GAMALT VÍN Á NÝJUM BELGJUM?

 

Stundum get ég ekki annað en brosað yfir nýjum orðum sem eiga að rétta við ímynd ákveðinna hugtaka eða fyrirbæra.  Það sem kemur strax upp í hugann er hin gamla "Félagsmálastofnun" sem varð að "Félagsþjónustunni", en þar er orðið þjónusta auðvita mun jákvæðara en orðið stofnun.  Það orð  sem var okkur lengi til skammar og lýsti hugarfari stjórnvalda (og kannski þjóðarinnar) til innflytjenda var  "Útlendingaeftirlitið", það hefði smell passað inn í eftirlitsstofnun í Hitlersþýskalandi. Er hægt að að kalla stofnun sem sjá á um innflytjendamál, neikvæðari nafni?  Nú heitir Útlendingaeftirlitið sum sé "Útlendingastofnun".  Af tvennu illu þá er það eitthvað skárra.

Ég var að lesa blöðin áðan og rakst þá á frétt um "lögblinda" og "seinfæra" stúlku, án þess að ég ætli að fara gera þá sérstöku frétt að umtalsefni. 

En nú spyr ég, af því þessi hugtök eða skilgreiningar hef ég ekki rekist á áður,

er lögblinda orð yfir að vera blindur?

Er seinfær, það sama og vera hreyfihamlaður eða þroskaheftur?  Kannski bæði?

Mér finnst ég ekki hafa við að fylgjast með sk. "orðatísku".  Það er skelfilegt að vera allt í einu pólitískt rangur í orðavali og verða sjálfum sér til skammar og koma út sem fordómafullur dóni.

Skýring, einhver?

Súmí

Athugasemdir

[Hrönn Sigurðardóttir, 20.8.2007 kl. 16:23]

Ef þú ert seinfær þá ertu seinni til..... ekki alveg þroskaheft en sein.....

Lögblindu hef ég aldrei heyrt um áður!!

[krossgata, 20.8.2007 kl. 16:33]

Ég velti fyrir mér hvort lögblinda sé fínna orð yfir siðblindu.  En það gæti alveg eins verið að þegar sjónskerðing sé komin á tiltekið stig sé maður löglega blindur.  T.d. eins og 75% örorka er full örorka, sama og 100%.  Þannig að þetta gæti verið einhvers konar mælieining m.t.t. réttinda og bóta.

Seinfær hef ég heyrt áður og þýðir það sem Hrönn sagði að vera á eftir.

[Kristín Katla Árnadóttir, 20.8.2007 kl. 16:52]

Ég hef aldrei heyrt orðið lögblinda.

[Páll Lúðvík Einarsson (IP-tala skráð) 20.8.2007 kl. 16:54]

"Félagsþjónusta" er ótæk í Reykjavík.  Réttþenkandi noti "Velferðarsvið Reykjavíkurborgar."

[Huld S. Ringsted, 20.8.2007 kl. 16:58]

"lögblinda" er búið að vera lengi til, það er notað þegar sjón manna er orðin það skert (en ekki alveg blindir) að þeir geti illa bjargað sér sjálfir  og eigi rétt á allri þjónustu hjá blindrafélaginu og örorkubætur. Þekki þetta því mamma mín er búin að vera "lögblind" í 2 ár.

[Jóna Á. Gísladóttir, 20.8.2007 kl. 17:04]

Hefði ekki getað orðað þetta betur en Huld.

[Jenný Anna Baldursdóttir, 20.8.2007 kl. 17:24]

Nú er ég öllu nær.  Takk fyrir.

[Anna Ólafsdóttir (anno) (IP-tala skráð) 20.8.2007 kl. 20:39]

Tek undir með þér að þessi orð virka stundum ankannaleg. Svo er þeim stundum einhvern veginn hent inn í málið og fara að þvælast hingað og þangað í greinum án þess að vera útskýrð í leiðinni, ávísun á alls kyns óþægilegan misskilning.

[Ragnhildur Sverrisdóttir, 21.8.2007 kl. 10:36]

Útlendingaeftirlitið var auðvitað arfavitlaust heiti. En er ekki kominn tími á að henda líka nafninu Útlendingastofnun? Væri ekki snilld að fara að fordæmi Félagsmálastofnunar og láta stofnunina heita Útlendingaþjónustan? Mikið myndi nú slíkt heiti lýsa jákvæðri hugsun