Þvagleggur

 

Ég kann ekki að sauma á saumavél, ekki þó líf mitt lægi við.  Mér hefur alltaf fundist fólk sem getur saumað, lagað, græjað og gert verið undramanneskjur.  T.d. get ég ekki faldað buxur, ekki stoppað í (en það skiptir ekki máli, enginn gerir það lengur) eða lagað saumsprettur.  Þess vegna hef ég hent fötum í stórum stíl í gegnum tíðina.  Þannig er nú það.

Ég hef átt vinkonur sem hafa átt saumavélar og ég man eftir að hafa starað á þær, þegar þær djöfluðust á græjunni og út úr ólögulegum efnishrauk reis tilbúinn kjóll eða jafnvel kápa á góðum degi.  Jösses hvað þær voru klárar.

Ég átti einu sinni mann (einn af mörgum - úff) sem saumaði eins og motherfucker (sorrí orbragðið), gerði við, faldaði og bjó til allskonar.  Hjónabandið entist ekki en það var ekki vegna skorts á handavinnuhæfileikum mannsins.  Á vél sko.  Hm... best að gæta orða sinna hérna.  Móðir mín hefur þennan fyrrverandi enn í hávegum

En að málinu...

Þið sem þolið ekki að minnst sé á Þvagleggsumdæmið eða Þvagleggina á Selfossi hættið að lesa hér.  Mér finnst óþarfi að vera að koma í veg fyrir saumavélasölu erlends aðila í umdæminu.  Saumaskapur á heimilum er deyjandi listform.  Það þarf að halda þessari þjóðaríþrótt íslenskra kvenna á lífi svo við getum nostalgíast yfir henni.

Já og ég man að ég var svo léleg í handavinnu að amma mín var með saumakonu á sínum snærum á Hringbrautinni, sem saumaði stykkin mín fyrir vorpróf.  Það var ekkert annað að gera í stöðunni, krakkafíflið ég var gersneytt áhuga og hæfileikum á vélina.

En ég get prjónað...

Trefla

Ójá farin að þvo!

Bætmí!

Úje

 

Sala á saumavélum stöðvuð

Loksins gerist eitthvað í þvagleggsmálinu

Þvagleggsmálið margfræga, hefur nú dregið dilk á eftir sér.

Læknir og hjúkrunarfræðingur hafa verið kærð til landlæknisembættisins fyrir að hafa tekið þvagsýni úr komu gegn vilja hennar, að kröfu lögreglu á Slefossi (Þvagleggs lögregluumdæminu) í mars s.l.  Einn af læknum konunnar kærði aðgerðirnar.

"Mannréttindaskrifstofa Íslands hefur sent eftirlitsnefnd Sameinuðu þjóðanna upplýsingar um mál konunnar. Það er líka í skoðun hjá umboðsmanni Alþingis og hjá starfshópi sem samgönguráðherra skipaði."

Konan sem grunuð var um ölvun við akstur, var tekin með valdi og í hana settur þvagleggur til að ná úr heni þvagsýni.

Eins og fólk sjálfsagt man, ákvað ríkissaksóknari að aðhafast ekkert í málinu.

Þetta er eitt af óhuggulegri málum af ofbeldi lögreglu sem ég hef lesið um hin síðari ár.

Gott að það er ekki látið falla í gleymskunnar dá.

Svo er að fylgjast með.

Ójá.

Kærð fyrir þvagsýnatöku

Guðmundur í Byrginu kominn á kreik

Guðmundur í Byrginu ætlar ekki að gera það endasleppt.

Nú hefur hann kært einhvern náunga fyrir þjófnað en sá gerði sér lítið fyrir og fór í Götusmiðjuna á Efri-Brú og náði í dót sem tilheyrði Byrginu, fyrir u.þ.b. 2 milljónir króna.  Starfsfólk Götusmiðjunnar afhenti manni þessum góssið í góðri trú.

Guðmundur í Byrginu hefur kært þennan þjófnað sem stuld á eigum Byrgisins. 

Halló, er ekki nokkuð ljóst að það er vægast sagt á reiki hvað tilheyrir hverjum í Byrgisósómanum?

Það er ljótur blettur á íslenskri meðferðarsögu að líf og heilsa fjölda manna og kvenna var látinn í hendurnar á trúarsöfnuði Guðmundar.  Reyndar eiga trúfélög ekki að sjá um meðferð á veiku fólki.  Það ætti að liggja ljóst fyrir en gerir það ekki, a.m.k. nægjanlega að mínu mati.

En af hverju lætur maðurinn ekki kyrrt liggja?  Var þetta ekki orðið gott?

Sjá nánar á visir.is

 

Þvagleggir á fylleríi

Löggan og starfsmenn sýslumannsins í Árnessýslu halda árshátíðir eins og annað fólk.

Það sem gerir þá kannski öðruvísi en marga er, að ég held, að það sé ekki mikið um "bumbuslag" hjá öðrum starfsstéttum.

Koma sem telur sig hafa orðið fyrir "bumbuslagsmálahundunum", féll í jörð og úlnliðsbraut sig og er nú 85% öryrki (85% varanleg örorka og 12% varanlegur miski vegna áverkanna).

Daginn eftir slysið komu löggumennirnir á spítalann og báðu konuna afsökunar og gáfu henni blóm.  Annar maðurinn beitti sér fyrir því að konan fengi styrk vegna slyssins úr félagssjóði lögreglumanna í Árnessýslu. Konan taldi þetta gefa tilefni til að draga þá ályktun að mennirnir hafi átt sök á því hvernig fór en því var héraðsdómur ósammála.

Af því má sjá:

a) að tvær löggur sem neita hafa meira vægi en eitt stykki kona, þá án tillits til þess sem á undan er gengið og nokkrar líkur á þátt lögregluþjónanna, ef maður skoðar eftirleikinn.

b) að það er aldrei lognmolla í Þvagleggnum, ekki einu sinni þegar þeir lyfta sér upp.

Hvað ætli Sýsli segi?

Ævonder.

Ég er á því að löggurnar tvær hefðu verið menn að meiri með því að taka einfaldlega ábyrgð á þessu hörmulega slysi sem konan lenti í.

En það er ekki því að heilsa.

Því miður.

 

Ekki sannað að „bumbuslagur" hafi leitt til slyss

Katrín vill banna þvaglegg!

Það er varla að ég geti skrifað orðið "þvagleggur" núorðið, án þess að fara í hamfarastellingar og skrifa það með stórum staf, því þá birtist Þvagleggurinn í Þvaglegslögregluumdæminu, ljóslifandi, fyrir hugskotssjónum mínum.

En Katrín Júlíusdóttir, þingkona Samfylkingarinnar telur að það "eigi hreinlega að banna þetta", og á þá við þvagsýnatöku með þvaglegg úr ökumönnum sem grunaðir eru um akstur undir áhrifum vímugjafa.

Þingmenn VG og Sjálfstæðisflokks tóku undir þetta hjá þingkonunni.

Ég vona að þessir þingmenn vilji banna þvagleggsnotkun, á grunðum sakamönnum, yfir höfuð, nema þá með sérstökum úrskurði og þá inni á sjúkrastofnun af læknum sem enn muna Hippokratesareiðinn.

Dem, ég verð óð í skapi, bara við tilhugunina um hina upphaflegu þvagleggsfrétt.

Bölvað valdníðslupakk.

Ogégmeinaða.

Lúkas hvað?

Skýr skilaboð frá Alþingi

Löggan í Þvagleggnum drepur mig úr hlátri..

 

..einhvern daginn.  Þeir fengu "ábendingu" um að það væri verið að selja fínkornað neftóbak í söluturni á Selfossi (úff, ég blikna frammi fyrir einbeittum brotavilja íslenskra sjoppueiganda).  Hugrakkir eins og þeir eru í Þvagleggsumdæminu, létu þeir sig ekki muna um að taka tollinn með sér í heimsókn til sjoppumannsins ógurlega og þeir leituðu í versluninni, við hættulegar aðstæður (hm).  Við leitina fundust á ANNAN TUG tóbaksdósa, sem voru auðvitað gerðar upptækar að staðnum.  Þó það nú væri.

Og þeir afrekuðu fleira í umdæminu.  Einhver stórglæpamaður henti hálfétinni pylsu sinni ásamt BRÉFINU, já þið lásuð rétt, út um gluggann á bílnum sínum og hann neitaði sök, ódámurinn sáarna.  Halló!  Siðlaust þetta fólk sem verslar í sjoppum og kaupir pylsur, svo maður ekki tali um sjoppueigendurna sem selja viðbjóðinn.  Kominn tími á að gera rassíu á ótýnda, samviskulausa glæpamenn, sem engu eira.

Hvað um það, þar sem pylsuætan neitaði sök, þá var tekinn á hann þvagleggur, nei, reyni aftur.  Þar sem hann neitaði sök þá verður ákært í málinu.

"Jón Jónsson, pylsuæta hér í bæ, sýndi af sér einlægan og markvissan brotavilja er hann þrykkti hálfétinni pylsu sinni og bréfi utan af henni, út um gluggann á bifreið sinni.  Hann mun sæta fangelsi allt að 3 árum og til frádráttar koma þeir 5 mánuðir sem sjoppufæðisætan sat í gæsluvarðhaldi, á meðan á rannsókn málsins stóð."

Þvagleggurinn er athyglissjúkur.  Er hann á leiðinni í forsetaframboð jú þeink?

Eru engin stórvægilegri "brot" að kljást við?

 Þeir fá sér ekki kaffibolla í Þvagleggslöggunni án þess að senda um það fréttatilkynningu á blöðin, svei mér þá..

Ójá.

Verslun á Selfossi seldi „snuff"

Ofbeldisdómur IV - Skilorðsbundinn

 

 

Ég held áfram að blogga um skilorðsbundna ofbeldisdóma.  Eins og ég sagði um daginn, þá einsetti ég mér að blogga um hvern einasta einn, þ.e. "klappákollinn" dómana, þar sem ofbeldi er gengisfellt hrapalega og ég hef nóg að gera í því.

Nú leggur Héraðsdómurinn í Þvagleggnum í púkkið.  Eftirfarandi mál var dæmt þar í dag.

"Maðurinn var ákærður fyrir að hafa aðfaranótt laugardagsins 18. nóvember 2006, í anddyri veitinga- og skemmtistaðarins Pakkhússins á Selfossi, slegið karlmann þungu höggi í andlitið þannig að hann féll afturfyrir sig og síðan sparkað einu föstu sparki í andlit mannsins, þar sem hann lá á gólfi staðarins, allt með þeim afleiðingum að hann nefbrotnaði, neðri kjálki brotnaði vinstra megin niður í gegnum neðri brún neðri kjálka og stæði tannar 38, þannig að mikil hreyfing var um brotið og bit sjúklings fór algerlega úr skorðum, auk þess sem tilfinning í neðri vör hans skertist. Var hinum ákærða gert að greiða fórnarlambinu tæplega 500 þúsund krónur í skaðabætur"

Fjórir mánuðir skilorðsbundnir.  Vá hann hlýtur að vera skelfingu lostinn maðurinn.  Þvílík eftirmál.  ´

Bíðið á meðan ég frem Harakiri af ánægju yfir að dómarar landsins skuli senda svona sterk skilaboð út í samfélagið.  Þau skilaboð að ofbeldi sé tertubiti.  Gott að viðkomandi stal sér ekki hangikjötslæri til matar.  Þá hefði hrikt í stoðum réttarkerfisins.

Ég á dómaravaktinni.

Sá er heppinn..

..að búa ekki í Þvagleggnum.

Að vera ölvaður á bíl, reyna að stinga lögguna af og vera svo með attitjúd og viðskotaillur, hefði kallað á læknisaðgerðir með lögregluvaldi, ekki svo langt frá bænum.

En mikinn rosa móral held ég að maðurinn sé með.

Vó hvað þetta hefði kallað á þvaglegg í Árborg.

Nananabúbú.

 

Ölvaður og viðskotaillur ökumaður fluttur í járnum í fangaklefa

Þvagleggshvetjandi ofbeldi!

 

Hey karlinn, það er bannað að slá.  Algjörlega blátt bann við ofbeldi hér vinurinn og maður lemur ekki lögguna þrátt fyrir að það sé búið að hella í sig einhverjum helling af brennivíni.

Er ég að missa vitið?  Mér finnst ég alltaf vera að lesa um að djammararnir í hátíðarskapinu séu að slá löggur, ráðast á þær, slá af þeim húfurnar og fleira í þessum dúr.  Algjört lögguofbeldi bara, nema á hinn veginn.  Ætli löggur séu með atvinnutryggingu? 

Mér brá þegar ég fyrirsögnina á fréttinni.  Já, auðvitað er ég að koma að þvagleggnum.  Ég læt ekkert tækifæri ónotað til að þvagleggsblogga.  Mér datt nefnilega svona í hug þegar ég las fyrirsögnina, "vá hvað ég vona að viðkomandi árásaraðili búi ekki í Selfossumdæminu, því þetta er þá pottþéttur þvagleggjari".

Sjúkkit, þetta var á Suðurnesjum, þar er bara notaður þvagleggur á sjúkrahúsinu, í læknisfræðilegum tilgangi.

Pissípissí!

Úje

Sló til lögreglumanns

Og enn er migið..

 

..í miðbænum um helgar, þrátt fyrir sektir og heimsókn á löggustöðina.  Hvað er þetta með þvag og Íslendinga?  Sumir mega ekki "vatni halda" til að komast yfir hland (þvagleggirnir),  og sumir hætta ansi miklu til að losna við það.. þar sem þeir standa.

Kominn tími á ferðakoppa?  Ég er ekki frá því að það eigi að skylda fólk til að taka með sér ferðakoppa á djammið.  Koppa sem ég legg til að framleiddir verði í skyndi, ferðavænir og samanbrjótanlegir, og hægt að stinga í vasa eftir notkun ( ).

Merkilegt hvað Íslendingar eru pervert í þvagmálum.  Einhver kallaði þetta þvagfrygð.  Þvagleggirnir á Selfossi eru með óeðlilega hlandhneigð og djammararnir í miðbænum líka.  Birtingarmynd þessa blætis er ólík en söm.  Erum við ekki almennilega klósettvædd á landinu eða hvað?

Ef við gefum okkur að hinn gullvæga 10% regla sé í fullu gildi, þá voru þessir 14 sem teknir voru við útimig í hópi 140 hlandvappara.  Vel af sér vikið hjá löggunni.

Ég bíð spennt eftir hlandkoppaframleiðslu og þangað til tel ég pissufrömuðina, glöð í (ó)bragði.

Dónjúrineitonmædressplís!

Úje 

Fjórtán handteknir fyrir hegðunarbrot