Á maður að tapa sér í fögnuði..

..vegna þess að Tískuráð Bretlands ætla ekki að leyfa fyrirsætum undir 16 ára aldri að sýna á Tískuvikunni í London, sem hefst á morgun?

16 ára stelpur eru bara krakkar líka.  Það verður haldið áfram að nota börn til að selja föt, börn með átraskanir, og engan þroska til að hrærast í þeim bilaða heimi, sem tískuheimurinn er.

Lóelítuheilkennið er lífseigt í bransanum.  Smástelpur sem vart eru búnar að missa mjólkurtennurnar eru stífmálaðar, og hökta svo um í fötum sem hanga utan á þeim.  Það er svo sexý og vænlegt til sölu að nota smábörn til að selja föt fyrir fullorðnar konur.

Jafnframt eiga fyrirsæturnar að framvísa heilbrigðisvottorði áður en þær koma fram.  Hvað á það vottorð að innihalda?  Yfirlýsingu um að viðkomandi sé ekki með átröskun?  Ef það stæði á enninu á okkur sem hafa þjáðst af átröskun, hvernig fyrir okkur væri komið, væri þetta varla vandamál.  En anorexía þarf að vera gengin ansi langt áður en það fer að sjást utan á fólki.

Demæmsóangrí!

 

Engar fyrirsætur undir sextán ára aldri á Tískuviku í Lundúnum

Ég er örugg, verð allra kerlinga elst!

Ég held að ég sé hætt við að hætta að reykja.  Samkvæmt rannsókn sem Halla Skúladóttir, hefur gert, þá eru reykingamenn sem borða mikið af ávöxtum og grænmeti ekki í eins mikilli hættu á að fá lungnakrabbamein en þeir sem borða minna af þessari nauðsynja matvöru.

Eftir að ég greindist með sykursýki, borða ég grænmeti og ávexti sem aldrei fyrr.  Meðal niðurstaðna Höllu er að ef reykingamenn borða yfir 400 grömm af grænmeti og ávöxtum á dag dragi það úr líkum á lungnakrabbameini um allt að 35%.

Ég borða lágmark 400 grömm af grænmeti á dag.  Lauk í allskonar litum, stærðum og gerðum, rósakál, gulrætur, paprikur og brokkoli og tómata, maður minn hvað ég borða tómata.  Svo úða ég í mig bláberjum frá Kanada og jarðaberjum frá Hollandi.  Já, já.

Þetta heitir að vera með nefið fast í fjandans naflanum á sér.  Ég sko. 

Auðvitað ætla ég að hætta að reykja.  Það er löngu tímabært og ég er búin að fá mig fullsadda af því að anga úr reykingalykt og finnast ég vera gangandi umhverfisslys hvar sem ég kem.  En ennþá blundar í mér hroki fíkilsins og hann kviknar og mun kvikna í hvert skipti sem reykingamönnum verður gert erfitt fyrir á meðan ríkið hefur beinan hagnað af fíkninni.

Ég hætti að reykja 1.október og þann dag mun verða léttskýjað yfir Reykjavík, einkum og sér í lagi yfir Seljahverfinu. 

Ævondervæ!

Úje

Neysla grænmetis og ávaxta dregur úr líkum á lungnakrabba

Furðufugl með hegðunarvandamál!

 

Við fórum í vikunni, með hana Jenný Unu Eriksdóttur, til að velja páfagaukinn sem staðið hefur til í allt sumar að kaupa, en ekki orðið af.  Jenný var svakalega spennt að fá "Bördísín" en fuglinn fékk nafngiftina Bördí vegna forvera síns á þessu heimili, sem einn daginn hné niður í miðri aríu og dó, okkur húsbandi til mikillar sorgar.  

Hvað um það, við fórum í Dýraríkið og keyptum Bördí með fylgihlutum (búr, rólu, leikföng, matur og sollis) og það kostaði hvítuna úr augum okkar allra.  Jenný valdi Bördí, en Einarrr varð að halda "roslalega fast" utan um hana, því hún var svo hrædd við "lætin" í fuglunum.  Fyrir valinu varð gári,  blár, gulur og svartur að lit.  Jenný var svolítið sár því hún hafði tilkynnt öllum að hún ætlaði að fá bleikan bördí.  En stundum verður maður að slá af kröfunum. 

Svo gisti Jenný hér um nóttina en auðvitað vildi hún fylgjast með sínum fugli.

Bördí sem leit svo sakleysislega út í búðinni, er ekki allur sem hann er séður.  Við erum búin að hleypa honum út nokkrum sinnum og OMG þvílíkt ves, að koma honum inn í búrið aftur.  Hann hendist um allt. Í gærkvöldi slapp hann inn í eldhús (fíflið ég gleymdi að loka hurð).  Eftirköst: kryddvörur á gólfi, ónýtt loftljós, pappírar úr hillu á víð og dreif um eldhús og húsmóðir með taugaáfall.  Fuglinn er ofvirkur með hegðunarvandamál.  Þegar svo loksins tókst að koma viðkomandi vænghafa í búrið, fór hann í fýlu og þegar þetta er skrifað lætur hann enn eins og hann sé tré.  Hreyfir hvorki legg né lið (æi þið vitið).

Það stefnir í þjálfun á Bördí.  Hvernig þjálfar maður páfagauk með attitjúd?

Er farin að kenna honum að flauta "Free as a bird".

Later! 

 

Hamfarablogg

Sumir eiga einfaldlega ekki að hafa með börn að gera, það er alveg klárt, hvað mig áhrærir.  Reglulega í gegnum árin hef ég heyrt af foreldrum sem keyrt hafa drukkin undir stýri með börnin í bílnum.  Í sumum tilfellum hefur það gerst reglulega. 

Ég fer ekki ofan að því að fólk sem stofnar lífi barna sinna í hættu með þessum hætti, ætti að fá frí frá foreldrahlutverkinu, a.m.k. þar til viðkomandi hafa kippt upp um sig og tekið á sínum málum.

Er barnaverndarnefnd tilkynnt um svona mál?

ARG

 

Ölvaður ökumaður með barn sitt í bílnum

Brjóstastækkunin fyrirhugaða, hér með, tekin af dagskrá!

Rækallinn sjálfur.  Mogginn mun hafa ýmislegt á samviskunni þegar upp er staðið.  Nú mun heimurinn verða fyrir miklum vonbrigðum.  Ég er hætt við að fara í brjóstastækkun.  Nú mun ég garga af skelfingu ef lýtalæknir svo mikið sem gjóar augunum að mér, í Hagkaupum, hvað þá ef einn slíkur tæki upp á að bjóða mér góðan daginn.

Ég þori ekki fyrir mitt litla líf að láta eiga við brjóstin á mér, vegna viðtengdrar fréttar.  En kona sem stungin var af býflugu í brjóstið, horfði á það verða vindlaust á innan við tveimur sólarhringum.  Reyndar var hún á ferð þegar flugan stakk en saltvatnsfyllingin í brjóstunum á að þola allt að 200 kg. þrýsting.

Þar sem ég á það til að vera flækjufótur og lenda í allskonar uppákomum, ætla ég ekki að vera með uppblásin brjóst sem springa, næst þegar það dettur á mig gámur, ég hjóla á vegg eða ef býfluga stingur mig þegar ég er að renna mér á sleða().

Fyrirgefið gott fólk, það mun áfram vera mögulegt að nota barminn á mér sem straubretti - um alla framtíð.

Ég heldi það nú.

 

Býfluga gerði gat á fyllingu í brjósti

Sumt er ekki hægt að endurtaka!

Ég var á Zeppelíntónleikunum margfrægu í Höllinni árið 1970.  Vá hvað ég er orðin gömul.  Ég man þessa tónleika eins og þeir hefðu verið í gær, upplifunin var slík.  Ég hef fram á þennan dag, engan hitt sem ekki er mér sammála um þetta kvöld forðum.

Þetta var svona "einusinniáævinni" dæmi.  Settist fast í sálina á mér og ég má ekki heyra sum lögin þeirra félaga án þess að flippa út í nostalgiunni.

Ég veit fátt aulalegra en endurkomur, ekki allar, en flestar.  Þær eru oft bara reykurinn af réttunum, eins og dauðakippir rétt fyrir andlátið.

Ég vona að þeir fari ekki að hendast um allt karlarnir og reyna að endurlífga það sem áður var.

John Bonham er dáinn (okokok, ég veit að sonurinn kemur í staðinn) það vantar í hópinn.

Mun éta alla mína hatta og peysur ef þessi endurkoma  verður eitthvað meira en veikluleg tilraun til að endurvekja gamla tímann.

Bætmíandsúmí,

http://www.youtube.com/watch?v=XQvxi9KZDqA

Set hér inn "Whole lotta love" með Zeppelin og ég hvet ykkur eindregið til að hlusta.  Þeir eru snillingar mennirnir.

Úje

Led Zeppelin kemur fram á tónleikum

Æi svo mikil dúlla eitthvað...

..og ég er alls ekki að halda því fram að hann Játvarður sé eitthvað ólánlegur þarna á myndinni.  Sumir taka bara alveg ferlega glataðar myndir eitthvað.

Muna Játi minn að hafa hirðljósmyndarann með næst.

Annars bara góður,

arg

ég,

í krúttkasti.

Ég fæ mér byssu..

..það er á hreinu og held til veiða á rjúpu.  Ég ætla ekki að láta fokka upp jólunum mínum annað árið í röð.  Í fyrsta skipti frá því ég var barn (ef undan eru skilin jólin mín í Svíþjóð) var ég rjúpulaus.  Það er ekki hægt að lýsa líðaninni, jólunum stolið af manni bara og ég ekki einu sinni í samningsaðstöðu til að kaupa rjúpu á 5.000 kr. stykkið, en svei mér þá ef ég hefði ekki gert það ef það hefði verið í boði.

Nú held ég á vertíð sjálf.  Það er sölubann á rjúpum og einhversstaðar verð ég að ná í jólamatinn.  Hvernig ætli hamborgarhryggselskendunum liði, ef steikin þeirra yrði bönnuð nema fáum útvöldum.  Þá myndi nú heyrast hljóð úr horni.

Þar sem ég veit ekki hvað er fram og hvað er aftur á svona byssu, auglýsi ég hér með eftir rjúpnamanni sem vill bjarga fyrir mig jólunum á sanngjörnu verði, og koma jafnvel í veg fyrir stórslys á heiðum uppi.

P.s. Annars var dádýrið sem ég hafði í matinn bara stórkostlegt og ekkert út á það að setja, en traddi er traddi, júnó.

Plíshelpmí.

Ójá

Áfram sölubann á rjúpum og rjúpnaafurðum

TÖKUM FEGURÐARSAMKEPPNISLEYFIÐ AF LAUFDALNUM OG HENDUM ÞVÍ ÚT Í HAFSAUGA..

 

..þar sem tímaskekkjur eins og keppni í fegurð eiga heima, með réttu. 

Hann getur svo dílað við missirinn "innanhúss" eins og hann ætlar að gera í sambandi við ofbeldið sem MR-krakkarnir urðu fyrir í s.l. viku, af hendi dyravarða Broadway.

Starfslraftar Elínar Gestsdóttur nýtist örugglega betur á nýjum vettvangi.

Hvað er það með veitingamenn.... sem hm.. gerir þá frábrugðna

Og hana nú.

Elínu Gestsdóttur sagt upp störfum

DÝRT AÐ VERA ERTANDI

Ef ég er ertandi (hvað sem það nú þýðir) eða með attitjúd úti í Hagkaup þegar ég kaupi í matinn, einhver slær mig "nokkur" (alls ekki mörg) hnefahögg í andlitið og sparkar svo í mig þar sem ég ligg, get ég sjálfri mér um kennt.

Þetta hef ég staðfest af Héraðsdómi Austurlands sem dæmdi mann í 30 daga skilorðsbundið fangelsi fyrir lítilræðið.  Í fréttinni stendur orðrétt " að konan hafi átt, samkvæmt gögnum málsins, upptök að árásinni með ertingum."

Ég velti fyrir mér hvað teljist ertinga.  Gæti verið að það teldist erting ef ég segi við einhvern í búðinni; "heyrðu ég var á undan þér", eða "ekki troðast" og sollis?  Ég meina að fólk er með misháan þröskuld fyrir böggi. 

Ég held að ég hætti að fara út í búð.

Yfir og út.

Við erum dauðar stelpur, fyrir Héraðsdómi Austurlands.

Úje

Skilorðsbundið fangelsi fyrir árás á konu