Endurkoma krúttflokkana?

Við erum í djúpum óhreinindum eftir hrunið við Íslendingar, ég ætla ekki að gera lítið úr því.

En eftir að hafa fylgst með þinginu í síðustu viku og heyrt dómadagsspár formanns Framsóknarflokksins þá fer ég að brosa þegar ég les fréttir þar sem segir af bölsýnisræðum mannsins.

Þetta er úlfur, úlfur, heilkennið á sterum og amfetamíni ef þið vitið hvað ég meina.

Það er hægt að ofkveða góðar vísur svo svakalega að maður fer að taka þeim sem skemmtilegu tómstundagamni.

Ég meina það, samkvæmt SDG þá erum við svo illa stödd með þessa ríkisstjórn "sem hefur ekkert gert á allri sinni löngu starfsævi" að við eigum okkur ekki viðreisnar von.

SDG vill stjórnina frá.

Og hver á að koma í staðinn?

Jú, sko sjáið þið til, væntanlega hinir fersku flokkar SDG og Bjarna Ben.

Algjörlega síungar nýjungar eins og skáldið sagði forðum daga þegar hann auglýsti Vörumarkaðinn.

SDG er greinilega að láta sig dreyma um endurkomu krúttflokkanna sem eru báðir alsaklausir af öllu því sem úrskeiðis hefur farið hér síðast liðinn 18 ár eða svo.

Þetta finnst mér sjúklega fyndið enda ég með sóðalegan húmor.

Kæri formaður, kannski trúa flokksmenn þínir þessu rugli í þér, en ég segi satt og lýg því ekki að þrátt fyrir kreppu og almenna óró í skelfingu lostnum sálum okkar þá er held ég enginn tilbúinn til að treysta Framsókn og Sjálfstæðisflokki fyrir örlögum þjóðarinnar.

Amk. ekki enn.

En ég vona að SDG haldi áfram að tvinna saman og semja fleiri blóðugar hryllingssögur og tíunda fyrir okkur að allt sé á leið til helvítis.

Mér er farið að þykja þær svo rosalega skemmtilegar.

Eins og maður sé ekki meðvitaður um það tventíforseven hvar við erum stödd?

En einhvern veginn held ég það tími kraftaverkanna sé ekki upp runninn.

Þangað til þá ætla ég persónulega að fylgjast vel með.

Á meðan mun ég hafa kviðristukittið mér innan handar og sverðdansinn undir geislanum, svona til að taka úr mér versta aulahrollinn þegar Sigmundur Davíð Gunnlaugsson þrumar yfir þjóðinni með sinni bassaröddu.

Arg.

 

„Fjarar undan stjórninni"

Ekki húmor fyrir þessu, kæri ríkissaksóknari

Við Íslendingar erum öðruvísi en allar aðrar þjóðir.

Við erum svo öðruvísi að enginn getur skilið okkur.

Best, fallegust, sterkum, stórust og klárust.

Ofboðslega er ég þreytt á þessari "spes-veiki".  Hún hefur nú þegar gert okkur að fjárglæframönnum um allan heim og komið okkur nánast á höfuðið.

Yfir Kastljósinu í gær henti ég mér fyrir björg, risti mig á kvið og gerði mig höfðinu styttri yfir forheimskun Íslendingsins.

Ólafur Arnarson sagði nefnilega eitthvað á þá leið að Eva Joly skildi sennilega ekki íslenska réttarsýstemið, það væri nefnilega öðruvísi en það franska.

Svo gæti Eva ekki talað íslensku og hefði þar af leiðandi ekki skilning á íslensku samfélagi.

Ég skil Ólafur; Eva Joly sem hefur rannsakað mál um allan heim getur auðvitað ekki skilið okkur Íslendinga og hvað hentar okkur þegar við rannsökum bankahrunið sem b.t.w. hefur áhrif á fólk í mörgum löndum.

Svo fannst mér það grátlegt og í leið sjúklega fyndið þegar Ólína Þorvarðardóttir ásamt Ólafi, óskapaðist yfir því að Eva Joly færi í Kastljós ÁÐUR en hún talaði við Dósmálaráðuneytið.

Nú veit ég að hún er búin að tala við hvern kjaft sem málið varðar, það var ekki hlustað á hana.

Í leiðinni þá fagna ég því að hún skuli tala beint til okkar almennings því það er kominn tími til að við séum með í að móta örlög okkar, af því við þurfum að standa straum af bankaráninu og það fyrir allan peninginn.

Við erum hætt að láta að stjórn.

Reyndar mættu íslenskir ráðamenn taka Evu til fyrirmyndar og tala tæpitungulaust.

En Eva Joly er okkar kona, við treystum henni betur en öllu íslenska batteríinu samanlögðu.

Og að lokum.

Helvítis hrokagikkir eru íslenskir embættismenn.

Valtýr toppar samt með því að gera grín að Evu Joly.

Við höfum ekki húmor fyrir því kæri ríkissaksóknari.

Far þú og gargaðu þig hásann.

Ólína og Ólafur.

Valtýr vill ráða Evu Joly

Og hvað SDG?

Ég held að það sé ekki til sú manneskja á Íslandi sem ekki er öskuvond yfir Icesave-málinu og það geta heldur ekki verið margir sem með glöðu geði vilja borga fyrir glæpamennina.

Við erum öll sammála um það.

Áðan horfði ég á Kastljós og horfði á Sigmund Davíð hrópa reikningsformúlur yfir Þóru og Steingrím J.

Hvað er Framsóknarflokkurinn að hugsa?

Það er ef hann er að því á annað borð?

Hvað á það að þýða að hafa formann sem er algjörlega óábyrgur í tali og lætur eins og götustrákur?

Ég meina, ég hef ekkert á móti strákum á götunni en mér finnst það ekki alveg passa að tala með þeim hætti sem maðurinn gerir.

Reyndar er hann reynslulítill og barnungur en só?

Hann ásakar fólk um skort á heiðarleika hægri-vinstri og talar um að borga ekki og hefur ekkert fram að færa annað en gífuryrði.

Ég beið nefnilega spennt yfir að fá að heyra hvaða aðferð til lausnar deilunni SDG væri með uppi í sinni Armaníermi.

Jú, hann hafði eftirfarandi lausn.

Við leysum þetta með dómstólaleiðinni og ef þeir vilja það ekki þá er það þeirra mál.

Jabb, þetta heitir að vera ábyrgur stjórnmálamaður í Framsóknarflokknum.

Verði þeim að góðu.

Er það nema von að þessi flokkur hafi löngum verið í útrýmingarhættu.

Þeir eru með svo glataða formenn.

Þ.e. eftir Steingrím sem var ekkert annað en stórkrútt með hjarta úr gulli.

Blekkingar, heimska og hótanir

Stórmál

Maður deyr í vörslu lögreglu.

Fremur sjálfsmorð.

Svo horfði ég á fréttir á báðum stöðvum.

Ekki orð um málið.

Mér finnst þetta stórmál.

Er ég ein um þá skoðun?

Fannst látinn í fangaklefa

Framsókn, Framsókn, dæs

Það er verið að ræða þingsályktunartillöguna um inngöngu í ESB í þinginu.

Fátt kemur á óvart.

Sjálfstæðismenn í skotgröfunum en eru þó með skoðun á málinu þó það megi segja að djúpt sé á henni.

Mr. Bertelsson sló í gegn hjá mér.  Ég er að verða ofboðslega höll undir Borgarahreyfinguna, er farin að hafa áhyggjur af þessu svei mér þá. Hvað um það, Þráinn kom sá og sigraði.

En ég hef áhyggjur af Framsókn sem situr uppi með prótótýpu manns sem líður af athyglissýki, málefnafátækt og lýðskrumsgreddu á formannsstóli.

Það er sorglegt að sjá þessi asnalæti í manninum sem hljóta að stafa af biturð vegna útkomu í kosningum.

Sigmundur Davíð; ekki láta þjóðina líða fyrir biturðina, dílaðu við þetta.

SD vildi ALLA ráðherra í salinn til að hlusta á fagnaðarerindið sem hann flutti, sem einkenndist mest af dylgjum og útúrsnúningum.

Sama með (addna) Eygló Harðardóttur (addna) sem virðist líta á sig sem sjálfskipaðan skemmileggjara málefnalegrar umræðu um þetta stóra mál sem önnur.

Mér er ekki hlátur í hug og ég vil beina því til allra þingmanna að hafa í huga að það er þjóðin sem mun segja af eða á varðandi inngöngu í ESB.

Haldið málinu ekki í gíslingu með málfundaæfingum og skítkasti.

Afgreiðið málið í nefnd.

Við höfum ekki efni á þessu karpi.

Við viljum fá að vita hvað er í boði.

Arg.

Æði margir ráðherrar í húsi

Dugir ekki að sitja heima og lesa?

Dugir ekki að sitja heima og lesa sagði stórskáldið um leið og hann klæddi sig í bomsuúlpuna og vaðstígvélin og rauk í fjárhúsið.

Það dugir víst að sitja heima og lesa.  Mér að minnsta kosti.

Í gær horfði á hryllingsmynd eða krimma, en því miður þá var það ekki skálduð glæpasaga heldur blákaldur raunveruleikinn um einkavæðingu.

Gaddagylfa: Snæddu innmat.

Myndin á R.Ú.V. í gærkvöldi er skylduáhorf þar sem við erum komin undir stjórn AGS.

Svo gat ég ekki sofnað.

Og ég teygði mig í bók sem ég var hálfnuð með.

Það var þessi hér:

Það er skemmst frá því að segja að þessi glæpasaga er svo spennandi að ég las hana til enda.

Gleypti hana í mig.

Ef þessi verður ekki kvikmynduð með þöglu týpunni með titrandi neðrivör, a la Bruce Willis í aðalhlutverki, þá er ég illa svikin.

Ég þoli reyndar ekki þann karl en það kemur ekki að sök því ég forðast eins og heitan eldinn að horfa á bíómyndir gerðar eftir bókum sem ég hef lesið.

Ég bý mér til mitt sögusvið, mína leikmuni, mitt fólk og ég læt ekki eyðileggja það fyrir mér af fólki sem hefur allt aðrar hugmyndir.

Bókin: Einfarinn og ofurtöffarinn Jack Reacher á hvergi heima og notar hvorki síma né tölvupóst. En þegar hann fær undarleg dulmálsboð gegnum bankakortið sitt veit hann hvaðan þau koma; frá félaga úr rannsóknarsérsveitinni sem hann eitt sinn stýrði. Tíðindin eru ógnvekjandi; einn úr hópnum hefur hlotið skelfileg örlög og flest hinna virðast horfin. Þau sem eftir eru safnast saman í Los Angeles til að grafast fyrir um örlög félaga sinna en flækjast brátt í þéttriðið net samsæris þar sem óþekktur óvinurinn er alltaf skrefi á undan.

Eftir þessa gjörninga, áhorf og lestur, er ég með bauga niður á kinnar og með timburmenn sem eru EKKI verðskuldaðir.

Því ég drakk ekki dropa.

Í rigningunni og í ferðalaginu um komandi helgi ráðlegg ég fólki að háma í sig spennubækur.

Þessi er kjörin í verkefnið.

Úje.

Ingvi Þór hlaut gaddakylfuna

Frávik vel þegin

 

Ótrúlegt hvað vel hefur tekist til að koma staðalímyndum inn í höfuðið á okkur.

Hvernig fólk á að vera, líta út, klæða sig, mála og greiða til að það standist kröfur okkar.

Evrópa (ef ekki heimurinn allur, svei mér þá) fór á límingunum yfir Susan Boyle þegar hún söng vel skaplega í Britain´s Got Talent um daginn.

Símasölumaðurinn og Susan eru frávik.

Hann var feitur, feiminn, með skakkar tennur, gekk með veggjum og gat svo sungið óperur eins og engill.

Susan er búttuð, með hár eins og hún búi í sænska vindvélarherberginu og hún er plebbi.  Mögulega jómfrú.  Hversu einstakt er það ekki í bransanum?

Sussí vinkonan komst áfram, þrátt fyrir að hafa ekki látið frissa á sér hárið og klæði sig eins og hún hafi ótakmarkaðan aðgang að klæðskerum Bretadrottningar.

Hvað liggur að baki?

Hún syngur ekki eins og Maria Callas, en það mætti halda að hún væri Jenny Lind endurborin.

Sko af því að útlitið passar ekki við röddina því meiri aðdáun yfir barka Sussíar.  Fagur barki, álappaleg kona.

Ég er sannfærð um að hefði Susan Boyle verið standard í útliti, þ.e. í kjörþyngd eða minna, verið korrekt í tauinu og máluð upp á þrjá og þurrkloft, þá hefðu öll þessi læti í kringum hana aldrei orðið.

Þó sennilega hefði hún komist áfram, hún syngur eins og engill.

Hvað gerist svo eftir makeóver hjá konunni?

Þegar útlitið á eftir að passa við röddina?

Ætli hún endi ekki sem primadonna með attitjúd og fari jafnvel á séns eða eitthvað?

Þá mun markaðsgildi Susan Boyle snarlækka.

Djöfull sem þetta er erfiður heimur að búa í.

Susan Boyle komin í úrslitin

Hví plástur?

Ég sá mann í fréttunum áðan sem ég veit engin deili á en hann eða hluti af honum vakti óskipta athygli mína.

Hann var með plástur yfir eyrað, sko yfir hlustina og út á kinn.

Algjörlega glataður staður til að setja plástur á, ekkert undir.

Ég hugsaði; af hverju er maðurinn með plástur þarna?

Er hann að koma í veg fyrir að kuðungurinn rúlli út?

Er þetta hlið sem á að varna flugum inngöngu í eyra?

Þetta er enn óráðin gáta.

Og nú get ég örugglega ekki sofnað í kvöld.

Það kemst ekkert annað að í hausnum á mér.

Fjandinn sjálfur.

Kjólar syngja ekki

Ég sagðist hafa bloggað mitt síðasta blogg um Evróvisjón á þessu ári, en var auðvitað að ljúga.

Samt lagði ég ekki upp með það, ónei.

Málið er að önnur hvor frétt á miðlunum þessa dagana eru tilvitnanir í hina og þessa út í heimi.

Einum þótti kjóllinn hennar Jóhönnu eins og brúðarmeyjarkjóll frá áttatíuogeitthvað.

Annar hélt að gjaldþrota slæðukaupmenn hefðu komist í saumavélina með lagerinn og látið það eitt vera markmiðið að klára uppsafnaðan slæðuvanda í kjólinn (ókei, ekki alveg en ég túlka þetta svona).

Það nýjasta er að einhverjum Breta sem kommenterar á keppnina fyrir BBC finnst Jóhanna Guðrún svo lík Scarlett Johansson.

Fyrirgefðu Breti en Jóhanna Guðrún er milljón sinnum fallegri en Scarlett (mér er misboðið).

Varðandi kjólinn þá slakið á umheimur.  Hann kom að minnsta kosti ekki í veg fyrir frábæra frammistöðu okkar konu á sviði.

Kjólar syngja ekki og það sem meira er um vert og mætti skila til annarra (sumra) keppenda í þessari uppákomu, að brjóst, læri og kynfæri gera það ekki heldur.

Þú vinnur einfaldlega ekki Evróvisjón með því að láta sjást í klobba.

Hvað er annars að mér?

Er ég að breytast í Evróvisjonfífl?

Mér gæti ekki staðið meira á sama um þessa keppni nema til að láta hana fara í mínar fínustu.

En svo kom Jóhanna Guðrún og sló mig út af laginu.

En í guðanna bænum Moggi og aðrir miðlar, keppnin er búin gætum við fengið frið þar til að ári?

Þá skal ég blogga um þessa keppni eins og enginn sé gærdagurinn.

Að tala um að blóðmjólka og gott betur?

Jabb, það er að minnsta kosti á hreinu.

Líkti Jóhönnu við Scarlett Johansson

Þau snertu í mér hjartað

Ég verð að viðurkenna væmni mína og hrifnæmi við ákveðnar aðstæður.

Sko, neðri vörin var farin að titra, hjartað í mér hoppaði innra með mér og ég táraðist af gleði yfir öllum frábæru nýju þingmönnum þjóðarinnar.

Og þá er ég ekki að tala um Sigmund Davíð sem er illa haldinn af FEGAB (farðu ekki að grenja af biturð).

Ég meina sko að maðurinn er svo sár yfir að þurfa að skipta um þingflokksherbergi, yfir að vera ekki í ríkisstjórn, yfir að hafa ekki getað komið 20% leiðinni á og bjargað heiminum.

Er Framsóknarflokkurinn allur í leikmununum?  "The frontside only" eins og skáldið sagði?

En ég ætla ekki að eyða orðum frekar í þetta háhaldraða ungmenni Framsóknarflokksins.

Nánast allir nýliðarnir hreyfðu sem sagt við hjartanu í mér, gáfu mér von.

Ég vil biðja þá, hvar í flokki sem þeir standa, að opna glugga Alþingis upp á gátt og hleypa inn tæru lofti.

Ég held að ég taki Birgittu Jónsdóttur og Guðfríði Lilju Grétarsdóttur í guðatölu í smá tíma.

Amk fram að miðnætti.

En annars er persónudýrkun harðbönnuð hér á kærleiks nema að hún beinist að mér.

Sjúhúbbílúbb.

Átta jómfrúrræður í kvöld