Hvar liggur ábyrgðin?

Það er kannski ekki fallegt af mér að vera að hafa skoðun á raunum þessa fólks sem situr uppi með skuldir af lóð og tveimur húsum.

En ég bara verð að segja skoðun mína á þeim skýringum sem maður heyrir oftar og oftar hjá fólki sem kemur í fjölmiðla til að segja farir sínar ekki sléttar.

Hin skvokölluðu opinberu fórnarlömb kreppunnar.

Þessi hjón segjast lifa milli vonar og ótta eftir að hafa lent á eyðslufylleríi árið 2007, hvött áfram af bönkum og fasteignasölum.

Málið er að ég er svo kaldlynd að ég þetta gengur ekki alveg í mig.

Ég vil minna á að fólk er ábyrgt á öllum sínum skuldbindingum án tillits til hver hefur hvatt það áfram og þá er best að hafa í huga að ráðgjafarnir ætla ekki að standa við skuldbindingarnar fyrir viðkomandi ef ekki gengur eftir eins og upp með var lagt.

Ég hef auðvitað samúð með fólki, ekki misskilja mig.

Og ég veit jafnframt að fólki var ráðlagt að taka myntkörfulán og að kaupa og spenna.

En ábyrgðin liggur fyrst og síðast hjá þeim sem skuldbindur sig.

Það er bara svoleiðis.

Fjölskylda á hringekjunni

Veður

 

Það er verið að malbika götuna mína.

Það lyktar allt af brenndu gúmmíi.

Hvar er gamla tjörulykt bernsku minnar?

En hei, krakkar, hvað er þetta með sumarið?

Ég er ekki vön að fara á samskeytunum vegna veðurfars, elska veturinn og haustið en síður vorið.

Þetta er algjört kreppusumar í veðurfari.

En sumur bernsku minnar voru sólrík.

Lykt af nýslegnu grasi, vínarbrauði, Sínalkói og bragð af rykugum rifsberjum stolnum úr görðum Ásvallagötu og Hringbrautar.

Ég er farin að skilja gamla fólkið sem oft talar um að hlutirnir hafi verið betri hér áður og fyrr.

Og nú langar mig í apótekaralakkrís.

Úr Vesturbæjarapóteki takk fyrir.

 P.s. Myndin er frá Nauthólsvík, árið 1966, tekin frá Ljósmyndasafni Reykjavíkur.

Verður 20 stiga múrinn rofinn?

Lúxusvandamál

Ég get ekki orða bundist við þessari "frétt" um móðurina sem talað er við og er reið, bálreið ásamt fleiri foreldrum sýnist mér, vegna þess að dótturinni var "hafnað" í Verzló þrátt fyrir góðar einkunnir.

Hvers lags hugarfar er þetta eiginlega?

Konan talar um að "börnin" hefðu þurft að fá áfallahjálp vegna þess að þau komast mögulega ekki í þá skóla sem þeim fannst henta best.

Róleg á dramatíkinni gott fólk.  Þetta er lúxusvandamál.

Ég segi velkomin á leiksvið lífsbaráttunnar. 

Lífið er ekki auglýsingabæklingur prentaður á glanspappír þar sem allar vonir og langanir okkar ganga eftir - af því að við höfum unnið okkur inn fyrir því með einkunnum, vinnuframlagi eða æskilegri hegðun.

Lífið er einfaldlega fullt af verkefnum og við sigrum stundum og stundum ekki.

Eins gott að átta sig á því.

Ég get ekki séð harminn í því að komast "bara" í Menntaskólann við Sund eða einhvern annan góðan skóla, því nóg er af þeim sem betur fer.

Við búum við þau forréttindi að geta menntað börnin okkar.

Hvernig væri að gleðjast yfir því?

Það er svo önnur saga og ömurleg að skólar eins og M.R. og Versló, svo ég taki dæmi, skuli velja úr nemendum eins og þeim sýnist, hegðandi sér eins og prímadonnur á sterum, með bullandi Harward wannabíisma.

Svei mér þá hvað vandamálin geta verið misstór og með allri virðingu fyrir foreldrakreppunni, misalvarleg.

Stór hluti þjóðarinnar er nefnilega að berjast við að láta enda ná saman.

Í kreppunni sko.

Foreldrar bálreiðir

Búrkur og skótau

 

Ég hélt ekki að ég ætti það eftir að verða algjörlega sammála Sarkozy, þeim smávaxna uppskafning og monthana.

En jafnvel það vígi er hrunið.

Sarkozy sagði á franska þinginu í dag, að búrka, klæðnaður múslímakvenna sé ekki velkominn í Frakklandi þar sem klæðnaðurinn sé ekki táknrænn fyrir trú heldur undirgefni kvenna.

Búrka er ein af skelfilegum uppfinningum múslímskra karlmanna til að hafa hemil á konum sínum.

Þær mega ekki sjást.

Horfa í gegnum net.

Ég hef lesið viðtal við konur þar sem þær lýsa upplifun sinni þegar þær byrja að nota búrkuna.

Jafnvægisskynið hverfur, þær sjá bara beint fram fyrir sig.

Kona í svoleiðis viðjum er ekki líkleg til að hlaupa mikið útundan sér eða vera með attitjúd.

Ekki að það séu ekki  lagðar hömlur á konur út um allan heim.

Eins og gert var í Kína á árum áður þegar fætur kvenna voru reirðir.

Geisurnar hlupu ekki langt heldur á töfflunum með plattforminu.

Og við vestrænar konur sem erum búnar að kaupa hugmyndina um að það sé flott að ganga á háum hælum.

Þó maður hafi skögrað um fyrstu mánuðina.

Ég t.d. féll algjörlega fyrir þessu farartæki vestrænna kvenna og bruna áreynslulaust á þeim út um allar koppagrundir þegar sá gálinn er á mér.

 Er t.d. núna að prufukeyra eina sem yngsta dóttir mín gaf mér á laugardaginn.

Ég veit ekki með ykkur, en ég gæti gert byltingu á 10 sentímetra hælum.

Konur eru droppdeddgjorgíus í flottum skóm.

Hvað sem upprunalegri kúgunarhugmynd líður.

Ha?

Meiri andskotans verkuninni.

Sarkozy: Búrka tákn undirgefni

Riðið á vaðið í rannsóknum

 

Ég er fjandinn hafi það forspá.

Um daginn varpaði ég þeirri spurningu fram á snjáldurskinnu, í algjöru bríaríi auðvitað, hvort það væri í lagi með fólk sem gerði það í bílum.

Ég var þá að hugsa um skort á hugmyndaflugi.

Hver þarf bíla þegar það eru þvottabretti, straubretti, snagar og hefilbekkur á hverju heimili.

Þarna hef ég beinlínis orðið fyrir andlegri reynslu og séð fram í tímann.

Fólk í Danmörku var að ríða í bílnum og hann fór út af.

Lögreglan segist hafa rökstuddan grun um að þetta ósiðlega athæfi hafi verið í gangi þegar bílinn keyrði á.

Það sem ég er að velta fyrir mér og vantar í fréttina er pönslænið.

Hvað liggur að baka rökstuddum grun lögreglunnar?

Fann hún eitthvað sem benti til samfara í bílnum?

Fann hún þvottabretti í framsætinu?

Eða hefilbekk?

Kannski las þetta fólk mínar heimspekilegu vangaveltur á snjáldrinu.

Og ákvað að "leggjast" í rannsóknir.

Ég sjálfmiðuð?

Ónei, bara raunsæ.

Súmítúðebón.

 

Kynlífið endaði með ósköpum

Til Grænlands...

..aðra leiðina.

Dorrit má þó koma aftur.

Ólafur Ragnar heimsækir Grænland

..og hjónin komu standandi niður - nema hvað!

Það rignir hlutum frá himni í dag.

Eins og flestir vita þá dúndraðist rakettufyrirbæri á jörðina í Sandgerði.

Svo hrundu þessi ágætu hjón af himni ofan og lentu farsællega á Álftanesi.

Svo er að minnsta kosti sagt.

Ljósmyndari einhvers fámiðils var að störfum við húsarústir á Álftanesi og náði mynd af þessum velklæddu heiðurshjónum sem eins og ávallt og ævinlega komu standandi niður.

Nema hvað?

Furðuhlutur féll af himni

19. júní

Til hamingju stelpur á öllum aldri með 19. júní.

Þann 19. júní árið 1915 fengu konur kosningarétt og árið 1922 náði fyrsta konan kjöri inn á þing.

Það er því ekki svo langt síðan að konur fengu þann sjálfsagða rétt að kjósa og gott að hafa í huga að þau réttindi eins og svo mörg önnur hafa aldrei verið færð okkur á silfurfati heldur áunnist vegna þess að sterkar konur hafa barist fyrir þeim oft með blóði svita og tárum.

Eitt besta veganesti út í lífið sem ég hef haft dætrum mínum til handa kristallast í ljóði Jóhannesar frá Kötlum:

Dómar Heimsins, dóttir góð
munu reynast margvíslegir
Glímdu sjálf við sannleikann
hvað sem hver segir.

Gakktu einatt eigin slóð
hálir eru hversmannsvegir
Skeyttu ekki um boð né bann
hvað sem hver segir.

Inn í brjóst þitt ein og hljóð
rýndu fast ef röddin þegir.
Treystu á þinn inni mann
hvað sem hver segir.

Í dag er mikilvægara en nokkru sinni að við skerpum á kvennabaráttunni stelpur.

Kreppa í hvaða formi sem er hefur tilhneigingu til að bitna verst á konum og börnum.

Höfum það í huga í dag.

Baráttukveðjur!

Æi, Þór Saari

Æi, Þór Saari.

Rólegur á leikrænu tilburðunum.

Trékubburinn sem þú náðir úr rifna Hólmatúnshúsinu og þú ætlar í algleymi dramans að færa Jóhönnu Sigurðardóttir á frekar heima hjá félögum þínum í stjórnarandstöðunni, eins og t.d. í Sjálfstæðisflokki.

Það er fjandinn hafi það ekki Jóhönnu Sigurðardóttur að kenna hvernig komið er fyrir íslenskri þjóð.

Háttvirtir og hæstvirtir

Ég eins og vel flestir, að ég hygg, finnst ekkert annað koma til greina en að alþingismenn og þjóðin öll fái að sjá Icesave samninginn.

Nú þegar búið er að koma því á hreint að svo verði mætti ætla að órólega deildin á þingi (lesist Framsóknarflokkur að mestu) væri sátt.

Nei, ekki.

Þeir halda áfram að spyrja og tuða og þráspyrja aftur eins og þeir hafi ekki náð því að í dag fá þeir samninginn til yfirlestrar.

Ég er svo þreytt á þessari sýndarmennsku, þessu lýðskrumi og hávaða sem hefur ekkert með stjórnarandstöðu að gera.  Ekkert með málefnalegar umræður að gera heldur.

Væri ekki lag að lesa samninginn yfir og koma svo í pontu og taka umræðu um efnisinnihaldið?

Það mætti ætla það.

Svo er það ekki skrýtið að þjóðin hafi misst alla virðingu fyrir Alþingi, fíflagangurinn er ótrúlegur.

Svo er spurning um hvenær Borgarahreyfingin rennur inn í Framsókn eða öfugt.

Rétt áðan kvartaði Höskuldur Þórhallsson yfir því að forseti þingsins hafi verið að áminna Birgittu Jónsdóttur, þá frábæru konu, yfir að ávarpa ekki ráðherra á réttan hátt.

Sko, þingsköp eru nauðsynleg held ég, þó mín vegna mætti alveg droppa háttvirtur og hæstvirtur.

En það þarf þá að taka ákvörðun um það.

Þangað til verða háttvirtir þingmenn að leggja það á sig að læra þingsköp.

Það er ekkert flóknara en það.

Og að lokum...

Ég ætla að treysta ríkisstjórninni þangað til annað kemur í ljós.

Bara svo það sé á hreinu.

Ekki ljóst hvort Icesave-umræða verður