Halló - jólin gera manni hluti

Þar sem það er kreppa og ég velti hverri krónu fyrir mér áður en ég kveð hana með kossi þá var ég að pæla í hvernig ég gæti nánaskast um jólin til að senda ekki krónur heimilisins á frítt flot út úr buddu og ofaní bæ og beint í glæpavasa sumra stóreignamanna sem höndla með ýmislegt.

Ég er jólanörd og hef alltaf verið og desember er minn uppáhaldsmánuður ójá.

Hvernig var þetta annars þegar við vorum að alast upp, spurði ég minn heittelskaða þar sem við sátum og reyndum að gúffa í okkur grjónagrautnum bæði kanil og rúsínulausum.

Hann sagði:  Það var súpa, rjúpur og frómas á aðfangadagskvöld.

Ég: Já og hvað var keypt af meðlæti á þessum tímum?

Hann mundi það ekki enda karlmaður og þeir ekkert með rosalegan áhuga á viðhengismeti á hátíðarborðinu, margir hverjir.

Ég fór því að pæla í því sjálf hvað keypt var inn þegar ég var barn.

Hangikjöt, jólasteik, grænar baunir, rauðkál, asíur, rauðrófur, blandaðir ávextir, ís, súkkulaði, brjóstsykur og konfekt, kókflöskur, malt og appelsín. Smákökur og randalínur bakaðar. 

Upp talið.  Eða hvað?

Á maður ekki að fara í þennan gírinn bara?

En eins og lyktin var góð af eplunum sem geymd voru í geymslunni þá eru þau ekkert sérstök á bragðið þegar komið var fram á annan jóladag, í minningunni.  Voru þau ekki dáldið útlifuð, marin og skemmd?  Mig minnir það.

Æi,  en stundum er afturhvarf til fortíðar það eina rétta í stöðunni.  Þrátt fyrir mínusa þá hlýja þessi hugarferðalög mér um hjartaræturnar.

Og já á meðan ég man þá kom jólalestin frá Kókinu út á mér tárunum þegar ég bjó á Laugaveginum og gat glápt á hana út um gluggann með viðkomandi börnum fjölskyldunnar.

Ég þessi kommi inn að hjarta grét af væmni yfir helvítis auðvaldslestinni frá Kók.

Halló - jólin gera manni hluti.

Jólalestin kemur með jólalögin í 12. sinn

Athugasemdir

[Jón Arnar, 12.12.2008 kl. 23:00]

já mest góða hluti/gjörðir gefur jóla des manni sko - ég kem t.d. til Íslands og verð þar í fyrsta sinn um jólin á þessarri öld nú á fimmtudaginn

p.s allt datt út hér um daginn þessvegna ? 

[Sunna Dóra Möller, 12.12.2008 kl. 23:01]

Ég grenja alla aðventuna við hin ýmsustu tækifæri, byrja fyrsta des og lýk gráti 2. jan formlega (er haldin áramótadepurð, finnst áramótin ótrúlega melódramatísk ), eftir það tek ég til við að þreyja þorrann fram að vori! Jólin gera manni sannarlega hluti, það er algjörlega rétt hjá þér !

[Ásdís Sigurðardóttir, 12.12.2008 kl. 23:02]

Ég er enn að kaupa þetta sama, það eru mín jól, peningarnir skipta ekki máli, heldur það sem til boða stendur.

[Kjartan Pálmarsson, 12.12.2008 kl. 23:16]

Og ekki má gleyma því þegar arkað var á stað með öll tiltæk ílát og staðið í röð, til þess eins að fylla þau af Hvítöli.

Gleðileg jól

[Lára Hanna Einarsdóttir, 12.12.2008 kl. 23:23]

Á mínu æskuheimili voru líka alltaf hnetur á boðstólum, venjulega tvær tegundir: valhnetur sem mér fannst voða góðar og svo einhver tegund sem mér fannst vond og man því ekki hvað heitir... 

Hnetubrjótur var bráðnauðsynleg eign á hverju heimili í þá daga.

[Steingrímur Helgason, 12.12.2008 kl. 23:28]

Partur af 'prógrammet' segji ég nú & skrifa meðvirkur slíkur, nema að þú gleymir vínberjunum & hezilhnetunum sem fara með eplunum, rjómanum & rifnu súkkulaðispænunum i ómizzandi Waldorfsalatið okkar með rjúpunum.

Ástandið frekar en aldurinn, væni ég þig um gæzkan.

[Kristín Katla Árnadóttir, 12.12.2008 kl. 23:48]

Ég ætla bara segja gleðileg jól Jenný mín.

[Guðríður Hrefna Haraldsdóttir, 13.12.2008 kl. 00:19]

Held að jólin mín séu yfirleitt frekar ódýr og nískuleg miðað við marga, kannski gamall vani. Hef heldur ekki allt þetta meðlæti sem var í æsku heima hjá mér, eiginlega ósmekklega mikið. Asíur, rauðkál, rauðbeður, ananas, gular baunir, grænar baunir, blanda af gulrótum og grænum baunum, hrásalat, kokteilsósa, brún sósa og eflaust margt fleira sem ég er búin að gleyma ... mamma var krakki í kreppunni miklu (sem heitir héðan í frá kreppan hin minni) og fólki fannst sjálfsagt að gera vel við sig þegar henni lauk ... með þessu líka óhóflega mikla meðlæti. Var reyndar með allt þetta fyrstu jólin mín með londonlambinu, nema brúna sósu, við kunnum ekki að búa hana til. Kokteilsósan var bara fín.

Knús í bæinn. 

[Anna Ólafsdóttir (anno) (IP-tala skráð) 13.12.2008 kl. 00:47]

Nostalgía, nostalgía, þvílík nostalgía þegar maður les svona pistla. ég finn hreinlega eplalyktina þegar ég hugsa um stóra eplakassann sem var keyptur fyrir jólin og geymdur niðri í köldu geymslu heima þegar ég var stelpa.

Knús og meira knús til ykkar Teigbúa

[, 13.12.2008 kl. 01:07]

Jú jú þetta allt og svo kóngabrjóstsykur og seinna meir mackintosh (sem mér þótti reyndar - og þykir enn - vont). Það þýðir lítið að nánasast því kjötið verður maður að fá - bara einu sinni á ári - og það kostar alltaf mest. Viðbitið kostar kúk og kanil hjá því. Mamma var alltaf með ananasfrómas (sem mér þótti ekkert sérstaklega góður) en ég hef verið með Tobleroneís frá því ég hóf búskap. Nú er ég samt að hugsa um að hafa frómas til tilbreytingar.

[M, 13.12.2008 kl. 01:13]

Heimagert rauðkál kallar fram jólamyndina í mínum huga. Þegar sem barn horfandi á barnaefnið að deginum og mamma að sýsla við rauðkálið. Ég viðheld þessari hefð þó bara við hjónin borðum kálið Lyktin verður barasta að vera.

[Sigrún Jónsdóttir, 13.12.2008 kl. 02:04]

Þú kemur minningaflóðinu af stað hjá manni....en ég hef aldrei séð jólalestina frá kók

[Jóna Kolbrún Garðarsdóttir, 13.12.2008 kl. 03:17]

Jólasúpan mín er alveg ómissandi, það er uppbökuð rósakálssúpa.  Ég geri 6 lítra af jólasúpunni á aðfangadag.  Hún klárast yfirleitt á jóladag, og frekar snemma.  Svo er náttúrulega æðislegt að skoða jólalest Kók fyrirtækisins. 

[Sesselja Fjóla Þorsteinsdóttir, 13.12.2008 kl. 03:29]

ummm    eplaþefur  einn og sér hefur gefið mér gott.

[Birna Dis Vilbertsdóttir (IP-tala skráð) 13.12.2008 kl. 09:09]

Hafa það einfalt. Minn heittelskaði er meðlætismaður

[Hrönn Sigurðardóttir, 13.12.2008 kl. 09:21]

Úff ég verð nú bara svöng að lesa um allan þennan mat!

[Ía Jóhannsdóttir, 13.12.2008 kl. 09:45]

Er enn að flytja út grænar ORA fyrir hver jól og alltaf skömmuð jafn mikið fyrir. 

[Bragi Þór Valsson (IP-tala skráð) 13.12.2008 kl. 09:47]

"

Hangikjöt, jólasteik, grænar baunir, rauðkál, asíur, rauðrófur, blandaðir ávextir, ís, súkkulaði, brjóstsykur og konfekt, kókflöskur, malt og appelsín. Smákökur og randalínur bakaðar. 

Upp talið.  Eða hvað?

Á maður ekki að fara í þennan gírinn bara?"

Kaupirðu eitthvað meira en þetta í dag? Meira hvað ég er greinilega mikill nískupúki fyrst þessi listi virkar m.a.s. ansi glæsilegur.

[Laufey B Waage, 13.12.2008 kl. 10:44]

Já það er ótrúlega margt sem kallar viðkvæmnistárin fram í augnkrókana á manni á aðventunni.

[Brjánn Guðjónsson, 13.12.2008 kl. 13:57]

æ, ég fæ alltaf kjánahroll þegar ég sé þessa svokölluðu jólalest. einhverja trukka með nokkrum vesælum jólaseríum lafandi utan á sér.

mikið er ég líka feginn núna að hafa hætt að halda jól, um árið. gott að vera laus við allt þetta rugl.

[María Guðmundsdóttir, 13.12.2008 kl. 15:31]

aldrei séd jólalestina, væri samt alveg til i thad.

hingad fæ ég grænar ora baunir um áramót i medlæti og hlakka mikid til. fyrir utan isl.lambalærid,ss.pylsurnar og whatnot. En svona erum vid misjøfn,misjafnar hefdir á hverju heimili held ég bara. en man sem krakki ad thá fengust KLEMENTÍNUR , og já,jólaeplin svokølludu..enda var ekki vani ad ávextir lægu í hrúgum á bordum, voru bara dýrir held ég thá. Samt er ég ekki svo gømul sko

hafdu góda helgi Jenný