BLOGGKIRKJA?? GMG

Nú koma kristnu bloggararnir saman og finna upp taktík til að grilla okkur trúleysingjana.  Þ.e. okkur sem eru öðruvísi trúuð en á bókstafinn.  Iss það er eins gott að blanda sér ekki í þá umræðu á blogginu, hér eftir.  Samtakamátturinn er öflugur.

Ég veit að þeir eru á móti hjónaböndum samkynhneigðra.

Á móti fóstureyðingum.

Á móti Palestínumönnum.

Á móti Múslimum.

Allt er synd á þeim bænum.  Er í lagi að dansa baka og föndra?

Vá frjálslyndið ríður ekki við einteyming.

Ég ætla ekki að mæta en sendi þeim baráttukveðjur.

What if god was one of us?

og hér er myndbandið með þessu frábæra lagi.

http://www.youtube.com/watch?v=Epow4VXhnW0

Úje og Amen

Bloggkirkjan bakar

BÖLVAÐUR HROKAGIKKURINN

 

Ég legst hér með á hnén og bið til allra Guða í alheiminum, að Giuliani endi ekki sem forseti Bandaríkjanna.  Maðurinn fær Georg W. Bush til að hljóma eins og friðardúfu. 

Giuliani telur það ekki þjóna hagsmunum Bandaríkjanna, að stofnað verði sjálfstætt Palestínuríki, sem þá "styðji við bakið á hryðjuverkamönnum."

Halló, Hr. Paranoja!  Heimurinn snýst ekki bara í kringum hagsmuni Bandaríkjanna.

"Þetta kemur fram í grein sem Giuliani skrifar í tímaritið Foreign Affairs. Þar segir hann ennfremur að of mikil áhersla hafi verið lögð á friðarumleitanir Ísraela og Palestínumanna, sem hann segir að fari í sífellda hringi."

Alltof mikil orka sem eytt er í friðarumleitanir.

Get a lvie, geta a grip.

Úhúje

P.s Þetta er fréttablogg, alveg ferlega ódýrt af mér ég veitða.

Giuliani kveðst mótfallinn stofnun sjálfstæðs Palestínuríkis

TEXAS - HELVÍTI Á JÖRÐ?

 

Það er verið að reyna að skýra út aftökugleði Texasbúa, langt umfram önnur ríki í USA.  Talið er að skýringin á þessu sé að leita til íhaldsemi þeirra og mótmælendatrú ásamt "menningarlegri" blöndu gamla suðursins og villta vestursins.

Kannski á þessi refsigleði sér skýringar í sögulegum bakgrunni.  Hvað mig varðar þá skiptir það engu máli og réttlætir ekki neitt.  Skýringar Gyðingahaturs Hitlers er talið eiga sér skýringu í þeim viðhorfum sem hann ólst upp  við.  Ég heyri ekki marga, mæla honum bót.

Það er talið öruggt að yfirvöld í Texas muni taka af lífi fanga nr. 400 í þessum mánuði, frá því að dauðarefsingar voru aftur leyfðar í Bandaríkjunum.  Fjórar aftökur eru bókaðar þar í ágúst.  Texasbúar eira engu.  Þeir taka geðsjúka og þroskahefta af lífi, án þess að blikna.

Að taka líf er aldrei réttlætanlegt.

Og af því að Texasbúar eru svo sterkir í trúnni hvernig væri að tileinka sér eftirfarandi?

Dæmið ekki svo þér verðið ekki dæmdir.

Amen og úje

Menning og trúarbrögð sögð skýra aftökugleði Texas-búa

GÓÐI GUÐ - PLÍS BÆNHEYRÐU MIG NÚNA

Elsku góði Guð, Jesú, Búdda, Java, Múhammed, Abraham og hvað sem þú nú annars heitir þessa dagana.

Ekki láta mig leggjast inn á Lansann eftir áramót.  Þá verður bannað að reykja allsstaðar á spítalanum og í KRING um hann.  Ég ákalla þig.  Ekki láta gera mér þetta ef ég verð veik og aumingjaleg.  Það væri nóg samt.  Ef ég veikist á geði t.d. og þarf að reykja í plastbúrinu við geðdeildina, þar sem ég verð til sýnis fyrir alla sem ganga um bygginguna, skal ég ekki kvarta.  Ég skal meira að segja dansa, hoppa, slefa og froðufella, til skemmtunar fyrir alla þá sem fram hjá fara, bara ef þú leyfir andskotans búrinu að standa.

Þú mátt dúndra á mig eldingu, henda mér í veggi, sparka í magann á mér og rífa í hárið á mér, en ekki láta þessa umboðsmenn dauðans, drepa mig úr fráhvörfum þegar og ef ég verð veik og lítil í mér.

Þess bið ég þig í mestu auðmýkt.

Til vara bið ég um nútíma holdsveikraspítala, uppi á öræfum þess vegna, fyrir okkur sem forpestum tilveruna og kaupum dópið sem ríkið selur í þínu nafni (æi þú veist Þjóðkirkjan sem kennd er við þig er ríkisstofnun sko).

Plísdóntheitmí!

ÚFF-je

Landspítali verður reyklaus um næstu áramót

HRÆÐILEGUR RAUNVERULEIKI

 

Það er vont að byrja daginn á því að lesa meðfylgjandi frétt.  Það er heldur ekkert sérlega huggulegt af mér að skella henni á bloggið mitt en þetta er eitthvað sem allir verða að lesa og kynna sér.  Talið er að um 10 milljónum fóstra hafi verið eytt á Indlandi síðustu tvo áratugina þegar í ljós hefur komið að mæðurnar gengu með stúlkur.

"Margar indverskar fjölskyldur telja fæðingu stúlkubarns af hinu slæma vegna þeirrar hefðar að fjölskyldur þurfa að greiða heimamund með þeim er þær ganga í hjónaband."

Nú hafa á annan tug plastpoka fundist í austurhluta Indlands.  Lögreglan telur að um sé að ræða fóstur eða nýfædd stúlkubörn.  Lýsingar á aðferðum við að drepa stúlkurnar fylgja fréttinni, því miður.

Það er náttúrulögmál að fátækt bitnar verst á konum og börnum.  Í þessu tilfelli stúlkubörnum.

Umhugsunarvert.

 

Fjöldi barnslíka finnast á Indlandi

FRIÐARGÆSLULIÐAR - MINN AFTURENDI

Hermenn eru hermenn, alveg sama hvaða nöfnum er troðið á þá  og hver sendir þá í stríð.  Þetta er ekki í fyrsta skipti sem hermenn S.Þ. (friðargæslumennirnir með byssurnar) liggja undir grun fyrir að misbeita valdi sínu gagnvart því fólki sem þeir eiga að vernda.  Þetta er heldur ekki í fyrsta skipti sem þessir vopnuðu "englar" eru grunaðir um kynferðislega  misnotkun.  Núna eru þeir sakaðir um kynferðislega misnotkun á Fílabeinsströndinni.

Þetta hefur gerst nógu oft til að Kofi Annan sá sig knúinn til að taka upp hina svokölluðu 0-stefnu (zereo-tolerance) gagnvart þessum málum sem þýðir einfaldlega að slíkt athæfi verður með engu móti þolað. 

Þá er að standa við það bara.

Meiksmísikk!

Friðargæsluliðar SÞ sakaðir um kynferðislega misnotkun

TRÚAROFSTÆKI - HREINN HRYLLINGUR

 

Það er eitthvað svo öfugsnúið við hugtakið "sæmdarmorð".  Á bak við það eru ófáar hryllingssögur kvenna eins og í þessu tilfelli þar sem faðir tvítugrar stúlku og föðurbróðir hennar voru dæmdir í lífstíðarfangelsi fyrir að myrða hana í janúar á s.l. ári.  Þriðji maðurinn var einnig dæmdur í lífstíðarfangelsi fyrir morðið.

Stúlkunni hafði verið nauðgað og henni misþyrmt illilega áður en hún dó.  Faðir hennar og frændur fengu mann til verknaðarins en ástæða þess var að stúlkan var ástafangin af manni sem fjölskyldunni líkaði ekki við. 

Trúarofstæki fyrirfinnst í öllum trúarbrögðum.  Þarna fær það á sig hina ljótustu mynd.

 

Dæmdir í lífstíðarfangelsi fyrir sæmdarmorð

ÞETTA HEF ÉG ALLTAF ÓTTAST...

..að verða gömul, veik og upp á aðra komin.  Ég er kannski ekki hrædd um að vera smyglað með gosflöskunum í endurvinnsluna af afkomendum mínum en skelfingu lostin yfir því að enda mögulega sem hornkerling heima hjá þeim, þeim og öðrum til ama og leiðinda og mér til andlegrar hrörnunar og niðurlægingar.

Svo er hinn möguleikinn.  Að enda á barnaheimili fyrir fullorðna þar sem ég á að föndra, dansa gömlu dansana, borða pylsu í beinni (af því það er svo krúttlegt að horfa á gamlar manneskjur borða pylsur),  láta fólk garga þegar það talar við mig (vegna heyrnarleysis sem endilega ekki er til staðar) og fleira í svona uppbyggjandi dúr.

Þjóðfélagið kemur fram við eldri borgara eins og hálfvita oft á tíðum.  Eins og maður verði átómatískt að hálfvita eftir vissan aldur.  Flestir vita þó að gamalt fólk er oft  með betri og gefandi nærveru en þeir sem yngri eru.  Þetta get ég vottað, enda alin upp af eldra fólki.

Ég held að ég biðji almættið sérstaklega um það í kvöld að kippa mér til sín áður en ég verð að fórnarlambi aðstæðna sem eldri borgara bíða ef heilsunni sleppir.

Súmí.

Ömmu hent á haugana

ÞUNGUR KROSS AÐ BERA..

...greinilega í þessu tilfelli því löggan handók tvo 17 ára gutta með trékross í eftirdragi sem hafði að geyma nafn látins einstaklings.  Þeir sögðust ætla að nota krossinn í listaverk.

Hugmyndaauðgi sumra "listamanna" eru greinilega engin takmörk sett.

Ég ætla að panta mér legstein.  Úr marmara þannig að það þurfi flokk manna til að fjarlægja hann.  Og þó mér er sama hvað um jarðneskar leifar mínar verður þegar ég er öll.  Þarf ekki einu sinni að merkja leifarnar af mér.

En hvernig dettur fólki svona lagað í hug?

Bítsmí.

Með kross í eftirdragi

ÞAÐ LIGGUR Í LOFTINU!

 

Það liggur einhver rasismi í loftinu alls staðar í heiminum.  Nú er andúð á gyðingum að aukast í Evrópu.  Ætlar manneskjan aldrei að læra?  Hvað þarf að fórna mörgum mannslífum í heiminum áður en fólk fer að átta sig á því að þessi andúð á þeim sem eru öðruvísi kostar bara mannfórnir og aftur mannfórnir?  Ég er langt í frá sátt við Ísrael þegar kemur að málefnum Palestínu.  Það þýðir ekki að mér sé illa við gyðinga.  Mér finnast Bandaríkin með fáránlega utanríkispólitík en það þýðir ekki að mér sé illa við ameríkumenn.  Og svo má lengi telja.

Það þarf ekki að segja mikið neikvætt um útlendinga til að það komi fólk (oftast nafnlaust) skríðandi upp úr holum sínum og tjái hatur sitt og ótta við útlendinga.  Þetta skelfir mig. 

Mér hefur reynst heppilegast í lífinu, að meta fólk eftir framkomu þess en ekki hvaðan það kemur og hvar það er fætt.  Margir af mínum bestu vinum eru útlendingar.  Ég tel mig ríkari fyrir bragðið.  Eitt barnabarnanna minna er útlendingur (sænskur pabbi) og fyrir hennar hönd og annarra útlendinga er mér misboðið, þegar heiftin og hatrið gagnvart innflytjendum á Íslandi geisar hér eins og stórhríð á blogginu, svo ég taki nú bara nærtækt dæmi. 

Bara vegna þess að einhver gefur tóninn.

P.s. Ég ætlaði ekki að tjá mig meira um þetta málefni, fannst nóg komið en svo mundi ég eftir því að ég blogga af ákveðinni ástæðu, ég verð allavega að vera skoðunum mínum trú.  Og hananú!

Andúð gagnvart gyðingum að aukast í Evrópu