Hvar er sóandsó?

 

Ég get bloggað mig niður í rætur lyklaborðsins um ástandið í efnahagsmálum en það mun engu breyta.

Ég skil eiginlega minna og minna eftir því sem ég les fleiri fréttir.

Það eina sem ég átta mig almennilega á að þessir karlar sem ráðið hafa ferðinni í peningamálum þjóðarinnar hafa ekki verið að hugsa um hag hennar amk. hefur sá hagur ekki verið í efsta sæti.

En nóg um það.

Ég fæ engu breytt um þetta hörmungarástand.  En ég ræð algjörlega ferðinni í mínu lífi og þess vegna ætla ég að einbeita mér að því.

Ég hef lært að gleðjast yfir litlu hlutunum eftir að ég varð edrú.  Í uppsveiflunni títtræddu sem ég reyndar tók ekki þátt í voru það litlu hlutirnir sem gáfu mér lífsfyllingu. Í niðursveiflunni er boðið upp á sama.

Einfaldleikinn klikkar ekki börnin góð, ég er að fullyrða það. 

Ég kveiki á kertum um leið og það tekur að rökkva, ég les bækur og ég er með fólkinu mínu.

Ég bloggaði aðeins um bækur í morgun en ég get ekki nógsamlega undirstrikað hversu frábær leið frá þunglyndi og amstri þessa grófa og miskunnarlausa peningaheims bækur eru.

Það er sama á hverju gengur, ég finn alltaf fróun í bókinni.  Enda er ég algjörlega ekki til viðræðna á meðan ég les.

Dætur mínar elskuðu bókalestur móður sinnar í uppvexti sínum.  Af eftirfarandi ástæðu.

Mamma: Má ég kaupa gallabuxur á sóandsóbilljónir?

Ég: Jájá.

Þær: Er það?

Ég pirruð: Jááááááá, í guðanna bænum látið þið mig í friði börn.

Önnur dæmi sem má nota eftir þörfum:

Má ég fara á diskó?

Má ég vera úti til miðnættis?

Má ég hætta í skólanum?

Má ég myrða nágrannann?

Ók, ekki alveg kannski en þið skiljið vandamálið.

Núna er það hins vegar Hljómsveitin sem verður smá pirraður þegar hann spyr;

Hvar er sóandsóeinhverandskotinnsemliggurbeintfyrirframannefiðáhonumenhannkemur  ekkiaugaá?

Ég: Jájá.

Hann: Ha, ertu ekki að hlusta? Hvar er sóandsóogsvoframvegis?

Ég pirruð: Jájájájájájájájájá!

Hann : ARG villtu leggja bókina frá þér.

Ég: Ha! Varstu að segja eitthvað?

Svona er lífið börnin góð. 

Engar hamingjupillur eða vökvar á flöskum komast í hálfkvisti við lestur góðrar bókar.

Farið á bókasafnið eða í bókabúðina.

Þar er kreppujöfnunina að finna.

Yfir og út í bili.

Nýi Landsbanki tekur við

Athugasemdir

[alva (IP-tala skráð) 9.10.2008 kl. 10:18]

Ég er lögst í skólabækurnar, ágætt að lesa svolítið um Sókrates og Platón í þsssu ástandi..

[Ía Jóhannsdóttir, 9.10.2008 kl. 10:25]

Er að lesa Glerkastalann núna.  Gott að komast aðeins frá raunveruleikanum.  Knús á þig bókaormur.

[M, 9.10.2008 kl. 10:54]

Er dottin inn í bókina Karitas  án titils og er hún æði. Hlakka til að opna hana á kvöldin og kvíð fyrir því þegar hún endar Glerkastalinn verður næstur. Græði á því að spjalla við ykkur bókakonur hér og fæ hugmyndir af bókum

Annars á ég kall sem gleymir sér fyrir framan tölvuna og gerir allt heimilisfólk brjálað að ná sambandi. Spurning að notfæra sér það eins og dætur þínar forðum

[Brynja skordal, 9.10.2008 kl. 11:17]

[Jónína Dúadóttir, 9.10.2008 kl. 11:34]

[Einar Örn Einarsson, 9.10.2008 kl. 12:17]

Ég er að lesa Fílabeinshöll Hagalíns aftur (Þjóðlegur sko) hlæ upphátt eins og asni öðru hverju, og svo gluggaði ég í Bólu Hjálmar. Andvakan hans er listaverk.

Býst ekki við að fara á sjó að ráði það sem eftir lifir árs, varðskipin bundin, nema útköllum sinnt.

[Marta B Helgadóttir, 9.10.2008 kl. 12:44]

Ligg heima í hálsbólgu og les Frjáls eftir Ayan Hirsi Ali. Stórgóð bók!

[Laufey Ólafsdóttir, 9.10.2008 kl. 13:33]

Ég segi alltaf nei til öryggis ef ég er of upptekin að hlusta. Þetta var kannski það sem olli því að dóttir mín, þá 9 ára, sagði mér að hætta að lesa og fá mér mann þegar ég var í námi. Feministauppeldið alveg útum gluggan þar.

[Gísli Baldvinsson (IP-tala skráð) 9.10.2008 kl. 13:59]

Svona...kona tekinn við í Landsbankanum, strákarnir sendir í sturtu.

[Linda Linnet Hilmarsdóttir, 9.10.2008 kl. 14:04]

[Laufey B Waage, 9.10.2008 kl. 14:53]

Þetta með bókvitið sem verður ekki í askana látið er auðvitað löngu úrelt. Það er kominn tími til að nútíma íslendingar fari að borða minna og lesa meira (alvöru bækur - ekki bara á tölvuskjá).

[Steingerður Steinarsdóttir, 9.10.2008 kl. 14:56]

Æ! Sammála, mikið kannast ég við þetta. Börnin mín kvörtuðu einmitt undan því sama að ég hyrfi inn í annan heim þegar ég væri að lesa og hægt að ná sambandi við mig.

[Birna Dis Vilbertsdóttir (IP-tala skráð) 9.10.2008 kl. 17:00]

[Sesselja Fjóla Þorsteinsdóttir, 9.10.2008 kl. 17:27]

Í kvöld tek ég mér bók í hönd.  Gott að falla með bókinni í annan heim um stund.

[Sólveig Kristín Gunnarsdóttir, 9.10.2008 kl. 18:21]

Alveg sammála, madur getur algerlega lokad heiminn úti ef madur kemst í góda bók.