Ekki kraftgalla að sjá

 

Ég finn til með honum Hebba að lenda í þessu þakfokki þar sem hann býr.

Ég myndi hins vegar löngu vera farin eitthvað annað.

Ef þakið hans þarfnast ekki viðgerðar en nágrannarnir þurfa að laga sín hvað er þá að?

Allir fyrir einn - einn fyrir alla - bara með öfugum formerkjum?

Ég þekki alka sem lýsti því yfir í hroka sínum og í leiðinni af sinni frábæru kaldhæðni að hann drykki einn dag í einu.  Hann tók speki leynifélagsins og hafði á henni endaskipti.

Hugmyndafræðin gengur sko út á að vera edrú einn dag í einu.

Það má nýta sér allan fjandann sér til framdráttar.

Það er svo mikið af smákóngum (húsvarðartýpurnar í kraftgöllunum) út um borg og bý.

Það er yfirleitt eitt svona fyrirbæri í hverju húsi þar sem fleiri en ein fjölskylda kemur saman.

Það eru þessir náungar sem moka frá útidyrunum (óbeðnir) á veturna með mæðusvip fórnarlambsins.

Það eru kubbarnir ábúðarfullu sem fara út með poka og týna lauf, sígarettustubba og sælgætisbréf upp af bílaplaninu og á meðan stynja þeir lágt og svo renna þeir augunum lymskulega upp í gluggana.  Alveg: Eru ekki vitni að fórnfýsi minni og snyrtimennsku?

Það eru líka þessir snillingar sem oftar en ekki hafa látið eiga sig að kynna sér réttritun en eru samt ákaflega skrifglaðir.  Þeir elska skilti og setja heilu ritraðirnar í skiltaformi upp í sameigninni.

Bannað að reikja.

Bannað að fara ynn á skónnum.

Þið vitið hvað ég meina.  Er það ekki?

Þessi menn veljast yfirleitt sem formenn húsfélaga, það er, þeir fara í framboð á meðan hinn almenni maður/kona taka á flótta þegar á að fara að virkja í stjórnina.

Ég held að það sé svona fólk sem gefur dauðan og djöfulinn í að í nafni húsfélagsins skuli Hebbi borga þökin þeirra þó hann sé búin að laga sitt á eigin kostnað.

En, það er mannskemmandi að standa í svona erjum.

Ég myndi ráðleggja öllum að draga sig í hlé.

Að standa á sínu er eflaust hið besta mál, en hvað kostar það?

Ég myndi ekki vilja hafa svona nágranna.  Ég læt fólk í friði og vill sjálf fá sama til baka.

En ég er afskaplega heppin með nágranna og svei mér þá það er engin húsvarðartýpa í mínu húsi.

Ekki kraftgalla að sjá í fleiri kílómetra fjarlægð.

Ég er heppin kona. 

P.s. Þarf að skreppa aðeins til að fórna mér í þágu vísindana.  Er að taka þátt í merkilegri rannsókn.

Ég get ekki dáið við að fara í blóðprufu er það?

Ok, þá nær það ekki lengra.

Ef minn tími er kominn þá þakka ég samfylgdina á liðnum árum.

Úje

Neitar að borga þak nágrannans

Athugasemdir

[Ragnheiður , 25.9.2008 kl. 09:58]

Ef það á að draga þér blóð með hefðbundum græjum þá ertu alveg seif, held ég.

Það er -því miður- enginn húsvarðartýpa í mínu húsi, ég veð skaflana upp í klof (að vísu ekki langt þangað) og hér er ekkert gert endilega þann daginn. (bý í einbýli)

Knús í daginn-ætla að kíkja á eftir

[Jenný Anna Baldursdóttir, 25.9.2008 kl. 09:59]

Horsí: Verð komin heim rúmlega tvö.  Hringdu bara og tékkaðu hvort ég sé ekki örugglega komin.

[Sunna Dóra Möller, 25.9.2008 kl. 10:00]

Ég hef búið í blokk með smákóngi, hann urraði alltaf á mig þegar ég var að fara út að labba með stelpurnar litlar á morgnana (rak út hausinn og sagði mér að hætta þessum hávaða þegar ég náði í vagninn inn í hjólageymslu)! Núna er ég laus við þetta og er alsæl með engan kraftgalla í mílunálægð !

Vona að þú snúir aftur, þessa blóðprufur geta verið trikkí ....bloggið væri litlaust án þín !

[Hrönn Sigurðardóttir, 25.9.2008 kl. 10:02]

Úff já! Ég þekki hann! Vann einu sinni með honum!!

[Ía Jóhannsdóttir, 25.9.2008 kl. 10:06]

Iss bara í blóðprufu ef þú vissir hvert ég er að fara á eftir þá.......

[Linda litla, 25.9.2008 kl. 10:13]

Blóðprufa er pís of keik, þú kemur endurnærð heim.

[Martha Elena Laxdal (IP-tala skráð) 25.9.2008 kl. 10:22]

Það segir margt um fólk að kunna ekki réttritun

Góða skemmtun í blóðprufunni - sumir fá nammi í verðlaun

[Birna Dis Vilbertsdóttir (IP-tala skráð) 25.9.2008 kl. 10:28]

Í mínu húsi eru nokkrir húsverðir og týpur.Bannað að leika sér á lóðinni ef þú ert barn,hundar í hverfinu meiga ekki gelta,stjórn húsfélagsins má hafa kött sem er kallað að hafa kanínu.

[Jónína Dúadóttir, 25.9.2008 kl. 10:36]

Verst að Herbert getur ekki selt og flutt annað, það mundi held ég enginn vilja taka við fjárútlátunum sem mundu þá fylgjaÉg stend algerlega með honum í þessu ! Æi skinnið mitt... ertu að fara í blóðprufu... nálar eru hættulegarIss þú kemur aftur, betri en ný

[M, 25.9.2008 kl. 10:41]

Þetta er eitt hús(raðhús) sem þarf að vera samtaka í viðgerð og viðhaldi. En ef Herbert greyið, sem ég finn til með að þurfa að standa í þessu þarf að greiða fyrir þökin hjá nágrannanum afhverju fær hann þá ekki sína viðgerð fyrir 15 árum metna til greiðslu á móti ?  Þá borgaði Herbert einn sinn hlut og enginn annar nágranni tók þátt í því á þeim tíma.

Þekki vel svona leiðindarnágranna  

[M, 25.9.2008 kl. 10:42]

Já... og blóðprufan er sárasaklaus en passaðu þig á bílunum

[Karma (IP-tala skráð) 25.9.2008 kl. 11:37]

M: Herbert getur ekki gert kröfu á að nágrannar borgi viðgerð hans fyrir 15 árum þar sem hún var ekki ákveðin af húsfélagi.

Þak og útveggir teljast sem sameign í raðhúsi og allir eigendur hússins eiga að bera kostnað af viðhaldi á því. Ef það lekur t.d. á einu húsinu eiga allir að borga fyrir viðgerð á þeim hluta þaksins, ekki bara eigandi tiltekinnar íbúðar.

Það borgar sig að kynna sér húseigendalögin vel áður en maður fer í framkvæmdir.

[Jenný Anna Baldursdóttir, 25.9.2008 kl. 11:39]

Það var stofnað húseigendafélag um framkvæmdina sem deilt er um núna.

Og á hvaða plani er fólk sem býr í örfáum húsum að þurfa að hengja sig í lög og reglur í stað þess að gæta sanngirni í mannlegum samskiptum?

Er það nema von að það sé ófriðvænlegt í heiminum.

[Gulli litli, 25.9.2008 kl. 11:43]

Getur þú ekki sent nágranna þína líka í blóðprufu?

[Einar Örn Einarsson, 25.9.2008 kl. 13:47]

Finn til með Hebba.

Vona að blóðsugutæknirinn finni góða æð

Sá eitt svona gott skilti á Vegamótum á Sæfellsnesi um árið.

VINSAMEGA LOKIÐ DIRINNI.

Ég tek mér bessaleyfi að þýða þetta á íslensku:

Vinsamlegast lokið HURÐINNI.

Kveðja á þig, er nýkominn af hafinu bláa

[Sigríður Inga Sigurjónsdóttir, 25.9.2008 kl. 14:32]

Sem betur fer, hef ég heldur enga "kraftgallagaura" nálægt mér..........  Ég er alveg viss um að blóðprufan er ekkert mál

[M, 25.9.2008 kl. 15:45]

Ég er sammála þér Karma líka enda tók ég það fram að viðhald eigi að vera sameiginlegt í fjölbýlis húseign.  Fer samt ekkert ofan af því að finnast það súrt fyrir Herbert þar sem hann lét gera við sitt þak sjálfur að hann þurfi að taka þátt í þaki hinna. En það voru kannski hans stóru mistök að nefna það ekki við húsfélagið á sínum tíma.

[Þröstur Unnar, 25.9.2008 kl. 16:04]

Hurðir lokast ekki. Dyr lokast með hurðum.

Hve oft á ég að segja ykkur þetta.

Farinn í Kraftgallan.........

[Helga Magnúsdóttir, 25.9.2008 kl. 18:42]

Tek undir með Þresti, maður lokar dyrunum. Er í tvíbýli og kallinn á neðri hæðinni var einn allsherjar kraftgalli. Hann dó í hitteðfyrra og íbúðin hefur staðið auð síðan. Það vill enginn vera nágranni minn.

[Þröstur Unnar, 25.9.2008 kl. 19:27]

Akkurru dó hann Helga.

[Jóhanna Magnúsar- og Völudóttir , 25.9.2008 kl. 19:52]

Það var einn svona í húsinu hjá mömmu, fylgdist alltaf með hvar ég lagði bílnum, hvort það væri á gestastæði eða stæði eigenda, ... mamma átti auðvitað eitt stæði, en það virtist ekki skipta máli. Hann var alltaf kominn út ef ég sosem hugsaði að leggja í stæði íbúanna!

[Helga Magnúsdóttir, 25.9.2008 kl. 21:03]

Ég játa ekkert á mig hér, Þröstur.