Ofmetin lífsreynsla

Í desember á hver dagur að vera skemmtilegur, fullur af tilhlökkun, mildur og dimmur.

Desember á að flela í sér epla og negullykt með dassi af appelsínuilmi og helst á fólk bara að bíða eftir jólunum og drekka heitt súkkulaði með rjóma.  Það á að horfast í augu, knúsa börnin sín og pakka inn jólagjöfum.

Líka í kreppu.

En það er ekki svoleiðis.  Í dag er ég að drepast úr kulda og ef mér er kalt þá er ekkert gaman að neinu.

Svo er ég algjörlega utan við mig.

Ég vaknaði svona í morgun.  Var stórt spurningarmerki í framan, alveg: Hver er tilgangur lífsins? Af hverju er veður?  Af hverju þurfum við að borða?  Eru óhefðbundnar lækningar það sem koma skal?  Hver fann upp drykkjarrörið?  Er hann ríkur?  Af hverju er utanborðsmótor kallaður utanborðs? Hvað er fídusinn með því að hafa hann hangandi yfir borðstokkinn? 

Ég hreinilega þoli ekki hvað ég þarf alltaf að hugsa djúpar hugsanir þegar ég reika um nývöknuð.

Svo á hún Helga mín afmæli og það er jólaskemmtun á Laufásborg hjá Jenný Unu á eftir sem ég ætla að sækja.

Ætli ég sé veik?

Ég sat hér áðan og var að sýsla inni á heimabankanum.  Hélt á öryggislyklinum og svona.

Stóð upp og var á leiðinni út að reykja.

Setti öryggislykil í þar til gert box og steðjaði með kveikjarann út í kuldann til að draga nikótínið ofan í lungu og fremja hægfara sjálfsmorð í desemberkuldanum njótandi þess út í ystu æsar í minni forherðingu.

Ég reyndi að kveikja í helvítis sígarettunni marg oft og það var liðinn dágóður tími, amk. nokkrar langar sekúndur þegar ég fattaði að öryggislykilinn er ekki kveikjari í dulargervi.

Þegar ég steðjaði inn til að skipta á lykli og kveikjara datt ég um útidyraþröskuldinn og flaug glæsilega inn eftir ganginum.

Hafið þið farið í sleik við parkett? 

Ekki?

Það er ofmetin lífsreynsla.

Hmrpfmmfprfm

Athugasemdir

[Sigrún Jónsdóttir, 11.12.2008 kl. 13:12]

Hvernig ferðu að þessu kona?

[Jenný Anna Baldursdóttir, 11.12.2008 kl. 13:13]

Að detta?

[Ásdís Sigurðardóttir, 11.12.2008 kl. 13:18]

Nei, bara að segja svona skemmtilega frá held ég. Þú ert nú yndisleg hvort sem þér líður vel eða illa.  Farðu samt vel með þig darling

[M, 11.12.2008 kl. 13:20]

Þegar þú færð mann til að skella uppúr fyrir framann tölvuskjáinn er þess virði að kíkja hér inn Vertu fegin að vera ekki með teppi á gólfum. Teppabruni er óþægilegur

[Anna Ragna Alexandersdóttir, 11.12.2008 kl. 13:25]

Svona daga koma líka það minnir okkur á að það er tilgangur með þessu öllu þinn dagur er að sleikja parket og vera utan við sig.muna hluti sem skipta máli afmæli uppákomur og þetta safnast allt upp í þínum reynslubanka.

Minnir þig á að þú ert bara þú.

[Sigrún Jónsdóttir, 11.12.2008 kl. 13:56]

Nei, frásagnarstíllinn eins og Ásdís sagði

[Hrafnhildur Ýr Vilbertsdóttir, 11.12.2008 kl. 15:19]

HAHAHAHAHA  nú öskraði ég af hlátri....luv u woman

[Sigurbjörn Sveinsson (IP-tala skráð) 11.12.2008 kl. 17:11]

Þegar ég reykti þá kólnaði ég allur upp. Nikótínið segja þeir. Mér líður illa, þegar mér er kalt. Eins og þér. Þess vegna hætti ég að reykja. Nú er ég allur eins og vel kynntur ónn.

Þeir segja að það séu til pillur við þessum vibba. Þeir eiga allan andskotann við öllum andskotanum, hvíslaði e-r að mér.  

[Hildigunnur Rúnarsdóttir, 11.12.2008 kl. 17:11]

Og komst ekki við hjá mér fyrir/eftir jólaskemmtun.  Skamm!  

[Birna Dis Vilbertsdóttir (IP-tala skráð) 11.12.2008 kl. 17:21]

Æðaþrengsli af reykingum.Nei hvernig er að fara í sleik við Parket? Hvernig parket?Fura?Hnota?Eik?

[Svanur Gísli Þorkelsson, 11.12.2008 kl. 17:36]

Ég veit að það er fátt verra en að vakna með hausinn fullan af spurningum, sérstaklega þegar þú veist að það eru ekki til svör. En til að ergja þig enn meira Jenný mín,  þá eru hér svörin við spurningum þínum síðan í morgunn.

Tilgangur lífsins er að elska og þekkja (læra).

Veður verður til af ýmsum orsökum, uppstreymi og niðurstreymi, snúningi jarðar og áhrifum aðdráttarafls tungls. Án veðurs væru ekki til veðurfræðingar eða neitt annað lifandi og merkilegt.

Þörfin fyrir að taka til sín næringu er bein afleiðing og ein af nauðsynlegum forsendum þess að vera skilgreind lífræn vera.

Margar óhefðbundnar lækningar verða kallaðar hefðbundnar í framtíðinni og öfugt.

Marvin Stone 1888 fékk fyrstur manna einkaleyfi á papírussogrörum. Hann dó auðugur maður úr lungnaþembu.

Mótorinn dregur nafn sitt af því að hann er nánast allur utan borðs á bátnum og var fundinn upp fyrir fátækt fólk sem átti minni báta sem ekki höfðu rúm fyrir vél innanborðs. Akkurinn er svo til  beint drif frá mótor í skrúfu og gerir siglingar á grunnsævi auðveldari, en nákvæmæega þar er fiskað eftir hóli og skjalli.

kv,