JÚRÓVISJÓN ÚJE-JEJE

Hér er Jenny Una Errriksdóttirrrr í öflugri Júróvisjón sveiflu.  Hún ætlar að koma til ömmu og Einarrrs á eftir í smá heimsókn.  Fyrirsögnin er villandi því ég ætla ekki að horfa á Júróvisjón.  Ég ætla að sýna hinum smáðu Norðurlandaþjóðum stuðning minn í verki (af því að kosningasjónvarpið er meira lokkandi ef ég á að vera strangheiðarleg).  Það getur þó verið að ég skjótist til að kjósa sænska lagið en Svíþjóð er mitt annað föðurland og ég elska það upp til agna.  Annars myndi ég ekki gráta það þó Ungverjaland myndi vinna.  Það er flottasta lagið sem ég hef heyrt í Júróvisjon í áraraðir.  Mér finnst tímaeyðsla að glápa á Júró þegar Eiki megatöffari er ekki með.  Hann var nottla flottastur.  Meiri asnarnir í Balkanlöndunum að sjá það ekki. 

Nú fer ég og skúra gólf.  Svo mikil húsmóðir alltaf.  Þegar ég vaknaði í morgun (enda á byrjuninni) þá fékk ég svona gleðikast inni í mér (sennilega sálin að verki) yfir að vera allsgáð og aldrei þunn.  Það er BARA stórkostlegt og ég hlakka til kvöldsins.  Vinstri stjórn er í sjónmáli börnin góð og hananú.

Lofjúgæs

ÉG NÆLDI Í....

..2 atkvæði áðan fyrir VG.  Ekki misskilja mig ég er ekki að króa fólk af með hótunum eða læsa það inni þar til að það lofar að kjósa minn flokk.  Málið er að tveir ungir menn í minni fjölskyldu sem vissulega ætluðu að kjósa VG en voru að hugsa um að sleppa því af því bílinn var bilaður.  OMG!    Nú er ég búin að virkja þessi tvö fótgangandi atkvæði og þau verða keyrð á kjörstað af húsbandinu í dag.  Keyrum gjarnan fleiri sem kjósa "rétt".  Það er bara af almennri kurteisi sem ég set rétt í gæsalappir.

Án gamans þá er mikilvægt að allir nýti rétt sinn til að kjósa.  Ég skora á þá sem vilja breytingar að kjósa VG eða einhvern hinna stjórnarandstöðuflokkana.  Það eru nefnilega fjögur ár í næstu möguleika á breytingum.  Það er langur tími í pólitík.  Á fjórum árum er hægt að byggja upp og gera  helling af góðum hlutum, ss breyta aðstæðum láglaunahópa,  auka hlut kvenna í stjórnunarstöðum, afmá biðlistana, setja "stopp" á virkjanaframkvæmdir og svo mætti lengi áfram telja.  Á fjórum árum má líka auka til mikilla muna það misrétti sem fyrir er í þessu þjóðfélagi, auka þensluna fjórfalt eða meira, lengja biðlistana enn frekar og leggja drög að fleiri virkjanaframkvæmdum með ófyrirsjáanlegum afleiðingum fyrir náttúru Íslands.

Nú er að duga eða drepast.  Ég vona að við íslendingar kjósum með sjálfum okkur að þessu sinni.

 

AFMÆLISBARN DAGSINS!

Hann Oliver Einar Nordquist Róbertsson á afmæli í dag og hann er hvorki meira né minna en tveggja ára.  Úff amman er hrærð og glöð yfir fallegasta smádrengnum í heiminum.  Verst er að hann er langt í burtu úti í London þannig að við erum fjarri góðu gamni á þessum margfalda hátíðisdegi.

Amma-Brynja reddar málunum og er í London hjá litlu fjölskyldunni og í dag lætur hún inn myndir úr partíinu. Ömmubandalagið alltaf að störfum, við sofnum aldrei á verðinum.  Við AB erum flottastar í ömmudæminu.  Hún í London og ég hér.  Knúsaðu Oliver milljónfalt frá okkur öllum Brynja mín og svo heyrumst við í kvöld. 

Ég elska ykkur í hörgul!

MYNDAALBÚM GERIÐSVOVEL!

Kæru bloggvinir og aðrir gestir.  Ég er búin að koma upp myndaalbúminu.  Loksins.  Kíkið endilega.  Bæti inn nýjum myndum eftir helgi þegar amma-Brynja kemur frá London.

Ég er að drepast úr bloggisma.  Er með svo rosalega tjáningarþörf.  Er farin að horfa á sjónvarpið.

Síjúgæs

FLOTTAR UMRÆÐUR Í KASTLJÓSINU

Hann var góður Kastljósþátturinn í kvöld.  Þórhallur og Elín stýrðu umræðunum vel og Þórhallur gekk sérstaklega vel eftir svörum.  Það var svo sem ekki margt sem kom á óvart í þættinum, en engu að síður þá fannst mér ég fá heilmikið út úr umræðunum.  Ég áttaði mig ma á því að bæði Geir og Jón Sig. eru að tala yfir höfuðin á okkur venjulegu fólki.  Þeir eru svo ósympatiskir í málflutningi þegar kemur að umræðu um skattamál og velferðarkerfi að það ætti að vera hverju barni ljóst að hinn almenni maður, sérstaklega láglaunafólk er ekki ofarlega á vinsældalista þeirra félaga.  Jón Sig. ber þó af í þeirri merkingu að tala í frösum sem ég efast um að hann sjálfur skilji. 

Mér fannst það koma berlega í ljós hversu mikill flýtir er að stofnun Íslandshreyfingarinnar.  Ómar eins yndislegur og hann er, er svolítið út undan þegar að kemur að öðrum málaflokkum en umhverfis- og velferðarmálum. 

Steingrímur J. var góður eins og alltaf og ISG þræl fín líka.  Guðjón Arnar er asskoti fylginn sér og hefur mikla þekkingu á öllum málum.  Hann hefur vaxið í áliti hjá mér í þessari kosningabaráttu.

Ég veit ekki hver sló því fram en einhver í þættinum nefndi að grænakarlsauglýsingar Framsóknar, tímamótaauglýsingin sem ræðst að frambjóðanda annars flokks (Steingrími J.), hafi verið gerð af syni Jóns Sig.  Jóns sagðist "ekkert" vita um það.  Er þetta landlægt minnisleysi í Framsóknarflokknum?  Það man enginn, veit enginn og skilur enginn. OMG.

ÉG ÞARF AÐ FARA Í MEGRUN - INNVORTIS!

Úff alltaf gleðifréttir úr rannsóknarheiminum.  Amk. ein á dag svona til að peppa mann upp.  Mælingar með nýrri tækni þykja benda til þess að fita safnist fremur saman innvortis í grönnu fólki en feitlögnu en læknar segja samansafnaða fitu í kring um hjarta, lifur og briskirtil geta verið jafn hættulega heilsu fólks og fitan sem liggur undir húðinni, svona frjálsleg og utanádinglandi þið vitið.

Eftir að ég hætti að vera fyllibytta fóru bjórkílóin af og sykursýkin (sem ég btw. drakk á mig hjálpaði til).  Nú er ég töluvert undir kjörþyngd.  Nánast of mjó.  Millivegurinn vandfundinn eins og venjulega, alla vega í mínu tilfelli.  Ætli ég sé bara ekki spikfeit að innan?  Að fituviðbjóðurinn sem á mér var hafi flúið inn á við þegar ég snéri við blaðinu og fór að lifa alsgáðu og heilbrigðu lífi.  Kannski er hjartað beinlínis vatterað í mör.  OMG ætli séu til einhverjar Jónínur í heiminum sem taka mann í innvortis megranir (ekki stólpípur samt).  Hvernig get ég komist að því hvort ég er offitusjúklingur?

Fitan innvortis í grannvöxnu fólki?

BARA "TERTUBITI" AÐ VERA MEÐ BARNAKLÁM!

Ég verð svo reið, svo hrygg og vondauf þegar svona mál ber á góma.  Héraðsdómur Suðurlands hefur dæmt karlmann í 6 mánaða fangelsi þar af þrjá skilorðsbundið fyrir að vera með í sinni vörslu 6548 ljósmyndir og 179 hreyfimyndir sem sýndu börn á kynferðislegan og klámfenginn hátt.

"Í dómnum segir að um hafi verið að ræða mikið magn af myndum og meðal þeirra hafi verið myndir af mjög ungum börnum, nánast niður í reifabörn, sem svívirt séu á ruddalegan og klámfenginn hátt. Í gögnum málsins komi fram að maðurinn sagðist hafa „einhverja söfnunarþörf“ á svona klámefni og safnað því undanfarin tvö ár þegar lögreglan lagði hald á tölvur hans. Sagðist hann hafa verið í þeirri trú að löglegt hefði verið að eiga slíkt efni en jafnframt sagðist hann hafa talið að efnið væri svo tryggilega geymt að enginn annar kæmist í það. Bendi það til þess að hann hafi ekki verið í góðri trú með vörslur efnisins."

Maðurinn ber fyrir sig "söfnunarþörf".  Svona menn eru samviskulausir þrjótar.  Af hverju eru ekki refsingar við hæfi í svona málum?  Af hverju sendir kerfið út þau skilaboð að það sé tertubiti (pease of cake), nánast að eiga og skoða klám?  Barnaklám!

Ekkert bendir til þess að maðurinn hafi reynt að leita sér hjálpar og NB hann er sagður vera fjölskyldumaður!! Hvað ætli það þýði í börnum?´

Mér er óglatt.

Fangelsi fyrir að vera með barnaklám

ERTU EKKI AÐ DJÓKA Í OKKUR JÓNÍNA?

Jónína Bjartmarz sem ætlaði að kæra umfjöllun Kastljóss vegna umfjöllunar um "ríkisborgara-tengdadótturmálið" síðast þegar ég vissi, fer nú fram á það í Fréttablaðinu í dag að Kastljós biðji sig afsökunar og leiðrétti umfjöllun sína.  Amma mín sem ól mig upp sagði oft að þeir sem ekki gæfu sig þegar nóg væri komið hefðu orðið hortugheitunum að bráð.  Ég verð að vera sammála henni ömmu minni sem var vís kona.

Mig fer að gruna að Jónína þrái ekkert heitar en að detta út úr pólitíkinni.  Hvernig dettur henni í hug að taka þetta mál upp einu sinni enn og það daginn fyrir kosningar?  Mér þykir það reyndar ekki leiðinlegt , en ég er að vona að Framsókn þurrkist út eins og ég hef margoft komið að hér á þessum einkafjölmiðli.

Getur verið að Jónína sé algjörlega úr tengslum við venjulegt fólk í þessu landi?  Ég hef ekki heyrt marga vera þeirrar skoðunar að þetta mál með ríkisborgararéttinn hafi verið "fullkomlega eðlilegt" í afgreiðslu svo ekki sé meira sagt.  Flestir gera sér grein fyrir að þessi afgreiðsla er ekki eðlilegur framgangsmáti umsókna um ríkisborgararétt og það er þungt í mörgum vegna þess.  Ég er hins vegar ekki að halda því fram að Jónína hafi beitt sér í málinu (hef ekki hugmynd um það).  Hver sér um ímyndarvinnuna hjá Framsókn eiginlega?

Það má svo koma fram að biðjist Kastljós ekki afsökunar þá mun Jónína kæra umfjöllunina til siðanefndar B.Í. 

Nú er mál að linni.  Ég fékk kjánahroll við lestur greinarinnar.

Í DAG VERÐ ÉG ALEIN..

..ef mark er takandi á þeim sem spáir í stjörnurnar fyrir Moggann.  Dem, dem, dem.  Viðkomandi "spekingur" er nú kominn með attitjúd og er að dæma mig til einangrunar í dag eins og sjá má:

Steingeit: Þú skipuleggur líf þitt á bæði sniðugan og hagnýtan máta. Þegar velmeinandi ástvinir reyna að hjálpa, eyðileggja þeir bara fyrir þér. Haltu þeim í burtu einsog er.

Hvaða spádómur er annars falinn í eftirfarandi: "þú skipuleggur líf þitt á bæði sniðugan og hagnýtan máta"?  Þetta er fullyrðing sem hægt er að slá fram sisvona og hefur ekkert með spádóma að gera.  Fyrir nú utan það að það er harla ólíklegt að ég fari að taka upp á því að vera hagnýt og sniðug svona upp úr þurru og þvert úr karakter.

Ég ætlaði að fá húsbandið í smá innanhús tiltektir með mér en ég get samkvæmt þessu sleppt því.  Ásvinir eyðileggja fyrir mér í dag.  Ég á að halda þeim í burtu.  Og hvað með grillfyrirkomulagið sem við ætluðum að hafa í kvöld?  Með Helgu og Jökla, Söru, Erik og Jenny Unu Errrriksdóttur?  Á ég að halda þeim í burtu eða læsa þau inni í eldhúsi á meðan ég bý til matinn út á svölum svo fíneríið skemmist ekki?  Ég sekk alltaf dýpra og dýpra í vandræðapyttinn við lestur þessarar spár. 

Ég er hættessu.  Það er eins gott að ég er ekki í framboði.  Ég yrði svakalega einmanna frambjóðandi í dag ef ég ætti að láta stjörnuspána ráða.  Iss ég ætla að skipta um merki.  Hvernig hljómar krabbi fyrir daginn?  Ég er í stemmara fyrir krabbanum.

Svei mér þá!

SVONA LA LA DAGUR

Dagurinn er að mestu leyti búinn að vera ljúfur en samt eitt og annað sem hefði betur mátt fara.  Ég fór og kaus, en það ætlaði ég að gera í síðustu viku en komst ekki til þess.  Stóð í röð og tilfæringarnar og vesenið við að kjósa er svolítið en allt verður að fara fram eftir laganna bókstaf.  Ég málaði mig áður en ég fór að heiman.  Hamaðist á augnahárunum þannig að þau náðu upp á hvirfil og svona og það liðu ekki nema fimm mínútur þar til það var farið að leka úr augunum.  Ég er komin með eitthvað ofnæmi fyrir maskara!  Ég er í víðtæku rusli get ég sagt ykkur.  Ég var komin langleiðina niður í Höll þannig ég kaus grátandi.  Tárin láku í stríðum straumum, ég saug upp í nefið og var öll skökk og skæld, með tissjú í annarri en kjörseðil í hinni.  Þetta tókst þó á endanum.

Svo fór ég á leikskólann hennar Jenny.  Þar var mikið fjör og Jenny sýndi okkur allt sem hún var búin að gera í vetur.  Svo fór hún að róla og við tjilluðum bara með fóstrunum.  Ég var grátandi nottla og útskýrði fyrir viðstöddum hvað væri að en ég held að þau hafi ekki trúað mér, þau litu ásökunaraugum á húsbandið, blásaklausan.

Svo brunaði ég heim og lagði á mig að horfa á öll lögin í Júró, þrátt fyrir að Eiríkur hafi verið bestur, næst bestur og best-bestur.  Svo hlustaði ég með ánægju á Ungverjaland.

Ég sit enn og græt, þrátt fyrir að sönnunargögnin (nýi flotti maskarinn minn) sé löngu runninn af.  Hvað á ég að gera?.  Fer kona til ofnæmislæknis eða augnlæknis eða til beggja?  OMG