LÆKNISHEIMSÓKN

Ég fór til læknisins míns áðan í venjulegt tékk á sykursýki og svoleiðis.  Það er svo sem ekki í frásögur færandi en læknirinn minn er "góðkunningi" okkar hjóna og við spjöllum um daginn og veginn á meðan hann sinnir sínu djobbi.  Ég hef ekki rýrnað á lengdina.  Nananabúbú þeir sem halda því fram að eftir fimmtugt fari maður að styttast í annan endann.  Ég er enn 162,5 cm á lengd.  Hávaxin og spengileg það er ég.  Ok,ok,ok, ég er allavega spengileg.  Mér var skutlað á vigtina líka (til að fá eitthvað index vegna sykursýkinnar) og ég er í grennra lagi en mun samkvæmt "indexinu" lifa allra kerlinga lengst (sorry börnin góð), þe ef ég hætti að reykja, hleyp maraþonið, sippa 500 sinnum á dag og tek lýsi. 

Ég var læknaritari til margra ára og það í sjálfu sér er heldur ekki í frásögur færandi.  Mér varð hins vegar hugsað til allra "eldri" kvennanna sem unnu í sjúkrahúsbatteríinu og höfðu tekið að sér lífvörslu alla lækna sem á deildunum störfuðu.  Ég var minnt óþægilega á þetta þegar ég kom að hitta lækninn minn áðan.  Í stóru ógnvekjandi glerbúri sátu nokkrar konur og afgreiddu sjúklinga, bæði í eigin persónu og gegnum símann.  Meðan ég beið hlustaði ég grannt eftir þegar ein af "lífvörðunum" varða sína lækna með kjafti og klóm.  Dæmi:

1. Nei, nei Magnús minn, læknirinn hefur engan tíma í þetta núna.  Hringdu í júlí. Símatíminn er í sumarfríi.

2. Læknirinn sagði að þú gætir komið í ágúst Magnúsína ef þú pantaðir þér tíma núna.  Nú ertu komin frá Akureyri gagngert?  Bíddu augnablik.... Magnúsína..Magnúsína ertu þarna? Læknirinn segir að þú getir fengið að koma á mánudaginn.  Þá þarftu bara að vera á hótelinu í tæpa viku og bíða.  Heppin þarna Magnúsína mín.

Ég er orðin það sem kallast "miðaldra" en finn ennþá ekki til tilbeiðslukenndar lotningar í návist lækna og hef enga löngun til að vernda þá fyrir öllum vondu/uppáþrengjandi/biluðu/taugaveikluðu/móðursjúku- sjúklingunum.

Góhóðar stundir!

Athugasemdir

[Guðríður Hrefna Haraldsdóttir, 6.6.2007 kl. 17:10]

Hehehhehe, góð! Einu sinni hringdi í algjöru rusli víða um borg, hafði óvænt hrunið niður á gólf vegna þursabits, c.a. 25 ára gömul, og var alveg skíthrædd. Heimilislæknar voru á ráðstefnu þennan dag og ég endaði loks á því, eftir nokkur árangurslaus símtöl, að hringja á heilsugæsluna í Asparfelli, bjó í Æsufelli þá. Í krafti hræðslunnar var músin ég bara frek og fékk loks að tala við lækni. Spennan var svo mikil að ég fór að háskæla þegar læknirinn kom í símann. Ég skammast mín fyrir að segja það en bakverkurinn lagaðist þónokkuð við þessa spennulosun en þegar læknirinn kom og ég sagði honum að ég væri ögn skárri gaf hann mér samt lyfseðil ... upp á róandi diesepam!!! Svona móðursjúk kona átti ekkert betra skilið! Fram að þessu hafði ég bara fengið vöðvaslakandi voltaren, eitthvað slíkt við bakverkjum. Saklausa ég vissi að þetta var róandi ... hehehhe og ég tók þrjár á dag í þrjá daga, eða þar til bakið lagaðist. Ég var svo hrædd um að verða dópisti að ég fór alltaf beint að sofa eftir hverja  pillutöku svo ég fyndi ekki áhrifin og yrði háð. Eftir þessa þrjá daga skolaði ég pillunum niður í klósettið (þetta var sko á níunda áratugnum). P.s. Konurnar á símanum á Heilsugæslunni á Akranesi eru algjör krútt, alltaf góðar við alla og hleypa sjúklingum í tonnatali á læknana hér!  

[Guðríður Hrefna Haraldsdóttir, 6.6.2007 kl. 18:14]

Þeir eru nú sumir ansi sætir og gáfulegir á svipinn ...

[Hrönn Sigurðardóttir, 6.6.2007 kl. 18:16]

....og svo skaffa þeir líka vel

[Kristín Katla Árnadóttir, 6.6.2007 kl. 19:33]

Já svo ,sannarlega skaffa þeir vel.

[Ásthildur Cesil Þórðardóttir, 6.6.2007 kl. 19:42]

Einmitt, þeir geta bara dílað við sína sjúklinga sjálfir hehe

[Jenný Anna Baldursdóttir, 6.6.2007 kl. 23:25]

Gurrí þú ert ekki sú fyrsta sem ég heyri um sem fékk Valium á þessum árum. "Mothers little helper" þú veist.  Í Læknamafíu Auðar Haralds er brjálæðislega fyndinn kafli (og um leið afskaplega sorglegur en þú veist hvernig sú kona drepur niður penna hehe) um það þegar Auður fékk Valiumið.

Smjúts

[Jóna Á. Gísladóttir, 7.6.2007 kl. 01:04]

Þarna slapp Magnúsína fyrir horn....