Kakófónía dauðans

Þessi sláttur úr og í varðandi kosningar er hreinlega að gera mig brjálaða.

Hvað er að þessum stjórnaliðum?

Það er ekki hægt að segja að þeir tali tungum tveim einu sinni, það er talað með tungu á mann!

Ég eins og fleiri skynja spennuna í Samfylkingunni, enda ekki nema von, það er farið að hitna all verulega undir þeim.

Meirihluti þjóðarinnar styður ekki þessa ríkisstjórn.

Össur segir blátt nei við stjórnarkreppu.  Halló monthaninn þinn, kreppan er nú þegar fyrir hendi.

Ég hef reyndar tilhneigingu til að finnast Össur vera að selja Norðurljósin í hvert skipti sem hann opnar munninn.  Hann er alltaf að gera milljarða díla út um heimsbyggðina.

Af hverju heldur þetta fólk að við klárum okkur ekki út úr neinu nema að akkúrat ÞAÐ haldi um taumana?

Eins og þeir hafa nú verið frambærilegir á dansgólfinu til þessa.

Dottið um allt eins og sauðdrukknir svallpésar á þorrablóti.

Ingibjörg Sólrún er veik og mér finnst að hún eigi að fá frið til að láta sér batna, láta málin í hendurnar á öðrum á meðan hún nær sér.

Eftir að hafa hlustað á hana, Össur, alla þingmennina í Kastljósi kvöldsins ásamt Geir Harðsnúna og Þorgerði Mannasætti Katrínu þá læðist að mér illur grunur.

Ég hef allt gengið grunað um að hugsa bara um eitt, hafa áhyggjur af aðeins einu.

Og það er hvernig þetta komi nú allt sem best út fyrir þau persónulega og flokkslega, hvert og eitt.

Þjóðin er búin að segja þeim á allan hugsanlegan máta að við viljum ekki láta stjórnina "hjálpa" okkur, ekki leiða okkur yfir götu einu sinni, vér viljum lifa fjandinn hafi það.

Átta sig, játa sig sigraðan og hoppa frá völdum.

Það er komið gott.

Þangað til verður framin kakófónía dauðans út um víðan völl.

Ingibjörg vill kosningar í vor

Athugasemdir

[Hrönn Sigurðardóttir, 22.1.2009 kl. 21:50]

Ég hef á tilfinningunni að Samfylkingin berjist innbyrðis. Þar sé formannsslagur í uppsiglingu! Þeir telji að IGS komi ekki aftur, vilji ÖS út og eftir stendur blóðug barátta um formanninn.

Kannski finna þau engan nógu ungan........

Hef á tilfinningunni að staðan sé keimlík hægra megin.

[Ásthildur Cesil Þórðardóttir, 22.1.2009 kl. 22:06]

Trúi öllu, er reyndar alveg örmagna eftir allar ágisganirnar.  Við viljum fá utanþingsstjórn ekki satt, ekki einhverjar grauta hér og þar.  Við viljum taka Njörðin á þetta, eða allavega ég.  'Eg vil ekki fá samkrull Samfylking, Vinstri græn og Framsókn fyrr en þá í fyrsta lagi eftir er búið að afar yfir stjórnarskrána og aðlaga hana að lýðveldinu Nýja Ísland, fækka þingmönnum og gera það sem þarf að gera.  Pólitíkusarnir gera það aldrei..... munið bara eftirlaunafrumvarpið.

[Helga Magnúsdóttir, 22.1.2009 kl. 22:37]

Ingibjörg kemur heim á morgun. Annaðhvort gerir hún eitthvað strax eða fylgið á eftir að hrynja af Samfylkingunni.

[Sigrún Jónsdóttir, 22.1.2009 kl. 23:40]

Tek undir kenningu Hrannar.  Svo eru þau öll orðin skíthrædd við atvinnuleysið sem blasir við þeim....og engar pólitískar bitlingastöður á Nýja Íslandi.

[Solveig (IP-tala skráð) 23.1.2009 kl. 00:30]

Appelsínur eru bæði hollar og góðar.

[Georg P Sveinbjörnsson, 23.1.2009 kl. 00:35]

Geir og reyndar íslendingar allir þurfa að horfa á þessa mynd "The Money Masters", afar vönduð heymildarmynd frá 1996 sem skýrir mjög vel afhverju það er kreppa og fyrri kreppur sem og hengingartak það sem klíka alþjóðlegra bankaskúrka hefur á öllum þjóðum, hvernig þeir náðu undir sig Bandaríkjunum(endanlega 1993), hvernig Aljóðlegi Gjaldeyrissjóðurinn kemur inn í dæmið seinna meir, hvernig það er hagur þessarar klíku að halda öllum þjóðum í skuld með skipulögðum kreppum og stríðum/styrjöldum. 

Það reynist mörgum erfitt að horfast í augu við slíkan hráskinnaleik og hvernig þjóðir heimsins eru hafðar að leiksoppar öld eftir öld, öllum er þó hollt að horfast allavegana smástund í augu við óvininn og skilja hvernig hann hugsar, nú eru ekki tímarnir fyrir sjálfsblekkingu því að nú fara hlutirnir að gerast hratt og þessi þjóð þarf einhvernveginn að losna úr klóm þeirra afla sem gera okkur að skuldaþrælum kynslóð eftir kynslóð. Í lok myndarinnar (sem segir fyrir 9 árum fyrir um hrunið mikla sem nú er í gangi, þó að höfundurinn hafi sennilega reiknað með því að Peningameistararnir myndu láta til skarar skríða nokkuð fyrr er raunin varð) er líka talað um lausnir og hvernig hægt sé á raunhæfann hátt að brjótast undan þessum óskapnaði. Hér á landi sem annars staðar er vissulega fyrsta verk að losa sig við spillta stjórmálamenn og koma heiðarlegu fólki að stjórn.

En í alls bænum horfið á hana og skiljið hvað hún upplýsir og augljóst samhengið við klípuna sem búið er að ginna íslensku í. Hverrar mínútu virði, afar augnaopnandi.

THE MONEY MASTERS

[Georg P Sveinbjörnsson, 23.1.2009 kl. 00:38]

(endanlega 1913) átti það að vera, annars er líka hægt lesa ýmsan fróðleik um þetta efni HÉR á íslensku.