AÐ EIGA GÓÐA AÐ

Ég á fullt af góðum vinum.  Þá meina ég vinum sem vilja allt fyrir mig gera.  Þeir elska mig skefjalaust og gera allt sem þeir mögulega geta til að gera veg minn sem mestan.  Það er auðvitað af því ég er svo æðisleg og rosalega fjölhæf á mörgum sviðum. Ég er t.d. alveg rosalega góður kokkur.  Jamie, vinur minn Oliver, er alveg æstur í uppskriftirnar mínar og vill að ég fái minn eigin þátt um mat í Bretlandi.  Maðurinn lætur mig ekki í friði.  Ég er mjög góður jóðlari líka og stór hópur vina minna í Austurríki vilja að ég flytjist þangað og gerist atvinnujóðlari.  Þeir eru með mottóið: "Jenny má jóðla" að leiðarljósi og liggja á línunni og spyrja mig hvort ég ætli ekki að flytjast út en þeir ætla að borga til að fá notið hæfileika minna.  Svo er ég hógvær með afbrigðum.  Mannréttindasamtök á Indlandi vilja gera mig að yfirmanni samtakanna og gera mig í leiðinni að nýrri móður Theresu.

Þrátt fyrir þetta, er ég minn eginn PR-maður, af því ég er óhrædd við að koma mér á framfæri.  Ég held að það sé enginn til sem myndi geta selt mig betur en ég sjálf en ég hef auðvitað frá fyrstu hendi hvað ég er æðisleg.

Geir Sinatra Ólafsson er örugglega ekki heldur með PR-mann frekar en ég.  Hann á líka svo góða vini hann Geir og hógværðin er hans helsti kostur.

Lofjúgæs! 

Geir á góða vini

AÐ KVÖLDI DAGS!

Ég reyni oftast að gera samantekt á deginum áður en ég fer að sofa.  Ég ætla ekki að hafa um hann mörg orð.  Mér komu á óvart rosaleg viðbrögð sumra við færsluna mína hér fyrir neðan þar sem ég kalla ritstjórn Moggans til ábyrgðar á hlutum sem geta misboðið fólki alvarlega og birtast á blogginu.  Ég var hissa á að flestir gætu ekki fallist á það sjónarmið mitt og margra annarra, að einhver mörk þyrftu að vera varðandi hvað við getum sett á bloggið. 

En hvað um það, svo lengi lærir sem lifir.

Las að Katrín (www.katrinsnaeholm.blog.is) vinkona mín er að hætta að blogga.  Það finnst mér leiðinlegt ef rétt er.  Vona að hún endurskoði hug sinn.

Á morgun kemur Jenny Una Errriksdóttirrr til okkar og við ætlum að dekra hana til tunglsins og hafa svakalega gaman.

Skellti inn einni mynd af litlu gullmolunum mínum Jenny og Oliver.  Þau bæta, hressa og kæta.

Gúddnæt gæs!

FYRIRSAGNAFRASI DAGSINS ER..

..STELPURNAR OKKAR!  Dálítið einhæft finnst mér en ágætis tilbreyting frá hinum frasanum: STRÁKUNUM OKKAR.  Áfram kvennaíþróttir!

MÉR ER ÞAÐ ÞVERT UM GEÐ..

..að blogga um "fræga" fólkið, líka það sem frægt er að endemum en ég get ekki orða bundist núna.  Það er ekki oft sem hægt er að lesa þróun alkahólisma, afneitunina á ástandinu og reiðina út í þá sem vilja aðstoða, svo skýrt og vel eins og með því að lesa fréttir af Britney Spears.  Frá hárrakstrinum, inn og út úr meðferð dæminu á nokkrum dögum, útskriftina þaðan hvar hún lýsti því yfir að hún væri ekki alkahólisti og væri bara undir svo miklu álagi.  Nýjasta þróun stúlkunnar í sínum bullandi veikindum er að íhuga nálgunarbann á móður sína og varna henni umgengni við börn sín.  Þetta ætlar stúlkan að gera vegna þess að móðir hennar stuðlaði að því að koma henni í meðferð.

Þetta er ekki einsdæmi hjá virkum ölkum.  Eitthvað þessu líkt á sér stað á hverjum degi, einhversstaðar á meðal okkar en sjaldan gefst okkur tækifæri til að fylgjast með þeim fjölskylduharmleik sem alkahólismi stuðlar að.  Spears er ekki eini alkinn sem fer í meðferð og kemst að þeim vafasömu sannindum að vera ekki alki.  Ég vona að allir alkar, alls staðar  nái botni og beri gæfu til að gefast upp og leita aðstoðar. Ég hef verið svo gæfusöm og ég vil gjarnan sjá sem flesta rata heim.

Spears sögð íhuga nálgunarbann á móður sína

GÖNGUHÆF STÍGVÉLI Á LEIÐINNI?

Gönguhæf stígvél gætu verið á leiðinni til landsins með Nancy Sinatra innanborðs ef hinn Íslenski pabbi stelpunnar, unglingurinn Geir Ólafsson fær einhverju um það ráðið.  Hver er tilgangurinn?  Fyrir utan að vera dóttir Sinatra hefur konan átt 3 hittara um ævina og enginn þeirra getur talist vera einhver megabomba.  En Geir Ólafsson vill endilega fá hana og hefur unnið að málinu í 4 ár.  Sumir reyna að bjarga heiminum en sumir eru í ....  öðru.

Nancy Sinatra til landsins?

REYKHERBERGJUM Á LSH LOKAÐ...

 

..eða eru þeir alveg að missa það svona almennt og yfirleitt á Mogganum?  "Reykherbergjum á LSH verður lokað á næstunni"!  Þannig hljóðar fyrirsögnin að þessari frétt sem ég set hér á síðuna mín.  Þar sem ég er áhugamaður um málefnið (reykingar sko) fór ég gírug inn á fréttina og þar blasti við allt annað en fyrirsögnin segir til um, þe. fréttir af því að ekkert lægi fyrir um dánarorsök stúlkunnar sem dó um helgina við vægast sagt undarlegar aðstæður á LSH.  Það verður nú aðeins að gæta að því hvernig fólk vinnur vinnuna sína.  Dálítið ömurlegt, svo ekki sé meira sagt, þegar verið er að klúðra umfjöllum um persónulega harma fólks. 

Hvar er hin rétta "frétt" um mína harma ef reykherbergjum verður lokað á LSH?

Reykherbergjum á LSH verður lokað á næstunni

KRYDD

Þykir einhverjum athugavert við að Kryddpíurnar megi ekki verða óléttar, vegna væntanlegrar endurkomu þeirra?  Er í lagi að banna fólki að eignast börn?  Þetta er fegurðarsamkeppnis fyrirkomulag.  Kvenfyrirlitning streymir frá Simon Fuller, þeim arma manni.  Mér er sem ég sjái Fuller banna karlkyns skemmtikröftum sínum það sama.  En konur eru auðvitað ekki til neins brúks óléttar.  Það er löngu vitað.

Sveiattann!

P.s. Tek fram að ég þoli ekki þennan stelpukór svona músíklega séð en það skiptir að sjálfsögðu ekki máli.

Ekki fleiri börn

FLUGHRÆÐSLA MÍN..

 

..ágerist um helming þegar ég les svona fréttir.  Ég sem er á leiðinni til London í ágúst.  Jesúsinn minn, Maysa ég kem með skipi.

Það yrði ekki mikið eftir af undirritaðri ef einhver óður náungi myndi reyna að opna neyðarútgang á ferð.  Ég var að lesa að með því að tjá tilfinningar gæti maður dregið úr depurð og ofsahræðslu.  Ég fer í svona therapíu.

Gúddnætgæs!

Óður farþegi reyndi að opna neyðarútgang á flugi

ÉG HEYRI HLJÓÐ

..og er búin að gera í allt kvöld.  Það er sama hvar ég er í íbúðinni, ég heyri slitróttan són eins og í síma sem gleymst hefur að leggja á.   Ég er að missa það.  Er ég að verða veik á sinni ofan á alltsaman?  Einhverjum hlýtur að vera illa við mig og hefur plantað símanum á góðan stað hérna heima hjá mér og óstöðvandi sónninn gerir það að verkum að ég get ekki einbeitt mér.  Ég er faktískt ekki að grínast þrátt fyrir að ýkja stórlega.  OMG!

Nú myndi ég hringja á Símann ef ég væri ekki hjá Hive!

EFTIRLITSLAUS BÖRN

 

Ofsalega varð ég hissa og reið þegar ég heyrði starfsmann í Nauthólsvík lýsa því yfir að foreldrar skildu börn sín eftirlitslaus á ströndinni, þe kæmu þeim á staðinn og færu svo.  Sem dæmi tók þessi starfsmaður dreng sem pabbinn hafði komið með kl. 10 í morgunn og var ekki búinn að ná í hann kl. 16.

Ég hélt í alvörunni að þetta hefði breyst eitthvað á undanförnum árum, þe að börn væru ekki skilin eftir lengur,  við leiki, látin fara ein í sund frá 8 ára aldri og að þvælast ein út um allt.  Ég kalla þetta "þetta reddast" uppeldisaðferðina og mér hugnast hún ekki par.  Forgangurinn í þjóðfélaginu hefur ansi mikið breyst.  Réttlætingar á skorti samvista barna við foreldra sinna er að það þurfi að vinna svo mikið, til að geta lifað mannsæmandi lífi.  En hvað er mannsæmandi líf?  Er það ekki að búa sem best að börnunum okkar og þá á ég ekki við að fylla líf þeirra gerviþörfum sem þau hafa ekkert við að gera.  Ég veit að margir þurfa að virkilega að leggja á sig til að hafa fyrir salti í grautinn en margir reisa sér nú öllu hærri  minnisvarða, í formi fasteigna, bíla, ferðalaga og þ.h. 

Æi ég vill ekki vera svona mikill tuðari en mér ofbýður kæruleysið sem ég alltof oft verð vitni að þegar börn og gæsla á þeim er annars vegar.