ÉG VAR AÐ VELTA ÞESSU FYRIR MÉR...

..með Norðmenn, hvort þeir séu álitnir vingjarnlegir en óáhugaverðir eða ríkir og hrokafullir.  Hm..þeir Norðmenn sem ég hef hitt eru svo sem af öllum stærðum og gerðum en þeir eiga allir eitt sameiginlegt.  Það er leiðinlegi "MATPAKKINN" með bragðlausu og óspennandi samlokunum.  Bókstaflega allir með tölu troða í sig úr þessum plebbalega matpakka í hádeginu.  OMG!

Jebb så var det med den saken!

Eru Norðmenn ríkir og hrokafullir eða vingjarnlegir og óáhugaverðir?

LEIÐIN AÐ TITLINUM..

..er löng og slítandi.  Í fegurðarsamkeppnum þarf mikið að leggja á sig til að hin raunverulega fegurð konunnar komi í ljós.  Þrotlausar æfingar í ræktinni þar sem hver vöðvi, sin og taug eru þanin til hins ýtrasta en þar liggur stór hluti hinnar sönnu fegurðar konunnar falin.  Þetta vita allir.  Ekki má gleyma hinum ströngustu megrunarkúrum þar sem hver biti er vigtaður og er skemmst að minnast kálsúpunnar hennar Katýar í World Class sem nánast gekk af Lindu Pétursdóttur dauðri um árið. Þess minna af keppandanum þess betra og sigurlíkurnar aukast með hverju grammi sem tapað er.  Meiköppið er stór þáttur í fegurð manneskjunnar, aðallega kvenna.  Hún dregur fram hina sönnu fegurð sálarinnar eða réttara væri að segja að meiköppið í miklu magni felur óvelkomna fæðingargalla eins og raunveruleg andlit, minnkar nef og stækkar varir.  Hreint dásamlegt fyrirkomulag.  Leiðin að titlinum "Fegurðardrottning Íslands 2007" er þyrnum stráð og vörðuð blóði, svita og tárum. 

"Leiðin að titlinum" er sjónvarpsþáttur sem sýndur verður á Stöð 2 í kvöld.  Enn ein samkeppnin í fegurð er í startholunum.  Ómægod!  Flottar stelpur en glatað fyrirbæri og ég vildi óska að það væri almenn skoðun fólks að þær væru tímaskekkja.

SNÚRAN

Ég og fleiri vinir á snúrunni!

Snúruafmælið mitt (sjö mánuðir) var skemmtilegt og gefandi.  Átti langt samtal við Ingu-Lill sem er að koma næsta sunnudag og setti henni fyrir langan innkaupalista því mig vantar eitt og annað frá hinum Norrænu löndum.  T.d. surströmming, blodpudding, palt og annað smátt og gott.  Nebb er að ljúga.  Sem er bannað fyrir alka eins og mig. 

Ég gaf mér loksins tíma frá hátíðarhöldunum og fór bloggrúntinn.  Það er einhver húmor á flugi hér í bloggheimum því ég er búin að hlægja mig máttlausa fyrir tilstilli skemmtilegs fólks.  Þar sem síða þessi er ekki bönnum börnum fer ég ekki nánar út í þá sálma.

Það var önnur snúra sem hélt upp á afmælið sitt í dag.  Sko afmæli í árum, ekki edrúdögum.  Þórarinn Tyrfingsson, megababe varð sextugur í dag.  Ég elska hann Þórarinn.  Sko á hreinan og tæran máta.  Hann bjargaði lífi mínu ásamt fleirum í hans ranni.  Svo er hann svo sexý.  Stelpurnar segja að hann sé eins og óumbúið rúm.  Ef ég væri ekki svona asskoti glöð með húsbandið þá væri ég kannski dómbær á það. (Ellý plís ekki blogga um menn sem eru eins og óumbúin rúm, það er patent á því meðal alsgáðra kvenna, ekki að þú sért það ekki.  Hm að tala sig í flækju OMG ég er sko að flýta mér að blogga, Boston Legal handan við auglýsingar).

Síjúgæs

NAUÐSYNLEGUR LÆKNIR Á HVERT HEIMILI

Hann www.ragnarfreyr.blog.isþe matglaði læknirinn og bloggvinur minn er að gera mig brjálaða.  Hann setur inn hverja dásemdina á fætur annarri í kræsingum og ég er alltaf svöng eftir að ég er búin að lesa færslurnar hans.  Nú er það Pavlova.  Það eru terturnar hérna fyrir ofan.  Djísús ég er sykursjúk og má ekki svona marengsdæmi eitthvað.  Lífið er tík og ekki bara pólitik.  Þetta er að fara verulega illa með mig.  Ég ætla samt að baka svona Pavlovu næst þegar ég svindla en það gerir ég reglulega með löngu millibili og ég brýt af mér með mjög einbeittum og allt að því agressívum brotavilja.

Annars eru uppskriftir mannsins vart af þessum heimi margar hverjar.  Ragnar Freyr hefur bjargað lífi mínu í kjúklingadeildinni svo eitthvað sé nefnt.  Varíasjónirnar eru óteljandi.

Konan hans er ekki síðri kokkur þegar hún kemst að í eldhúsinu (er í lagi með okkur hin? Mörg hver á stöðugum flótta undan eldavélinni).

Ég hef eldheita matarást á þessum hjónum og ég þekki þau ekki nokkurn skapaðan lifandi hræranlegan hlut.

Namminamm!

SKÁL Í NAFNI ALLAH

Vó, vó!  Það er eins gott að passa sig ef maður ætlar í heimsókn til föðurlandsins Írans.  Kúrdi frá Íran sem búsettur er í Drammen í Noregi var að heimsækja móður sína í Baneh í Íran en lögreglan sá hann drekka bjór.  Hann var færður á löggustöðina og fékk 130 svipuhögg fyrir tiltækið og voru þau afhent á staðnum.

Ég er ekki á leiðinni til Írak en ef svo undarlega vildi til þá er eins gott að ég haldi mér edrú áfram og í góðum bata því ég vil alls ekki láta berja mig í sumarfríinu.

Úff umboðsmenn Allah svo svakalega refsiglaðir eitthvað.

130 vandarhögg fyrir að drekka bjór

DRYKKJUHVATNING UM HÁBJARTAN DAG!

Sjónvarpsdagskráin "Dagsbirtan" væntanlega með vísun í Birtu þeirra DV manna sem lagði upp laupana í fyrra hefur komið fram á sjónarsviðið.  Dagskrá þessi er alveg ótrúleg að gerð, textinn eins og ómálga barn hafi séð um hann en þessu gerði hin stórskemmtilega www.skessa.blog.is góð skil í síðustu viku.  Það var ekki annað hægt en að hlægja sig máttlausan að lélegu orðfæri þess sem blaðið skrifar.  Nú í þessari viku halda bommerturnar áfram í blaðinu en nú m.t.t. efnis blaðsins (rithátturinn er enn með ólíkindum) og mér er spurn hvort það er allt í lagi með þá sem að blaðinu standa.  Er þetta einn stór brandari eða er þarna fólk á ferðinni sem ætti heldur að BERA út Dagsbirtuna í staðinn fyrir að skrifa í hana?

Það sem vakti athygli mína var umfjöllun um Júróvisjón, aðallega tillögur að Júróvisjón partíleikjum.  Ég hefði nú verið búin að blogga um þetta fyrr en kosningarnar hafa tekið hug manns allan.  Ég hef ekki farið í launkofa með að ég er óvirkur alki, enda engin ástæða til.  Það þýðir þó ekki að ég sé fanatísk gagnvart áfengi en ég veit af eigin raun og þekki til að misnotkun á áfengi krefst ótrúlegra mannfórna í samfélaginu og tekur fjölda lífa með beinum eða óbeinum hætti á hverju ári.  T.d. hef ég á s.l. tveimur árum misst nákomna vini sem beinlínis hafa dáið af völdum fíknisjúkdóma.  Það er sorglegra en tárum taki.  Samfélagið okkar er mjög áfengistengt og mér hefur ekki fundist skorta hvatningu í þá átt að fá fólk til að fá sér í glas.  Tilhneigingin ætti fremur að vera að draga úr neyslu þess einfaldlega vegna þess að ofdrykkja er mikið vandamál meðal stórs hóps fólk.

Þess vegna varð ég kjaftstopp þegar Dagsbirtan hvetur til ofneyslu áfengis á mjög opinn og frjálslegan máta.  Á maður að hlægja eða gráta?  Kona spyr sig.

Gjörsvovel, hér kemur hvatningin:

"Partýleikir.  Leikur 1

Skrifaðu niður heiti allra landanna sem eru með í úrslitum á miða og láttu gestina draga miða þegar þeir koma inn.

Leikurinn gengur út á það að þegar þitt land fær stig þá drekkur þú jafn marga sopa og stigin sem landið fékk.

Svo er hægt að hafa allskonar leikfléttur, til dæmis að sá sem fær 12 stig tekur eitt skot () Þeir sem fá 10 stig og 12 stig geta líka gefið öðrum af sínum sopum.  En hafa skal í huga að ekki er æskilegt að gefa ALLA sopana heldur kannski hafa sem reglu að þú verðir að eiga fyrstu 6 sopana."

Vá vesalings þeir sem lenda á efstu löndunum.  Þeir koma til með að verða FULLIR!  Maður getur reiknað út sjússa fram og til baka.  Hvað um það, er þetta fólk sem skrifar í blaðið komið með aldur til að fara í ríkið?  Ekki nóg með að þetta sé ósmekklegt heldur er þetta með plebbalegri uppástungum sem ég hef lesið um lengi hvernig á hafa gaman saman.  Það er auðvitað "dagsljóst" að þeir sem drekka áfengi í hófi munu ekki fara í ofannefndan leik eða leiki svipaða þessum.

P.s. Greinarhöfundur ráðleggur fólki sem ætlar að hafa áfengi um hönd (ef áfengi SKYLDI haft um hönd) þá er best að vera búinn að koma börnunum fyrir.  OMG ætli það kvikni alltaf í eða húsið hrynji um leið og sá sem heldur á pennanum fær sér í glas? 

 

ÉG ÞARF AÐ FARA Í MEGRUN - INNVORTIS!

Úff alltaf gleðifréttir úr rannsóknarheiminum.  Amk. ein á dag svona til að peppa mann upp.  Mælingar með nýrri tækni þykja benda til þess að fita safnist fremur saman innvortis í grönnu fólki en feitlögnu en læknar segja samansafnaða fitu í kring um hjarta, lifur og briskirtil geta verið jafn hættulega heilsu fólks og fitan sem liggur undir húðinni, svona frjálsleg og utanádinglandi þið vitið.

Eftir að ég hætti að vera fyllibytta fóru bjórkílóin af og sykursýkin (sem ég btw. drakk á mig hjálpaði til).  Nú er ég töluvert undir kjörþyngd.  Nánast of mjó.  Millivegurinn vandfundinn eins og venjulega, alla vega í mínu tilfelli.  Ætli ég sé bara ekki spikfeit að innan?  Að fituviðbjóðurinn sem á mér var hafi flúið inn á við þegar ég snéri við blaðinu og fór að lifa alsgáðu og heilbrigðu lífi.  Kannski er hjartað beinlínis vatterað í mör.  OMG ætli séu til einhverjar Jónínur í heiminum sem taka mann í innvortis megranir (ekki stólpípur samt).  Hvernig get ég komist að því hvort ég er offitusjúklingur?

Fitan innvortis í grannvöxnu fólki?

LOKSINS MÁ GERAÐA Á KLÓINU!

Það var kominn tími á að einhver setti þessi mannréttindi okkar "aumingjanna" í fúnsjón.  Pete Wentz, bassaleikari hljómsveitarinnar Fall Out Boy´s hefur ásamt félögum sínum opnað bar í New York fyrir aumingja eins og hann sjálfan og félagana þar sem má hafa samfarir á klósettinu.

Þar sem við íslendingar erum svo opnir fyrir síungum nýungum þá hljótum við að taka þetta eftir.  Það væri æðislegt að geta t.d. farið út að borða og fá allan pakkann með.  Borða, drekka regnhlífardrykki, fá sér bjór, pissa og fá sér svo einn á broddinn inni á klói áður en haldið er heim.  Það er nú lífið.

Þeas við alkarnir fengjum kaffi, og sódavatn og einn laufléttan í staðinn.  Lífið er svo sannarlega dásamlegt!

LÁNANÐU MÉR LYKILINN...

..lagsi.  Ég vil lifa lengur.  Hm.. Bandarískir vísindamenn telja sig hafa fundið út hvers vegna hófsemi í mat kann að eiga þátt í að lengja líf mann.  Þeir hafa rannsakað erfðaefni orma og leiða í ljós gen sem eiga þátt í þeim viðbrögðum við minni inntöku kaloría.

Þetta eru flottar fréttir.  Með mínu nýfengnu insúlínháðu sykursýki er óhollusta no,no fyrir mig.  Þess vegna hlýt ég að lifa lengur.  Þess vegna bið ég um lykilinn góða að langlífinu.

Stendur ekki einhverstaðar að maðurinn sé aumasti ormur í samanburði við Guð.  Nú skil ég út á hvað sú setning gengur.

Síjúgæs!

 

Finna lykil að langlífi

AF HITASÓTT, RÁNDÝRUM MAT OFL.

Úff ég er með hita.  Sótthitta já. Sit hér og ræð fram í gráðið með beinverki, höfuðverk og almmennt slen. Ég finn til í hárinu.  Hafið þið verið með verki í hárinu? Augun ranghvolfast í höfðinu á mér og það er vont að reykja.  Vont að reykja segi ég en ekki ómögulegt.  Í þessu ástandi er ógerlegt að vera með sleifina á lofti þannig að hér var brugðið á það ráð að panta mat utan úr bæ, sem vegna breytts lífsstíls gerirst ákaflega sjaldan núorðið.  Uppáhaldsstaðurinn Nings varð fyrir valinu. Eftir að hafa hringt þangað vorum við að pæla í því húsbandið og ég hvort það hafi orðið rosaleg hækkun í hafi á hrísgrjónum eða eitthvað.  Þeir eru sko flottir á Nings, ekki misskilja mig en 2.800 karl á mann fyrir svona horaða og matgranna einstaklinga er nú bara hvítan úr augunum á manni.  Bæði hönd og fótur.  Ég er ekki nísk en fyrir þessa peninga má gera ýmsilegt skemmtilegt, nytsamt og uppbyggilegt.

Annars er ágætt að lesa blogg þegar heilsufarið er í lakara lagi.  Ég á reyndar alveg ótrúlega skemmtilega bloggvini úr öllum stjörnumerkjum (hehe) og þeir eru allir í "rithöfundamerkinu" með tungl í húmor og pólitíska vakningu rísandi.

Held áfram að lesa blogg og skrifa líka.  Ef þið eruð ekki sátt við það þá getið þið beðið fyrir ykkur, ég hef parkerað minni eðlu seingeitarpersónu við tölvuna og hananú!