Í matinn á Vísarað?

 

Merkilegt þegar maður hugsar um hversu öllu hefur fleygt fram hér á landi, upp á gott og vont auðvitað, að það skuli ekki vera bændamarkaðir út um allan bæ.

Svoleiðis er það í siðmenntuðum löndum og ósiðmenntuðum líka ef ég á að vera alveg nákvæm.

Þegar ég bjó í Gautaborg þá var Saluhallen t.d. staður sem ég heimsótti að minnsta kosti einu sinni í viku.

Þar var hægt að fá lambakjöt bæði íslenskt og svo háheilagt Mekkakjöt þar sem viðkomandi lambi hafði verið slátra upp á múslímsku með höfuð í átt til Mekka.

Ostar upp á Ítölsku og seladæmi og annað sem ég hef ekki geð á að nefna frá Grænlandi og kjötbolur með mör frá Færeyjum, ég gæti talið endalaust áfram en sleppi því.

Grænmeti og krydd út í það óendanlega.

Mín kynslóð var ekki alin upp á miklu grænmeti.

Tómatar, gúrkur, hvítkál og gulrætur.

Búið og bless.

Já og grænar baunir frá Ora með sunnudagssteikinni.

Niðursuðumatur er auðvitað ekki í alvörunni svona ef maður hugsar um það, ekki frekar en líkamspartur í formalíni er lifandi manneskja.

Löngu dautt í báðum tilfellum.

Þess vegna hoppa ég hæð mína af tilhugsuninni um að hér verði grænmetis- og kjötmarkaðir.

Að því tilskyldu að verðið verði þolanlegt.

Og ekki segja mér að það sé svo dýrt að vera Íslendingur, að forréttindin kosti.

Þá segi ég: Þá er betra að ganga í ESB.

Ég vil ekki þurfa að kaupa í matinn á raðgreiðslum, fjandinn hafi það.

Og góðan daginn, villingarnir ykkar.

Þrír í undirbúningi

Athugasemdir

[Óskar Þorkelsson, 19.7.2009 kl. 11:41]

svona bændamarkaðir hafa verið í umræðunni hjá okkur sem höfum starfað í matvælageiranum um langa hríð.

Ég er sannfærður um að þetta verði bændum og almenningi til góðs ef rétt er haldið á spilunum. 

Vöruverð ætti að vera amk 20 % ódýrara en í stórmörkuðum , jafnvel allt að 40 % í einstaka tilfellum. 

visakort ættu að vera bönnuð þarna inni, í anda upphafs bónusverslana til þess að geta pressa' vöruverðið enn frekar niður því þá fær almenningur staðgreiðsluafslátt og bóndinn að sjálfsögðu peningana strax en ekki í næsta mánuði.. 

svo vísarað ætti ekki að vera möguleiki Jenný :)

[Þorsteinn Briem, 19.7.2009 kl. 11:51]

Sammála Skara að vanda.

Hins vegar eru grænar ORA-baunir í dós hápunktur siðmenningarinnar í heiminum.

[Hrönn Sigurðardóttir, 19.7.2009 kl. 14:18]

Ég vil ekki heyra eitt hnjóðsyrði um grænar baunir í dós!!

[Þorsteinn Briem, 19.7.2009 kl. 14:41]

Jamm, vonandi verða seldar Bíldudals grænar baunir og Bíldudals handsteiktar ketbollur á þessum bændamörkuðum.

Annað væri skandall.

[Jón Óskarsson (IP-tala skráð) 19.7.2009 kl. 17:24]

Ef innlend matvælaframleiðsla væri jafn mikið niðurgreidd og sú í ESB þá væri hún ugglaust á sama verði. 

Hér mað ekki minnast á niðurgreiðslur því þær hafa verið af  hinu illa

Því er spurt.  Eru niðurgreidd matvæli betri ef þau eru niðurgreidd af öðrum.

Pælið í þversögninni í þjóðarsálinni. Íslendingar vilja borða niðurgreddan mat frá ESB en vilja svo ekki heyra á það minnst að niðgurgeiða sína eigin framleiðslu.

[Jenný Anna Baldursdóttir, 19.7.2009 kl. 20:49]

Ég er alveg til í niðurgreiðslu Jón Óskarsson.

Mér óar líka fyrir tilhugsuninni um ferskt innflutt kjöt og ekki ber að taka allt sem ég skrifa eins og heilaga meiningu mína.

En ég er þreytt á háu matarverði.

Óskar: Takk fyrir þitt innlegg.

Dreg hér með til baka tilfinningakalda og ósvífna yfirlýsingu mína um grænar baunir í dós.

Þær eru hámark matarmenningar heimsins.

[Jenný Anna Baldursdóttir, 19.7.2009 kl. 20:50]

Ég er líka sammála með kortalus viðskipti til að ná niður kostnaði bara svo það sé á hreinu.