GELGJUSKEIÐ HIÐ SÍÐARI

Þessa dagana er ég á "þungu" gelgjuskeiði númer tvö í lífi mínu.  Ég hef ullað og grett mig framan í húsbandið, systur mínar, nágrannana og börnin mín, ef ekki hefur verið gengið samstundis að vilja mínum.  Ég hef tuggið Pan-tyggjó (12 plötur í einu) blásið kúlur, málað neglurnar á mér svartar, grátið yfir bíómyndum Tarentinos (vegna angurværðar þeirra), skellt símanum á fólk oftar en ég kæri mig um að muna og borðað hamborgara í öll mál og þrátt fyrir það verið í stanslausri megrun (er að segja að ég sé feit).

Ok,ok,ok.. róleg ég er að ýkja en ég er á einhverskonar gelgju þessa dagana og það kemur fram í furðulegum svefnvenjum.  Vakna eins og stálsleginn berklasjúklingur á morgnana, reyki, drekk sódavatn, hangi á blogginu og er heilbrigð með afbrigðum.  Svo skellur á einhver þreyta, ég fer aftur í bólið og sef eins og saklaust barn fram yfir hádegi og missi af helling í heiminum á meðan og má hafa mig alla við að láta eins og ég hafi verið að allan morguninn.  Sko við heimilisstörf krakkar mínir, lífið gengur ekki bara út á bloggheima (*ræskj*) ég á mér LÍF þessa dagana utan þeirra (jeræt).

Kannski er um að kenna þeirri leiðu staðreynd að ég er með hita, beinverki og arfamikinn hósta.  Æi það er ekki eins dramatiskt og alls ekki efni í færslu. 

Þetta verður flokkað undir "satt og logið".

Er sem sagt vöknuð, komin á vaktina og til í allskonar óknytti, enda unglingur á ferð.

Lofjúgæs!

ORÐ

Ég elska orð.  Sem er auðvitað borðliggjandi enda væri ég einskis nýt án þeirra, eins og flestir.  Ég tala mikið og blogga mikið.  Ég held samt að með árunum tali ég ívið minna en áður og hlusti pínulítið betur,  ætla rétt að vona það.

Öll orð eiga rétt á sér því þau færa í búning einhverja reynslu, lýsingu á tilfinningu eða geðslagi, þess sem þau talar.  Sum orð eru þannig í laginu samt,  að mér finnst þau smá vond.  Það verkjar pínu undan þeim, þau geta verið særandi eða misboðið manni á einhvern hátt.

Smá dæmi um orð og hugtök sem meiða mig,  ýmist af tilfinninga- eða fagurfræðilegum ástæðum:

aumingi (vó hvað það er vont að vera kallaður aumingi)

mella og gleðikona (veit ekki hvort er verra)

vinan (gerir mig morðóða þegar "ungir" menn á óræðum aldri, sem ég þekki ekki, kalla mig því)

Gitmo (gælunafn á pyntingarbúðum Bandaríkjamanna á Kúbu.  Talað um þennan viðbjóð eins og gamlan vin)

litli maðurinn, (litlir í samanburði við hvern? Stórmennin sem víkja huganum einstaka sinnum að hinum almenna manni, sjálfum sér til upphefðar?)

 þeir sem minna mega sín (hef örugglega notað þennan sjálf, lýsing á hinum breiða massa sem er ekki á vildarlista bankanna og er stöðugt verið að taka í afturendann af stjórnvöldum)

íslenska útrásin (forðið ykkur, hver sem betur getur, með peningana úr landi og hæfileikana líka, að því gefnu að þeir séu fyrir hendi, að sjálfsögðu).

rétt handan við hornið (ofnotaðasti frasi í fjölmiðlum, fyrr og síðar. Sigmundur Ernir byrjaði á þessu í bríari og frasanum uxu vængir)

lágvöruverslun (halló, við erum á Íslandi þar sem matarinnkaup kosta hvítuna úr augunum á okkur.  Köllum það ögnskáraverðsverslanir)

lúser (útlent og vont, notað til að niðurlægja fólk og stimpla það sem vonlaust)

kvóti (nauðsynlegt orð en er að eilífuamen komið með þýðinguna "óréttlæti dauðans" í mínum huga og það þrátt fyrir að ég hafi aldrei veitt svo mikið sem eitt kvikindi úr sjó eða vatni)

Læt þetta duga í bili.  Ég er svo andlaus enda ferð í þvottahúsið framundan og algjör óvissa ríkjandi með status á dýralífi í neðra.

Síjúgæs!

 

 

 

FYRIRBÆRIÐ FARIÐ ÚT

Trú mín á mannkyninu hefur eflst þúsundfalt.  Fyrirbærið sem trónað hefur í þriðja sæti vinsældarlista Moggans er horfið með öllu.  Ég hef ekki minnst á þetta mál einu orði, finnst það svo ógeðfellt, en nú hefur ritstjórn Moggans tekið á málinu og það held ég að sé það eina rétta, eins og málum er komið.

Mér léttir stórlega.

KYNNI TIL SÖGUNNAR NOKKRAR BLOGGVINKONUR

..sem allar reyndar,  eru eðalbloggarar.  Ég les þær af mikilli áfergju og fæ alltaf mikið út úr lestrinum.  Þær eru ólíkar, allar skemmtilegar, fræðandi og fyndnar.  Ég vil að sjálfsögðu deila með mér af því sem er gott og bendi hér á nokkrar.  Meira seinna því af nógu er að taka.

www.gurrihar.blog.is Gurrí er kattarkona, býr í Himnaríki og er blaðakona á milli þess sem hún bloggar.  Hún er andstyggilega fyndin.  Muhahahaha

www.anno.blog.is Anna bloggar um allt milli himins og jarðar.  Hún er vel heima í mörgum málefnum, launfyndin og með meirapróf á músik og menntamál. Anna er ein af þeim sem manni finnst maður alltaf hafa þekkt.

www.asdisomar.blog.is Er jákvæður og yndislegur bloggari sem lætur sér fátt mannlegt óviðkomandi.  Konan er megatöffari og með hjarta úr gulli.  Missi aldrei úr færslu, hún bjargar deginum.

www.skessa.blog.is Er kona með ákveðnar skoðanir, hamhleypa og engann vegin skaplaus, sér skemmtilega vinkla á málefnum og er alltaf til í að endurskoða sjálfa sig.  Svo fjandi flott.

www.asthildurcesil.blog.is Er fulltrúi Vestfirðinga.  Hún bloggar um pólitík, daglegga lífið fyrir vestan og tekur myndir af heimabænum þannig að maður finnur lyktina þaðan.

www.evathor.blog.is Er húsmóðurtöffari með meirapróf á kaldhæðni.  Hún er þrusu skemmtileg og nú um stundir er hún fulltrúi okkar í Amó. 

www.jonaa.blog.is Er alhliða bloggari og verðandi rithöfundur.  Hún er brjálæðislega fyndin, tilfinningarík og má skammast sín fyrir hvað hún kaus.  Ég elska konuna.

www.lauola.blog.is Hörkutöffarinn Laufey sem er svo leikinn með pennann.  Hún skrifar flottar færslur og ég er viss um að einn daginn á hún eftir að vera í forystu í pólitíkinni, vinstra megin að sjálfsögðu og taka á stærstu meinum samfélagsins.

www.hross.blog.is Er flottur bloggari sem bloggar um allskonar.  Hún er líka persónuleg í sínum pistlum og ekki hrædd að vísa í hvunndaginn sinn.  Ég passa vel upp á að missa ekki af henni, fremur en öllum hinum reyndar.

Jesús minn.  Út í hvað er ég komin.  Það er svo erfitt að velja úr.  Ég tek fleiri næst.  Það sem skiptir máli er að sem flestir fái að kynnast bloggvinkonum mínum.  Ég er að gera ykkur greiða góðir gestir og gangandi, sko stóran GREIÐA. 

 Skiljið blómin eftir á leiðinni út.

 

HÁLF MÁTTLAUST GLEÐIEFNI

..að einkadans skuli bannaður frá og með 1. júlí n.k.  Auðvitað fagna ég því að það skuli ekki lengur leyfilegt að stunda vafasama gjörninga í hálf-lokuðu rými en alveg er ég viss um að eigendur nektardansstaða eru búnir að finna sér leið kringum þetta eins og áður hefur verið gert þegar reynt hefur verið að koma í veg fyrir vændi og misnotkun á þeim konum sem á þessum klúbbum starfa.  Ég æti trúað að þessi forvinna hafi gengið undir vinnuheitinu "hvernig taka á löggjafann í afturendann" eða eitthvað í þeim dúr.

Einkadansinn líður undir lok

ENN Á NÝ..

.. leggur amma-Brynja land undir fót og fer til London til að passa hann Oliver okkar á meðan mamman og pabbinn fara til Spánar í brúðkaup Hebu og Toms.  Með ömmu-Brynju fer Gunnur, stóra frænkan hans Olivers og saman ætlar þetta tríó að taka London með stormi.

Amma-Brynja er bjargvætturinn minn í myndamálum af krúttmolanum í London.  Hún er búin að lofa mér að smella af í gríð og erg.  Amma-Brynja þú ert bara flottust. 

Granny-J

ENN EIN FJÖLDAÁRÁSIN..

 

..um helgina og enn einn þolandinn liggur höfuðkúpubrotinn á gjörgæslu LHS.  Árásin var gerð í íbúð við Hjaltabakka.  Ég er reyndar orðlaus, það er enginn endir á djöfulganginum.  Ríkir blóðugt stríð hérna í borginni?

 

Sex í yfirheyrslu eftir fjöldaárás

AÐ DREKKA Á RÉTTAN HÁTT..

..getur verið vandasamt fyrir suma.  Þar á meðal mig en ég myndi seint skrifa upp á að ég hafi drukkið það eðlilega.  En enn er bisað við að finna góða fleti á "víninu" og nú hafa þrír næringarfræðingar frá Ankerhus Seminarium og spítalanum í Hvidrovre þrjóað fjögur ný ráð um áfengi.  M.a. ráðleggja þessir næringarfræðingar, fólki sem kann vel að meta bjór og vín að neyta þess reglulega, í smáum skömmtum með mat.

Hm... þetta má vel vera rétt en mikið rosalega hefði ég gripið svona á lofti meðan ég var í "áfenginu" (understatement, var líka á læknadópi).  Að drekka samkvæmt ráðleggingum frá næringarfræðingi hefði komið sér vel í baráttunni fyrir áframhaldandi fylleríi.

Auðvitað er þetta útúrdúr og fíflaskapur í mér.  Meginþorri fólks kann að fara með áfengi og ef vín gerir þeim gott þá "be my guest", ég ætla að halda mér við sódavatnið, í ómældu magni auðvitað.

Vín er hollt

ÉG BÍÐ ÞOLINMÓÐ..

...eftir frétt í sunnudagsblöðunum þar sem segir frá því að borgarbúar hafi ekki hagað sér eins og víkingar á sveppum, ælt og migið þar sem þeir stóðu, ekki hálf-drepið náungann né keyrt dauðadrukknir.  Ég veit að horfurnar eru ekki góðar um að þetta gangi eftir en ég er bjartsýn  kona.  ARG

Mikil ölvun í miðborginni í nótt

AF HENNI JENNY UNU ERRRIKSDÓTTUR

Hún Jenny Una Errriksdóttir kom til ömmu og Einarrrs í gær til að fylla líf þeirra enn frekari gleði og hamingju.  Hún var í besta laugardagsskapi og sagði okkur að nú væri hún komin á Kroppakotsdeildina á leikskólanum sem er fyrir STÓRU BÖRNIN.  Jenny er sífellt að bæta við sig og nú svarar hún hugsi öllum spurningum sem til hennar  beinast með "ég held ekki".  Ekkert verið að fullyrða og þykjast vita alla hluti.  Við lásum Emmu í gærkvöldi og dáðumst að hugrekki Emmu sem fór ekki að gráta þegar læknirinn saumaði sárið á enninu hennar.  Svo fékk Jenny leið á Emmu og ömmu reyndar líka og kallaði í Einarrr í staðinn og hann söng hana í svefn. 

Nú er kókófíllinn orðinn að krókódíl, jákarlinn er enn á sínum stað og gívaffinn líka, en í þessum hverfula heimi, verða þeir orðnir að hákarli og gíraffa áður en varir.  Lífið er ein örskots stund.

Jenny sendir saknaðarkveðjur til Olivers í London og hún elskar hann svakalega mikið.