Mótmælt fram í rauðan dauðann

Hvað á að troða hóteli á sjálft Ingólfstorgið?

Skemma götumyndina?

Eyðileggja gamla Sigtún - láta það hverfa?

Ég vil ekki hafa þennan fíflagang.

Það er merkilegt með Íslendinga (suma) hvernig þeir vilja troða öllu á sama reitinn.

Og byggja háhýsi líka, eins og hroðbjóðinn á Höfðatorgi.

Ef íhaldið í borginni hefði fengið að ráða væri Torfan minni eitt.

Moggahöllinn er svona dæmi um skelfilegan arkitektúr og kumbalda sem var troðið niður í gamla miðbæinn.

Mogahöllin er reyndar svo ljót að mér er farið að finnast hún falleg, verra verður það ekki.

Við skulum ekki tala um ráðhúsið.

Manni líður eins og Gúliver hafi tekið með sér heimili sitt til Putalands og slengt því ofan í tjörnina.

Látið Ingólfstorg vera mig langar til að borgin mín eigi sér einhverja húsasögu.

Að virðing sé borin fyrir því gamla.

Hlustið á það yfirvöld.

Annars getið þið þarna hjá borginni átt okkur á fæti.

Við munum einfaldlega mótmæla þessum gjörningi fram í rauðan dauðann.

Baráttutónleikar á Ingólfstorgi

Álfarnir voru bankamenn

Hvernig er hægt að taka þjóð alvarlega sem lætur taka viðtal við sig um álfa í umfjöllun um efnahagshrunið?

Það er kona í þessu myndbandi sem fer alveg með mig.

Hún bendir á stokka og steina og bendir á hreyfingu í grasinu og sýnir svo álfadúkku til að sýna stærð þessara "lífvera".

Krúttlegt en það eru líka þjóðsögurnar og ævintýrin og fín til heimabrúks.

En annars er þetta fínn þáttur hjá ástralska 60 minutes.

Fín viðtöl við fólk, líka sjómanninn sem varð að bankamanni.

Ef við gætum nú sleppt þessu víkinga- og álfakjaftæði alltaf hreint þá gætum við svei mér þá verið tekin í fullorðinna manna  tölu.

Ég varð svo hrygg þegar ég sá þetta klipp sem fylgir fréttinni.

Mikið skelfing erum við búin að vera.

En þá er að bretta upp ermar.

Köllum álfana til hjálpar.

Annar sjómaður sem talað var við var algjörlega að mínu skapi.

Aðspurður hvort hann tryði á tilvist álfa svaraði hann á þá leið að þeir álfar sem hann vissu um hefðu allir verið bankamenn.

Spot on.

„Uppskrift að stórslysi“

Lúserar aldarinnar

Þegar vertíðin í útrásinni er lokið hvað gera menn þá?

Jú, Björgólfur I og II, Karl Wernersson og eflaust einhverjir fleiri heiðursmenn stefna fréttamönnum og fjölmiðlum.

Það er ekki líðandi að fréttamenn skuli sífellt vera að segja frá bömmerum þessara snillinga.

Eru ekki fleiri matarholur sem má stinga gullslegnu trýninu ofan í?

Það má auðvitað halda sér í æfingu og stefna aumum bloggurum líka.

Sem sífellt tala niður hina íslensku fjármálasnillinga.

Hvernig væri að þessir menn færu að láta rofa til í hausnum á sér?

Og læra svo að skammast sín?

Neh, hvernig læt ég.

Þeir eru ekki enn búnir að ná því að þeir eru og verða lúserar aldarinnar.

Get fucking over it.

Karl höfðar mál gegn fréttamönnum

Þjóðin á þing - úje og allir glaðir í boðinu

Heiða vinkona mín og fleira gott fólk ætlar að bjóða sig fram sem hópur til stjórnar í Borgarahreyfingunni á komandi landsfundi.

Vefstjóri heimasíðu Borgarahreyfingarinnar hefur verið að lenda í tækni sem er kvikindislega stríðin eins og tækni ein getur verið, m.a. misst út eitt komment í umræðu á síðunni úr miðri umræðu.

Nú eru nokkrir dagar síðan hópurinn góði tilkynnti um framboð sitt til stjórnar og enn hefur ekki tekist að koma þessari tilkynningu inn á síðu hreyfingarinnar og því datt mér í hug að koma til aðstoðar og birta þetta hjá mér því skilaboðin eiga auðvitað erindi til allra sem áhuga hafa á málefnum BH og vilja jafnvel ganga í hreyfinguna til að vera þátttakendur í nýjum stjórnmálum á nýju Íslandi, þar sem allt er opið, frjáls og uppiáborðiliggjandi sýnilegt öllum.

Hér koma skilaboðin:

"Þjóðin á þing

Borgarahreyfingin var stofnuð af fólki með hugsjónir og væntingar um að koma á lýðræðislegum umbótum, réttlátara samfélagi með gagnsæjum vinnubrögðum og umfram allt, heiðarleika að leiðarljósi

Slagorðið “þjóðin á þing” er engin tilviljun. Það var valið vegna þess að vildum að þjóðin fengi rödd inni á Alþingi Íslendinga. Þinghópur hreyfingarinnar var hugsaður sem brú frá grasrótinni þangað inn.

Að okkar mati hefur það mistekist.
Þess í stað hafa hugsjónir, stefna og kraftur hreyfingarinnar týnst í deilum og óánægju á alla kanta.

Við sem undir þetta ritum erum stolt af Borgarahreyfingunni eins og hún var hugsuð. Í stað þess að gefast upp fyrir þeim mistökum sem gerð hafa verið langar okkur að leggja okkar að mörkum til að hreyfingin finni uppruna sinn á ný og að vegur hennar verði sem mestur.

Þess vegna ætlum við að bjóða fram krafta okkar til stjórnar Borgarahreyfingarinnar.

Við komum fram sem hópur og gerum okkur vonir um að fá stuðning sem slíkur. Engu að síður bjóðum við okkur hvert og eitt fram til starfsins sem einstaklingar.

Sem hópur höfum við sett saman grunn að stefnu þeirri sem við munum fylgja í störfum okkar og hana má skoða hér: Þjóðiná þing - framboð til stjórnar

Við munum kynna stefnuna nánar á næstu dögum og á landsfundi hreyfingarinnar.

Ásthildur Jónsdóttir, Bjarki Hilmarsson, Björg Sigurðardóttir, Guðmundur Andri Skúlason, Gunnar Gunnarsson, Gunnar Sigurðsson, Heiða B. Heiðarsdóttir, Ingifríður Ragna Skúladóttir, Jón Kr. Arnarson, Lilja Skaftadóttir, Sigurður Hr. Sigurðsson og Valgeir Skagfjörð."

Ég veit að allir meðlimir hreyfingarinnar fagna þessu framtaki mínu.

Ásamt því að allir miðlar að vefsíðu BH undantekinni hafa verið duglegir að segja frá þessu.

Ekkert að þakka elskurnar mínar.

Geri bara mína "borgaralegu" skyldu.  Móðir Theresa hvað?

"Meira af henni en minna af mér"

 

Á sumum menningarsvæðum þykja holdugar konur fallegar.

Merki um velmegun og það er logískt finnst mér.

En við vestrænar konur viljum helst hverfa af yfirborði jarðar ef þess er nokkur kostur.

Þessi mynd vakti hjá mér viðbrögð sem mig langar ekkert að kannast við.

Fyrst hugsaði ég ég með mér hversu falleg þessi kona væri, að hún geislaði af heilbrigði.

Svo festist ég í lærunum. 

Alveg: Eru þau ekki af einhverjum öðrum, mömmu hennar eða jafnvel eiginmanni?  Þau eru hjúmongus.

Mér fannst þau alveg dekka heilt búningsherbergi, að það væri hægt að byggja á þeim heilt úthverfi nánast.

Ég skammast mín fyrir hversu móttækileg ég hef verið fyrir heilaþvotti tísku- og útlitsómenningarinnar.

Samt vinn ég í því á fullu að losa mig við þetta fáránlega mat á kvenlegum formum sem er búið til af fatahönnuðum og snyrtivöruframleiðendum og hefur orðið mörgum konum og stúlkum að aldurtila vegna átröskunarsjúkdóma.

"Meira af henni en minna af mér" var auglýsing sem gekk ljósum logum á markaði fyrir þetta 15 árum eða svo.

Kona vel í holdum horfði á spegilmynd sína sem var svo horuð að hún gaf sveltandi börnum í Afríku ekkert eftir í holdleysi.

En hvað um það, Lizzie Miller er falleg.

Það er heilaþvottastöðin sem er að trufla sjónina í mér og fleirum og það ætti að vera verkefni okkar allra að útrýma stöðluðum markaðshugmyndum um hvernig við eigum að líta út.

Gínukonan er ekki til nema í heimi tískunnar þar sem örlítil prósenta kvenna gengur um deyjandi úr hor og átröskunarsjúkdómum og gefa tóninn.

Út með gínukonuna og inn með hina venjulegu konu sem er alls konar í laginu og nánast aldrei eins og gína.

Nú eða barbídúkka sem samkvæmt nákvæmum útreikningum gæti ekki gengið upprétt eins og hún er í laginu.

Algjörlega flott kona hún Lizzie Miller, læri og allt - og ekki orð um það meir.

Sjá hér.

 

Þrýstnar línur vekja fögnuð

Löglegir og siðlausir í Landsbanka?

Eftir hrun hafa bankadólgar og aðrir græðgifurstar og stundum stjórnmálamenn svarað uppkominni gagnrýni á eftirfarandi hátt:

Engin lög hafa verið brotin, ekki reglur heldur. Allt eftir bókinni.

Vilmundur heitinn talaði mikið um hugtakið löglegt en siðlaust og þannig er uppgjörið við bankahrunið afgreitt af þeim sem að því stóðu.

Oftast löglegt en alltaf siðlaust.

Núna Segir Páll Benediktsson, talsmaður Landsbankans að meðferð bankans á Styrktarsjóði hjartveikra barna hafi verið lögleg.  Farið hafi verið að reglum og þegið þið svo.

Þetta lið ber fyrir sig lögum til að verja siðleysið, græðgina og samviskuleysið.

Svona lög eru þá ólög og það ber að breyta þeim núna!

Fullt af fólki missti aleigu sína við fall bankanna.

Það situr nú uppi með sárt ennið.

Starfsfólk bankans hringdi í akkorði mánuðina fyrir hrun til að fá fólk til að færa peningana sína út af öruggum reikningum yfir í sjóði.

Það er auðvitað líka löglegt trúi ég.

Ég ráðlegg þessum kverúlöntum að segja sem minnst og skoða á sér höfuðið í staðinn.

Uppgjörið mun eiga sér stað.

Væntanlega með siðleysisfaktornum inniföldum.

Arg.

„Bankinn fór að reglum"

Bannað að míga og æla á almanna færi?

 

Ég veit að löggan var að sekta og taka fólk höndum í fyrra í einhverri rassíu.

Eða var það í hitteðfyrra?  Skiptir ekki máli.  Fólk var að minnsta kosti sett í járn og það með réttu þegar það meig og ældi utan í byggingarnar í miðbænum.

Svo sá ég þessa fínu mynd utan á forsíðu Fréttablaðsins í dag.

Af landsliði karla í fótbolta.

Þar voru tveir landsliðsdrengir mígandi utan í vegg eða gám, hvað veit ég.

En þá hét það að "vökva náttúruna" eða eitthvað viðlíka væmið og and-krúttlegt.

Tvískinningur here you come.

Ef það eru "strákarnir okkar" í einhverju samhengi þá mættu þeir örugglega æla á götuna sér til hugarhægðar ef þeir væru með óskir þar um.

Afsakið á meðan ég hendi mér fyrir bjarg.

Ókei, ég hendi mér ekki út af þessu mígildismáli.

En ég garga mig hása. 

Kapíss?

Atli Viðar: Stórt skref á ferli mínum

Ó Sara

Fyrrverandi tengdasonur Söru Palin segir hana eiga fátt sameiginlegt með ímyndinni.

Ég alveg: Sjúkkitt, þá er hún ekki fáfrótt "airhead" eftir allt konan, hugsaði ég.

Veit alveg hvar Rússland er á kortinu og svona og að það er til Asía og Evrópa líka.

Nebb, barnsfaðirinn vill meina að hún sé ekkert alltaf eldandi og alandi upp börnin sín.

Voðalegur skandall er það.

Ég sem hélt einmitt að kona í framboði til varaforseta Bandaríkjanna myndi hafa svo mikinn tíma í dúllerí heima í eldhúsi.

Og svona af því ég er byrjuð þá gæti mér ekki staðið meira á sama um Söru þessa og allt hennar slekti, bæði nú og fyrr.

Það sem gleður mig hinsvegar óendanlega mikið að þessi húsmóðir frá Alaska skuli ekki hafa komist nálægt valdabatteríi Washingtonborgar.

Vá hvað heimurinn væri ekki í góðum málum með Söru og Jón við stjórnvölinn.

Hvað varðar svo ímynd hins s.k. fræga fólks þá held ég að hún sé sjaldnast annað en heimagert plott hjá PR-fólkinu.

Úje.

„Palin á fátt sameiginlegt með ímyndinni"

Algjört einkaframtak án innblöndunar

Nýju myndina um hrunið sem verður frumsýnd 9. október og heitir "Guð blessi Ísland", ætla ég að sjá, það er á hreinu.

Þá verður liðið ár frá þeim degi sem allt hrundi svona formlega þó auðvitað hafi allt farið í vaskinn löngu áður en okkur starfsmönnum á plani haldið í ástandi hins hamingjusama hálfvita eins lengi og nokkur kostur var.

Ég ætla að sjá hana þó ekki væri nema nafnsins vegna sem er auðvitað tilvísun í orð Geirs Haarde þegar hann bað guð fyrir okkur þann 7. október í fyrra vansællar minningar.

Ég hef reyndar alltaf skilið þetta ákall Geirs á guð.

Maðurinn vissi auðvitað að hann og hans hómís voru gjörsamlega ófærir að bjarga nokkrum sköpuðum hlut og þá var ekkert eftir nema ákall á hinn almáttuga.

Sem mér finnst ekki hafa tekið neitt sérstaklega vel í bón Geirs Hilmars.

En hvað gat Geir gert?

Ekki gat hann beðið VG um að bjarga okkur.

Það hefði verið pólitísk sjálfsmorð.

En hið pólitíska sjálfsmorð var auðvitað framið án hjálpar nokkurs manns eða máttar.

Algjört einkaframtak án innblöndunar.

Gvöð blessi Kolbeinsey, hún er að hverfa í sjó.

Þetta er bara allt farið í steik

Hvenær tilefni?

Ég er á móti eignaspjöllum sem þó eru mis alvarleg.

Smá málning er atvinnuskapandi og ég get ekki sagt að ég gráti það.

Eyðilegging á bílum blásaklauss fólks er hins vegar skammarleg iðja og engum til sóma.

Ef eitthvað þá eyðileggur svona framferði þann málstað sem barist er fyrir.

En að segja að bíll hafi verið "lyklaður" er hreint ótrúlega hallærislegt orðalag.

Ef einhver myndi slá mig í hausinn með ausu, var ég þá "ausuð"?

En ástæðan fyrir því að ég blogga um þessa frétt er fyrirsögnin:

"Lúxusbílar skemmdir að tilefnislausu".

Halló, er einhvern tímann hægt að skemma bíla að yfirlögðu ráði að gefnu tilefni?

Þetta orðalag er líka notað í réttarkerfinu.

Ofbeldi að tilefnislausu.

Er einhvern tímann tilefni til beitingu ofbeldis?

Auðvitað ekki,  ofbeldi er alltaf óverjandi kostur í mannlegum samskiptum.

Sjálfsvörn er auðvitað til og þá má bara nota það.

Hættið svo að ráðast á helvítis lúxusbílana. 

Flestir eigendur þeirra eru fólk sem trúði oflætiskjaftæðinu í bankadólgunum og stjórnvöldum.

Að Ísland yrði miðstöð fjármálalífs á jörðinni og við frábærust í heimi og ladídadída.

Geðveiki.is

 

Lúxusbílar skemmdir