Samdráttaruppskriftir

 

Íslenska ríkisstjórnin hefur sett niður sína síðustu kartöflu í mínum garði.  Þeir ætla ekki að grípa til neinna aðgerða í efnahagsmálum og við meðaljónarnir fáum auknar byrðar að bera.

En af því að það er minnst á kartöflur.

Kartöflur voru fátækramanns matur í Svíþjóð í denn.  Þær voru soðnar, steiktar, bakaðar og eimaðar, og í beinu framhaldi bæði étnar og drukknar.

Nú þegar stórmarkaðirnir hækka innflutta matvöru um 15% eða meira þarf að nota útsjónarsemina.

Við förum í kartöflurnar.

Ég kann að búa til kartöflubollur, kartöfluklatta, kartöfluköku plús allt hitt sem allir kunna.  Maður var ekki búandi í Svíþjóð fyrir ekki neitt.

Ég er að hugsa um að opna neytendasíðu.  Þar sem samdráttaruppskriftir verður að finna.  Aldrei að vita nema það komi sér vel.  Bónus jr. er búinn að segja okkur að herða sultarólina.

Öryrkjar, eldriborgarar og fólk á strípuðum töxtum; herðið, herðið, herðið.  Það er verið að tala við ykkur börnin góð.

Ég er farin að stinga upp kartöflufjandann hans Geirs H. Haarde.  Þessa síðustu sem hann setti niður í mínum garði.

Heyrurðu það kartöfluhöfuð?

Ælofitt.

Úje.

 

Kartöflunni kippt inn í 21. öldina

Athugasemdir

[Steingrímur Helgason, 26.3.2008 kl. 23:36]

Þar sem Geirharður er ekki af nýnorskum ættum, þá stórefa ég að hann hafi tímt að setja niður útsæði.

Næsta garð, held ég vísast....

[Lára Hanna Einarsdóttir, 26.3.2008 kl. 23:49]

Bíð eftir samdráttaruppskriftum. Auk kartaflna má gera sitthvað ódýrt við hrísgrjón og spagettí. Ég lifði á slíku fæði einu sinni, alveg staur... 

[Jenný Anna Baldursdóttir, 26.3.2008 kl. 23:52]

Ég tilheyri ekki spaghettikynslóðinni LH af því ég hef skömm á linsoðnu hveiti.  Fyfanken hvað mér finnst það vont.  En hrísgrjón eru góðra gjalda verð.  Eigum við að stofna kreppuklúbb?

Steingrímur.  Þetta er metafórísk niðursetning á kartöflu. Er þér að batna góurinn?

[Hrafnhildur Ýr Vilbertsdóttir, 27.3.2008 kl. 00:01]

Ég er ekki bara flink í kartöfluréttum heldur baunaréttum ýmiskonar svo ég ætti að hafa kreppuna af.......var hins vegar pínu sjokkeruð að sjá Ísland í dag, það voru tekin viðtöl við manninn á götunni og enginn virtist ætla breyta neysluvenjum sínum eða skera niður á nokkurn hátt, mér finnst það áhyggju efni.

Svo er ég sammála með linsoðið hveiti..... pasta er ofmetið.

[Steingrímur Helgason, 27.3.2008 kl. 00:03]

Jenný, ég er að vanda illskárri & sáttur við að þér finnist harðsoðið hveit skárra, þó að ég sé nú linur Láru Hönnu samsinntur 'pazdadúddi' inn við beinið í mínu 'Carbonara' með Zpliff, Dong & Gengju.

[Ragnhildur Sverrisdóttir, 27.3.2008 kl. 00:11]

Æ, látið kartöflurnar vera. Þið vitið hvað gerist annars: Verðið á þeim rýkur auðvitað upp úr öllu valdi! Því hvernig eiga ræfils kaupmennirnir í smáverslunum Hagkaupa, Bónuss og Krónu að lifa af ef fólk hættir að kaupa kjúklingabakka á mörg þúsund kall? Þá verða þeir að ná inn einhverju á kartöflunum.

Var þetta ekki svona með helv.... díselolíuna líka? Maður kaupir trukk sem gengur eins og traktor, allt í nafni örlítið minni mengunar og töluverðs sparnaðar. Svo hittust menn í Öskjuhlíð: "Hey, strákar, hafiði tekið eftir að það er farið að seljast minna af bensíni? Það eru allir á þessum dísel-jeppum. Verðum við ekki að hækka verðið?"

Látið kartöflurnar í friði, segi ég!

[Marta B Helgadóttir, 27.3.2008 kl. 00:17]

...það sama og Ragnhildur segir!

LÍst vel á þessa hugmynd hjá þér um samdráttaruppskriftir.  Allavega góð tímasetning til að markaðssetja slíkan vef núna.

[Guðjón H Finnbogason, 27.3.2008 kl. 00:22]

Kartöfluommuletta hrein snilld.

[Guðrún Emilía Guðnadóttir, 27.3.2008 kl. 08:22]

Ég elska kartöflur og allt sem búið er til úr þeim,
og nota bene, eins og ég kom inn á í gær, getum við ræktað þær sjálf
við fáum heilmikinn aukatíma er við hættum að fara svona mikið í búðir.Svo geta allir lært að baka rúgbrauð, það er bara snilld með
kartöfluréttunum. Ég baka nefnilega rúgbrauð, mér ógnar verðið á því.
Hlakka til að sjá hvaða samdráttaruppskriftir þú átt í þínum kolli Jenný, Í kolli mínum geymi ég gullið, þá meina ég ekki peninga í baukum barnanna, heldur ekta gull sem er geymt í reynslu og þroskabanka okkar sem ekki orð meira um það.
                                  Knús inn í daginn. Milla.

[Huld S. Ringsted, 27.3.2008 kl. 08:46]

Endilega, samdráttaruppskriftarsíðu, líst vel á það þar sem undirrituð er ekkert alltof sniðug í að spara í matargerð, það vantar þetta sparnaðarkokkagen í mig

[Birna Dis Vilbertsdóttir (IP-tala skráð) 27.3.2008 kl. 09:06]

Sætukartöflu-uppskriftir takk fyrir

[Steingerður Steinarsdóttir, 27.3.2008 kl. 09:17]

Ég myndi kíkja á samdráttaruppskriftasíðu. Endilega komdu þessu í verk sem fyrst og fáðu styrk frá ríkistjórninni til verkefnisins.

[Hrönn Sigurðardóttir, 27.3.2008 kl. 09:24]

Svo gætirðu haft hafragraut með, svona til tilbreytingar....

Annars er ég að hugsa um að fá lánaða ólina hjá Bónus jr. - þessa til að herða........

[Ía Jóhannsdóttir, 27.3.2008 kl. 09:26]

Sá sem hefur kartöflur og soðningu þarf hvorki hugsjón né miljón segir pressarinn í Dúfnaveislunni.    Kveðja inn í daginn

[Ingibjörg (IP-tala skráð) 27.3.2008 kl. 11:56]

Á alveg dásamlegar kreppuuppskriftir - steikar rófur og alls kyns nammi - lærði þetta á námskeiði hjá merkilegri konu - Þorbjörgu heitinni frá Vigur.

Get bætt í púkkið þegar kreppuuppskriftasíðan verður sett á laggirnar.

Svo á ég líka uppskrift af gæsasteik frá ömmu í skóginum - ömmu barnanna átta og hún er sko grín a la Ann-Cath Vestly.

Kveðja úr Höfninni.

Ókunnug I.

I

[Ingibjörg (IP-tala skráð) 27.3.2008 kl. 11:58]

P.S. Það voru Eskfirðingar sem átu útsæðið á sínum tíma - í kreppunni forðum - grínlaust.

Takk fyrir gott blogg.

Sama ókunnuga I

[Jenný Anna Baldursdóttir, 27.3.2008 kl. 12:36]

Ingibjörg og Ía: Takk fyrir komment.  Ingibjörg þú fylgist með þegar síðan fer í loftið og kemur þá með uppskriftirnar.

Ætli þetta endi ekki bara með uppskriftasíðu?  Kæmi mér ekki á óvart.

[Marta B Helgadóttir, 27.3.2008 kl. 13:41]

Mjólkin er komin úr 87 kr í 100 kall !

Launahækkanir skv nýgerðum samningum eru þar með farnar í næstu helgarinnkaupum hjá barnafjölskyldu.