..í aðsniðinni treyju með undarlegum ermum

Sjálfstæðis- og Framsóknarflokkur gefa ekki upplýsingar um fjármál sín, hinir flokkarnir gera það hins vegar.

Þessir flokkar geta svo malað um gegnsæi þar til þeir falla í gólf, ég tek ekki mark á þeim.

Ég gef mér að þeir flokkar sem ekki eru með sitt á borði séu að fela bæði tölur og stuðningsaðila.

En að máli málanna.

Flokkarnir eiga að gera með sér samkomulag um hvernig staðið verði að kosningabaráttu.

Við erum nánast gjaldþrota þjóð í skelfilegri kreppu, nú skulum við sýna aðhaldssemi.

Engar auglýsingar í sjónvarpi og blöðum.

Það mætti reyndar gefa út kynningarbæklinga og láta þar við sitja.

Það er ekki nokkur leið fyrir ný öfl að ná til almennings í samkeppni við stóru flokksdurgana með fjármagnið á bak við sig.

Ég veit ekki hvort glansbæklingar eða sjónvarpsauglýsingar hjálpi fólki að gera upp hug sinn.

Annað hvort ertu að kjósa það sama og síðast "afþvíbara" og ættir nærri því að vera í kosningabanni vegna ábyrgðarleysis.

Nú eða þú tekur upplýsta ákvörðun eftir að hafa kynnt þér stefnu flokka, hverjir eru í framboði og hvað þú merki á eigin skinni (lesist buddu).

Mér finnst alltaf svo merkilegt að kjósa.  Ég var alin upp við að það væri eitt af grunnréttindum mínum sem manneskju og ég ætti að fara vel með þann rétt.

Því hugarfari hef ég skilað áfram til afkomenda minna.

Ég veit ekki hvað ég myndi gera ef þær nýttu ekki kosningaréttinn stelpurnar mínar, þ.e. þessar tvær sem eru í aðstöðu til þess.

Ég myndi frekar vilja að þær kysu íhaldið heldur en að þær létu hjá líðast að mæta á kjörstað.

Ég kýs til vinstri, nú eða ekkert,  skila auðu ef þannig liggur á mér.

En frá því að ég fékk fyrst kjörseðil í hönd hef ég aldrei kosið miðju eða hægri.

Ef ég verð uppvís að slíku, leggið mig inn.

Í aðsniðinni treyju með undarlegum ermum.

Dýr kosningabarátta er ekki í spilunum

Athugasemdir

[Tiger, 31.1.2009 kl. 15:41]

  Er ekki sagt að með því að skila inn auðu - eða mæta ekki á kjörstað - sé maður að styrkja þann flokk sem stærstur er hverju sinni? Á meðan hinir flokkarnir fá ekki atkvæðið þá stækka þeir ekki og verða því engin ógn við stærsta flokkinn sem þá stendur í stað ...

Er maður þá ekki bara að styðja Sjálfstæðisflokkinn ef maður er að skila inn auðu? Hefur hann ekki alltaf verið stærstur þannig séð?

Kisskiss ..

[Jenný Anna Baldursdóttir, 31.1.2009 kl. 15:57]

Tiger: Í raun á að telja ógild atkvæði sér og auð sér.

Hér er lýðræðið auðvitað tekið í rassinn og auð og ógild saman.

Ég tel að maður sé alls ekki að greiða stærsta flokkinum atkvæði með því, heldur er maður að greiða atkvæði gegn þeim sem eru í framboði.

[Tiger, 31.1.2009 kl. 16:01]

  Pé ess .. ég gleymdi náttúrulega öllu öðru en auðu seðlunum.

Ég er sammála því að það þarf meiri gegnsæi hvað fjármál flokkanna varðar. Þeir sem vilja ávinna sér traust almennings ættu ekkert að hafa að fela heldur einbeita sér að því að hafa allt uppi á borði frá byrjun.

Er algerlega sammála því að það væri fullkomlega nóg að gefa út kynningarbæklinga í komandi kosningum. Held að almenningur sé þegar mjög vel inni í því hvað hver stendur fyrir og því alger óþarfi að fara í dýrar herferðir um borg og bý ...

Flottur græni liturinn á blogginu þínu skottið mitt ..

[Birna Dis Vilbertsdóttir (IP-tala skráð) 31.1.2009 kl. 16:07]

Systurdóttir mín ein vildi ávallt peysu án þess ermar.En það er furðulegt að hafa niðurneglt og lokað bókhald,einmitt þegar umræðan um spillingu er í hámarki.Ekki traustvekjandi.Ekki að ég treysti þessum tveimur neitt sérstaklega þessa daganna.

[Huld S. Ringsted, 31.1.2009 kl. 17:10]

Þú meinar svona væntumþykjupeysu?

[Einar Indriðason, 31.1.2009 kl. 18:05]

Já, mjög merkilegt að það vanti enn bókhaldið frá B og D.  Það svona... læðist að manni sá grunur, að það sé ekki alveg allt þar, sem þoli dagsljósið og grandskoðun.....

Þetta er ekki að hafa "allt upp á borðinu" eins og Geirharður lofaði í Háskólabíó á borgarafundinum.

[Jenný Anna Baldursdóttir, 31.1.2009 kl. 18:11]

Huld: Nákvæmlega.  Múha.

Einar: Lofaði íhaldið þessu ekki einróma í Háskólabíói?  Mig minnir það.

[Einar Indriðason, 31.1.2009 kl. 18:14]

Ég man ekki betur, heldur en *allir* D-arar á sviðinu annað hvort sögðu eða muldruðu "já, allt upp á borðinu".....

[Jenný Anna Baldursdóttir, 31.1.2009 kl. 18:16]

Nákvæmlega, þessir "allir" og engum tíðræðara um gengsæi og allt upp á borðið frasana en einmitt þessu andskotans leynifélagi.

[Jenný Anna Baldursdóttir, 31.1.2009 kl. 18:16]

meira tíðrætt held ég að eigi að standa þarna.  Hehe.