"Gardarobe no komplít"

 

Fyrir töluvert mörgum árum síðan fór minn ástkæri í flippferðalag með félögum sínum til Póllands.

Þetta var fyrir hrun múrs og kommúnisma og var í sjálfu sér skelfileg upplifun og ekki meira um það að segja að sinni.

En þessir sukkglöðu félagar ætluðu á ball.  Voru í sínu fínasta pússi auðvitað en fengu ekki inngöngu í dýrðina fyrir pólskum dyravörðum og var hindrunin skortur á hálstaui.

Þegar þeir vildu fá útskýringu var svarið stutt og laggott.

"Gardarobe no komplít".

Þeir hörfuðu.  Gagnvart svona rökum stóðu þeir ráðþrota.

Alþingi er að poppa sig upp núna og hefur aflalagt þennan ósóma að heimta bindi um háls allra karlkyns þingmanna.

Nú geta þeir væntanlega verið smá lús í vinnunni og kominn tími til.  Það felst engin virðing fyrir Alþingi í hálstauinu, það eru verkin sem tala.

Svo fremi sem þingmenn eru ekki gauðrifnir eða á náttfötunum, þá er ég sátt.

En það leiðir huga minn að öðru.

Hefur virkilega enginn karlkyns þingmaður sett sig upp á móti þessari asnalegu reglu í gegnum tíðina?

Finnst ekki einn uppreisnarmaður meðal þeirra sem neitaði að vera fórnarlamb klæðareglna?

Mætt í vinnu án bindis?

Og væri svo ætli dyravörðurinn á Alþingi hafi þá stoppað viðkomandi uppivöðslusegg með orðunum:

Klæðaskápur ekki fullnægjandi?

Segi svona.

Sjá Visir.is

Athugasemdir

[Lára Hanna Einarsdóttir, 13.5.2009 kl. 12:22]

Það verður gaman að fylgjast með því hverjir halda áfram að skrýðast hálstauinu og hverjir ekki... 

[Einar Indriðason, 13.5.2009 kl. 12:34]

Jú, það var einn fyrir nokkrum árum, sem neitaði fyrst, að vera með hálstau... en... "lét sannfærast" eftir smá tíma... Man ekki hvað hann heitir, eða tímabilið, ca.

[Ásdís (IP-tala skráð) 13.5.2009 kl. 14:41]

Hlynur Hallsson, varaþingmaður VG á norðurlandi eystra.

[Hilmar Gunnlaugsson, 13.5.2009 kl. 15:14]

Ég er ánægður með þessa breytingu en ómögulegt er að segja hverjir munu ekki mæta með bindi hér eftir.

[Ben.Ax. (Benedikt Jóhannes Axelsson), 13.5.2009 kl. 15:15]

Mér finnst að alþingismenn ættu að sjá sóma sinn í að vera sæmilega til fara í ræðustóli alþingis. Það gæti vegið upp á móti munnsöfnuðinum hjá sumum þeirra að skammast í sparifötunum. 

[Jenný Stefanía Jensdóttir, 13.5.2009 kl. 15:20]

Já örugglega skiptar skoðanir um þetta.  Sjálfri hefur mér fundist bindisvæðing herra, gefa þeim sjéns á að lífga upp á einslitan og litlausan búning þeirra, að öðru jöfnu.  Það eru líka til hellingur af kúl bindum og litagleðin stórkostleg.

Fólk klæðir sig upp, m.a. til að sýna virðingu.  Sjaldgæft er að sjá karla án bindis við jarðarför t.d.  enda er fólk að sýna ástvinum hins látna og minningu hans virðingu og samúð. 

Karlar í rúllukragapeysu geta líka verið virðulegir og kúl, þess vegna er mér slétt sama, ef fólk sýnir starfinu, stofnunni og þjóðinni virðingu.