Svo þreytt á baktjaldamakki og sukkbandalögum

Í annað skipti í dag er þingfundi frestað.

Fyrst til kl. 16,30 og nú til kl. 17,00.

Stormur í vatnsglasi segir Höskuldur Þórhallsson, nýjasti vinur Davíðs Oddssonar.

Hann er að fylgja sannfæringu sinni maðurinn, hvað er að?

Hann er líka að standa í lappirnar segir hann.

Ég vildi að Framsóknarflokkurinn hefði staðið í lappirnar í stað þess að einkavæða bankana og leggja grunninn að því skelfingarástandi sem við nú upplifum.

Mikið skelfing er ég þreytt á hráskinnaleik, baktjaldamakki og sukkbandalögum í íslenskri pólitík.

Allt undir merkjum sannfæringar og hagsmunagæslu fyrir almenning (nú hreinlega gubba ég).

Svo þreytt að ég gæti hreinlega lagst í gólf og gargað.

Ég ætla ekki að láta það eftir mér, í staðinn ætla ég að vara fólk við Framsókn sem mest ég má fram að kosningum.

Það er ef þeir láta þennan Davíðsarm (ég meina mann) stöðva Seðlabankafrumvarpið.

En ég held, nei ég veit, að það er ágætis fólk í Framsókn.  Trúi og treysti á að það beiti sér.

Nú eða gangi í VG bara.

Segi svona.

Framsókn skekur ríkisstjórnina

Athugasemdir

[Gísli Baldvinsson (IP-tala skráð) 23.2.2009 kl. 16:51]

Það er staðfest að AGV er að bíða eftir breytingum á lögum um Seðlabanka. Þessi lappadráttur er í boði Finns Ingólfssonar og Alfreðs Þorsteinssonar. Nú skilja menn "heimsókn" Alfreðs í Seðlabankann.

[Gunnar Th. Gunnarsson, 23.2.2009 kl. 16:57]

"Ég vildi að Framsóknarflokkurinn hefði staðið í lappirnar í stað þess að einkavæða bankana"

Í stað þess að einkavæða bankana??

VG eru einangraðir í þeirri skoðun sinni að ekki hafi átt að einkavæða bankana. Mistök voru hins vegar gerð varðandi eignarhaldið, en það er önnur saga.

[Lára Hanna Einarsdóttir, 23.2.2009 kl. 17:01]

Nú er búið að fresta enn á ný - til 17:30! Eitthvað mikið að gerast.

[Hlédís, 23.2.2009 kl. 17:14]

"Mistök voru hins vegar gerð varðandi eignarhaldið, en það er önnur saga." segir G Th.  Setningin hefur eitthvað mis-farist  Þetta er allt sama sagan - sagan endalausa.  Engin mistök, Gunnar! - Þetta voru meistara-tök í  MIS-ferli.

[Hrönn Sigurðardóttir, 23.2.2009 kl. 17:29]

Höskuldur afskaplega upptekin af því að standa í lappirnar!

[Sigurður Þorsteinsson, 23.2.2009 kl. 17:43]

Það var mjög merkilegt viðtal við Steingrím Sigfússon á INNTV við Yngva Hrafn. Þar leiðrétti Steingrímur Sigfússon þann misskilning að VG vilji opinberan rekstur á öllum sköpuðum hlut, nei þeir vildu blandað hagkerfi. Sem þýðir opinber rekstur að hluta og einkarekstur að hluta. Ef við skoðum ríki þar sem blandað hagkerfi þá eru bankarnir yfirleitt einkareknir. Vandamálið er hins vegar að sú umgjörð sem um þá var, reyndist algjörlega ófullnægjandi. Bæði regluverk, svo og eftirlit. Nú heyrist mér flestir flokkar vera á þeirri skoðun að þegar nýju bankarnir komast almennilega á koppinn, þá beri að selja þá. Sem þýðir...... einkavæðing. Hver er þá á móti hverju?

[Fríða Eyland, 23.2.2009 kl. 18:03]

Ég  líka

Kveðja

[Hlédís, 23.2.2009 kl. 18:09]

Regluverk/Regelwerk er leiðininda-orð beint uppúr eb-þýðingum. Fyrirgefið orðhengilshátt sem kemur málefni ekkert við.

þakka þér, Sigurður, fyrir að benda aftur á INNTV  - gleymi alltaf að kíkja á það. Ég held við séum flest meira og minna sammála. Sum okkar treysta bara ekki þeim sem komnir eru á kaf í ósómann, - til að leysa með skástum hætti úr flækjunum nú. Þetta eru frændur okkar, vinir og venslamenn -  á allra handa máta. -  En því miður - vanhæfir til að stjórna nú.   Þeir verða bara að gera eitthvað annað, réttíbili!

[Jenný Anna Baldursdóttir, 23.2.2009 kl. 18:21]

Ég geri athugasemdir við það hvernig bankarnir voru einkavæddir en þeir voru réttir flokksgæðingum íhalds og framsóknar á silfurfati.

Meira að segja Valgerður Sverrisdóttir segist sjá ýmislegt athugavert við framgangsmátann þegar hún lítur til baka.

Bara að enginn hafi haft sinnu á að bjarga listaverkum þjóðarinnar frá því að komast í einkaeigu bankanna sem bónus segir mér að þarna var ekki verið að hugsa um hag almennings.

Framsóknarflokkurinn hefur í dag sett niður sína síðustu kartöflu í mínum garði.

Fari þeir og veri.

[Gunnar Th. Gunnarsson, 23.2.2009 kl. 18:22]

Þegar þessir vinstriflokkar komast í ríkisstjórn, komast þeir ekki lengur upp með lýðskrumið.

[Villi Asgeirsson, 24.2.2009 kl. 07:54]

Gunnar, vinstriflokkarnir ERU í ríkisstjórn og þeir hafa komið meiru í verk á einhverjum vikum en fyrri ríkisstjórn á fjórum mánuðum. Megi framsókn ná til sín 4.9% atkvæða í vor.