Ég er í góðum hópi óvina Framsóknarflokksins

Mér líður eins og stoltri móður.

Nú eða stoltum og glaðbeittum skemmileggi.

Framsóknarflokkurinn telur mig óvin flokksins.

Mikið skelfing er ég upp með mér, þó þetta komi mér í opna skjöldu, hef verið að mæra konurnar í flokknum en það telst greinilega ekki með.

-----

Leyniskjöl: Óvinir Framsóknar í bloggheimum

Þetta eru þeir sem teljast "andstæðingar" Framsóknarflokksins í bloggheimum.

Miðvikudagur 22. apríl 2009 kl 13:36

Höfundur: Ritstjórn DV ([e-mail])

DV hefur undir höndum Excel skjal frá Framsóknarflokknum yfir óvini flokksins í bloggheimum. Á listanum er meðal annars Bjarni Harðarson, fyrrverandi þingmaður Framsóknarflokksins, Samfylkingarfólkið Dofri Hermannsson, Bryndís Ísfold Hlöðversdóttir og Helga Vala Helgadóttir. Auk þeirra er Jónas Kristjánsson, fyrrverandi ritstjóri, á listanum.

DV barst skjalið frá heimildarmanni innan flokksins. Nöfn ofantaldra eru birt í skjalinu undir fyrirsögninni Bloggarar – Andstæðingar. Nöfn allra sem eru á listanum eru eftirfarandi:

(Nafn, stjórnmálaskoðun, slóð á blogg)

Andrés Jónsson, XS, www.andres.eyjan.is
Árni B. Steinarsson Norðfjörð, ??, www.taoistinn.blog.is
Baldur McQuees, ??, www.baldurmcqueen.com
Bjarni Harðarson, L, www.bjarnihardar.blog.is
Björgvin Valur Gíslason, XS, www.bjorgvin.eyjan.is
Bryndís Ísafold Hlöðversdóttir, XS, www.bryndisisafold.eyjan.is
Dofri Hermannsson, XS, www.dofri.blog.is
Dögg Pálsdóttir, XD, www.doggpals.blog.is
Gunnar Axel Gunnarsson, XS, www.gunnaraxel.blog.is
Helga Vala Helgadóttir, XS, www.eyjan.is/helgavala
Jakobína Ingunn Ólafsdóttir, ??, www.kreppan.blog.is
Jenný Anna Baldursdóttir, ??, www.jenfo.blog.is
Jón Ingi Cæsarsson, XS, www.joningic.blog.is
Jónas Kristjánsson, ?? , www.jonas.is
Lára Hanna Einarsdóttir, ??, www.larahanna.blog.is
Ómar Ragnarsson, ??, www.omarragnarsson.blog.is
Róbert Marshall, XS, www.marshall.hexia.net
Sigurjón Þórðarson, XF, www.sigurjonth.blog.is
Þór Jóhannsson, ??, www.thj41.blog.is

Í skjalinu er einnig að finna upplýsingar um herráð flokksins sem hittist klukkan hálf níu á hverjum morgni. Auk þess er að finna upplýsingar um bloggara sem eru hliðhollir flokknum. DV mun á næstu klukkustundum birta þessar upplýsingar á dv.is.

-----

Nú þakka ég fyrir að vesælli persónu minni sé sýndur þvílíkur heiður að ég geti talist skipta máli svona yfir höfuð.

Svo get ég ekki verið að gera Framsóknarmenn að meiri ómerkingum en þeir þegar eru og mun því leggja mig alla fram til að gera þá ekki að ósannindamönnum og hamast í þeim eins og brjálæðingur fram að kosningum - og eftir kosningar ef þurfa þykir.

Reyndar mætti listinn vera betur unninn.  Þeir setja spurningamerki við stjórnmálaflokk þann sem ég tilheyri.

Reyndar tilheyri ég engum en fyrir þessar kosningar er ég merkt í bak og fyrir - ég er vinstri græn.

Hvað er að þessu liði?

Ég legg til að þeir fari að dæmi Jóhönnu Sigurðardóttur og steinþegi (og skrifi) fram yfir kosningar.

Skjóta sig í lappirnar hvað?

Þögn Jóhönnu til umræðu í Færeyjum

Þessu trúi ég - því miður

Stundum hefur maður ekki hugmyndaflug til að skilja eða sjá fyrir sér hversu lágt er hægt að leggjast þegar völd og peningar eru annars vegar.

Við sjáum dæmi um þetta á hverjum degi, stundum oft á dag.

En ég sá þetta inni hjá Dofra.

Samkvæmt þessu þá munu Sjálfstæðismenn ástunda hringingar í unga kjósendur sem ætla að kjósa annað en Sjálfstæðisflokkinn og hvetja þá til að strika Árna Johnsen út.

Þar með er kjörseðillinn ógildur.

Ef þetta er rétt þá er siðleysið innan Sjálfstæðisflokksins meira en mig óraði fyrir og taldi ég það í hæstu hæðum fyrir.

Samanber styrki og prófkjör og annað því um líkt.

En miðað við allt sem upp hefur komið í tengslum við þennan flokk þá trúi ég þessu.

Trúi þessu algjörlega og inn í merg og bein.

Svo fann ég þessa krúttlegu mynd á netinu.

Fleiri munu skila auðu og strika yfir

Hvar vorum við?

Þá er það komið á hreint.

Enginn þingmaður VG né aðrir sem tóku þátt í prófkjörum fyrir flokkinn hlutu styrki til að kosta prófkjörsbaráttu.

Enda harðbannað í VG.

Mínir menn, dúllurnar.

Gæti knúsað þau öll og geri um leið og ég næ þeim í kremjufæri.

En..

mér finnst eins og þjóðfélagið nötri, að það kraumi undir löppunum á okkur, hlutir sem áttu aldrei að komast fyrir almenningssjónir sullast nú og buslast upp á yfirborðið.

Eins og náttúruhamfarir, óstöðvandi, lútandi sínum eigin lögmálum.

Alls kyns óþverri.

Krakkar, hvað vorum við að gera á meðan öll þessi spilling blómstraði?

Af hverju spurði enginn neins (amk. fáir)?

Vildum við ekkert heyra, ekkert vita?

Af hverju settum við ekki spurningarmerki við flottræfilsháttinn?

Kommon, vorum við í sólbaði eða að bora í nefið?

Svei mér þá, ég er eitt spurningarmerki!

Ekki að þetta sé almenningi að kenna, en svei mér þá þetta er með ólíkindum.

VG menn þáðu ekki styrki

Skýlaus krafa um upplýsingar

Nú koma þessar upplýsingar, um að stórfyrirtæki hafi styrkt frambjóðendur í prófkjörum árið 2006 um milljónir króna, fimm mínútum fyrir opnun kjörstaða.

Það kemur fram að einstakir frambjóðendur hafi þegið allt að 2 milljónum króna í styrk.

Stöð 2 segist hafa heimildir fyrir því að sjálfstæðismennirnir Guðlaugur Þór Þórðarson, Illugi Gunnarsson og Guðfinna Bjarnadóttir séu á meðal þeirra sem hlutu styrk frá áðurnefndum fyrirtækjum, einnig samfylkingarþingmennirnir Helgi Hjörvar og Steinunn Valdís Óskarsdóttir og Björn Ingi Hrafnsson, fyrrverandi borgarfulltrúi Framsóknarflokksins.

Áður en við göngum að kjörborðinu held ég að við kjósendur verðum að krefjast þess frá öllum frambjóðendum flokkanna sem fóru í prófkjör 2006 og eru í framboði núna að þeir birti upplýsingar um styrktaraðila sína og hversu mikla peninga um er að ræða.

Eftir allt sem á hefur dunið, eftir alla spillinguna sem við erum að fá vitneskju um nánast á hverjum degi, hlýtur þetta að vera skýlaus krafa.

Eða hvað?

Háir styrkir frá Baugi og FL

Atkvæðabanarnir ógurlegu

Allir flokkar vilja láta Ríkisendurskoðun fara yfir fjármál stjórnmálaflokkana.

Líka þeir sem geyma þau í skugganum eins og Sjálfstæðisflokkurinn.

En hvað um það,

að tala um að "ganga hreint til verks".

Ég sá þessa mynd á Smugunni.

Málið er að fyrir helgi var bæklingur til vinstri sendur í hús.

Eftir helgi var búið að hreinsa Gulla út úr mynd og Kristján Þór kominn í staðinn!

Allt uppi á borðinu, gegnsæ vinnubrögð, hreint til verks skal gengið.

Það er líka talað um þá staðreynd á Smugunni að atkvæðabaninn ógurlegi Hannes Hólmsteinn er settur í geymslu fyrir kosningar.

Spurningin er því hvort Gulli hangi í geymslunni með Hannesi.

Sko, framyfir kosningar.

Mar spyr sig.

Taka undir að Ríkisendurskoðun skoði fjármál flokkanna

Kjósa!

 

Mikið skelfing er ég glöð með velgegni Borgarahreyfingarinnar í skoðanakönnunum.

Minn flokkur er líka í fínum málum.

Jájá, þið sjáið þetta sjálf á meðfylgjandi frétt.

Ég er að hugsa um að kjósa utankjörstaðar, bara upp á öryggið.

Ég gæti vaknað dauð á laugardagsmorguninn og þá er mitt atkvæði farið í súginn.

Ekki bara mitt, húsbandið yrði auðvitað miður sín og færi ekki á kjörstað.  Tvö í ruslið.

Dætur mínar, hm.. þær yrðu voða leiðar líka, en frumburður verður í London og búin að kjósa, Maysan í London og má ekki kjósa en Sara færi líka í rusl og myndi gleyma kosningunum.

Þannig að sjá má að það er ekki á vísan að róa með atkvæði þessarar fjölskyldu.

Kannski ég ætti að steðja á kjörstað strax í dag.

Gæti hrunið í kvöld, enginn veit sína ævina fyrr en öll er.

Já, ég er stórskrýtin en ég er með boðskap í þessari færslu hérna.

Það skiptir ÖLLU máli að kjósa.  Það er grundvallaratriði og heilög skylda nú eða réttur hvers manns.

Ég set X við V það er nokkuð ljóst.

Ætli það sé ekki best að fara að koma sér í kjörklefann.

Ég er með svo hraðan hjartslátt eitthvað, smá höfuðverk, hvað er í gangi?

Ætli ég sé nokkuð að yfirgefa?

Lalalalalala

O-listi fengi fjóra

Upprisa holdsins, loftborar og fáviska

Ég er eiginlega búin að vera kjaftstopp í kvöld eftir borgarafundinn í Suðurkjördæmi.

Svo margt setti mig út af laginu.

Björgvin upprisinn!

Hvað á nú þetta að þýða?  Upprisa holdsins og eilíft líf hjá Bjögga nýliðnum banka- og viðskiptamálaráðherra.  Maðurinn sagði af sér korteri fyrir stjórnarslit íhalds og Samfylkingar, fer svo í andlegt meikóver og er bara mættur með attitjúd, Evrópuáráttu og saklaus af öllu eins og nýfætt lamb. Geislabaugurinn kingum hausinn á honum olli ofbirtu í augum mínum. Þetta er nú meiri leikaraskapurinn.

Grétar Mar!

Ég verð að viðurkenna að þeir eru eins og salt jarðar Guðjón Arnar og Grétar Mar.  Dáldið krúttlegir og svona,  en myndi ég hleypa Grétari Mar út í íslenska náttúru?  Nei, hann myndi vaða í að rífa upp hvern runna, hvert lyng, bora og andskotast út í eitt til að leita að atvinnutækifærum.  Maðurinn ber enga virðingu fyrir náttúrunni.  Ég sé Grétar fyrir mér með hjálm og loftbor ef ég loka augunum. Ég á eftir að verða andvaka í nótt.  Læsið manninn niðri í káetu, þar á hann heima.

Ragnheiður Elín!

Halló kona góð, "vændi elsta atvinnugreinin og svona".  Í hvaða skóla gekkst þú?  Atvinnugrein?  Ég er ekki hissa á þið Sjálfstæðismenn viljið styðja við refsilaust vændi, sjálfur atvinnurekendaflokkurinn.  Misskilinn stuðningur við "atvinnulífið"?  Kannski mun einhver góðhjartaður maður eða kona leiðrétta þennan víðtæka misskilning hjá þingkonunni svo hún verði sér ekki aftur til skammar.

Vændi er ekki spurning um atvinnugrein.  Vændi er spurning um kúgun, misbeitingu valds og flokkast undir kynbundið ofbeldi (já og drengir og karlar geta fallið undir þá skilgreiningu, að sjálfsögðu).

Að svona steypa skuli koma frá konu sem á að teljast upplýst er með ólíkindum.

Svo er eins og ekkert mál sé nógu merkilegt að Sjálfstæðisflokkurinn geti lagt sig niður við það nema að það heyri undir "fyrirtækin og heimilin í landinu" eins og það heitir svo fallega hjá íhaldinu þessa dagana.  Var Sjálfstæðisflokkurinn með skilyrt framboð.  Heimili og fyrirtæki og ekkert þar fyrir utan?  Mar spyr sig.

Meira seinna.

Það læddist að mér illur grunur í kvöld, fannst eins og Samfó og Sjálfstæðis væru komnir á bullandi lóðarí.  Getur það verið?

Vont að geta engum treyst.

Ég með aðsóknarkennd?

Ónei, gullin mín.

Algjörlega fokking kúl eins og agúrka.

Evrópustefnan verði á hreinu

Að skjóta sig í fætur

Björn Bjarnason fer hamförum á blogginu sínu.

Heitir það ekki að berjast fyrir lífi sínu?  Svei mér þá, ég held nú það.

Las einhvers staðar (dv held ég) að Björn segi Atla Gísla hafa "nauðgað" vændisfrumvarpinu í gegn í þinginu.

Smekklegt orðaval Björn Bjarnason, verulega smekklegt.

Annars eiga sumir ekkert að tala um svona hluti, verandi bullandi sekir um að hafa með málþófsobeldi komið í veg fyrir breytingar á stjórnarskrá.

Takk Atli fyrir að "nauðga" þessu þjóðþrifafrumvarpi í gegn.

Og svo hjólar Björninn í Jóhönnu.

Nenni ekki að tíunda þann söng allan, en hann segir m.a. að þvermóðska Jóhönnu hafi gert hana að forsætisráðherra og að hún hafi komið þremur seðlabankastjórum frá völdum.

Gott Jóhanna, til hamingju með þvermóðskuna.  Greinilega mikill kostur í þínu tilfelli.

Og að lokum,

Björn býsnast yfir að forsætisráðherrann hafi komið "norskum" manni að í Seðlabankanum.

Það er auðvitað reginhneyksli.

Hann var svo vel mannaður íslendingum, þ.e. yfirbankastjóranum vini hans.

Úff.

Skjóttu þig endilega áfram í lappirnar Björ góður.

Þvermóðska Jóhönnu gerði hana að forsætisráðherra

Darth Vader í símanum

Ég vildi óska þess að ég og fleiri hefðum aðstöðu til að mynda okkur skoðun um ESB út frá forsendum sem ekki eru litaðar af flokkslínum.

Ég hringsnýst í kringum sjálfa mig í þessu máli, veit ekki hvað snýr upp og niður á umræðunni.

Veit sem sagt ekki hvort ég er með eða á móti.

Jóhanna vill setja aðildarviðræður í forgang, kannski er það ágætt bara, þá komumst við að minnsta kosti að því hvað aðildin inniheldur í plús og mínus.

Ég veit ekki með ykkur, en ég er varla búin að ná því að það skuli kosið um helgina.

Úrvinnslugeta höfuðsins á mér er orðin frekar hægt eftir allt sem á hefur dunið.

Ég veit að minnsta kosti hvað ég ætla að kjósa, þarf ekki að velta því lengur fyrir mér.

Svo er bara að reyna að halda haus í gegnum komandi hremmingar.

Annars er ég enn nánast raddlaus.

Hef þó rödd sem er ryðguð og ljót, nánast skelfileg í myrkri.

Elskulegur tengdasonur minn svaraði í símann í gær þegar ég hrindi til að tala við dóttur mína.

Hann kallaði:

Sara; Darth Vader er í símanum.

Jájá.

Eddie Izzard er með þetta.  ÓMÆGODDDD.

 

ESB-viðræður í júní?

Með kjaft og attitjúd

Ég er ekki eins og fólk er flest, ég veit það og er sátt við það.

Þetta kemur fram í því, til dæmis, að ég nenni ekki svona byssuogbófalöggæslu og skrúfa niður í sjónvarpinu.

Auðvitað er frábært að dópið sé tekið, því komið í lóg (vonandi) og þeir sem reyna að smygla því fái sín maklegu málagjöld.

Málið er að það eru bara sjaldnast þeir sem fjármagna og verða milljóna(jarða)mæringar sem nást, bara milliliðirnir, undirsátarnir, oft náungar sem eru í skuld við dópgreifana.

Samt er alveg látið eins og það hafi tekist að uppræta valmúaakrana í Langburtistan, eins og þeir leggja sig, ekki að ég sé að gera lítið úr þessu magni og allt það.

Löggan verður svo dramó (munið þið síðustu stóru sendingu sem þeir náðu í?  Settu á langborð og stelpulöggur beint úr Worldclass sitthvoru megin við borðið? Vó, heví stöff).

Áhuginn er gífurlegur, eltingarleikur sem berst um landið og miðin, löggan fær raðfullnægingar af spenningi og það eru jólin.

Ég geispa og hugsa, jájá, bráðum kemur næsta sending og hún fer í gegn.

Þann dag sem sjálfu frumógeðinu verður skellt á bak við lás og slá skal ég fylgjast með af áhuga.

Á meðan skipti ég um stöð og andvarpa í hljóði dálítið þakklát fyrir fíkniefnalögregluna.

Þ.e. þegar hún er ekki að fara hamförum gegn sprotafyrirtækjunum í borginni (djók).

Gat verið, segið þið, að helvítis tuðmajan hafi getað fundið eitthvað neikvætt við stórkostlegar hamfarir löggunnar í eltingaleik við dópsalana í dag.

Hm.. hún kann ekki að skammast sín.

Hún játar, skammast sín ekki rassgat og er með harðsnúið attitjúd og ætlar að vera fram yfir kosningar.

Hún ætlar að rífa kjaft svo hjálpi henni Óðinn, Þór og Freyja.

Yfir 100 kg af fíkniefnum