SVO "LEIÐILEGT" Í VINNUNNI

Það kann að virðast undarlegt að einhver nenni þessum sparðatíningi sem gjörgæsla á sumarstarfsmanninum með stjörnuspána á Mogganum er en ég get ekki látið þetta í friði.  Ekki einn einasti dagur hefur sloppið án einhverra glapa og í dag tek ég aftur hrós mitt frá í gær, þar sem ég held því fram að starfsmaðurinn sé búinn að læra á villupúkann.  Það er dálítið krúttlegt að þessar tvær línur sem spá Steingeitarinnar rúmast í skuli ekki sleppa framhjá leiðréttingarforriti blaðsins.  Hér er afrakstur sívinnandi stjörnuspástarfsmannsins:

Steingeit:Leyndur og týndur hæfileiki kemur upp á yfirborðið í leiðilegu verkefni. Ekki taka því með hálfkæringi. Þessi uppgötvun gæti breytt lífi þínu.

Ég hef auðvitað engin "leiðileg" verkefni með höndum bara "skemmmtileg" og leyndu og týndu hæfileikarnir (hm) eru allir farnir forgörðum enda er ég svo hæfileikarík að ég hef ekkert með fleiri af sama að gera.  Takk samt.

P.s. Myndin náðist af afleysingapersónunni í gærdag, rétt áður en hún skrapp í kaffi.

PERVERTISMI HLÝTUR AÐ VERA...

..ákaflega sjaldgæfur í hinum stóra heimi ef marka má þessa frétt Moggans í dag.  Þar segir frá japönskum karlmanni sem hugðist ræna nærfötum sem dóttir lögreglumanns átti. Löggumaðurinn náði hinum unga manni sem var íklæddur skólabúningi stúlkna og náðist mynd af honum við verknaðinn.  Ekki alveg kannski.  Það er samt undarlegt fréttamat á vestrænum fjölmiðlum stundum.  Þessi litla saga getur varla talist frétt í hinu stóra samhengi hlutanna.  Innan um alla misnotkunina á börnum, þrælavinnu þeirra og allan viðbjóð annan þá fær þessi litla saga mann til að brosa.  Það er kannski tilgangurinn með birtingunni.  Ok,ok,ok. ég brosi eins og fífl.

Japanskur nærbuxnaþjófur gripinn glóðvolgur í stelpufötum

ÞAGNARMÚRINN ROFINN?

 

Ég "missti" af umfjöllun Stöðvar 2 á föstudaginn um Goldfinger og karlinn sem þar fitnar eins og púkinn á fjósbitanum.  Ég var ekki eins heppin þegar ég í kvöld sá myndbrot úr sama viðtali endurtekið.  Mér varð óglatt.  Þar nánast játaði þessi ógeðiskarl á sig bæði mansal og vændi.  Það er auðvitað ekki svo að maður hafi haldið að það væri eitthvað eðlilegt við þessa viðurstyggilegu starfsemi sem þarna fer fram, en karlinn var greinilega í fári, hafði ekki haft tíma til að setja upp frontinn og það varð okkur til ansi mikilla upplýsinga.  Skelfing hlýtur löggan að vera glöð.  Hún veit núna að hverju hún á að leita.  Geiri var ábúðarfullur þegar hann játaði að hans stelpur (eins og hann svo skemmtilega kallar konurnar sem hann blóðmjólkar) hefðu ekki leyfi til að fara neitt í átta klukkutíma eftir vinnu, nema heim að sjálfsögðu.  Er það ekki nokkuð eðlilegt í samningum milli atvinnurekanda og starfsmanns?  Svona samningar munu vera kallaðir mannréttindabrot jafnvel á Kárahnjúkum. Ég er allavega fegin að lögreglan hefur fengið eitthvað til að vinna með. 

Er þagnarmúrinn rofinn? 

HVAÐ ER ÞAÐ MEÐ LAUGAVEGINN OG ELDA?

Nú bjó ég við Laugaveginn fremur lengi, þar til fyrir nokkrum árum og Brunaliðið var fastagestur í götunni með reglulegu millibili.  Sem betur fer var það þó aldrei alvarlegt.  Ári eftir að ég flutti, kviknaði í mínu eigin(s) húsi og efsta hæðin skemmdist illa.   Eru þetta álög á götunni minni? Nú var slökkvilið höfuðborgarsvæðisins kallað að Laugavegi 120, sem er ekki svo langt frá þaðan sem ég bjó og þar hafði fólk orðið vart við reyk í stjórnstöð lyftunnar í húsinu um klukkan hálf átta í kvöld.  Reykurinn reyndist sem betur fer ekki mikill og engin hætta skapaðist.

Nú myndi ég flytja ef ég væri ekki þegar flutt.

 

Reykur á Laugavegi

ÉG SPYR EINS OG FÁVÍS KONA

 

Sumarstarfsmaðurinn færist æ meira í fang í stjörnuspánni.  Nú er hann farinn að nota villuforrit Moggans og allt önnur sjón að sjá vinnubrögðin. Ég hef engar akút spurningar akkúrat núna til hins vísa afleysingamanns á Mogganum enda orðin rugluð eftir að hafa glápt upp í himininn í allan dag.  Ég er kominn með hausverk og hálsríg en ég bíð spennt eftir svari.  Eftir kvöldmat tek ég við að horfa í augu.  Má spyrja einnar spurningar í öllu spurningaflóðinu?  Hver er spádómurinn?

"STEINGEIT:Stundum brenna á þér spurningar sem þú færð engin svör við. En þau eru þarna. Horfðu í kringum þig, í augun á fólki og til himins. Ekki satt?"

Hm..hugs...hugs

STUND MILLI STRÍÐA

Haldið þið ekki að ég hafi fundið lyklana mína sem Jennslubarnið lagði á öruggan stað fyrir ömmuna, og í leiðinni fann ég demantshringinn minn sem ég var hætt að nota og hafði sem lyklakippu?  Þetta er Cartier hringur upp á fimmhundruð karöt sem ég var hætt að nenna að lufsast með.  Ég er svo mikið fyrir að geta nýtt hluti. En aftur að aðalatriðinu.  Nú fara enn á ný að birtast á blogginu mínu hin æsispennandi þvottahúsaævintýri sem allir voru svo hrifnir af.  Nú get ég líka haldið strangt bókhald um dýralífið þar neðra á meðan ég hendi í eina og eina vél.

Vildi bara gera ykkur daginn þolanlegan elskurnar!

Síjúgæs!

TATATARA..HÚN GURRÍ BLOGGVINKONA MÍN...

Látið ekki blekkjast af barnslegu og sakleysislegu útliti konunnar!

.. er kynlegur kvistur.  Hún býr í hæsta fjölbýlishúsinu á Akranesi (á nítjándu hæð) og skoðar líf fólksins á Skaganum í stjörnukíki (perrinn), skráir niður (eins og meistari Þórbergur gerði með veðrið frá svölunum af Hringbrautinni) af mikilli nákvæmni, allt sem Skagabúar taka sér fyrir hendur, án þess að þeir hafi hugmynd um, og það er ekki allt fallegt get ég sagt ykkur.  Síðan skrifar hún um þetta vesalings fólk, sem allt er komið af beinum og óbeinum karl- og kvenleggjum beint frá Jóni Hreggviðssyni í Rein, viðurstyggilegar frásagnir sem hún selur dýrum dómum í vikuna, sjálfri sér til framfærslu.  Konan fer ekki í búðir heldur lætur hún Einarsbúð í nágrenninu senda sér matvæli og kveður svo rammt að kynþokka hennar að Einar heitinn, hefur ekki átt annars úrkosta en að hafa sendil við annan mann þegar vörunum er skilað þarna í hæstu hæðir.

Guðríður hefur nú fengið nýtt áhugamál () og það er ekki fallegra en persónunjósnir hennar um fólkið saklausa og fallega á Skaganum.  Ónei, nú hefur kjéddla fengið matargerð á heilan og þar sem hún vill ekki svo glatt skiljast við blóðpeninga sína gerir hún nú tilraunir með útrunna kjötvöru sem hún prófar fyrst á köttunum sínum (OMG) og svo á sjálfri sér.  Hún er mjög lukkuleg með árangurinn og nú bíð ég eftir að verða boðið í mat eftir að hafa skrifað um hanna þessa fallegu færslu.

Til að sjá myndir af hinum girnilegu réttum og til að sjá alsbera Skagakarla á myndum farið hér: www.gurrihar.blog.is og kynnist kattarkonunni ógurlegu á Akranesi.

P.s. Gurrí mín lögfræðingurinn minn heitir Helga Björk Laxdal (er í símaskrá) og er dóttir mín

MÁ DANMÖRK EKKI ÁFRAM...

...vera griðland fyrir okkur reykingamenn hérna megin hnattar?  Danir hafa alltaf verið "líbó" í meira lagi þegar kemur að karakterbrestum manneskjunnar og skilningur þeirra á "löglegum" fíknisjúkdómum ásamt hippisma verið ærinn.  Eitthvað virðast danski ættingjar mínir og bræður vera að falla í banngildruna hættulegu því nú virðast deilur vera í uppsiglingu á danska þinginu, hvorki meira né minna, um hvort reykingabann, sem byggir á nýjum reykingalögum feli það í sér að reykingar verði bannaðar á einkaskrifstofum þingmanna og annarra starfsmann í danska þinginu.

Mínir elskuðu Danir.  "First things first".  Hættið að vera "líbó" varðandi vændi og klám.  Christianía mætti líka fá að vera í friði.  Farið svo, að því loknu, að skipta ykkur að því hvort þingmenn og aðrir reykja inni á sínum einkaskrifstofum.  Annars skil ég nú ekki hvernig nokkur hefur geð á að reykja inni á skrifstofu.  Lyktin hlýtur að vera agaleg.... sko fyrir þann sem þar situr.

Deilt um reykingar í danska þinghúsinu

THE EINARSDÓTTER´S ON THE ROAD

Oliver að tjilla í flugvél með mömmsl       Mammsl og Oliver í bústað            Ég elska þig mamma mín

Nú er Maysan mín ásamt Robba og Oliver, fallegasta smádreng í heimi,  búin að tæma geymsluna á Bræðró en það gerðu þau um síðustu helgi þegar þau komu hingað í nokkra daga.  Úff nú er Bræðró bara eign einhvers fólks úti í bæ sem ég þekki ekki og mér kemur ekki einu sinni við.  Maysan mín er núna formlega flutt til London og það varð allt í einu svo raunverulegt.  Búhú (og þetta var alvörunni búhú).  Í gær fóru nokkrar stundir í að skoða gamlar myndir af stelpunum mínum þremur, allt frá vöggu og fram til dagsins í dag.  Tíminn hefur flogið áfram og allt í einu eru litlurnar mínar þrjár orðnar fullorðnar konur.  Granny-J saknar þess stundum af hafa ekki "the infamous three" til að kljást við.  Ef uppeldi hefur eitthvað að gera með útkomu á börnum þá spyr ég hvar eru VERÐLAUNIN fyrir að vera hin hm.. fullkomna mamma?

Oliver fær að makkast hjá Ö-Brynju        The father "Chronic"           Bestuvinkonur Andrea-Maysan og Sóley

Nú er að leggjast í regluleg ferðalög til að hitta ömmubarnið hann Oliver og Amma-Brynja þessi elska sem er að fluffast,  getur þess vegna farið til þeirra mun oftar en ég,  heldur áfram að setja inn myndir á barnaland fyrir Granny-J og aðra áhugasama. (Elska þig Brynja mín).

Hér kemur fjölskyldugalleríið frá síðustu helgi en það tók nottla engin mynd af mér.  Er of sæt hreinlega eða eitthvað

Jenny og Oliver hjá Helgu frænks     Barnabörnin þrjú og Saran            Jökull, Oliver og Sara "på balkongen"

Úje kominn til London í sólina

ÉG BRÝT AFTUR PRINSIPPIÐ..

..um "celebana" en áðan þegar ég í sakleysi mínu, ætlaði inn á bloggið þá blasti þessi mynd af Paris Hilton við mér og fyllti mig mikilli sorg.  Ég var nefnilega að vona, eins og allir hugsandi menn, að stúlkan myndi fá náðun fyrir þetta lítilræði að keyra full aftur og aftur.  Sjáið harminn, sjáið hversu kvalinn hún er? Hún er að tilfinningalegu niðurlotum komin stúlkan en lét sig hafa það í gær að mæta í fangelsið tveimur dögum áður en henni bar.  Hún ber sig vel þrátt fyrir sína miklu sorg.  Hvar er Amnesty International spyr ég nú einfaldlega.