ÞUNGUR KROSS AÐ BERA..

...greinilega í þessu tilfelli því löggan handók tvo 17 ára gutta með trékross í eftirdragi sem hafði að geyma nafn látins einstaklings.  Þeir sögðust ætla að nota krossinn í listaverk.

Hugmyndaauðgi sumra "listamanna" eru greinilega engin takmörk sett.

Ég ætla að panta mér legstein.  Úr marmara þannig að það þurfi flokk manna til að fjarlægja hann.  Og þó mér er sama hvað um jarðneskar leifar mínar verður þegar ég er öll.  Þarf ekki einu sinni að merkja leifarnar af mér.

En hvernig dettur fólki svona lagað í hug?

Bítsmí.

Með kross í eftirdragi

SJÁLFSDÝRKANDI ALDARINNAR..

 

Viktoría Beckham gerir sig endanlega að fífli í nýju sjónvarpsmyndinni um flutninginn til Ameríku.  Ég hef reyndar svo víðtækt ofnæmi fyrir þessari kjéddlingu sem og karlinum hennar að ég nenni yfirleitt ekki að lesa um hana.

Gagnrýnandi New York Post segir þáttinn vera "sjálfsdýrkunarsvall" sem kemur auðvitað ekki á óvart enda konan prótótýpan af sjálfsdýrkanda. 

Lesið nánar um þáttinn hjá ágætri bloggvinkonu minni henni Stínu (www.stinajohanns.blog.is) en hún skrifar alvega bráðfyndna færslu um þáttinn sem hún sá í gær.

Af hverju er Viktoría svona vinsæl?

Bítsmí.

Sjónvarpsþáttur Victoriu sagður sjálfsdýrkunarsvall

ÉG ER LAUS, ÉG ER LAUS

Það vantar söngkonu í Nylon-flokkinn.  Emelía er hætt (who the fuck is Emilía?).  Ég get ekki sungið, hata tyggjókúlumúsík en er flott í að mæma og hrista mjaðmirnar.

Einar get ég fengið vinnu, er doldið við aldur sko en aldrei of seint að byrja.

Újejejejejeje-

Emilía hættir í Nylon

ÁHYGGJUM AFLÉTT

Ég var að lesa Moggann eins og venjulega og datt niður á meðfylgjandi frétt.  Húsbandið á stórafmæli eftir nokkur ár og ef hann lafir hérna megin grafar á þeim tímapunkti, sem er alls ekki víst þar sem hann er enn í nikótíninu, þá ætla ég að slá upp veislu.  Ég hef að sjálfsögðu verið að plana viðkomandi teiti undanfarin ár, enda þarf ég góðan tíma í svona fyrirkomulag eins og afmæli í fjölskyldunni.  Ég er að hugsa um að halda  veisluna á Kínamúrnum (er í samkomulagsviðræðum við þarlend stjórnvöld um að loka múrfjandanum í þessa fáu daga sem veislan stendur yfir), vera með dýr í útrýmingarhættu á matseðlinum, ekki eitthvað almúgasnakk sem hægt er að kaupa úti í búð, og þjón á mann enda gestirnir ekki margir (eitthvað um 10.000), bara nánustu vinir og kunningjar.  Veislan hefur verið að taka á sig heildarmynd undanfarið, en ég hef alveg verið lens með hvað ég ætti að bjóða upp á í formi skemmtiatriða.  Nú er það vandamál úr sögunni.  Stóns eru í miklu uppáhaldi hér við hirðina en ég hélt að þeir væru dýrir.  Sko villidýrir.  En það er ekki græðginni fyrir að fara hjá hetjunum mínum.  Þeir taka ekki nema 331 milljón fyrir einkagigg.  Ég er búin að leggja skilaboð fyrir Mick Jagger og hið glæsilegasta mannflak, sjálfan Keith og býð nú spennt eftir svari.  Ég vona að þeir séu lausir, part úr kvöldi, dagana 26. 27. 28. 29. apríl 2010.  331 milljón x4, tertubiti í heimilisbókhaldinu.

Nei ekki að ræða það, ykkur er ekki boðið.  Bara nánustu vinum og vandamönnum.

Úje.

Fengu 331 milljón fyrir að spila í einkaveislu

MONTNÚMERIÐ MITT

 

..er upptekið af einhverjum öðrum.  Ibba Sig. vinkona mín (www.ibbasig.blog.is) var að blogga um að hún hafi séð bílinn minn niðri í bæ.  Að enginn annar myndi fá sér montnúmer á bílinn sinn með textanum újee nema ég.  Það hélt ég líka.  Svona er að draga lappirnar.  Einhver annar hefur orðið á undan mér.

Ætli súmí eða bítsmí sé á lausu?

Ef ekki þá á ég þó allavega þetta:

MIKIÐ SKELFING ER ÉG FEGIN..

..að hér skuli fólk ekki líflátið af dómstóli götunnar.  Bara svona nærri því.

Ætli mannorðsmorð sé hin nútíma aftökuaðferð?

Ég, hugsi-

Hundurinn Lúkas á lífi

LÉLEGUR HÚMOR

Mikið rosalega fannst mér hallærislegt að sjá í fréttatímasjónvarpsins, sviðsetningu á þrælauppboði í Alsír, í tilefni þess að 380 ár eru liðin frá Tyrkjaráninu ógurlega, í Vestmannaeyjum.  Flott að minnast þessara tímamóta en aðgerðin gjörsamlega misheppnuð þar sem öllum fannst uppboðseftirlíkingin svo rosalega sniðug og skemmtileg.

Í fyrsta lagi hafa aldrei verið haldin þrælauppboð af Tyrkjum í Vestmannaeyjum.  Í öðru lagi þá er mansal, uppboð á fólki og annar óþverraháttur, jafn grafalvarlegt mál í dag og það var dagana ógurlegu þegar Tyrkir fóru um Vestmannaeyjar rænandi og ruplandi.

Bendi á reisubók Guðríðar Símonardóttur eftir Steinunni Jóhannesdóttur, sem er vissulega skáldsaga en byggð á traustum heimildum.

Ég, í böðulsbúningnum með þrælapískuna.

Tyrkjaránsins minnst í Vestmannaeyjum

ÞIÐ MEGIÐ FARA STRÁKAR..

..hvenær sem þið viljið segir forsætisráðherra Íraks, Nuri al-Maliki.  Ég er sammála kalli, pakkið saman og drífið ykkur, það eru allir að bíða eftir að þið náið því að þið erum komnir langt fram yfir eðlilegan heimsóknartíma.

Annars voruð þið aldrei neitt sérstaklega velkomnir að ég held.

Drífa sig.

Komasho!

„Bandaríski herinn getur farið þegar hann vill“

66 ÓÞVERAR NAPPAÐIR

 

Það er alltaf gott þegar lögreglunni tekst að ná taki á barnaníðingum og 66 stykki er ekki lítið af óþverum á einu bretti.  Það er allavega verið að rispa í yfirborðið á þessum viðbjóði sem viðgengst út um allan heim. 

Er Spánn einhver sérstök gróðastía fyrir barnaklám?  Mér finnst ég alltaf vera að lesa um Spán í sambandi við þennan viðbjóð.

66 handteknir í tengslum við barnaníð á Spáni

FORBOÐIÐ

Rosalega finnst mér gleðilegt að Starbucks kaffihúsið hafi neyðst til að loka í Peking, eftir kröftug mótmæli. Sjá:

"Kaffihúsið Starbucks neyddist til þess að loka í Peking eftir kröftug mótmæli. Bandaríska kaffihúsakeðjan opnaði fyrst í Forboðnu borg Peking fyrir sjö árum síðan, en hefur löngum verið talin móðgun við kínverska menningu."

Að hafa þessa keðju, sem eflaust er ágæt fyrir sinn hatt, í hinni forboðnu borg finnst mér svo mikið stílbrot og nákvæmlega jafnmikið út úr kortinu og stilla MacDonalds upp í fordyri Þjóðleikhússins.  Eitthvað verður að vera heilagt gagnvart kapítalismanum sem öllu tröllríður.  Reyndar bauðst kaffihúsakeðjunni að starfa áfram ef þeir kölluðu starfsemina öðru nafni en það tóku þeir ekki í mál

Mér finnst einhvernvegin að í forboðnu borginni eigi að vera kínversk tehús og matsölustaðir.  Ekkert annað takk fyrir.  Það er hægt að gúffa í sig hamborgurum og kaffi annarsstaðar "for crying out loud".

Úje

Starbucks lokar í Forboðnu borginni