ANDA-STJÓRNIN AÐ FÆÐAST

Andastjórnin er í burðarliðnum.  Miðað við að hún sé búin að vera í vinnslu frá því fyrir kosningar ætti þetta að fara að ganga.  Samfylkingarmenn hafa talað um það allan tímann eftir að formlegar viðræður hófust eins og stjórnin væri handsöluð, múr- og naglföst, þannig að þetta ætti að skotganga.

Þetta andatal í mér kemur til að því að nánast í hverri einustu frétt þar sem talað er við Ingibjörgu Sólrúnu og Geir varðandi gang stjórnarmyndunar tala þau um að góður andi sé í viðræðunum.  Aftur og aftur.  Er stjórnin ekki af þessum heimi?  Verður þetta heilög stjórn blessuð af Guði?  Það væri ekki verra.  Annars verður spennandi að sjá málefnasamning hinnar nýju ríkisstjórnar.  Ég gef mér að Ísland verði tekið af lista hinna staðföstu þjóða, tafarlaust. Biðlistarnir minnkaðir eða þeim eytt.  Eitthvað hljóta kjör hinna lægstlaunuðu og lífeyrisþega að batna. Launamunur kynjanna verður auðvitað tekinn sterkum tökum.  Spennandi að sjá.  Stærsti plúsinn við þessa stjórn verður Jóhanna Sigurðardóttir, ISG og Þorgerður Katrín Gunnarsdóttir að öllum öðrum konum ólöstuðum.  Þarna er föngulegur hópur fólks úr báðum flokkum.

Síðast þegar ég vissi þá var Össur enn "hugfanginn" af verkefninu og ég vona svo innilega að hann sé ekki kalinn á hjarta. 

Gúddnætgæs!

 

Fundur stendur enn yfir á Þingvöllum

SNÚRAN

Ég og fleiri vinir á snúrunni!

Snúruafmælið mitt (sjö mánuðir) var skemmtilegt og gefandi.  Átti langt samtal við Ingu-Lill sem er að koma næsta sunnudag og setti henni fyrir langan innkaupalista því mig vantar eitt og annað frá hinum Norrænu löndum.  T.d. surströmming, blodpudding, palt og annað smátt og gott.  Nebb er að ljúga.  Sem er bannað fyrir alka eins og mig. 

Ég gaf mér loksins tíma frá hátíðarhöldunum og fór bloggrúntinn.  Það er einhver húmor á flugi hér í bloggheimum því ég er búin að hlægja mig máttlausa fyrir tilstilli skemmtilegs fólks.  Þar sem síða þessi er ekki bönnum börnum fer ég ekki nánar út í þá sálma.

Það var önnur snúra sem hélt upp á afmælið sitt í dag.  Sko afmæli í árum, ekki edrúdögum.  Þórarinn Tyrfingsson, megababe varð sextugur í dag.  Ég elska hann Þórarinn.  Sko á hreinan og tæran máta.  Hann bjargaði lífi mínu ásamt fleirum í hans ranni.  Svo er hann svo sexý.  Stelpurnar segja að hann sé eins og óumbúið rúm.  Ef ég væri ekki svona asskoti glöð með húsbandið þá væri ég kannski dómbær á það. (Ellý plís ekki blogga um menn sem eru eins og óumbúin rúm, það er patent á því meðal alsgáðra kvenna, ekki að þú sért það ekki.  Hm að tala sig í flækju OMG ég er sko að flýta mér að blogga, Boston Legal handan við auglýsingar).

Síjúgæs

ÉG STUNDA EKKI HAUSATALNINGAR...

...þegar Silfur Egils er annars vegar en panell nr. 2 núna áðan samanstóð af 5 körlum (að Agli meðtöldum).  Það er ekki fjöldi karlanna sem verður mér tilefni til þessa bloggs heldur besserwissaraháttur sumra þáttakenda.  Það voru Sigurður G. Tómasson og Pétur Tyrfingsson sem þar fóru á kostum.  Pétur Tyrfingsson tók fram að hann væri ekki hrifinn af samsæriskenningum, en setti fram nokkrar í leiðinni.  Sama gerði Sigurður G. Tómasson.  Þa´best´asegeggimeir.

Andrés og Pétur hinn voru málefnalegir og fá heilan hóp af "poengum" fyrir það.

ÞAÐ ER EKKI MOGGANUM AÐ KENNA..

..hið almenna fréttamat vestrænna fjölmiðla en þeir mættu kannski fara að íhuga málið.  Ég vaknaði eftir ljúfan svefn (hefð verið betra fyrir litteratúr heimsins ef ég hefði vaknað af martröð) og fór beint í Moggann.  Kona reynir að sofa ekki yfir sig á fréttavaktinni.  Forvitnin er sjúklegt ástand í tilfelli þessarar konu.  Mogginn tekinn, á innsoginu, flett, flett, andanum náð og meira flett, flett (flettið er í netískum skilningi auðvitað) og þetta blasti við mér:

• Sex létu lífið í sprengingu í Perú
• Jose Ramos-Horta sór embættiseið
• Íbúar Caracas mótmæla lokun sjónvarpsstöðvar
• 40 slösuðust þegar eldur kom upp í hringekju
• Þrír fórust í umferðarslysi í Danmörku
• Ísralesher drap þrjá Hamasliða
• Mannfall í átökum líbanska hersins við öfgamenn
• Yfir 30 uppreisnarmenn felldir í Afganistan
• Rúmenar halda tryggð við forsetann

Hér er, eins og glöggt má sjá er jákvæðustu fréttirnar hjá Mogganum í erlendu deildinni í dag, mótmæli íbúa Caracas vegna lokunar á sjónvarpsstöð og að Jose Ramos-Horta hafi svarið embættiseið en það er eins og allir vita ákaflega umdeilanlegur harmur.   Úff ég ætla ekki að tékka nánar á þessum fréttum og komast síðan að því að einhverjir hafi verið drepnir eða lemstraðir við tækifærin.  Ekki misskilja mig ég vill veg sannleikans sem mestan en fyrr má nú aldeilis fyrr vera.  Ég ætla að lifa lengi enn og til þess að það geti gerst stóráfallalaust verð ég sennilega að fara á geðlyf.  Svona til að auka Seretoníið í heilanum, annars arka ég hreinlega yfir móðuna miklu einn daginn.

Úpps, hæ krakkar og góðan daginn!  Er nokkuð fréttnæmt að gerast í lífi ykkar, enginn alvarlega slasaður eða sollis?

P.s. sá að neðsti linkurinn er um að rúmenar haldi tryggð við forsetann.  Sorrý sá það ekki, heilinn alveg mengaður af neikvæðni.  Mogginn - 5 points!

ANNASAMUR DAGUR..

..hjá henni Jenny Unu Errriksdóttur og hún staðið á haus nánast með fullt af verkefnum í allan dag.

Hún tók sig til og ryksugaði fyrir foreldra sína og hljóp um allt til að ljúka húsverkunum á tíma.

síðan fór hún í Húsdýragarðinn og horfði þar á öll dýrin en sá ekki gívaffa, kókófíl eða jákarl.  Í þeirri ferð var myndavélin ekki með í för en ég hef það frá fyrstu hendi að Jenny hafi verið glöð og ekki feimin.

Svo kom hún heim úr þeirri merkilegu ferð og hóf að leika sér við dúkkuna sem amma og Einarrr gáfu henni um daginn.  Jenny vill koma því á framfæri að margur sé knár þótt hann sé smár en eins og sjá má þá kemst hún ágætlega fyrir á borðsendanum en Jenny er ekki mjög um það gefið að verið sé að segja að hún sé agnarlítil.  Hún er rúmlega tveggja árrrra og er alveg að verða þrrriggja. 

Þessu er hér með komið á framfæri frá yngismeyjunni nöfnu minni sem núna sefur svefni hinna réttlátu.

Góða nótt frá henni

PS. VOFFINN HENNAR JÓNU BLOGGVINKONU MINNAR (www.jonaa.blog.is) ER TÝNDUR! KÍKIÐ Á BLOGGIÐ HENNAR OG FÁIÐ NÁNARI UPPLÝSINGAR!

 

 

ÞAÐ ER BROSTIÐ Á MEÐ SUMRI..

..en þangað til í dag var vor í hausnum á mér og sumarið var í fjarlægri framtíð.  Ég held að það sé vegna þess að stóran hluta ársins er maður að bíða eftir sumrinu.  Ég hefði þess vegna getað beðið það af mér ef ekki væri vegna þess að ég mundi allt í einu í dag að sænsk vinkona mín, hún Inga-Lill er að koma næstu helgi í SUMARFRÍ til mín.  Þá seytlaði sumarið inn í vitund mína.  Merkilegt.  Annars er kalt, það verður að segjast eins og er.  Það er heldur ekki við öðru að búast við búum hér en ekki á Spáni.

Inga-Lill vinkona mín hefur verið í lífi mínu í yfir hartnær 30 ár.  Ég veit reyndar ekki hvernig lífið væri án hennar.  Ég vann stórt í happdrættinu þegar ég hitti hana.  Hún er prótótýpan af vinkonu, sálarlegur tvíburi og hún fer aldrei, sama á hverju gengur.  Hún ætlar að dvelja hjá okkur í hálfan mánuð. Úje.

Inga-Lill býr á Skáni.  Við sveitaveginn rétt fyrir utan Ystad.  Hinum megin við götuna er stórt engi þar sem rauður valmúinn blómstrar og gömul kirkja stendur í blómahafinu og það er bara svo fallegt!  Það er sá galli á gjöf Njarðar að sænsku flugukvikindin, þessar sem eru eins og fiskiflugur eru þarna í gengdarlausu magni á sumrin og ætla að æra mann með stöðugum árásum á andlitið á manni.  Þess vegna finnst mér best að horfa á heimilið hennar Ingu-Lill á mynd þegar fluguárstíðin gengur í garð.  Haust og vor eru fínir heimsóknartímar til þessarar bestuvinkonu minnar.

Nóg um það.  Nú tel ég niður, Sveriges alletiders flicka är på väg.

ALLT ÖNNUR EMMA!

Ég er vön að lesa Emmubókina fyrir hana Jenny Unu Errrriksdótturrr.  "Emma meiðir sig" er ákaflega vinsæl bók áður en farið er að lúlla.  En hérna er frétt sem ég nappaði af Vísi um allt öðruvísi Emmu sem skv.  fréttinni er dálítið pírípú út í karlinn.  Ég hef þó ekki heyrt margar sögur af konum sem klippa föt eiginmanna í tætlur í skilnaðardeilum eins og höfundur greinarinnar, en  aumingja Emma þarf að leita sér læknis því hún er greinilega meidd á sálinni.

"Það hafa verið sagðar sögur af konum sem hafa farið með skærin í fataskáp eiginmannsins í skilnaðardeilum. Ekki hún Emma Thomason. Hún gerði gott betur. Emma býr í Whitehaven í Bretlandi. Hún var að fara að ganga að eiga Jason Wilson, kærastann sinn til margra ára. Þau eru bæði rúmlega tvítug og voru farin að búa saman.

Um daginn stoppaði Jason á kránni til þess að fá sér öl. Á meðan hann sat þar hringdi Emma og bað hann um að koma heim. Jason sagði að hann ætlaði að fá sér einn öl í viðbót. Emma varð reið og þau rifust þar til Emma skellti á.

Svo fór Emma og tók öll fötin hans Jasons. Og alla munina hans Jasons. Og setti þetta allt inn í bílinn hans Jasons. Svo keyrði Emma bílinn hans Jasons niður á höfn. Tók af honum handbremsuna og...plask.

Jason er nú að reyna að selja giftingarhringana til þess að geta keypt sér nærbuxur og sokka til skiptanna. "

Svona getur lífið tekið á sig tragiskar myndir stundum.

ENDURBIRT ÞUMALFINGURSREGLA

 

"ÞUMALFINGURSREGLAN" - "THE RULE OF THUMB"

Pistillinn um þumalfingursregluna var einn sá fyrsti sem ég skrifaði hér á blogginu.  Mér finnst ágætt að fólk viti hvaðan þessi frasi sem svo mikið er notaður, á uppruna sinn.

Þumalfingursreglan svokallaða er talin eiga uppruna sinn á Englandi en þar finnst hún fyrst skjalfest árið 1692. Þumalfingursbreidd kaðals eða annars bareflis var talin leyfileg stærð fyrir eiginmenn sem vildu refsa konum sínum með barsmíðum.

Það mun hafa verið Sir Francis Buller sem fyrstur mun hafa kveðið á um þetta.  Hann var því fyrir vikið kallaður Þumall dómari að því er sagnir herma. 

Maður gekk um í mörg ár og talaði um þumalfingursregluna hingað og þangað án þess að hafa grænan grun um að þar lægju að baki kvenlegir harmar.

KARLAFRASINN...

.."ENGINN ER ANNARS BRÓÐIR Í LEIK" er einn af þeim leiðinlegri sem ég heyri.  Þetta er frasi sem hefur aðeins eina merkingu og er notaður til að afsaka með málskrúði að maður sparki í vini sína og taki þá í bakaríið. Það má pakka alls kyns viðbjóð í gjafapakkningar.  Mér segir svo hugur að margur stjórnmálamaðurinn afsaki gjörðir sínar í hinni pólitísku refskák með þessum handhæga frasa.  Segi það jafnvel upphátt alveg eins og þetta sé leyfilegt undartekningatilvik frá Guði þegar vináttusvik eru annars vegar.  Verum vinir en ef þú ætlar að stíga á tærnar á mér kæri félagi þá færðu að finna fyrir því.

Heyrði þennan frasa í sjónvarpsumræðu fyrir einhverjum dögum síðan og er búin að vera með gæsahúð síðan.  Kommon ekki réttlæta lélega framkomu með svona hátíðarfrösum.

BONNY ER FUNDIN - LOKSINS!

Lögreglan í Glostrup í Danmörku nappaði konu á áttræðisaldri við að selja hass.  Þarna mun vera komin Bonny hin ógurlega að drýgja tekjurnar eftir að hafa sloppið frá lögreglunni hérna um árið.  Bonny beibí heldur sér vel þrátt fyrir háan aldur og lögreglan hefur ekki hugmynd um að þarna er þessi alræmda kona á ferðinni.

Nebb bölvuð vitleysa er þetta.  En þarna er sum sé eldri dama í fíkniefnabransanum að drýgja tekjurnar með hassölu.  Þetta sýnir nú bara fram á að það er hægt að vera glæpsamlega hneigður langt fram á grafarbakka.  Konunni var sleppt þar sem hún hafði ekki komið við sögu lögreglunnar áður.  Sagði ég ekki?  Er ekki stórhættulegt að hafa ellilífeyrinn svona lágan?  Það kallar á vandræði get ég sagt ykkur.

Góðan daginn annars.

76 ára kona seldi hass