VEÐURJÖFNUN

..er þetta ekki "veðurjöfnun"?  Aðeins að síga smá á sólina kannski?  Skelfing hefði ég ekki á móti smá tækifæri til að innipúkast.  Slakið á veðrið verður fínt.  Hafgola og víða léttskýjað.

Segi sonna

Góðan daginn annars ég er á bloggvaktinni en það eru ekki fréttir.  Kannski ætti ég að blogga minna í dag.  Ég gæti "bloggjafnað".  Hm.. nei elska það að bögga bloggvinkonur mínar og halda þeim við efnið. 

"Bloggvinkonujöfnun"? Segi aftur sonna.

Þokubakkar við norður- og austurströndina

ER HÆGT AÐ SKIPTA UM AFMÆLISDAG?

Satt best að segja er ég farin að verða dálítið nojuð varðandi stjörnuspána mína á Mogganum.  Fyrst fannst mér hún dálítið sniðug, svo var hún arfavitlaus þýdd og full af stafsetningarvillum og ég var farin að hafa gaman að því að hafa sumarstarfsmanninn Sigurrósu í gjörgæslu.  Nú er mér alveg hætt að lítast á blikuna.  Mín stjörnuspá er alltaf óskiljanleg, innihaldslaus og rugluð (sem er merkilegt þegar svona spár eiga í hlut, hm).  Ég held að Sigurrós sitji róleg inni á skrifstofu, lesi bloggið mitt og alla gagnrýnina á sjálfa sig og greiði mér fyrir með spá eins og þessari:

"Steingeit: Félagslífið stendur í miklum blóma, sem þýðir að þú þarft að standa við gefin loforð. Hefurðu gefið of mörg? Jæja, þú lærir af því fyrir næstu vinsældabylgju."

Samkvæmt þessu verð ég að lifa með eftirfarandi:

1. Af því ég mun stunda grimmt félagslíf verð ég að uppfylla loforð.  Halló; hvenær er samasemmerki á milli djammsins og loforða, hefur það ekki oft verið eimitt á hinn veginn? Á hún við að ég sé búin að vera lofa einhverju misjöfnu og hún spyr mig hvort ég hafi gefið of mörg.  Er hún að segja að ég sé einhver drusla?  Eða finnst henni ég feit og er að setja það í dulmál?  Ég er í víðtæku fári og veit ekkert hvernig ég á að snúa mér.

2. Ég mun læra að lofa ekki svona upp í ermi áður en NÆSTA vinsældabylgja skellur á.  Hvað þýðir nú þetta?  Er Sigurrós að segja að ég sé óvinsæl nú um stundir,  að ég muni hrapa á vinsældarlista Moggabloggs?

Veit einhver símann hjá bölvaðri kvensniftinni?

ÚPPS..

 

Ég er líka skíthrædd við hamingjuna.  Sendi stuðningskveðjur til þjáningarsystkina minna á Hólmavík.  Verð hjá ykkur í huganum.  (Eina leiðin, hef aldrei orðið svo fræg að koma á Hólmavík).

 

Óttaleg hamingja á Hólmavík

STOKKHÓLMUR OG KÖBEN Í HÁR SAMAN

 Nú eru Svíar og Danir komnir í hár saman vegna þess að Stokkhólmur hefur undanfarin 2 ár verið kynntur sem höfuðborg Skandinavíu.  Danirnir eru auðvitað ekki ánægðir með það, enda mikill heimsborgarabragar á Kaupinhavn og það get ég sem fyrrverandi íbúi í tvígang og sem dvalargestur borgarinnar, margoft, vitnað um.

Ég bjó í Svíþjóð og ól þar upp stelpurnar mínar og lít á landið sem mitt annað heimili.  En halló mina älskade svenskar, farið í raunveruleikatékk.  Stokkhólum-Köben, ekki samanburðarhæft.  Híhí.

Strangt til tekið erum við ekki í Skandinavíu en eigum að hafa eitthvað um þetta að segja.

Hvað um Þórshöfn í Færeyjum, geta ekki allir lifað með því?

Skandínavískur pirringur

SMÁ ÁMINNING..

.. til þín Banderas karlinn.  Auðvitað er gott að heyra að þú munir aldrei yfirgefa wæfið, þótt allt sé forgengilegt í heiminum og yfirlýsingar eins og "aldrei" og "alltaf" séu svolítið hæpnar en þú meinar örgla vel.  Ertu nokkuð í vörn strákur?  Búin að vera hlaupa eitthvað útundan þér ha?  Minni þig bara á að vera ekki of yfirlýsingaglaður darling.  Þú gleymir nefnilega alveg að reikna með að Mellí gæti yfirgefið þig, að minnsta kosti svona tæknilega séð. 

Sjáið þið fegurð mannsins?  Alveg gæti ég stráfallið fyrir þessum, þe ef hann héldi á leikfangabangsa en ekki þessu morðtóli.  Já leikfangabangsa eða dúkku.

Lofjúgæs!

Banderas ætlar aldrei að yfirgefa eiginkonuna

BLOGGVINATILTEKT..

...fór fram að venju en nú vildi svo undarlega til að ég tímdi ekki að henda út einum einasta manni (fyrir utan tvo sem eru löngu hættir að blogga).  Allt í einu er ég bara komin með fullkomna bloggvini. Alltaf er að bætast í hópinn enda ég vinsæl kona.  Reynum aftur, það eru alltaf að bætast við í bloggheima, flottir bloggarar og ég fer ekki varhluta af því.

Ég náði að ræsa þessa á myndinni og tók af þeim mynd í morgunsárið og má sjá sólina glenna sig þarna fyrir aftan.  Þessir félagar mínir voru arfa hressir úti í Gróttu í morgun vegna bloggvináttunnar við mig og að það er að koma helgi.

Í næstu viku verður hins vegar hent.  Því get ég lofað (híhí).

GULA FÍFLIÐ OG FJÖLSKYLDUFRÉTTIR

Ég vaknaði við það í morgun (lesist nótt) að gula fíflið hafði smeygt sér inn í herbergið mitt og það linnti ekki látum fyrr en ég vaknaði.  Þrátt fyrir að vera vel varin frá sólinni með þar til gerðum gluggatjöldum er hún svo mögnuð þessa dagana að hún smýgur allsstaðar inn.  Ekki ætla ég að fara að tala illa um sólina, en kona þarf svefn.  Ég gafst upp, játaði mig sigraða og sit nú hér og get ekki annað.

Næsta vika verður skemmtileg hjá mér því þá fer Jenny Una Errriksdóttirrr í frí frá leikskólanum og þar sem pabbinn er að spila á trrrommurrrnarrrr langt í burtu og mamman er að vinna þá fæ ég heiðurinn og ánægjuna af félagskap þessarar litlu dömu.  Í gær komst hún í sælgæti stúlkan sem átti að nota í kökuskreytingu og á örkotshraða náði hún að innbyrgða svo mikið af böngsum og fleiri ullabjökkum að klukkan var að ganga ellefu þegar hún sofnaði.  Hún sagði mömmu sinni að hún hefði barrra verrrið að prrófa nammið og mamma ætti ekki að vera með læti af því hún og Jenny væru binkonur.  Sú stutta sagði mér í símann í gær að Franklín hefði hent í hana sandi enn einn ganginn en hann væri samt góður.  Franklin henti einu sinni sandi í Jenny en hún "typcastar" stundum strákana og hann Olav sem klóraði hana "alleg óvart" einu sinni og er hættur í skólanum er samt enn að, en hann er samt líka góður, þrátt fyrir að vera sekur um hverja einustu rispu sem Jenny fær í ötulum leik sínum á leikskólanum af og til. 

Nú fæ ég helling af myndum frá London eftir helgi líka af honum Oliver, Maysunni og Robba því Andrea bestavinkona Maysunnar er að fara til þeirra og er búin að lofa undirritaðri að liggja á myndavélartakkanum.  Þannig að allir eiga að geta skilið að þessi kona hér hefur ástæðu til að bíða spennt eftir að helgin líði. 

Ekki sef ég af mér biðina, það er eitt sem víst er því sú gula ætlar að vera hér allsráðandi um helgina, þannig að ég blogga bara í staðinn á milli þess sem ég ætla að njóta góða veðursins. 

Síjúgæs!

 

Í LAUGARDAGSHÖLL FYRIR 37 ÁRUM

Þar var ég gott fólk á tónleikunum margfrægu með Led Zeppilin.  Enn þann dag í dag og eftir allt sem ég síðan hef fengið að upplifa, er fátt sem hefur toppað þessa tónleika þarna um árið.  Ég hef reglulega hitt fólk gegnum lífið sem talar upp stemminguna í höllinni þetta kvöld í júní fyrir svo löngu síðan.

Ég veit ekki hvort mig myndi langa á þetta "reunion" með Zeppelin.  Það gæti skemmt upplifunina af orginalnum.

Ó já, stairway to heaven var það heilinn.

Led Zeppelin að snúa aftur?

SUMARRÓS FALLIN Í FYRRA HORF

Moggasérfræðingurinn i stjörnuspám, hún Sumarrós,  hefur haldið sér nokkuð á mottunni undanfarið, allavega hef ég ekki séð ástæðu til að blogga um hana nýlega og ég var eignlega búin að sleppa af henni hendinni.  Svo þegar ég var að vafra um netið í hægðum mínum (!) þá rakst ég á stjörnuspá dagsins fyrir Steingeitina og ég fékk nett áfall:

"Steingeit: Þegar þú umfaðmar sjálfstæði þitt, færðu einmitt alla þá hjálp sem þú þarfnast. Þú eykur vinsældir þínar með því að mæta á samkomu. Og skapið verður betra."

Nú er þetta farið að snúast um persónunjósnir hjá sumarstarfsmanninum.  Hvað er hann að læða því að mér að ég þurfi að fara á samkomu?  Er hann með eitthvað bókhald yfir mína AA-fundi og er ég ekki í góðum málum í minni edrúmennsku? Ha!

Ég má ekki vera svona neikvæð.  Ætli það sé ekki bara verið að benda mér á að drífa mig á trúarsamkomu, það ku gera skapið mun betra.

Arg.

EIN SVONA HM.. NEÐANMITTIS FÆRSLA

Ég er óheppin að sumu leyti.  T.d. er ég fædd of snemma.  Ég er alin upp á þeim tímum þegar blaðsíðu 82 í heilsufræðinni (kynfræðsluopnan) var sleppt, vegna þess að kennarinn ákvað að hann hefði ekki taugar í að fara í gegnum klámfenginn textann.  Allan veturinn biðum við spennt, yrði síðan tekin?  Ætli maður yrði spurður út úr?  Þurfa að segja tíðir og frjóvgun?  Skoða opinberlega þverskurðarmynd af kvenlegi?  Ég man ekki hvort opnan hafi innihaldið þverskurðarmynd af karlkyns legi ég meina tippi.  Þetta var sem sagt á þeim árum sem við stelpurnar hefðum látist á staðnum hefðum við þurft að segja smokkfiskur.

Fræðslan var ekki mikil eins og sjá má.  Hvað gerir fólk þá í blindu fáfræðinnar?  Jú það fer út í verklegar framkvæmdir og stundar rannsóknarmensku um leið.  Ég man eftir nokkrum 15 ára stelpum í Vesturbænum, óléttum, og skýringarnar á hvernig það hefði gerst gátu hljómað eitthvað á þessa leið: Ég vissi ekki að það væri hægt að verða óléttur í fyrsta skipti sem maður gerði það (dýrkeypt fræðsla það), eða þá þessi: Hann lofaði að passa sig (mynduð þið ekki lofa öllum andskotanum á þessu stigi máls?).  "Gætni" elskhugans skilaði sér í óléttu og ég man eftir þeim í Neskirkju þegar ég fermdist, þau voru fermingarsystkini mín og hún var 132 cm á hæð og breidd, hann var jafnlangur eða svona sirka.

Ég var heppin... svínheppin, ég get ekki kallað óléttuleysi mitt fram að nítján ára aldri neitt annað.  Það var ekki mér að þakka, né heldur meðreiðarsveinum mínum að ég þurfti ekki að vafra um jöfn á hæð og breidd.

Skortur á umræðu um þetta neðanmittis (roðnukarl), fáfræði og fordómar hafa orðið til þess að ég mun aldrei getað staðið Ellý á sporði.  Ég á svo erfitt með orðfærið, en ég gæti klippt þetta allt út í pappa fyrir ykkur, vegna öflugrar reynslu minnar á þessu sviði.  Ekki hef ég neitt í hana Heiðu mína enda algjörlega ástæðulaust að reyna að feta í hennar spor (sko Heiðu) þar sem hún klobbar (þorrí, bloggar) brilljantlí og notar kyn-orð eins og mm-pillur.  Þetta útilokar mig algjörlega frá möguleikanum um að komast í 1. sæti Moggabloggs.  En hvað með það.  You can´t win them all.

Til dætra minna, systra og foreldra.  Ég sagði þegar ég byrjaði að blogga að ég myndi ljúga reglulega á blogginu.  Hafið það í huga.

Síjúgæs!