Eitt alsherjar samsæri gegn mér!

Aumingja presturinn sem "neyddist" til að drekka messuvín í vinnunni og svo er hann bara tekinn af löggunni og mætir engum skilningi.

Skilja þeir ekki að þetta er hluti af djobbinu, að drekka og snæða Jesúmm?

Enginn skilningur. Nada.  Nothing. Ingenting.

Oh, ég kannast svo við þetta frá því ég var ekki látin í friði fyrir fólki sem vildi neyða mig á fyllerí.

Ég meina að þarna var ég alsaklaus á meðal manna í hinum og þessum gleðskap og var neydd til að lyfta glasi í tíma og ótíma.

T.d. í fjölskyldunni minni giftir fólk sig reglulega.

Svo er það eilíflega og alltaf að útskrifast úr skólum, hljóta stöðuhækkanir og eiga afmæli.

Endalausar átyllur til að koma mér á fyllerí.

Það lá við að ég henti mér á hnén og grátbæði um miskunn.

Alveg: Ætlið þið að gera mig að alkóhólista?

Er ykkur ekkert heilagt?

Var hlustað á harmkvæli mín?

Nei, það var ekki gert og á endanum þurfti ég að fara inn á Vog, ég legg ekki meira á ykkur.

Orðin alki vegna drykkjuþrýstings frá fjölskyldu minni og vinum.

Frá samfélaginu, Orkuveitunni, Símanum og Vínbúðunum, sem plöntuðu sér niður alls staðar þar sem leið mín lá um.

Allt eitt stórt andskotans samsæri.

Ég er algjörlega saklaus af því að hafa sóst í áfengi.

Aldrei, aldrei, aldrei, að ég hafi haft frumkvæði að því sjálf.

Fór meira að segja í ríkið bara til að gera öllu þessu fólki til hæfis.

Og sýnir það mér skilning?

Nei, heldur betur ekki.

Lætur eins og þetta sé allt mér að kenna.

Skítapakk.

 

Kennir messuvíni um ölvunarakstur

Athugasemdir

[Garún, 28.6.2009 kl. 20:54]

Sammála.  Mér fannst það ekki einu sinni gott á bragðið!  Og þess vegna þambaði ég bjórinn.  Fólk er svo tillitslaust! 

[, 28.6.2009 kl. 21:36]

 

[Lilja Guðrún Þorvaldsdóttir, 28.6.2009 kl. 23:42]

Skelfilegt er að heyra þetta, gátu þau ekki látið einhvern annan "lenda" í þessu alltaf hreint.  Þurfti þetta alltaf að lenda á þér!  Agalegt tillitleysi er þetta í fólki.  Aumingja þú!

[Sigurður Sveinsson, 29.6.2009 kl. 03:54]

Næst þegar ég verð stoppaður fullur á bílnum segi ég löggunni að séra Baldur í Þorlákshöfn hafi hellt í mig messuvíni og þeir skuli bara snúa sér til hans. Okkur ber að sjálfsögðu að hlýða umboðsmönnum almættisins. Blóð krists, bikar lífsins.

[Edda Agnarsdóttir, 29.6.2009 kl. 06:39]

[Jenný Anna Baldursdóttir, 29.6.2009 kl. 09:09]

Ég sver það, þetta áfengisofbeldi er farið að fara illa í mig.

Gerum eitthvað.

Óþolandi ofbeldi.

[Sigríður Sigurðardóttir, 29.6.2009 kl. 17:28]

Snilld!  En djö....að lenda í svona "pressu"!