Austurland að Glettingi

 

Þegar ég í bríaríi var að fabúlera um að ég gæti hugsað mér að gerast vitavarða í færslunni hér fyrir neðan, fór hausinn á mér á flug.

Muniði eftir veðurfregnunum í denn (þær eru reyndar eins enn í dag)?

Það sem ég velti mér upp úr frösunum.

Austurland að Glettingi varð mér tilefni til margra ára pælinga. 

Hvað var átt við með Austurland að Glettingi? 

Ég spurði ekki frekar en ég gerði þegar ég hélt að ættingjar þulanna hríðféllu í stórum stíl.

Það hefur komið til tals hérna áður. 

Elskulega móðir mín, hjartkær sonur okkar og ástkær faðir okkar lést sóandsó.

Ég alveg; Guð minn góður, það sem lagt er á sumt fólk.

Þar sem ég spurði engan um þessa háu dánartíðni ættingja þulanna í útvarpinu þá liðu þó nokkur ár í þoku sem þeir dvelja í sem ekkert vita í hausinn á sér eða þangað til einn daginn að það kviknaði á perunni.

Af hverju spurði ég ekki um dánartilkynningarnar?

Nú eða Austurland að Glettingi?

Hvað þá hvernig börnin yrðu til?

Það var beinlínis móðgandi á láta segja sér að Guð setti börnin í maga mömmu minnar.

Aftur og aftur, endalaust.

Í stað þess að spyrja vafraði ég um í villunni vitandi að það var verið að ljúga að mér og málið upplýstist ekki fyrr en á Róló þegar villingarnir í hverfinu leiddu mann í sannleika.

Þeir orðuðu sannleikann ekkert sérstaklega pent.  Hm.....

Glettingur er reyndar fjall fyrir austan.

Hana... þá vitið það villingarnir.

Athugasemdir

[Linda Linnet Hilmarsdóttir, 17.11.2008 kl. 10:31]

Knús kveðjur til þín elsku besta Jenný mín:):)

[Ásthildur Cesil Þórðardóttir, 17.11.2008 kl. 10:41]

Þegar ég var lítil, þá spáði ég heilmikið í hvernig væri hægt að leika nokkur lög af plötum.  Einu plöturnar sem ég hafði séð voru plöturnar á eldavélinni  En svona er þetta.  Orð eru eitthvað sem á sér myndir í höfðinu á manni, ef myndin er ekki rétt, þá verður misskilningur, eða óskilningur. 

[Greta Björg Úlfsdóttir, 17.11.2008 kl. 10:47]

Hvernig getur rigning verið köflótt?

[Jónína Dúadóttir, 17.11.2008 kl. 11:48]

Og allir "skúrarnir" sem var alltaf verið að tala um....

[Birna Dis Vilbertsdóttir (IP-tala skráð) 17.11.2008 kl. 12:22]

 él með köflum

[Maddý (IP-tala skráð) 17.11.2008 kl. 12:49]

Fyndið, ég var einmitt að rifja þetta upp fyrir strákinn minn í fyrrakvöld, útvarpinu lauk ca kl 23:30 og sagði þulurinn "góða nótt" og svo kom bara þögn og ef maður var eitthvað að stússast þá gleymdist að slökkva og svo vaknaði maður með andfælum kl 01 við draugalega rödd sem drundi fram í stofu .. ÚTVARP REYKJAVÍK, NÚ VERÐA SAGÐAR VEÐURFRÉTTIR ..

[Davíð Halldór Lúðvíksson (IP-tala skráð) 17.11.2008 kl. 13:05]

Þegar ég var krakki spáði ég í því hvar Austurland-a-glettingi væri staðsettur :)

[Ragnhildur Sverrisdóttir, 17.11.2008 kl. 16:06]

Ég var alltaf svo undrandi á því hvað hann Þráinn fór ört frá einni kærustunni til annarrar. Í stað þess að heyra "frá hinu opinbera" heyrði ég nefnilega "Þráinn opinberar"

Jájá, ákaflega skarpur krakki, hún ég

[Greta Björg Úlfsdóttir, 17.11.2008 kl. 16:18]

Ha, ha, ha, þessi var góður!

Ég var að vísu orðin fullorðin þegar ég gerði mér grein fyrir því að maður einn hét Orms-tunga, en ekki Orm-stunga! 

[Sigurður Þór Guðjónsson, 17.11.2008 kl. 23:40]

Ég hef alltaf haldið að þetta með austurland væri bara eins og hver önnur glettni. 

[Jenný Anna Baldursdóttir, 17.11.2008 kl. 23:46]

Þið eruð frábær og ég er í kasti.

[Harpa Oddbjörnsdóttir, 18.11.2008 kl. 08:43]

hahahahhahahahahhaha! ég er gjörsamlega í kasti líka!

[Laufey B Waage, 18.11.2008 kl. 13:06]

Ég elska þessa frasa veðurstofunnar: Þurrt að kalla, - gráð, - og allt ofangreint. Vona að þessi dagskrárliður breytist aldrei og verði ekki lagður niður meðan ég lifi.

[Greta Björg Úlfsdóttir, 18.11.2008 kl. 14:39]

Laufey, segi það sama - þó það hafi iðulega komið fyrir mig að gleyma að leggja við hlustir einmitt þegar ég ætlaði að heyra veðrið í mínum landshluta. Helst vil ég líka hafa sömu raddirnar þarna sem lengst! Þessi sænski er samt góður líka - veit nú ekkert hvenær hann byrjaði.