Nýja Ísland?

Nýja Ísland?

Karlar á miðjum aldri í jakkafötum?

Kunnið þið annan Framsóknarmenn?

Breytingar hvað?

Svara spurningaflóði

Af ófriðarhöfðingjum og hallærislegum hrópendum í eyðimörkinni

Ástþór Magnússon hefur öðrum fremur tengt nafn sitt við frið.

Ég efast reyndar ekkert um að hann hafi verið einlægur í þeirri baráttu að minnsta kosti svona framan af.

En miðað við hvað friður er honum hugleikinn þá lætur hann ófriðlegar en flestir.

Hörður Torfa er til að mynda á heilanum á Ástþóri.

Hörður er kommúnisti, einvaldur, segir hann.

VG, VG heyrist hrópað hásum rómi í eyðimörkinni en fáir ef nokkrir heyra í holum röddum hrópendanna.

Þetta eru áhangendur gamla Íslands, valdagírugs Sjálfstæðisflokks, fólk sem ekki vill horfast í augu við að hin ómanneskjulega græðisvæðing hefur beðið skipbrot. 

Það trúir enn á kommagrýluna. 

Almenningi er þetta ljóst og brosir blíðlega.  Kjánarnir hugsum við, andófið í samfélganu nær langt út fyrir hið gamla og úr sér gengna flokkakerfi.

Félagsskapurinn "Nýjar raddir" hafa boðað til fundar í miðjum laugardagsfundinum á Austurvelli.

Ég segi við þá sem ekki kunna aðrar leiðir við að koma sér á framfæri en að skemma og eyðileggja eru ekki hótinu betri en þau stjórnvöld sem verið er að gagnrýna og þeir andskotar sem hafa verið á græðgisfylleríi og komið Íslandi í hóp þriðja heims ríkja.

Þeir eru ekki hótinu betur en þessir tveir hér.

Ég tel mig vita að Ástþór Magnússon standi fyrir þessari hvítliðasamkomu sem kallar sig "Nýjar raddir".

Ef ekki þá dundar hann sér við að stefna mér í friðarins nafni eftir helgi.

Og ég segi þá: "Sorrí Ástþór, en þetta var alveg í þínum nýja ófriðaranda".

Merkilegt hvað hvítliðarnir eru helvíti lífseigir.

En af því ég á það sameiginlegt með Ástþóri Magnússyni að þrá frið í sálu og sinni, úti og inni, heima og að heiman, þá ætla ég að vona að allir sem eiga heimangengt mæti á völlinn og sýni stjórnvöldum í þessu landi að það er engin uppgjöf í gangi.

Almenningur er með úthaldið í góðum gír.

Áfram Nýja Ísland.

Nýjar raddir boða fund

Þetta truflar heilmikið

Það eru margir sem óskapast yfir grímuklæddum mótmælendum.

Fólk talar um að það sé lágmark að mótmæla með andlit upp í vind og veður.

Ég tek ekki afstöðu með því, það truflar mig ekki nokkurn skapaðan hlut.

EN ÞETTA TRUFLAR MIG HEILMIKIÐ!

Hvað er í gangi?

Bann á ferðir fyrir almannafé

Ég legg til að sett verði ferðabann á ráðamenn nema í algjörum neyðartilvikum.

Skv. þessari frétt í DV hefur t.d. Ásta Ragnheiður Jóhannesdóttir ferðast fyrir á aðra miljón króna s.l. þrjá mánuði.

Dagpeningar eru um 87 þúsund á dag og Ásta Ragnheiður hefur ekki orðið vör við að það sé afgangur af dagpeningum enda sé dvalið á dýrum hótelum.

Einhvern tímann hefði maður sagt; veldu hótel á hæfilegu verði og skilaðu mismuninum.

Ég þekki mann sem vinnur hjá stórum samtökum og hann hefur alltaf skilað hverri krónu til baka umfram það sem hann þarf nauðsynlega að nota.

Þetta dæmi sem tekið er um ÁRJ er ábyggilega almennt dæmi sem á við fleiri alþingismenn og mér er svo nákvæmlega sama hvaða flokki þeir tilheyra, þetta gengur ekki upp.

Þessi upphæð sem nefnd er hér er fyrir s.l. þrjá mánuði eins og að ofan segir.  Þessa þrjá mánuði gott fólk, þar sem fólk hefur verið að missa vinnu í stórum stíl, er að missa heimili sín og þarf að berjast við skelfilegar afleiðingar peningasukks sem það á enga sök á.

Þess vegna er mér fyrirmunað að skilja að þingmenn taki ástandið ekki alvarlegar en svo en að þeir ferðist fyrir almannafé upp að þessu marki að það hlaupi á milljón og ríflega það á ekki lengri tíma en þetta.

Nú er kominn tími á að allir og þá meina ég allir fari að sýna hegðun í samræmi við ástandið.

Það er kreppa á Íslandi.  Efnahagslegar hörmungar þar sem reikningurinn sem sendur er almenningi með upphæðum sem við venjulegt fólk fáum ekki skilið og enn er ekki allt komið á borðið hvað það varðar.

Ef það er ekki kominn tími á að bjöllur hringi hjá forréttindastéttunum þá veit ég ekki hvenær hún mögulega rumskar.

Ferðabann á fólkið.

Við verðum einfaldlega að sitja heima á meðan ástandið er svona.

Spilling í leik og starfi

Leiðinlegt að brostnar væntingar skuli vera í Landhelgisgæslunni.

En ég fullyrði að sá harmur er öllu minni en minn eftir að hafa horft á Kastljósið í gær.

Mínar væntingar gagnvart íslenskri stjórnsýslu hrundu gjörsamlega.

Ók, ég viðurkenni að klíkuráðningar innan fjölskyldu og frændgarðs yfir höfuð komu mér ekki alveg á óvart.  Spillingarfyrirkomulagið er sífellt að verða sýnilegra.

Helvítis stjórnsýslan er meira og minna sundurspillt. 

Þörfin fyrir nýtt Ísland gargar á mann í hverjum fréttatíma, í hvert skipti sem manni er litið í blað eða hlustar á útvarp.

En það má sjá eitthvað jákvætt við alla hluti.

Nú má taka matarboð, fermingarveislur og aðrar samkomur í fjölskyldum upp á nýtilegra plan.

Í staðinn fyrir gjafaborðið í horninu má nú setja upp ráðningaskrifstofu.

Ég á t.d. afmæli á þriðjudaginn.

Ætlaði ekkert að gera mál úr því - en nú sit ég við og skrifa boðskort eins og motherfucker.

Svo býð ég í glas, ég á helling af merkilegum ættingjum og vinum.

Ég þekki líka fullt af fólki sem mér er kært og hefur misst vinnuna nýlega.

Á tíunda glasi (gestanna sko, ég er enn alki þrátt fyrir kreppu og held mér í kaffinu) mun ég ráða í stöður eins og enginn sé morgundagurinn.

Mér er alls ekki hlátur í hug - en það er í raun ekki skrýtið að hugurinn flögri til ónefndra Afríkuríkja þegar upplýsist um vinnuaðferðir sumra íslenskra embættismanna bæði í leik og starfi.

Leikhús fáránleikans hvað?

Kastjós.

Brostnar væntingar í Landhelgisgæslunni

Stóriðjuskólinn - er mig að dreyma?

Ég las einhversstaðar í Mogganum að ef maður drykki of mikið kaffi gætu raddir farið að heyrast, dauðir að sjást og önnur undur og stórmerki farið að þvælast fyrir manni.

Ég sem hélt að ég væri skyggn.  Þar fór það.

En..

Ég held að ég hljóti að hafa drukkið of mikið kaffi í dag.

Er grínlaust til Stóriðjuskóli ISAL?

Hvert er námsefnið?

Forpestun andrúmslofts 101?

Útrýming óspilltrar náttúru, framhaldskúrs í máli, myndum og praktík?

Og Bjöggi banka hélt ræðu yfir verðandi stóriðjufrömuðum.

Hvað er að?

Bjögga sko?

ISAL kemur mér ekki á óvart.

Djísús hvað ég taugarnar á mér þola þetta ekki.

Ég farin að laga mér kaffi.  Sterkt kaffi.  Ég ætla að eiga spjall við látna ættingja fram eftir nóttu.

Útskrift úr framhaldsnámi Stóriðjuskóla ISAL

Gengisfelling á orðinu nauðgun

 Ari Edwald kann ekki að meta tilboð þriggja mótmælanda að safna fyrir útlögðum kostnaði vegna mótmælanna sem urðu til þess að Kryddsíldin hans Sigmundar Ernis var rofin.

Ara grunar að þetta sé einhvers konar hótfyndni og reiknar ekki með að þiggja söfnunarféð.

Ari er enn í uppúrveltingi vegna atviksins á gamlársdag. 

Hann hefur yfirdramatíserað atburðinn oftar en einu sinni og oftar en tvisvar í fréttum.

Hann virðist ætla að mjólka atvikið til síðasta dropa.  Harmur hans hrópar í himininn.

Ari getur greinilega ekki lagt þetta til hliðar og haldið áfram að næsta máli á dagskrá.  Hann grætur enn eins og barn sem hefur týnt snuddunni sinni.

Ari á líka heiðurinn að því að vera sá eini sem undir nafni (í mynd og allt) hefur hvatt lögregluna til að taka fastar á "glæpamönnunum" og á hann þá við mótmælendurna offkors.

Ástæðan fyrir því að ég nenni að blogga um þetta tuð í Ara er einföld.

Hann fór gjörsamlega og ófyrirgefanlega yfir markið í viðtali í hádegisfréttum Bylgjunnar í dag.

Ari óar og æjar vegna andlegs tráma starfsmanna sinna og líkir áföllum þeirra sem lentu í átökunum við Borgina við þolendur annarra ofbeldisbrota eins og nauðgana.

Hefur Ari kynnt sér það áfall sem nauðgun er?

Að þolendur þeirra verða aldrei samir aftur?

Að nauðgun er innan sama refsiramma og mannsmorð? 

Hefur hann velt því fyrir sér hvers vegna hægt er að dæma menn í allt að 16 ára fangelsi fyrir nauðgun?

Allt þetta efni er aðgengilegt.

Ég bendi Ara á að hafa samband við Stígamót og fá þessar bráðnauðsynlegu upplýsingar frá þeim sem best vit hafa á líðan þolenda nauðgana.

Áður en hann gengisfellir aftur orðið nauðgun sem lýsir einum af skelfilegustu ofbeldisglæpum sem hægt er að fremja.

Ég myndi segja upp Stöð 2 í annað skiptið núna á skömmum tíma hefði ég ekki asnast til þess fyrr í haust af sparnaðarástæðum.

Ari Edwald nú er komið að þér að biðja þolendur kynferðisofbeldi afsökunar og meina það.

Sjá hér

Hlýleg ummæli

"Ríkisstjórnin er eins og sauðdrukkinn bílstjóri" er greining alþýðumannsins Bubba Morthens  samkvæmt þessari frétt.

Svei mér þá ef þetta er ekki ein sú hlýlegasta lýsing sem ég hef heyrt á ríkisstjórninni frá áramótum.

En ég á það líka til að vera mikið í vondum félagsskap.

Hmprfm

 

Ríkisstjórnin eins og sauðdrukkinn bílstjóri

Sukkveislan enn í algleymingi?

Smátt og smátt er að renna upp fyrir fólki hversu gíganískt peningafylleríið var í gróðærinu á meðal þeirra sem stóðu í miðri svallveislunni.

Eins og t.a.m. hjá bankatoppunum í þáverandi einkabönkunum og svo útrásarvíkingunum auðvitað svo ég nefni dæmi.

Auðvitað vissi maður um sumarbústaðina, kyrrahafseyjur, afmælisveisluhöld sem stefndu hraðbyri upp á Kínamúr og svo nálægar plánetur í sólkerfinu, þyrlur og einnota þyrlupalla og alla hina úrkynjunina.

Þegar ég sá myndirnar úr snekkjunni frægu með nafnið 101 missti ég samt andlitið og mér varð hugsað til ákveðinna sukkkeisara í Róm áður og fyrr.

Í morgun fékk ég svona "andlitsmissi" og það nánast beint ofan í kaffibollann.

Í DV stendur að lesa eftirfarandi:

"Ríkisbankarnir þrír eiga 157 bíla af ýmsum stærðum og gerðum sem starfsmenn keyra um á í boði almennings. Langflestir bílanna myndu flokkast sem lúxusbílar eins og BMW, Audi og Toyota Land Cruiser. Ódýrustu lúxusbílarnir í eigu bankanna kosta um og yfir tíu milljónir króna en þeir dýrustu kosta yfir tuttugu milljónir."

Ég gapti vegna þess að mér varð ljóst að þeir hafa verið með öflugt mikilmennskubrjálæði hjá bönkunum fyrir fall.

Keypt undir sig rándýra bíla eins og bölvaðir olíufurstar sem baða sig í gulli og demöntum.

En burtséð frá því, sá sukktími á að vera liðinn og ætti ekki að koma aftur ef þessi þjóð hefur eitthvað lært.

En hafa þeir lært í bönkunum?

Nebb, þeir keyra áfram á lúxusbílunum eins og ekkert hafi í skorist.

Látum það vera að þessir bankamógúlar í "æðri" stöðum innan ríkisbankana sjái ekkert athugavert að keyra um á flottræfilsbílum í eigu almennings en hvernig dettur íslenskum ráðamönnum eins og t.d. bankamálaráðherranum í hug að láta þetta viðgangast?

Almenningur verður að spara, almenningur á að borga Icesave og allt annað sem til fellur eftir partíið sem hann kom ekki nálægt.

Í bönkunum, það er í flottstöðunum með bílafríðindunum virðist engin kreppa setja spor sitt á líf manna.

Þeir keyra um á okkar kostnað eins og fyrir hrun og engum þeirra virðist detta í hug að það sé eitthvað stórkostlega bogið við þetta rugl.

Taka bílana Björgvin G.

Bankatoppunum er ekki vandara um en öðrum að keyra um á eigin sjálfrennireiðum.

Fjandinn.

DV-fréttin

Bleksvört spá í Kastljósi

Eftir að hafa horft á Kastljósið í kvöld veit ég allt um gjaldeyrissamninga (heita þeir það ekki örugglega?).

Málið með mig er að þegar þessi hugtök úr fjármálaheimi eru annars vegar þá er ég minni en hálfviti.

Það þarf meira af svona fræðslu, fólk eins og ég þarf að fá hugtökin klippt út í pappa fyrir sig í hæfilegum skömmtum.

Takk Kastljós.

En ég sé ekki orð á netmiðlunum í kvöld um merkilegt viðtal, gott ef ekki tímamótaviðtal við Guðmund Ólafsson hagfræðing í Kastljósi kvöldsins. 

Þykir það ekki til frásagnar þegar hann segir að spá Wades um svarta framtíð Íslandi til handa sé í vægari kantinum?  Að ástandið eigi eftir að versna öllu meira en Wade spáir fyrir um og þótti flestum það ansi ljót spá.

Guðmundur segist hafa heyrt því fleygt að ríkissjóður muni seilast í lífeyrissjóðina?

Mér rann að minnsta kosti kallt vatn milli skinns og hörunds.

Wade talaði um skertar lífeyrissjóðsgreiðslur í viðtalinu í gærkvöldi.

Guðmundur var með bleksvarta spá í Kastljósinu þó hann benti vissulega á að það væru góðir hlutir til í lífinu fyrir utan peninga.

Guðlaugur Þór kom af fjöllum í dag varðandi ummælin á borgarafundinum

Ætli ég fari ekki á fjöll á endanum, taki til fótana og feli mig eins og Fjalla-Eyvindur?

Ég tek þetta svo ferlega inn á mig eins og við gerum reyndar meira og minna öll.

Á meðan ég man þá hvatti hann stjórnvöld til að fara að segja satt.

Bjartsýnn maður hann Guðmundur.

Viðtalið.

 

Tóku ekki stöðu gegn krónunni