Og ég vissi það

 

Ég elska að fylgjast með kosningum og aðdraganda þeirra að sjálfsögðu.  Ef ég sest niður við sjónvarpið (túbuna þið munið) á kvöldin, horfi ég á CNN og fleiri stöðvar fjalla um komandi forsetakosningar í USA.

Og ég hef komist að þeirri niðurstöðu að í nóvember verði dálítið erfitt að vera hvítur karlmaður á miðjum aldri, í góðri vinnu, með hús, konu, börn og bíl, verandi demókrati í þokkabót.

Valkostirnir eru ekki beysnir fyrir þennan holdgerving ameríska draumsins.

Hvað stendur manninum til boða sem svona er ástatt um?

Jú lengi vel kom til greina að það yrði hvít kona, forrík og að margra mati ísköld tæfa (ekki mín skoðun, en hafið þið horft á Fox?), eða svartur karlmaður, forríkur og með vafasama fortíð í trúmálum.

Það krimtir nú eiginlega í mér af því stundum er skrattanum skemmt.

Fyrir ári síðan, þegar öll vötn runnu til Hillary, sagði ég einhvers staðar að það myndi saxast af henni fylgið þegar nær drægi kosningum.   Mig grunaði að það væri ekki alveg komið að því að strákarnir helyptu Hillary í Hvíta Húsið.  Og ég hafði rétt fyrir mér.

Þegar allt kemur til alls, standa þeir saman karlarnir,  jafnvel þó litasétteringin á bróðurnum sé ekki alveg eftir bókinni.

Súmí.

Athugasemdir

[Jóna Á. Gísladóttir, 28.5.2008 kl. 01:05]

þeir afsaka sig með því að bróðirinn ólst upp hjá hvítri fjölskyldu

[Linda litla, 28.5.2008 kl. 01:07]

Kveðja inn í nóttina.....

[Jenný Anna Baldursdóttir, 28.5.2008 kl. 01:13]

Jóna: Það breytir öllu

Linda: Sömuleiðis honní.

[Sigurður Þórðarson, 28.5.2008 kl. 01:17]

Ég hélt að þú værir að lýsa mér þangað til þú nefndi demókrati en það er ég víst ekki, ég er bara í Frjálslynda flokknum.

En hvað um það þá finnst mér þessir tveir kostir líklega með því skásta sem bandarískum kjósendum hefur verið boðið upp á lengi. Ég skal alveg viðurkenna að það gæti út af fyrir sig verið gaman að fá konu í þetta valdamesta embætti í heimi. En með hliðsjón af pólitískum skoðunum beggja er ég ekki í vafa um að ég myndi heldur velja Obama. Hann studdi ekki Íraksstríðið og er líklegri til að virða mannréttindi og stuðla að friði. Ef hann gerir það  má hann mín vegna trúa hverju sem hann vill.

[Jenný Anna Baldursdóttir, 28.5.2008 kl. 01:20]

Mér hugnast ágætlega bæði tvö.  En face it þetta eru auðvitað hægri menn sem ég vildi ekki sjá í íslenskri pólitík en á Fox eru þau skilgreind sem radical lefties.  Ójá.

[Sigrún Jónsdóttir, 28.5.2008 kl. 01:21]

Er Hilarý búin að tapa?  Ég held með henni

[Jenný Anna Baldursdóttir, 28.5.2008 kl. 01:37]

Nei, ekki búin að tapa, en nánast engar líkur á að hún hljóti útnefningu. 

[Eva Benjamínsdóttir, 28.5.2008 kl. 01:55]

Hillary verður bara að taka þetta, og ekki láta pína sig til uppgjafar...það er vont.

Varð að líta við Jenný mín, þó pr. og kvikmyndastörf hafi átt allan minn tíma að undanförnu.  Saknaði þinna góðu pistla. Gangi þér vel

[Sunna Dóra Möller, 28.5.2008 kl. 08:55]

Strákarnir standa alltaf saman.......Ætli skýringin væri ekki sú að heimurinn væri ekki tilbúin fyrir konu á forsetastóli USA...rétt eins og að Íslendingar voru ekki tilbúnir fyrir kvenbiskup þegar Auður Eir bauð sig fram 1997 þegar Karl var kosinn......það var alla vega skýringin þá og er eflaust notuð enn við ýmis hátíðleg tækifæri !

Eigðu góðan dag !

[Jenný Anna Baldursdóttir, 28.5.2008 kl. 09:16]

Takk fyrir komment. Heimurinn er ekki tilbúinn fyrir konur á æðstu póstum.  Glerþakið þið munið.

Njótið dagsins.

[Edda Agnarsdóttir, 28.5.2008 kl. 09:20]

Hm ég er ekki ánægð með þróun mála. Ég held að þetta sé fjölskyldurasimi - Hillary er ekki ung með smábörn - Obama á fagra konu og tvær litlar hnátur - ímynd  USA

[Sigurður Þórðarson, 28.5.2008 kl. 19:39]

Þetta eru ekki sanngjörn komment frá ykkur stelpur. Ég tók það fram að að öðru jöfnu hefði ég frekar kosið Hillary vegna þess að hún er kona. Hún er vel menntuð, greind og flottur frambjóðandi. 

Hún er bara full mikill hernaðarsinni fyrir minn smekk. Það er eiginlega komið gott af slíku í bili í þetta embætti.

En þið þurfið ekki að hafa áhyggjur ég hef ekki kosningarétt þarna og ekki sendur til að breyta því.