Búin á því

Jæja, þá eru kosningar að baki og hægt að fara að einbeita sér að lífinu.

Annars vakti ég fram á morgun, ekki gott fyrir óvirka alka og nú er ég með vökutimburmenn.

Frussss

Ég er ánægð.  Til hamingju vinstri menn, þetta er okkar sigur.

Til hamingju Borgarahreyfing, þið eigið þennan sigur líka.

Skrítið, eftir að hafa verið vakin og sofin yfir pólitík s.l. mánuði er ég eins og sprungin blaðra.

Nú þurfa Samfylking og VG að setjast niður og koma sér saman.  Ég reikna með að báðir flokkar séu meðvitaðir um væntingarnar sem þjóðin gerir til þeirra.

Það sem ég er þó mest í skýjunum yfir eftir úrslitin er að konur eru nú 43% af þingliði.

Annars ætla ég að horfa á Silfrið.

Og leggja mig.

Ésús hvað ég er búin á því.

Nýtt Alþingi Íslendinga

Munið hrunið

Í tilefni dagsins og samvisku minnar vegna vill ég minna á eftirfarandi, vegna þess að nú í dag hefur fólk tækifæri til að tala með atkvæði sínu.

Refsa eða umbuna.

Munið hrunið.

Munið hverjir gerðu það mögulegt.

Sjálfstæðisflokkurinn í boði Framsóknar lengst af, rétti óreiðumönnum fjöregg þjóðarinnar sí svona, eins og ekkert væri sjálfsagðara.

Nú er allt útlit fyrir að næstu kynslóðir verði bundnar á skuldaklafann og það án þess að hafa lyft litlafingri til að orsaka það.

Gangið fram hjá þeim flokkum sem sváfu á verðinum eða tóku þátt í sukkinu.

Ekki hafa á samviskunni áframhaldandi rugl.

Ég kýs VG og þakka fyrir að ég þarf ekki að velkjast í vafa um heiðarleika þess flokks.

Njótið dagsins!

Bjarni Ben kaus fyrstur

Amenið

Örþreytt eftir góðan og annasaman dag í gær settist ég niður og horfði á formannaþáttinn á RÚV.

Mér fannst hann þokkalega málefnalegur.

Mín upplifun:

Sigmundur Davíð: Eins og unglingurinn í skóginum, rammvilltur og kominn út í horn með ábyrgðarlausar yfirlýsingar sínar um yfirvofandi hrun og auðvitað gat hann ekki útskýrt hvað hann átti við.

Þessi maður á ekki erindi í pólitík strax.  Örvæntingarfullur og til í að gera hvað sem er fyrir atkvæði.  En við hverju er að búast frá flokki sem gerir lista yfir mögulega andstæðinga?

Ástþór: Ég er glettilega oft sammála Ástþóri, hann er bara svo flippaður og stjórnlaus.  Hver veit.. kannski mun hans tími koma.

Bjarni Ben: Vel máli farinn.  Búinn að tapa og jafnframt búinn að sætta sig við það.

Þór Saari: Hefur margt áhugavert til málanna að leggja.  En halló, að troða fingrunum í eyrun?  Mér er sem ég sæi viðbrögðin ef t.d. Steingrímur J. leyfði sér það.  Læra mannasiði.  Eftir eyrnaatriðið hætti ég að hlusta.  Tapaði áhuganum.

Jóhanna: Jóhanna á stóran sess í hjartanu á mér.  Hún er alvöru jafnaðarmaður.  Hún er núna tilbeðin í Samfylkingunni (eins og Þór Saari  í O) og ég er viss um að hún hefur ekki beðið um það, né heldur trúi ég því að hún kæri sig um það.  Dýrkun er vond í pólitík.  En áfram Jóhanna!  Flott kona, flottar áherslur.

Steingrímur J: Steingrímur er búinn að tóna sig niður, verður að gera það auðvitað, kominn í ríkisstjórn.  Sakna svolítið hins æsta hugsjónamanns.  En hvað um það, rökfastari maður er ekki til í íslenskri pólitík og svo er hann talsmaður mannúðar og réttlætis.  Með svoleiðis málaflokka er erfitt að klikka, meira segja þó viðkomandi væri með horn og hala, spúandi eldi og brennisteini.

Panellinn hjá Agli mátti missa sig, vegna þessarar konu, Stefaníu, sem réri lífróður fyrir Sjálfstæðisflokkinn í málfutningi sínum, eða þannig sló það mig.  Mér kemur ekkert við pólitískar skoðanir eða áherslur álitsgjafa.  Þeir eiga að álitsgefa.  Halló.

Ég óska ykkur öllum sem rekist hér inn, hvar í flokki sem þið standið, gleðilegs kosningadags.

Notið atkvæðisréttinn, það er okkar lýðræðislega verkfæri.

Ekki kjósa út í loftið.

Svo gleðst ég yfir hverju nýju atkvæði greitt VG.

Svo vona ég innilega að O komi manni að.  Manni sko, ekki heilagri veru.

Later.

Lokaorð formanna til kjósenda

Jóhanna; "do something"!

Af hverju kemur fólk út af leynifundi og segir að atburðarrásin í Icesave deilunni vera mun ævintýralegri en hægt var að ímynda sér?

Siv gerir það.

En má svo ekkert segja enda bundin trúnaði.

Fréttakona Moggans segir enda að þetta sé í véfréttastíl.

Þetta eru ekki upplýsingar.

Þarna varð ég hins vegar skíthrædd en fæ ekkert að vita fyrr en einhver rannsóknarnefnd ákveður að opna á sér munninn.

Er þetta ekki okkar mál?

Af hverju þessar hálfkveðnu vísur?

Jóhanna; do something.

Siv segir atburði ævintýralega

Hvað kaus hún?

 

Mér er illa við hræðsluáróður.

Enda er sjaldnast full innistæða fyrir honum. (Nei, ég er ekki að gera lítið úr ástandinu, það er skelfilegt).

Sigmundur Davíð reynir að hræða fólk til fylgis við flokkinn sinn (uss, munið ég er á óvinalistanum).

Lágt lagst þykir mér.

Hræðsluáróður gagnvart VG, til dæmis, hefur verið mikill og öflugur í gegn um tíðina og lengi vel virkaði hann á fólk.

Hann virkaði á meðan fólk hélt að Ísland væri ónýtt án Sjálfstæðisflokksins.

VG vildu prjóna sokka og týna fjallagrös í atvinnuskapandi skyni.  Gargandi fyndið í fyrstu þúsund skiptin.

Núna eru tímarnir breyttir.  Hrunið hefur gert það að verkum að fólk trúir ekki hverju sem er.

Hvorki fagurgala né spám um Ragnarök.

Ótrúlegur fjöldi hefur haft samband við mig í gegnum meil eða síma (bíða þess reyndar ekki bætur andlega þegar ég svara í símann með skuggalegri röddinni sem virðist ekki ætla að lagast í bráð), og segir mér að það ætli að kjósa VG.

Fólk sem ég hefði síst trúað til að kjósa lengst til vinstri.

Svo eru þeir sem segja: Hvað á ég að kjósa?

Ég segi: Kjóstu með hjartanu.

Og þá er það yfirleitt VG (stundum O) sem er efst á hjartalistanum.

Annars heyrði ég í konu í gær sem ætlaði að kjósa Sjálfstæðisflokkinn eins og áður, með hangandi haus þó, utankjörstaðar.

Henni sýndist hún sjá Björn Bjarnason og Hannes Hólmstein álengdar.

Hún sagði við mig: Ég kaus ekki íhaldið, ég gat það ekki þegar ég sá þessa menn.

Ég: En þeir eru ekki einu sinni í framboði.

Hún: Ég veit það; en þeir ERU Sjálfstæðisflokkurinn.

Og hvað kaus svo kaus svo konan?

Ég læt ykkur eftir að ráða í það.

Lalalalalala

Farið ekki að grenja HH og BB.

Sigmundur Davíð spáir öðru hruni

Heldur enn

Stjórnin heldur enn, segir Mogginn.

Alveg eins og hann hafi búist við hinu gagnstæða.

En betur má ef duga skal.

Allir að kjósa, kjósa rétt og ekki skila auðu.

Koma svo.

Stjórnin heldur enn

Hver er fallegust?

Ég er svo mössí, mössí í kvöld.

Algjör tilfinningakartöflustappa með smjöri.

Svo langar mig til að bresta í söng.

"Vorvindar glaðir", en ég sleppi því.

Örugglega sumarið held ég.

En eitt hefur vantað í kosningabaráttuna.

Það er fegurð kvenframbjóðendana sem hefur ekki enn verið metin, hvað þá um hana kosið.

Það á að raða konum upp eftir fegurð, fallþunga og aldri, þvert á flokka.

Konur eiga ekkert að þvælast í framboð, séu þær yfir/undir kjörþyngd, ómálaðar og með skjúskað hár.

Svo kjósum við auðvitað þann flokk sem á fallegustu konurnar.

Herra Ísland (hver sem það nú er) hefur gert þetta mögulegt.

Hann hefur útbúið lítinn og sætan samkvæmisleik þar sem við getum raðað stelpunum eftir útliti að okkar smekk.

Takk, takk, takk.

Og hér má kjósa framboðsherrana.  Jafnræði.  Ávallt jafnræði.

Hvað er málið?

Guðlaugur Þór reyndi að réttlæta milljónastyrkina sína af miklum móð á borgarafundi RÚV í gærkvöldi.

T.d. benti hann á að "umhverfið" hafi verið allt öðruvísi þegar hann tók á móti skömminni árið 2006.

Þá vitum við það, þetta er árinu að kenna.

En að kjarna málsins.

Bæði Guðlaugur Þór, Össur og Steinunn Valdís, hafa lýst yfir vilja til að opna prófkjörsbókhaldið.

En bara ef allir aðrir gera það líka.

Ég er auðvitað ekki með neina sérfræðikunnáttu á bókhaldssiði flokkanna en sem jóna út í bæ þá skil ég ekki alveg þessa hjarðhugsun.

Ég skal sýna þér ef þú sýnir mér.

Minnir mig á læknisleiki barnæskunnar.

Fyrir mér er málið einfalt.  Það er vont að liggja undir ámæli vegna hárra styrkja frá fyrirtækjum sem og einstaklingum.

Spurningin um hvað hafi átt að koma í staðinn vaknar hjá fólki og alls kyns fabúlasjónir fylgja í kjölfarið.

Af hverju ætti það að skipta Guðlaug Þór einhverju máli hvað Fiddi frambjóðandi hefur sett í bókhaldið hjá sér?

Er ekki aðalmálið að sýna fram á að viðkomandi sé með allt sitt á þurru án þess að kalla til heilu fylkingarnar til að gera slíkt hið sama?

Hvað er málið?

P.s. Og í lokin.  Það er ekki Sjálfstæðisflokknum til framdráttar að vera með óuppdregið klapplið á tíunda glasi með framíköll í sal eins og gerðist í gærkvöldi.  Eigið þið ekkert betra stuðningslið en þetta?

Segir 40 aðila hafa styrkt sig

Heyrðu mig kæri samflokksmaður og frú ráðherra

Fyrirgefðu Kolbrún Halldórsdóttir, en sem kjósandi VG og í góðum fíling vegna stöðu flokksins, má biðja þig að vera róleg á yfirlýsingumm, einkum og sér í lagi þegar þær eru ekki í takt við stefnu flokksins.

Ég get ekki orða bundist en mér finnst þessi annars frábæri ráðherra stundum eins og hún sé að ögra öllu og öllum.

Auðvitað viljum við láta leita að olíu og gera það eftir öllum kúnstarinnar reglum hvað varðar megnunarvarnir og allan þann pakka.

Svei mér þá Kolbrún, ef það þarf ekki að setja þig í geymsluna ásamt fleiri góðum mönnum fram yfir kosningar.

Hemja sig, hemja sig og hugsa.

Já, ég sagði það, hugsa.

VG ekki gegn olíuleit

Mikil óánægja og átök í bloggheimum

Upp er komin mikil óánægja í bloggheimum, nánast hystería, fólk er afskaplega reitt og sárt.

Þ.e. þeir bloggarar sem ekki komust á óvinalista Framsóknar en telja sig engu að síður hafa lagt vel af mörkum við aðgerð: "Var einhvern tímann til Framsóknarflokkur?"

Mikill metingur á sér nú stað á milli bloggara, fólk níðir skóinn hvert af öðru allt vegna téðs lista.

Ég persónulega er afskaplega stolt af veru minni á listanum eins og ég hef áður tekið fram, enda mesti heiður, ef ekki sá eini, sem mér hefur hlotnast svo langt aftur sem ég man.

Illugi Jökulsson er stórmóðgaður. Honum finnst réttilega að þessi heiður hafi átt að falla honum í skaut, en þarna voru margir kallaðir en fáir útvaldir.  Illugi minn, snædd þú garnir og blóðmör bara.

Þórarni Badabing, bloggskáldi, Byron-aðdáenda og blaðamanni, er heldur ekki skemmt.  Finnst hann eigi rétt á að vera á listanum, enda að mér skilst í öflugu ástar-haturssambandi við flokkshelvítið.

Páli Ásgeiri er líka misboðið sá ég inni hjá Illuga.

Og fleirum og fleirum.

Ég legg því við herráð flokksins sem mun funda að vanda í fyrramálið í flokksstöðvunum að bæta fólki á listann og lægja þar með öfund og átök meðal bloggara.

Nú er nefnilega þörf á að bloggheimur fari í merkilegri hluti.

Eins og t.d. að minna fólk á "afrek" Sjálfstæðisflokks og Framsóknar á þeim 12 árum sem eldheitt ástarsamband þeirra stóð.

Plís, kippiðessu í liðinn strákar mínir, þeru að koma khosssningar.