Mea culpa

Ég hef ekkert sérstaklega mikið álit á Íslendingum nú um stundir.

Sjálf er ég þar meðtalin oft á tíðum.  Finnst ég segja heilmikið en gera fátt.

Þegar litið er til mætinganna á mótmælafundi s.l. vetrar og mótmælanna vegna Icesave (sem ég reyndar hafði engan áhuga á að sækja, mótmæli seint með íhaldinu og framsókn, það er einfaldlega sjúklegt að gera það finnst mér) sást hvers lags hræsnarar og kjaftaskar við erum.

Málið er að tugir þúsunda manna skráðu sig á Facebook á móti Icesave.

Hundrað til tvöhundruð mættu síðan til að sýna vilja sinn í verki þegar blásið var til mótmæla.

Nema þegar fólk var lokkað með skemmtiatriðum og grilluðum pulsum en þá náðist í eitt til tvöþúsund sálir.

Svo er það Helgi Hóseasson heitinn.

Alla sína fullorðinstíð barðist hann fyrir þeim sjálfsögðu mannréttindum að fá skírnar- og fermingarsáttmála sínum rift.

Ekkert gekk.  Kirkjan er enda engin mannúðarstofnun sem sleppir taki sínu á þeim sem settir eru inn í hana ómálga börn.

Fólk brosti að Helga í besta falli, afgreiddi hann sem brjálæðing þegar verst lét.

Hann fékk nánast engan stuðning frá almenningi yfir þessu baráttumáli sínu sem skipti hann öllu máli.

Ég er þarna meðtalin.

Núna hafa yfir 20.000 manns skráð sig á Facebooksíðu sem vilja láta reisa þessum gamla baráttumanni minnismerki.

Eins og hún Heiða vinkona mín segir:

Það væri gaman að sjá þessa tuttuguþúsund mæta fyrir hans hönd og mótmæla ranglætinu sem hann var beittur af sjálfskipuðum umboðsmönnum guðs á jörðinni sem gera hvern mann trúlausan sem þarf að eiga í viðskiptum við þá - með örfáum undantekningum.

Hræsni og tvískinnungur.

Við ættum að ýta á færri tölvuhnappa og láta verkin tala.

Þessu beini ég stíft til sjálfrar mín og til ykkar í leiðinni.

Mea culpa.

Athugasemdir

[Soffía Valdimarsdóttir, 9.9.2009 kl. 13:07]

Þú ert skynsöm kona Jenfo!

[Gísli Ingvarsson, 9.9.2009 kl. 13:21]

Það finnst mér alltaf vera hámark lágkúrunnar þegar menn ganga á eftir líki sem þeir fyrirlitu og hæddu í lifanda lífi bara til að upphefja sjálfan sig.

[Matthías Ásgeirsson, 9.9.2009 kl. 14:05]

Mikið yrði ég glaður ef ekki nema 10% þessa hóps myndi skrá sig úr ríkiskirkjunni Helga til heiðurs.

[Garún, 9.9.2009 kl. 14:51]

Í mínum huga er hann ekki fermdur, svo það má segja að hann hafi náð til mín.  Einn í einu sagði einhver einu sinni þegar hann var spurður hvernig hann ætlaði að sannfæra fólk!   Hann sannfærði mig!  Ég skal koma og mótmæla þegar Roxette er að  spila!  

[Ásdís Sigurðardóttir, 9.9.2009 kl. 16:02]

Þú mælir vel Jenný, tek þetta til mín og ætla að reyna að bæta mig, takk fyrir góðan pistil.

[Baldur Bjarnason (IP-tala skráð) 9.9.2009 kl. 16:10]

Frábærlega skrifað, þakka kærlega fyrir

[Jón Bragi Sigurðsson, 9.9.2009 kl. 16:18]

Vel mælt! Ég man eftir grátbroslegri niðurstöðu biskups á sínum tíma: prestar hafa umboð til að skíra og ferma beint frá guði en ekki umboð til þess að taka það til baka eða ógilda...

[Dúa, 9.9.2009 kl. 17:26]

Hver segir að fólk hafi hætt hann þó að það hafi ekki staðið með honum á horninu Gísli?

Alveg eins og í Icesave grúppunni er fólk í þessari af jafnmörgum ástæðum og það er margt.