Í vondum lungnamálum

Á læknavakt fyrir einhverjum klukkutímum.

Læknir: Þetta er skelfilegur hósti sem þú ert með.

Ég: Já finnst þér það? Það var sko þess vegna sem ég er komin hingað.  Er með hita og hósta.

Læknir: Þú reykir (ekki spurning, fullyrðing).

Ég: Jább.

L: Hvað lengi?

Ég: 34 pakkaár (ekki gamall læknaritari fyrir ekki neitt).

L: Það er rosalegt.

Ég: Jább.

L: Þú verður að hætta þessu, þú ert með fast í lungum og með bullandi bronkítis. 

Ég: Jább.

L: Hvenær?

Ég: Bráðum en ég reyki mikið minna núna, bara örfáar.

L: Hvað margar (hann frussar þessu út úr sér)?

Ég: Svona tólf á sólarhring.

L: Þetta er náttúrulega ekki hægt.

Ég: Jú og ég fer létt með það.  Fyrir tveimur mánuðum reykti ég tvo pakka.  Ég er öll að koma til.

L: Þetta gengur ekki, þú verður að hætta að reykja.  Taktu þetta lyf hérna sem ég skrifa upp á og farðu nú að hugsa þinn gang, hugsaðu um lungun kona (hér var hann alveg intú itt).

Ég algjörlega í rusli yfir að gera manninum þetta: Fyrirgefðu.

L: Hrmphf....

Svo lufsaðist ég heim með hausinn undir hendinni og ég skammaðist mín fyrir að vera á lífi með þennan einbeitta brotavilja til margra ára og ekki enn lát á.

Farin í smók.

Úje

 

Einhverju við að bæta?

Er einhverju við þessa frétt að bæta?

Já auðvitað.

Eins og t.d. þessu.

Nú eða þessu.

Þessi hérna er svo skyldulesning.  Til að halda okkur í raunveruleikanum.

Ég held að ég láti þetta duga í bili.

Farin að sýsla við verkefni.

Súmítúðebón.

Later.

Mótmæli á Austurvelli í dag

Kreppuspjall á kærleiks

Edda Rós Karlsdóttir, sagði á félagsfundi SVÞ í morgun að fyrsta verkefni stjórnvalda til að koma Íslendingum út úr kreppunni væri að koma krónulufsunni í gang.

Það eru allir reiðir þessa dagana og það er ekkert skrítið við það.

En afhverju er verið að beina reiðinni að blásaklausu krónukrúttinu sem hefur ekkert gert af sér nema að vera til?  Ekki  henni að kenna að hér séu fíbbl að möndla með´ana.

Króna var stór nammipeningur þegar ég var barn, túkallinn var heví djútí fjársjóður.

Skamm.  Ekki við krónuna að sakast.  En við eigum að nota hana í skartgripi og fara í evru.

En svo að krepputali dagsins hér á kærleiks.

Ég: Kreppan er heldur betur búin að setja strik í reikninginn.  Ég sem ætlaði til London að heilsa upp á barnabarnið og kaupa jólagjafir.  Fjárinn sjálfur bara.

Húsband ákveðinn: Það er út úr mynd.  Ekki séns að við höfum efni á því.

Ég: Ég veit það en ég ætlaði áður en delinkventarnir fokkuðu upp mínum fjárhag og fjárhag íslensku þjóðarinnar.  Ég gæti lamið þá.  Hreinlega slegið þeim saman. 

Húsband: Láttu ekki svona, það þýðir ekkert að ergja sig á þessu, við förum seinna.

Ég: Seinna, seinna, seinna, það er alltaf allt einhverntíma seinna, ég vil fara núna" (búin að tala mér til hita).

Húsband: Dona, dona, ástin mín, við getum skroppið á Þingvöll á sunnudaginn og tekið með okkur nesti. (Hann glotti viðurstyggilega).

Ég: Auli.

Kreppan er að kroppa í mitt dásamlega skapferli

Ég er að verða heiminum hættuleg.

Svo langar mig ekkert til London, nei ég vil ekki sjá það. 

Ég vil fara og hitta aðra hryðjuverkamenn í mínu fríi.

Mér líður vel með mínu fólki.

Og hana nú!

Koma „krónulufsunni" í gang á ný

Burt með spillingarliðið

Félagar úr VR stóðu fyrir utan skrifstofur VR í hádeginu.

Þeir voru að mótmæla siðleysinu í formanni og stjórn félagsins.

Þeir ætla að halda því áfram þangað til að liðið segir af sér.

Mikið rosalega er ég ánægð með þetta fólk.  Ég er reyndar ánægð með fullt af fólki þessa dagana, það er nefnilega vöknun í gangi.

Þyrnirósarsvefninn hefur verið rofinn, fólk er að vakna og því líkar ekki það sem blasir við enda ekki ástæða til.

Á morgun verður mótmælt á Austurvelli kl. 15,00.  Ég er þess fullviss að fleiri og fleiri munu mæta, þetta er bara byrjunin.

Borgarafundir verður í Iðnó á laugardag kl. 13,00.  Það er að mæta þangað fyrst og svo beint á völlinn kl. 15,00.

Svo var tölvuóða tónskáldið með hugmynd, kíkið á hana.

Farin að þvo upp, taka til á lóð og vinna álfur.

Later!

Allir saman nú, burt með spillingarliðið.

Klanið burt

Ég hníg ekki til jarðar í aðdáunarkrampa en..

Ráðuneytin hafa gripið til sparnaðaraðgerða.

Það hefur meira að segja verið dregið úr utanlandsferðum eins og kostur er.

Og nú eiga allir að henda sér á skeljarnar, horfa til himins og klappa fyrir batteríinu.

Fyrirgefið en ég er ekki að missa mig í hysteríu vegna eðlilegra hluta eins og sparnaði í ráðuneytum, það er svo löngu tímabært. 

Þannig að ég sit hér hrifningsvana og hugsa með mér, loksins lyfti einhver rassi í ráðuneyti.  Hvað ferðalög varðar finnst mér útstáelsið á "sumum" duga íslensku þjóðinni vel fram á næsta áratug.

Og nei, ég er ekki skilningsvana á þeirri staðreynd að ákveðin ferðalög um heiminn eru nauðsynleg.

Það er einfaldlega þannig að við erum ríkið og við sem fyrirtækiseigendur þurfum að draga saman rétt eins og við herðum sultarólina á heimavelli.

Reyndar hefur bullað í mér heilbrigð reiði vegna einkaþotuleigu og annars hégóma fyrr á árinu.

En kannski var flottræfilshátturinn og neysluhyggjan smitandi, hvað veit ég?

Ég er með allskyns sparnaðaruppástungur fyrir starfsfólk mitt/okkar í ráðuneytunum.

Við erum bláfátæk þjóð af efnahagslegum gæðum og höfum ekki efni á bruðli.

Ódýrari ráðherrabíla og fólk flytur sig sjálft á milli staða. 

Bæbæ utanlandsferðir og Björn Bjarnason situr heima það sem eftir lifir árs.  Maðurinn er búinn að vera eins og landafjandi út um heim á þessu ári.

Fækka sendiráðum all verulega.  Við erum þrjúhundruðþúsund manna þjóð.  Get a live and a grip.  Þetta sendiráðsbruðl er út úr öllu korti.

Niðurskurður í veislum á vegum hins opinbera og út með áfengið.  Kostar peninga.  Kaffi dugar fínt, en það má gera á þessu ákveðnar undantekningar.

Aðstoðarmenn út, ég held að þeir hafi allir fimmhundruðþúsundkall á mánuði.  Ég efa ekki að það eru full not fyrir þessa starfsmenn en nú er kreppa við höfum ekki efni á svona fíneríi.  Umboðsmaður Íslands er orðinn opinber starfsmaður til aðstoðar einhverjum íhaldsþingmanni.  Ráðinn í miðri kreppu. Draga til baka takk.

Nú hefur einhver grafið upp laun konunnar í Landsbanka, en hún er með tæpar tvær á mánuði (1.950).  Bæði hún og Birna Glitnis eru með afnot af glæsibifreiðum.

Ætla ráðamenn, í þessu tilfelli viðskiptaráðherra, aldrei að læra?

Við höfum ekki efni á þessum flottræfilshætti bankatoppa. 

Arg.

Dregið úr ferðum ráðuneyta

Símtólið tek

 

Furðulegt hvað ég er stundum liggjandi í símanum.

Ég er reyndar orðin frekar afhuga símtólum eftir að hafa verið með himinháa símareikninga til margra ára.

Lengi vel var ég í afneitun á eigin sök í málinu. 

Þegar stelpurnar mínar voru enn heima var ég handviss um að þeim væri um að kenna.  Þær lágu í símanum ég hins vegar var örsnögg og hringdi sjaldan.  Já ég trúði því.  Afneitun er dásamlegt aðferð til að hanga í ósiðunum.

Stundum hélt ég að sími nágrannans væri tengdur inn á minn og ég væri að borga fyrir alla hans símaþjónustu og líka fyrir hans leiðinlegu fjölskyldu.  Mér var ekki skemmt.

Ég var jafnvel tilbúin að trúa því að það væri starfsmaður á gamla Landsímanum sem væri að ofsækja mig.  Ég var í alvöru að velta því fyrir mér, reikningar voru óskiljanlega háir.

Við fyrrverandi áttum mörg, innihaldsrík og gefandi rifrildi vegna símareikninga.

Maðurinn var með tómar andskotans ásakanir í minn garð.  Ég var helsærð vegna mannvonsku hans.

Svo fóru dæturnar að heiman en símareikningurinn fitnaði samt eins og púkinn á fjósbitanum.

Það var samt ekki mér að kenna.  Ég skildi ekkert í þessu.

En nú orðið er ég orðin pen.  Reikningarnir eru vel ásættanlegir og allir eru glaðir.

Ég fór líka yfir í nýtt símafyrirtæki þar sem það kostar ekki hvítuna úr augum mér að lyfta upp tóli.

En vípsívú um leið og ég var komin með ódýra símaþjónustu þá hætti ég að nenna að halda partí í gegnum símann.

Engin spenna í því lengur, nú eða þá að ég hef loksins fullorðnast.

Heimasíminn var stundum læstur inn í skáp þegar ég var unglingur.

Mér lá ógeðslega mikið á hjarta, fullt af stöffi til að kryfja til mergjar.

Ég er svo fjarskiptatæknióð að ég er ein af þeim sem grét af gleði þegar gemsarnir komu á markaðinn.  Möguleikarnir hlupu á milljónum.

Ég er (var) kontrólfrík.  Fyrir okkur sem þannig erum innréttuð er sími í tösku eða vasa fjölskyldumeðlima ein besta uppfinning síðan kveikt var á fyrstu perunni.

Ég gat hringt í stelpurnar mínar og húsbandið any time og tékkað hvort allt væri í lagi.

Ég held að tilurð gemsans hafi ekki glatt þau neitt sérstaklega þegar ég kynntist notkunarmöguleikunum.

Þau eru hætt að kvarta - en bara vegna þess að ég er orðin leið á eftirlitinu.

Nennessueggi ég sver það.

En í kvöld talaði ég í símann - í rúman klukkutíma.

Mikið djöfull var það hressandi.

Úje.

Aldrei leiðinleg stund

 

Maturinn hækkar og hækkar.

Hvað er til ráða spurði ég vinkonu mína og húsband þegar við sátum úti í smók áðan.

Hm... sagði eiginmaðurinn, á maður að fara að borða unnar kjötvörur aftur?  Það er svo óhollt.

Við reyktum aðeins meir og það sá ofan í svört lungun þegar við soguðum nautnalega að okkur eitrið.

(Innskot frá mér og hefur ekkert með þessa matarfærslu að gera).

Vinkona mín var að fara heim að elda medisterpylsu og kartöflumús.

Húsband varð dreyminn í framan og velti fyrir sér hvort það væri ekki kominn tími á medister eftir hollt mataræði undanfarinna ára.

Ég: Jú eða bjúgu.

Hann: Bjúgu, nei, þau eru svo feit og lufsuleg.  Öll plöstuð og svona. Með fitukúlum í.

Ég: Heldurðu að medisterinn sé úr eðalafgöngum?

Nei, sagði húsband en stundum er matur misógeðslegur.

Hvað um það við fabúleruðum svolítið um hvað væri hægt að hafa í matinn á krepputímum fyrir ótýndan pöbul sem við jú tilheyrum (þrátt fyrir að vera bæði af konungum komin, en  enginn er neitt að láta mann njóta þess hér í þessu smalasamfélagi).

Ég velti upp hugmyndum sem honum leist misvel á:

Svið með rófustöppu, kjötbollur í brúnni sósu, reyktan fisk, kálböggla, lifrarpylsu og sagógrjónagraut, sætsúpu með tvíbökum, plokkfisk og hræring.

Hann var alveg sáttur við þessa upptalningu að undanskilinni lifrarpylsu, kálbögglum og hræring.

Go ahead sagði hann á íslensku.

Ég sagði Can´t do á ensku því af þessum lista borða ég sætsúpu, mögulega svið og mögulega kjötbollur.

Hann: Af hverju varst þú þá að telja þetta upp.

Ég: Af því ég hef ekkert betra að gera. 

Svona er hjónabandið, aldrei leiðinleg stund.  Akademískar samræður okkar hjóna ættu að vera til á bók.

Ekki einu sinni í kreppunni missum við okkur í að ræða hversdagslega hluti.  Aldrei.

Miklar hækkanir á matvöru

Djöfuls glæpajurtin

Svona á að gera þetta.  Húrra fyrir íslenska dómskerfinu.

Mannandskoti nokkur þrídældi bensíni á bílinn sinn fyrir samtals 7.508 krónur og stakk af án þess að borga.

Haldiði að það sé?

Djöfuls glæpajurtin.

Hann fékk 45 daga skilorðsbundið fangelsi helvítið áonum.

Skilaboðin eru skýr.   Glæpir borga sig ekki á kærleikseyjunni.

Á Íslandi þrífast öngvir bensínþjófar, hvað þá hangikjötlærisþjófar.

Mitt auma hjarta gladdist yfir þessu.

Tökum smákrimmana, merjum þá, berjum þá og látum þeim blæða.

Svo stórkrimmarnir geti haldið áfram að dunda sér við að taka þjóðina í görnina.

Afsakið á meðan ég rækta ákveðna "boddíkal fúnksjón" lútandi yfir klósettskálina.

Blóta ég of mikið?

Jájá, mér er bara svo misboðið fyrir hönd bensínstöðvarinnar og Sláturfélags Suðurlands.

Irrrrrrrrrrrr

BURT MEÐ SPILLINGARLIÐIÐ!

Skilorð fyrir bensínþjófnað

Fyrirgefðu svín og burt með spillingarliðið

 

Svefn er mikilvægur og fyrir óvirka alka er hann grundvallaratriði til að vera í góðri líðan.

Þess vegna fer ég yfirleitt í rúmið á skikkanlegum tíma þrátt fyrir að ég sé kvöldmanneskja og mér finnist að fjörið hefjist upp úr miðnætti.  Búhú lífið er friggings hundstík.

Ef ég sef ekki nóg gerast hlutir.  Það vex á mig úlfafeldur og kryppa.  Ég verð að villidýri.

Ók, reynum aftur.

Ef ég sef ekki nóg gerast hlutir, ég verð úrill, döpur, svartsýn og örg.  Það alvarlegasta er þó að ég missi húmorinn.  Fyrir sjálfri mér og öllu öðru.

Í nótt vakti ég til að verða þrjú.  Út af Obama, ég var nefnilega svo hrædd um að ef ég sofnaði og léti talningamennina í USA eina um málið þá myndi maðurinn tapa kosningunum.

Muniði þegar Al Gore vann og tapaði svo?

Já, einmitt, þar gerðist það að ég fór að sofa og á meðan vann karlandskotinn hann Georg Búski.

En nú er ég sem sagt með afleiðingar nætursukksins í fullum blóma.

Ég er eitruð. 

Reyndar ber að þakka Boga Nilssyni fyrir að haga sér eins og heiðarlegur maður, hann gerði það eina rétta í stöðunni.

Vá, hugsaði ég, þarna fer eitt stykki af manni sem ekki gengur fram af mér með siðlausri hegðun.

Það lá við að ég dytti af stólnum þegar ég sá fréttina um að hann væri hættur að rannsaka.

Og þá fattaði ég að það þarf ekki mikið til að vekja aðdáun manns þessa dagana.

Það heyrir nefnilega til undantekninga að fram komi fólk úr kerfinu sem gerir hið sjálfsagða.

Hinir halda áfram að haga sér eins og svín.

Fyrirgefðu svín, ég er að gera þér skömm til.

Arg og ekki rífa kjaft við mig.  Ég er EKKI búin að jafna mig á svefnleysinu.

Farin að leita að löndum til að sigra.

Burt með spillingarliðið!

Later.

Brotið blað

Ameríkanar brutu blað í gær þegar þeir kusu Ombama sem forseta þjóðarinnar.

Ég var að horfa ræðuna hans og fjöldinn sem var mættur til að hylla þennan nýja forseta stóð með tárvot augu og hlustaði andaktugt.

Ég skildi það vel.  Það er vonin um nýja og breytta tíma sem varð að veruleika þarna í Ameríku í nótt og það sem fyrir ekki svo löngu hefði verið talið ómögulegt gerðist.

Og mér vöknaði smá um augu líka og ég hugsaði með mér að við Íslendingar þyrftum nýja tíma og nýja von.

Við þyrftum að geta endurvakið trúna á landið okkar sem mér finnst persónulega að hafi verið rænt frá okkur um hábjartan dag.

Jafnframt varð ég ótrúlega sorgmædd vegna alls þess sem hefur verið að gerast og gerist hvern dag stundum oft á dag.

Leiktjöldin eru hrunin og eftir stendur miður fallegur raunveruleikinn, flest það sem við trúðum á reyndist lygi og uppspuni.

Við getum litlu treyst, að minnsta kosti ekki þeim sem hafa fengið umboð frá okkur almenningi í þessu landi til að gæta hagsmuna okkar.

Við þurfum nýja tíma, nýjar áherslur.

Til þess að það geti gerst þurfa korktapparnir, fyrirstöðurnar og hagsmunagæslumennirnir að taka frakkann sinn og stimpla sig út.

Ef almenningur í Ameríku gat rétt af kúrsinn þá hljótum við hér að geta gert það líka.

Nú er lag.  Látum það gerast.

Obama kjörinn forseti