Sannleiksleitandi blaðamenn fái sér líftryggingu

Um mitt sumar gerðist ég áskrifandi að DV.

Er nefnilega töluverður aðdáandi blaðsins nú um stundir.  Það er af sem áður var.

Við lestur blaðsins í dag varð ég eiginlega kjaftstopp.

Ekki út af því sem stóð í blaðinu þótt þar hafi kennt margra og merkilegra grasa heldur vegna tveggja viðmælenda blaðsins.

Annað hvort er í gangi alvarlegur skortur á kurteisi í samfélaginu eða þá að fólk er einfaldlega brjálað í skapinu nú um stundir og hefur ekki fyrir því að hemja sig.

Ég veit ekki hvort er verra.

Í annarri fréttinni er talað við Bjarna Hauk Þórsson, leikstjóra Loftkastalans vegna frétta um að leiksýning hafi fallið niður og fólk hafi komið þar að lokuðum dyrum.

Bjarni er viðskotaillur við blaðamann DV svo ekki sé nú dýpra í árina tekið.

Í fréttinni stendur m.a.

"Bjarni Haukur ítrekaði að honum fyndist ekki fréttnæmt að leikhúsgestir hefðu komið að lokuðum dyrum hjá Lofkastalanum og því engin ástæða til að fjalla um málið. "Þetta er bara lágkúrublaðamennska, finnst mér", segir hann.  "Ef þið ætlið að fara að keyra þetta þá erum við bara ekkert að "sörvisa" Dagblaðið eða þessa samsteypu sem gefur þetta blað út og erum bara ekkert að auglýsa þar og sleppum því bara algjörlega, alfarið", og áfram í þessum dúr.

Svei mér þá ef Bjarni Haukur hefur ekki komist í hrokasafaflöskuna hans Þórs Saari.

Á sömu síðu er svo frétt um að fjármálastjóri Keilis, Stefanía Katrín Karlsdóttir, sé að hætta.

Hún tekur Bjarna Hauk og Þór Saari á blaðamanninn og segir m.a.

 "Veistu það, hvort sem það passar eða passar ekki, ég bara tel enga ástæðu til að tjá mig neitt um það við þig og mér finnst það bara ekki koma nokkrum manni við hvort að svo sé eða svo sé ekki.  Ég ætla bara ekkert að svara þessu neitt öðruvísi.  Mér finnst bara dónaskapur að hringja í mig og spyrja mig um svona hluti.  Þú spyrðir mig ekki hvenær ég vaknaði í morgun (what?)" , og hún heldur áfram lengi vel með sömu vísuna.

Þegar ég var að alast upp var það brýnt fyrir mér að sýna kurteisi.

Kannski eru það liðnir tímir að fólk nenni að hafa fyrir því að svara af kurteisi jafn vel þó því líki ekki við spurninguna sem fyrir það er borin.

Hvað varð um hið kurteisilega; ég hef ekkert að segja eða no comment?

Ég myndi fá mér líftryggingu væri ég sannleiksleitandi blaðamaður í nútímanum.

Og það strax í gær.

Athugasemdir

[Ásdís Sigurðardóttir, 8.9.2009 kl. 16:32]

Held það sé málið, kannski það verði næst að bloggarar fara að streyma í líftryggingar

[Matthildur Ágústa Helgadóttir Jónudóttir, 8.9.2009 kl. 16:36]

Mér finnst þetta nú líka hallærisleg fréttamennska og hálfgerð misnotkun á fjórða valdinu.  Að birta orðrétt eitthvað sem fólk hreytir út úr sér að því er virðist bara til þess að láta viðmælandann líta illa út finnst mér lélegt.

[Jenný Anna Baldursdóttir, 8.9.2009 kl. 16:37]

Matthildur: Ég sé ekkert að því.  Ef þú talar við blaðamann áttu að taka fram ef þú vilt vera "off the record" en annars er það ekki málið heldur þetta afspyrnu attitjút.

[Soffía Valdimarsdóttir, 8.9.2009 kl. 17:58]

Þú ert nú bara eitthvað að grínast með þessari færslu - ikke?

[Ignito, 8.9.2009 kl. 18:18]

Reyndar sýnist mér að það sé fjallað um þessi 2 viðbrögð og ekki komið með það sem fram fór áður en þau svöruðu.

Hef reyndar ekki séð nefndar 'fréttir' þ.a. ef sé rangt og i þeim komi fram það sem fram fór áður en ókurteisisheitin (heh, er þetta orð , púkinn kaupir kurteisisheitin) áttu sér stað, þá ómerkist þessi athugasemd mín að mestu.

Í það minnsta ætla ég ekki að atast mikið útaf viðbrögðum þessa einstaklinga.  Blaðamenn geta verið 'frakkir' í spurningum og í leiðinni ýtt við taugum á fólki.

Hins vegar er ég persónulega mjög kurteis, kannski úr hófi á stundum, og myndi treysta mér að svara spurningum sem einhver blaðamaður ber á mig án þess að 'gelta' til baka.  Hitt er annað hvort nokkur þeirra hafi áhuga á því, en það er allt annað mál.

e.s.  Takk fyrir skemmtilegt blogg

[Benedikt Halldórsson, 8.9.2009 kl. 19:41]

Getur ekki verið að fólk treysti ekki DV? Það vakti líka athygli mína að þrír viðmælendur í eina og sama blaðinu eru ósáttir við DV. Það segir miklu meira um blaðið en viðmælendurna.

Í mínum huga er DV skítablað sem ég treysti bara alls ekki. Ég held að ég sé ekki einn um þá skoðun.

[Hildur Helga Sigurðardóttir, 8.9.2009 kl. 19:49]

Rosalega gæti ég trúað að iðgjaldið sé hátt hjá rússneskum blaðamönnum...

[Jóhannes Laxdal Baldvinsson, 8.9.2009 kl. 21:16]

Jenný ,ég sé ekki betur en þú sért að ráðast á fórnarlömb þeirrar lágkúrublaðamennsku sem hefur alltaf verið stunduð af DV, með þá feðga í brúnni.  Oftar en einu sinni hafa þeir gerst sekir um sorpblaðamennsku setta fram í fyrirsagnastíl, til þess eins að selja blaðið.  Þótt þeir geri líka marga hluti vel þá vegur þessi neikvæða mynd þyngra. Því miður

[Jenný Anna Baldursdóttir, 8.9.2009 kl. 22:11]

Ég er algjörlega sammála þér Jóhannes um að DV var lengst af skelfilegt blað sem fór niður á afskaplega lágt plan.

Mér finnst þetta hafa breytst.

Allir eiga að fá séns að mínu mati.

Nema auðvitað ofbeldismenn og barnaníðingar.

En það er önnur saga.

Mikið helvíti er langsótt að ætla mér að ég sé að ráðast á þolendur gamla DV með því að hafa skoðun á prímadonnuduttlungunum í þessum tveimur hér að ofan.

Rólegur á dramanu maður góður.

HH: Segðu.

[Jóhannes Laxdal Baldvinsson, 9.9.2009 kl. 04:07]

En kæra frú Jenný, eru það ekki frekar við sem höfum breyzt en ekki DV. Erum við ekki orðin neikvæðari og reiðari og þessvegna finnst okkur DV hafa batnað   Sjáðu bara þessa sýningu í Loftkastalanum, örugglega bráðfyndin en samt er svo lítil aðsókn að þeir(þær) urðu að fella niður sýningu.  Ég skal viðurkenna að ég les frekar óánægju og hneykslisbloggin heldur en þessi "blaður um ekkert" blogg og guð hjálpi þeim sem dirfist að vera jákvæður. Það hljóta að vera vitleysingar eða sækópatar nema hvort tveggja sé