HÁPUNKTUR GÆRDAGSINS

Var nautasteikin sem ég hafði í kvöldmatinn, skv. læknisráði auðvitað, en nautakjöt mun vera svo blóðaukandi.

Steikin var matreidd eftir kúnstarinnar reglum ástríðukokksins Jamie Oliver, að sjálfsögðu.  Hér er ekki verið að taka sénsa með rándýran mat.

Niðurstaða:Kjöt eins og gamall og veðraður sjóvettlingur, þrátt fyrir nýmalaðan pipar og Maldonsalt.

Það sem bjargaði málinu var grænmetið og bara grænmetið.

Æmgonnasúðemaninhagkaupkringlunni.

Úje

 

HLANDVOLGT OG LEYFILEGT

Ég skellti upp úr núna áðan þegar ég rakst á viðtengda frétt.  Það  er í alvörunni búið að fjarlæga kælirinn úr Vínbúðinni í Austurstræti, að ósk borgarstjóra í Reykjavík.  Hann fór líka fram á að hætt yrði að selja bjór í stykkjatali í Vínbúðinni en þeir voru ekki til í að láta þá ósk rætast. 

Nú þegar kælirinn í Vínbúðinni er horfinn á braut, mun áfengisneysla í miðborginni leggjast af og Austurstræti mun verða algjörlega laust við "ógæfumenn" eins og borgarstjórinn kallar fullu kallana í Strætinu.

Þ.e. þangað til að 10-11 ásamt öðrum verslunum fær leyfi til að selja áfengi allan sólarhringinn í götunni, en Vilhjálmur er yfirlýstur stuðningsmaður þess að leyfa sölu áfengis í stórmörkuðum.

Vilhjálmur Þ. Vilhjálmsson er í stjórn S.Á.Á. og þess vegna kom mér á óvart að hann sendi drykkjumönnunum í Strætinu svona kaldar kveðjur.  Ég hélt að með langri setu sinni í stjórn S.Á.Á. væri hann upplýstur um sjúkdóminn alkahólisma.

Nú geta strákarnir keypt bjór í Vínbúðinni, að vísu hlandvolgan, og það gerir auðvitað gæfumuninn.

Veikmíöppæmöstbídríming!

Úje

 

Kælirinn fjarlægður úr vínbúðinni í Austurstræti

JAMIE, JAMIE, JAMIE!

Stundum slær fólk í gegn.  Jamie Oliver er eitt dæmi um svona óvart "meik", þ.e. að það var alls ekki fyrirsjáanlegt í upphafi matreiðsluþáttanna hans í sjónvarpi, að þeir myndu slá svona algjörlega og fullkomlega í gegn.

En það gerðist og Jamie er að verða að stofnun með öllu tilheyrandi.

Fyrstu seríurnar voru teknar upp heima hjá honum og kannski einmitt þess vegna var stemmingin yfir þáttunum það sem greip mann, án tillits til hvað kraumaði í pottunum hverju sinni.  Svo eldar maðurinn af ástríðu, og ég hef tekið eitt og annað til handagagns frá þessum þmámælta gleðikokki.

Nú er hann allsstaðar.  Hann er í auglýsingum, hann er orðinn ferðakokkur sem hendist á milli landa og eldar mat í anda viðkomandi lands.  Asskoti skemmtilegt en mér finnst einlægninni hafa hrakað.  Enda örugglega erfitt að halda sér ferskum þegar þáttagerðin og allt lífið bókstaflega, snýst um að vera listakokkur og bara það.

Nú verður Jamie aðalpersónan í teiknimynd fyrir börn.  Maðurinn hefur líka mikinn áhuga á að kenna börnum að elda og beina þeim inn á brautir heilnæms mataræðis.  Ekkert nema gott eitt um það að segja.

Spurning er hvort hægt sé að halda út svona stofnun, nema að fá fullt af hjálparmönnum og fyrirkomulagi því sem einkennir stór þáttargerðarbatterí. 

Ég ætla að vona að hann verði ekki að Mörtu Stewart.  Guð forði okkur frá því.

Bon apitit

Újejejeje

Teiknimyndahetjan Jamie Oliver skemmtir börnum

GERIST SVONA Á ÍSLANDI?

 

Kona kærði lögregluna á Selfossi til ríkissaksóknara í maí s.l. fyrir kynferðislegt ofbeldi þegar þvagsýni var tekið með þvaglegg á hennar samþykkis.

Það kemur fram að tveir karlkyns lögregluþjónar hafi haldið konunni á meðan læknir og hjúkrunarfræðingur settu upp í hana þvaglegg til að ná úr henni þvagsýni.

Ekki ætla ég að túlka það hvers kyns ofbeldi konan hefur upplifað, en ofbeldi er það klárlega.  Það fer um mig. 

Getur verið að sú staðreynd að ekki eru til neinar starfsreglur hjá lögreglu þegar þvagsýni er tekið gegn vilja fólks, innifeli aðgerðir að þessu tagi?

Er hægt að kippa manni úr umferðinni eftir geðþótta lögreglunnar og með valdi sem þessu seta upp þvaglegg, sem er frekar óþægilegt inngrip, líka þegar það er gert með vilja viðkomandi?

Nú þarf hinn almenni borgari tölur.  Hversu oft er þetta gert?  Eru öll lögregluumdæmin að ganga svona langt?

Þetta er hreinn viðbjóður, það segi ég satt. 

 

Konu haldið niðri og þvagsýni tekið

VON FYRIR MIG OG MÍNA

Dómstóll á Englandi hefur bannað kántrýáhugamanni að spila sum lög með Dolly Parton Tammy Wynette.  Lagið Divorce með Tammy spilaði maðurinn stundum þrjátíu sinnum á dag, segja nágrannarnir sem enduðu með að fara í mál við manninn.

Nágranni minn með borinn er með afspyrnulega leiðinlegan smekk á tónlist (fyrirgefið ég meina samræmdum hljóðum).

Hann spilar til skiptis "Ég er frjáls eins og fuglinn" og "Komdu í Kántrýbæ".  allan sólarhringinn, þ.e. þegar hann er ekki að bora eins og vitlaus maður.

Get ég látið setja nálgunarbann á músíkina?

Eða á manninn til að vernda músíkina?

Eða bara eitthvað til að hann steinþagni?

Einhverjar uppástungur um leiðinlegustu lög ever?  Ekki að ég haldi það.

Æmgonnasúðefokker.

Arg og Úje

Kántrý áhugamanni sett takmörk

STUNDUM BILAST ÉG ÚR HLÁTRI..

..yfir fyrirsögnum á Moggabloggi.  Stundum hlæ ég vegna þess að húmorinn að baki fyrirsögninni er einfaldlega brjálæðislega fyndinn.  Eins og hjá henni Dúu vinkonu minni (www.dua-athugasemd.blog.is)  sem átti eina um daginn sem innihélt eitthvað um Bloggvinalufsur. og þar hló ég upphátt. Annars eru dæmin um fyrirsagnir líkar þessum, sem betur fer mörg og ótrúlega skemmtileg.  Bjarga hreinlega deginum stundum. 

"Ég er hætt/hættur að blogga er farin/farinn, búmm-pang fyrirsagnirnar" geta verið hugmyndaríkar og fyndnar, í hófi sko.

Fyrirsagnir bláu þulunnar eru mér stundum tilfefni til hláturs.  Ég skilgreini það krimt ekki nánar.

En í dag hreinlega bilaðist ég úr hlátri yfir fyrirsögninni hjá Jónínu Ben.  Þar stendur orðrétt: "LATIBÆR VERÐUR AÐ FÁ AÐ LIFA - VIÐSKIPTARÁÐHERRA!"

Hefur eitthver heyrt talað um "overkill" vs. "understatement"???

Hvað er fólk að  hafa áhyggjur af hungruðum heimi hérna?  Latibær má ekki deyja.  Það er algjörlega satt og rétt.

Súmíbítmíbætmíandkikkmí!

Úje

GAMALT VÍN Á NÝJUM BELGJUM?

 

Stundum get ég ekki annað en brosað yfir nýjum orðum sem eiga að rétta við ímynd ákveðinna hugtaka eða fyrirbæra.  Það sem kemur strax upp í hugann er hin gamla "Félagsmálastofnun" sem varð að "Félagsþjónustunni", en þar er orðið þjónusta auðvita mun jákvæðara en orðið stofnun.  Það orð  sem var okkur lengi til skammar og lýsti hugarfari stjórnvalda (og kannski þjóðarinnar) til innflytjenda var  "Útlendingaeftirlitið", það hefði smell passað inn í eftirlitsstofnun í Hitlersþýskalandi. Er hægt að að kalla stofnun sem sjá á um innflytjendamál, neikvæðari nafni?  Nú heitir Útlendingaeftirlitið sum sé "Útlendingastofnun".  Af tvennu illu þá er það eitthvað skárra.

Ég var að lesa blöðin áðan og rakst þá á frétt um "lögblinda" og "seinfæra" stúlku, án þess að ég ætli að fara gera þá sérstöku frétt að umtalsefni. 

En nú spyr ég, af því þessi hugtök eða skilgreiningar hef ég ekki rekist á áður,

er lögblinda orð yfir að vera blindur?

Er seinfær, það sama og vera hreyfihamlaður eða þroskaheftur?  Kannski bæði?

Mér finnst ég ekki hafa við að fylgjast með sk. "orðatísku".  Það er skelfilegt að vera allt í einu pólitískt rangur í orðavali og verða sjálfum sér til skammar og koma út sem fordómafullur dóni.

Skýring, einhver?

Súmí

ER HÆGT AÐ VERA ÓHEPPNARI..

 

.. en Amy Winehouse, þessa dagana en sökum óreglu hennar er breska pressan búin að gefa út veiðileyfi á stelpuna.  Eins og fram hefur komið er þessi söngkona ein af mínum uppáhalds af yngri kynslóðinni.

Bömmerinn hlýtur að felast í því að vera bullandi alki og í dópi líka, heita WINEHOUSE, eiga hittara sem heitir REHAB og harðneita svo að fara í meðferð. 

Ég sárvorkenni stelpunni.

Hér er  slóðin á bráðskemmtilegri útgáfu af laginu Rehab.

http://www.youtube.com/watch?v=GgfrxZlrYR4

Cry me a river!

Úje

Fyrrum elskhugi Amy Winehouse segir hana kynlífsfíkil

GÆLUDÝRAHORROR

Sumir fá sér risaköngulær (baneitraðar) sem gæludýr, aðrir eiturslöngur, beltisdýr eða eðlur.  Ég hef aldrei botnað í þessum áhuga.  Sá einhvertímann þátt í sjónvarpinu um náunga sem var með tarantúllu heima hjá sér, í lausagöngu, og kvikindið settist svo á öxlina, andlitið, lærið  eða hnakkann á gestunum, þeim til mikillar hörmungar.  Maðurinn viðurkenndi að heimsóknum til sín hefði snarlega fækkað. 

Nú er það úlfaldi sem bættist í gæludýrasirkusinn.  Konu í Ástralíu var gefinn úlfaldi í sextugs afmælisgjöf af því hún hefur svo gaman að framandi dýrum.  Hvað er athugavert við að skoða dýr í sínu náttúrulega umhverfi?  Furðulegt að fólk þurfi að EIGNAST alla hluti.

Konan getur ekki lengur séð sig um hönd.  Úlfaldinn varð henni að bana með mökunartilburðum. 

Stundum fæ ég þá tilfinningu að ég lifi á flippaðasta tíma mannkynssögunnar.

I´ll walk a mile for a Camel

Újeeee

Gæludýr varð ástralskri konu að bana

AFMÆLISSNÚRA

Jæja, enn eitt edrúafmælið orðið að raunveruleika.  Nú er 20. dagur mánaðar í 10. skipti frá því ég kom af Vogi.  Tíu mánaða snúruafmælið er staðreynd.

Merkilegt hvað tíminn hefur flogið áfram.  Og ég man afturábak, í stórum dráttum allt sem gerst hefur frá því af mér rann.  Það er ekki lítil breyting.  Reyndar er minnið að styrkjast dag frá degi, en áður en ég varð fyllibytta, gat ég státað af minni fílsins.  Um það leyti sem ég fór svo helsjúk inn á Vog, gat ég ekki munað símanúmer, og ekki einu sinni hvert ég hafði hringt.  Áfengi og lyf í of stórum skömmtum lama algjörlega allt sem er á milli eyrnanna á manni.

Ég hef fengið svo margt til baka.  Samskipti mín við mína nánustu eru betri en nokkru sinni.  Merkilegt hvað fólkið mans er fljótt að jafna sig, gefa manni séns, þrátt fyrir að það hafi verið búið að stimpla mann nánast út enda ég amk. orðin eins og innsetning í stól fyrir framan sjónvarpið.

Nú er ég reyndar eins og innsetning fyrir framan tölvuna (hehe), amk. þessa dagana þegar blóðskortur og önnur vanheilsa herjar á.  En ég tek þetta með vinstri og ég er í raun þakklát fyrir að muna nafnið mitt, kennitölu, skóstærð og föðurnafn, ásamt öllu hinu sem hefur hlotnast mér á þessum 10 mánuðum.  Ég er heppin kona sem fer edrú að sofa í kvöld.

Útsýnið af snúrunni er alveg frábært, þakka ykkur fyrir.

Úje...