AÐ VERA FÓRNARLAMB OG MÆÐAST Í MÖRGU I

Ég hef verið að lesa að nýju Alkemistann eftir Paul Cotelho, sem mér finnst vera ágætis bók.  Ég las hana fyrir nokkrum árum og í dag tók ég mér hana aftur í hönd.  Á fyrstu síðunni er að finna tilvitnun úr Biblíunni sem er eitt af mínum uppáhalds gullkornum í þeirri merkilegu bók.  Það hljóðar svona:

"Er þeir voru á ferð, kom hann inn í þorp nokkurt.  En kona ein að nafni Marta tók á móti honum í hús sitt.  Og hún átti systur, er hét María, hún settist við fætur Drottins og hlýddi á orð hans.  En Marta var önnum kafin við mikla þjónustu.  Og hún gekk til hans og mælti: -Herra, hirðir þú ekki um það, að systir mín lætur mig eina ganga um beina?  Seg þú henni að hjálpa mér.  En Drottinn svaraði og sagði við hana:

-Marta, Marta, þú ert áhyggjufull og mæðist í mörgu en eitt er nauðsynlegt.

María hefur valið góða hlutann, hann skal ekki verða tekinn frá henni."

Þarna útspilar sig ein af frumútgáfunum fórnarlambsheilkennisins í bókmenntasögunni sem ég man eftir.  Marta, Marta, sem mæðist í mörgu.  Fórnarlambshlutverkið er eitur í mínum beinum og ég hef séð það myndbirtast í sjálfri mér, í fjölskyldunni og vinkonum í gegnum árin.  Mér hefur fundist við konur oft snöggar að detta í þetta hlutverk.  Kannski af því við vorum svo lengi valdalausar. Að vera fórnarlamb er ákveðin stjórnun.  Ég var ómeðvituð um að ég væri sérfræðingur í fórnarlambsgeiranum langt fram eftir aldri.  Maður var að gera og græja meðan fórnarlambsblóðbunan stóð aftanúr manni.

Að vera fórnarlamb er hræðilegt hlutverk.   Fórnarlambið er algjörlega varnarlaust.  Það hefur ekkert að segja um eigið líf og á endanum gleymir maður því að það er til val.  Val til að geta haft áhrif á aðstæður sínar en vera ekki eins og sektarlambið sem leitt er hljóðlaust til slátrunar. Orðið hetja er mikið notað í dag.  Það er notað um fólk sem ratar í ýmiskonar raunir og lifir þær af.  Mér finnst fórnarlambsbragur á þessu orði.  Við lendum í aðstæðum og við lifum þær af og ef okkur tekst að ná tilfinningalegri fjarlægð á aðstæðurnar og jafnvel að hjálpa öðrum í sömu sporum, þá erum við að gera okkur sjálfum gott og öðrum í leiðinni.  Það er að lifa af með reisn.  Hetjur eru samkvæmt Orðabók Menningarsjóðs: Kappi, hraustmenni, afreksmaður.

Meira seinna. Takk fyrir mig.

                                                                    

MANSALSHRINGUR UPPRÆTTUR!

Lögregla á Spáni hefur upprætt mansalshring á Costa Brava ströndinni á austurhluta Spánar.  Það var Albani sem stýrði hringnum en um 40 konum var haldið í kynlífsþrælkun. Flestar kvennanna komu frá Rússlandi og voru neyddar til að vinna í hóruhúsum og við götuvændi.

Mér verður alltaf jafn illa við þegar maður les fréttir af þessum óhugnaði sem mansal er.  Það blómstar í heiminum í dag.  Það er gleðiefni þegar tekst að uppræta þó ekki sé nema einn mansalshring en mér fallast hendur þegar ég hugsa um þær miljónir kvenna og barna sem búa við þennan hroðalega raunveruleika í heiminum í dag.

Mansalshringur upprættur á Spáni

MISYNDISMAÐUR AF ERLENDU BERGI BROTINN?

Nú má fólk fara að vara sig!  Engin leyndarmál eru leyfð lengur þegar meðaljóninn ætlar að færa viðskipti sín yfir til KB-banka.

Þú ert spurður að því hvort þú eða fjölskylda þín tengist hryðjuverkastarfsemi.  Svo er náttúrulega spurt hvort foreldrar þínir séu að erlendu bergi brotin.  Þeir hjá Kaupþingi hljóta að eiga fyrir nýjum þyrlupall fyrir næsta áramótapartí sem haldið er að þessu sinni við pýramídana í Egyptalandi (segi sonna). Ekkert voða æstir í nýja viðskiptavini.  Þeir eru greinilega vandir að valinu hjá Kaupþingi þegar að fólk vill færa viðskiptin sín yfir til þeirra.  Útlenskur bakgrunnur er jafn hættulegur og hryðjuverkastarfsemi hlýtur að vera fyrst það skiptir máli fyrir bankann að hafa það mál á hreinu.

Reyndar sagði starfsmaður bankans við viðskiptavininn að þetta væru misgáfulegar spurningar.  Hm.. ég ætla aldrei að færa viðskiptin mín yfir í Kaupþing.  Ég er komin af frönskum duggurum og alkahóliseruðum danakonungi í móðurætt svo ég leggi nú á ekki nokkurn mann að fara að skilgreina föðurættina.  Ég held mér við Sparisjóðinn enda engar þyrlupallabyggingar áformaðar þar á næstunni.  Eftir því sem ég kemst næst.

Gaman að þessu krakkar

„Ertu hryðjuverkamaður?“

ATTBÚ RÉTT STRAX OG FJÖRIÐ BYRJAR KL. 24,00

Nú tryllist allt á miðnætti.  Eða þannig því þá er þessum langa degi lokið og við getum orðið syndum spillt á ný.  Þrátt fyrir öflugar yfirlýsingar um að ég láti ekki langa viðhengið á föstudeginum hafa áhrif á mig þá er þessi dagur búinn að vera alveg afskaplega langur.  En eftir kortér er hann að baki.

Þá er bara að hoppa í dressið og hendast út á lífið allavega í andlegum skilningi.  Drekka kaffi fram á morgun, hanga í tölvu, lesa eins og eina bók og sofa til hádegis á laugardaginn fyrir páska.

Takk bloggvinir mínir sem hafið verið að blogga í dag.  Það stytti mér verulega stundirnar.

Adjö och tack så jättemycket

AF GAMNI OG ALVÖRU

Sniðuglega til fundið hjá þeim í félaginu Vantrú sem stóðu fyrir bingói í dag á Austurvelli til að mótmæla því að brotið sé á athafnafrelsi með helgidagalöggjöf Þjóðkirkjunnar.  Það var heldur ekki leiðinlegt að fylgjast með þeim félögum í sama félagi í fréttunum í kvöld þar sem þeir undu glaðir við sitt bingóspil og hafa jafnvel beðið eftir lögreglunni til að handsama sig en þeir munu hafa lýst með fjarveru sinni. Löggan þekkir greinilega sinn vitjunartíma og heldur sig frá saklausum skemmtunum sem engan meiða.

Það var þó sorglegra að sjá í sama fréttatíma í kvöld, ungu mennina á Filppseyjum sem láta krossfesta sig með margra tommu nöglum til að minnast Jesú Krists.  Þar gat líka að sjá hóp af mönnum sem rifu bak sitt með svipum og á sumum þeirra sást inni í kjöt.  Algjör viðbjóður.  Af hvaða meiði skyldi hún sprottin þessi sjálfspíningarhvöt?  Það er erfitt að fá glóru í svona gjörninga.

Hvort myndi fólk nú velja?  Bingóspil eða krossfestingu?  Ætli þeim feðgum á himnum sé ekki slétt saman um vanþroska leiki okkar mannana?  Ég er þó nánast viss um að þeim hugnast ekki helgislepja og barlómur.

Svo er þessi helgidagalöggjöf löngu úr sér gengin og algjör tímaskekkja.  Hvað ætli Þjóðkirkjan haldi lengi áfram að stjórna lífi fólk með úr sér gengnum löggjöfum og reglum sem eiga alls ekki heima í nútíma samfélagi og hafa kannski aldrei átt?

Vantrú heldur bingó á Austurvelli

FÖSTUDAGARNIR LÖNGU ORÐNIR 55 TALSINS

Svona gamalli líður mér þegar ég rifja upp Föstudagana löngu sem ég hef lifað.  Ekki ætla ég samt að missa mig í meiri bláma en dagurinn býður upp á en ég fór að velta fyrir mér þessu furðulega fyrirbæri sem Föstudagurinn langi er.  Ég man eftir hreint ótrúlegu "ekki gera neitt" andrúmslofti, þar sem enginn krakki var úti að leika, ekki mátti þrífa, spila, dansa og alls ekki hlægja.  Svona gömul er ég orðin.  Biðin eftir páskaeggjunum var óendanlega löng og erfið fyrir smástelpu.  Útvarpið sá svo um að koma manni á sálarlega heljarþröm með óendalegum "hátíðaerindum" og músík í stíl.

Einhvern veginn hefur það haldist í hendur hjá mér að leiðast á hátíðum þar sem búðir eru lokaðar.  Skömm að segja frá því hversu neyslutengdur maður er í lifnaðarháttum en ég er bara svona þegar ég veit að búðirnar eru lokaðar og ég GET ekki farið og verslað.  Ekki að mig vanti neitt.  Er nokkuð forsjál í þeim efnum.  Eina undantekningin frá þessu er aðfangadagskvöld sem er svo skemmtilegt að það líður sem örskotsstund.

Ég man eftir vini sem datt í það á þessum degi fyrir ansi mörgum árum og hringdi í mig á hálftíma fresti eða svo til að velta sér upp úr því hvað mamma hans sáluga hefði GERT hefði hún verið á lífi og hann á fylleríi á þessum degi!!!! Skítt með alla hina dagana sem hann var fullur.  Hann kom mér eins langt niður og kostur var með símtölunum en ég frétti síðar að hann hafi verið hrókur alls fagnaðar í partíinu og hringdi í mig til að fá aflausn tvisvar á klukkutíma. Þann dag var ég trúarleg sorptunna.

Eftir því sem ég eltist fór ég sjálf að ákveða sinnislagið sem ríkti í mér á þessum degi.  Ég komst að því að Jesú væri örgla engin þægð í að ég velti mér upp úr eymd og volæði.  Nú er Föstudagurinn langi bara frídagur, gaman að blogga í rólegheitunum, fara í göngutúr og horfa á vídeó að eigin vali. Ég sendi hér með öllum húmorlausum eymdaraðdáendum fokkmerkið (sorrý) héðan sem ég sit á þessum fallega degi með Guð og Jesú í mínu liði, þe gleðiliðinu.

 

HM...KÍNVERSK HÁTTVÍSI??

Nú verður bannað að vera illa greiddur, fella tár og syngja óheilbrigð lög í kínversku útgáfunni af Idol.  Það er erfitt fyrir keppendur að þurfa að GREIÐA sér,  stilla sig um að gráta og syngja einhver bévítans úrkynjuð vestræn lög. Vesalings fólkið.  "Engin furðulegheit, viðbjóð eða smekkleysu" sagði útvarps- kvikmynda og sjónvarpsstjóri ríkissins.  Vá sá er í víðtækri stöðu.  Bara yfir öllu batteríinu.  Þá er bara mínir kínversku vinir að hætta að grenja, fara í lagningu og syngja sögnin um stúlkuna sem leitaði kærastans við liljutjörnina á hverju vori.

Góða skemmtun.

Engin tár eða illa greitt hár

AF BLÓMUM, SÆTINDUM OG KVEIKTUM ELDUM

Ég er orðin svo húsleg að ég bar áhyggjur mínar um það efni upp við húsbandið og velti því upp hvort ég endaði ekki bara sem matartæknir einhvers staðar með ekkert líf (sko ég ekki matartæknar almennt séð) ef fram heldur sem horfir.  Honum fannst þetta ekki áhyggjuefni og sagði mér að njóta þess á meðan á því stæði.  Einn með rosalega trú á úthaldsemi sinnar heittelskuðu ofan í pottavélum og ofnföstum mótum.

Eins og sést á myndinni af mér hér að ofan, í mínum nýja páskakjól (), þá bakaði ég pönnukökur og Dúa Dásamlega, vinkona mín neitar nú að trúa því að ég hafi tekið mér pönnukökupönnu í hönd.  Ég hef ekki eingöngu bakað pönnukökur í dag,  heldur s.l. tvær helgar líka. Jenny finnst skemmtilegt að baka pönnukökur og þá gerum við það.  Einfalt mál og ansi skemmtilegt þegar maður kemst upp á lagið.  Húsbandið segir raunar að ég sé eina konan sem hann hefur hitt sem bakar pönnukökur eftir uppskrift (dl. sænsk ef þið hafið áhuga, namminamm þunnar og krispý).

Frumburður minn hún Helga Björk kom hér með Jökulinn sinn og hafði með sér tertu með kaffinu (veit að það er ekki á vísan að róa með mömmuna þegar kemur að bakkelsi).  Ég fékk líka þessar fínu páskaliljur að gjöf frá þeim líka.  Ég hef aldrei, alla mína hunds- og kattartíð verið eins mikið í svuntu, lagandi kaffi, leggjandi á borð og allskonar eins og s.l. sex mánuði eftir ég hætti að vera völt á fótunum. Ég er sem sagt stoltur eigandi hóps af páskaliljum.  Konan með svuntuna er heppin.

Páskaeggjum erfingja- og erfierfingja hefur öllum verið komið til skila.  Nú geta páskar hafist og nú verður gert eitthvað dúndrandi siðspillt og úrkynjað á Föstudaginn langa.  Eins og t.d. farið eitthvað út úr húsi, sagðir brandarar, þjóðsöngurinn sunginn á Lækjartorgi (ég komst ekki í kór 9 ára gömul þannig að þetta verður púra lögbrot) og ég þekki konu sem ætlar að brenna svuntur og pottaleppa í ofnföstum mótum úti í Gróttu á morgun kl. 14,00. Segisonna en sjáumst þá.

 

HALLÓ, HALLÓ ÉG MINNI Á...

Húslækninn sem kemur í heimsókn til okkar stelpnanna eftir klukkustund eða svo.  Ég er búin að vera svo upptekin í öðru að ég gleymdi þessu skylduverki sem ritari í HÓKÍ (Húsfélagóvígðrakvennaáíslandi) að láta vita af komu doktorsins slynga og þokkafulla í kvöld.  OMG, sorry stelpur.  Ekki það að ég haldi að klúbbvinkonur mínar gleymi Hús-lækni, ónei.  Ég veit t.d. að Hrönn fór sérstaklega í ríkið í gær, hékk þar í röð utandyra í kulda og vosbúð til að geta nælt sér í áfengi til að smyrja með tilfinningarnar og æra þær snarvitlausar þegar læknirinn loksins mætir á svæðið.  Enda hinn mæti doktor alltaf búinn að vera þegar hann kemur úr vitjun hjá Hrönnslu.  Sko Hrönn þarf að standa í biðröð í ríkinu, utandyra því hún býr í sveit.  Þeir eru svo svakalega á eftir í Ölfushreppi.

Fleiri vinkonur sem ég nafngreini ekki frekar vegna sóðalegs smekk þeirra á Hús-lækninum, bíða í ofvæni eftir að hann komi og vitji þeirra.  Örugglega í saurugum tilgangi. OJJJJJ.  Ég hins vegar fæ hann í heimsókn af faglegum áhuga.  Við ræðum mikið um hjáveituaðgerðir og gangráðaísetningar þessa stuttu stund sem hann stendur hér við.

Fundur í HÓKÍ á annan dag páska í Reykjavíkurprófastdæmi anno 2007 eftir Krists burð.

 

SKÍRDAGSMORGUN

Hér var vaknað fyrir allar aldir eða kl. 07,30, þar sem lítil prinsessa er til gistingar hjá ömmu og Einarrrri.  Það hlýtur að vera unaðsleg tilfinning að vera tveggja ára og vakna úthvíldur og fullur orku. 

Jennslan sagði um leið og hún opnaði augun: "Amma, Jenny búin sofa lengi, lengi og sólin er úti.  Koma frrrrram".  Fram fórum við og Jenny er búin að afreka ýmsilegt.  Hún er búin að borða vatnsmelónu og egg, fá einn pínulítinn ís, mála með tússlitum, skreyta egg, horfa á barnaefni og er nú á leið í bað.  Hún blæs ekki úr nös enda dagurinn rétt að byrja.  Amma fylgir á eftir og yngist upp um 30 ár eða svo.

Svo koma mamma og pabbi að sækja Jenny og fara með henni og gera skemmtilega hluti.  En fyrst æltar Jenny að baka pönnukökur með ömmu og gefa gömlu ásamt kaffi. Ég hef verið að reyna að koma barninu í skilning um að amma heiti líka Jenny en hún hlær bara að þessari vitleysu og segir: "amma heitir amma og Jenny heitir Jenny Una Errrriksdóttirrrrr".

P.s. Þeir sem taka eftir rispunni á nebbanum hennar Jenny upplýsast hér með skv. barni að: "Það var hann Olav sem var vondur við Jenny og hann má ekki meiða Jenny". Heyrirðu það Olav??? Og skammastín!!

Síjúgæs