Tröllin sem stálu jólunum

Þeir sem lesa þessa síðu vita að ég segi aldrei frá draumum sem mig dreymir.

Það er örugg aðferð við að drepa alla úr leiðindum.

Svona álíka skemmtilegt og að fá lýsingar á kvefsjúkdómi einhvers - í smáatriðum. 

Ég var í Barcelona, en það var samt ekki Barcelona heldur Reykjavík og með manninum mínum sem var samt ekki maðurinn minn heldur Prad Pitt og þið vitið ruglið.

En í nótt dreymdi mig draum.  Ég er enn á valdi hans, hann var svo raunverulegur djöfullinn á´onum.  Ég vil fá að vera í friði í verkamannsins kofa lúllandi á mínu græna.

Draumurinn innihélt Davíð Oddsson, Geir Haarde, Danann frá IMF og Hannes Smárason ásamt mér í lautarferð í Heiðmörkinni.

En þetta voru samt ekki þeir, þeir voru allir tröllin sem stálu jólunum.

Þeir drukku kampavín og borðuðu kavíar, ég fékk flatköku með hangikjöti og ekkert að drekka.

Ætli þeir viti að ég sé alki?

Enginn sagði orð, allir störðu tómum augum út í loftið.

Nema ég, ég horfði á þá.

En eins og ég sagði þá segi ég aldrei frá því sem mig dreymir.

Aldrei.

Athugasemdir

[Katrín Snæhólm Baldursdóttir, 10.11.2008 kl. 09:43]

þú bloggar um draum og ég blogga gamlan draum og raunverulega martröð. Við erum alltaf öll sveimandi á svipðum slóðum!!! Dónar voru þeir að hafa ekki eitt mjólkurglas handa þér með flatkökunni!!!

[Jónína Dúadóttir, 10.11.2008 kl. 09:48]

Martöð...Eigðu góðan dag samt

[Laufey B Waage, 10.11.2008 kl. 10:05]

"Draumurinn innihélt Davíð Oddsson, Geir Haarde, Danann frá IMF og Hannes Smárason"  - Og þú talar bara um draum en ekki martröð. Skil vel að þú hafir frekar viljað fá að vera í friði í verkamannsins kofa.

[Lára Hanna Einarsdóttir, 10.11.2008 kl. 10:30]

Tek undir með stelpunum hér að ofan - þetta er martröð, ekki draumur! 

[Guðríður Hrefna Haraldsdóttir, 10.11.2008 kl. 11:39]

Sonna, sonna .... allt í lagi (áfallahjálp netheima)

[Jóhanna Magnúsar- og Völudóttir , 10.11.2008 kl. 11:45]

Gurrí góð, ,,áfallahjálp netheima" .. er það ekki málið! Ég hef bæði skrifað drauma (og fengið ágætar ráðningar) og svo kvartað big time, sérstaklega undanfarið. Og það er einhver lækning í því að fá klapp og knús og allt þetta væmna. Sorry, svona er ég nú ótrúlega klikk!

En mér er á móti farið að þykja vænt um fullt af fólki sem ég hef nú bara aldrei hitt, sumt af því er svona næstum soul-mates, því mér finnst það hugsa líkt og ég. Erum við ekki alltaf hrifnust af "okkar líkum" ?  Að vísu hef ég stundum gaman af fæting, ef hann er ekki undir beltisstað.

Tek undir með stelpunum hér að ofan sem eru, by the way, allar hipp og kúl - að þetta er MARTRÖÐ!

Ef ég virka klikk þá kennum bara parkódíninu um það!

[Ásdís Sigurðardóttir, 10.11.2008 kl. 11:49]

Úff skelfileg samsetning, annars dreymdi mig stóran hóp af blindfullum sjálfstæðismönnum og var DO þar fremstur í flokki, ég var svo reið við manninn minn því hann var að bera vín í þá. Svona getur hversdagurinn dottið inn í draumheima sem eiga að vera friðhelgir.

[Brjánn Guðjónsson, 10.11.2008 kl. 12:06]

hljómar meira, í mínum eyrum, sem raunveruleiki liðinna ára en draumur.