldursfasismann á Akranesi og í fyrra á Akureyri, þá man ég eftir að það voru oft óhugnanleg læti og sukk á næturnar.  Veit einhver hvernig er að sofa í tjaldi þegar nágranninn er með allt á fullu blasti?  Eða hversu vel það heyrist þegar fólk í ölæði rífst hinu megin á tjaldstæðinu?  Nei, kannski ekki, en þá er að taka mín orð fyrir því, það er martraðarkennt ástand.

Og hverjir skyldu nú hafa djöflast mest á tjaldstæðum landsins?  Það voru ekki unglingar, svo mikið er víst.  Það var rígfullorðna fólkið sem datt í það eftir að börnin sofnuðu. Og það hafði hátt.

En ég vildi koma að þeirri skoðun minni að mér finnst það mannréttindabrot að setja aldurstakmörk á tjaldstæði, þá meina ég eftir að fólk er búið að ná lögaldri.

Ætli það myndi ekki heyrast hljóð úr horni ef tjaldstæðisfrömuðir þessa lands bönnuðu öllum 33-43 að tjalda vegna gruns um að það ætti að detta ærlega í það?

Hvað er eiginlega í gangi þarna uppi á Skaga?

Yngri en 23 ára bannað að tjalda nema í fylgd með fullorðnum