Andúðin á forsetanum

Ég er búin að sitja stóreyg og lesa dagbækur Matthíasar, ekki litið upp.  Það er auðvitað sjaldan sem manni gefst færi á að vera fluga á vegg og fylgjast með sögunni eins og hún var ekki sögð, hvað get ég sagt?  Mannveran er forvitin skepna, ég þar engin undantekning.

Bræðrabönd heimsins snæðið hjarta!  Þarna er valdabatteríið í þessu landi í beinni, að vísu tíu árum síðar, þið skiljið hvað ég meina.

Það er margt skemmtilegt í dagbókarfærslunum, skemmtilegar heimildir um menn og málefni, krúttlegar litlar sögur og falleg ljóð.  Ekta Matthías.  Svo eru það miður skemmtilegri færslur eins og gengur.

Matthías virðist hafa skrifað nákvæmlega niður eftir mönnum, spurning hvort þeim grunaði það.

En það er rauður þráður í gegnum allar færslurnar sem ég er búin að lesa og það fór um mig hrollur þegar ég áttaði mig á því.

Matthías, Davíð, Styrmir og fleiri hafa megnustu andúð á Ólafi Ragnari Grímssyni. 

Mönnum er það frjálst en andúðin er sterk, svo sterk að mér finnst það vægast sagt óhugnanlegt.

Af hverju er Matthías að birta þetta aðeins tíu árum eftir að hann skrifaði það?

Ég er viss um að það er hárbeittur tilgangur með þessu.

Meira að segja þegar forsetafrúin deyr situr Matthías ekki á strák sínum.  Hann skrifar:

"Kista forsetafrúarinnar kom heim í dag. Viðhöfn með eindæmum, án fordæmis. Lúðrasveit verkalýðsins lék sorgarlög. Tekið fram í kynningu að eitt þeirra hafi einnig verið leikið, þegar kista Jóns Sigurðssonar kom til landsins frá Höfn.
Allt fór vel og skipulega fram. Þjóðhöfðingjar Norðurlanda væntanlegir við útförina.
Konungsríkið Ísland í burðarliðnum.
Morgunblaðið laufblað í þungum straumi tíðarandans.
Og dansandi fánar í haustgolunni."

Við vissar aðstæður hlýtur að vera hægt að henda kaldhæðninni fyrir róða, eða hvað?

En hann er ljóðrænn karlinn.

Það verður ekki af honum tekið.

Úff og dæs.

DAGBÓKARFÆRSLUR MATTHÍASAR

Athugasemdir

[Edda Agnarsdóttir, 18.8.2008 kl. 23:54]

Svakalegt - eiginlega virðingarleysi við eftirlifendur og þjóðina.

[Jenný Anna Baldursdóttir, 18.8.2008 kl. 23:56]

Ég er að velta því fyrir mér hvort þessar birtingar núna séu til að draga athyglina frá einhverju öðru.

Svona lagað gera menn ekki nema að vel hugsuðu máli.

[Ragnheiður , 18.8.2008 kl. 23:59]

Andúð þeirra á ÓRG skín í gegn en samt er gaman að fá að sjá þennan glugga inn í tíðarandann, ég bendi á að hægt er að skoða færslur Matthíasar enn lengra aftur.

Merkileg heimild.

[Heidi Strand, 19.8.2008 kl. 00:05]

Mér fannst þetta ósmekklegt sem fram kom í sjónvarpsfréttum.

Jenný þetta er örugglega rétt hjá þér. Er þetta ekki smjörklípuaðferðin?

[Jón Ingi Cæsarsson, 19.8.2008 kl. 00:05]

Nýr flötur á Matthiasi.... og ótrúlega lágkúrulegur og sóðalegur.... ég lít þennan mann ekki sömu augum og áður.

ER að nota þetta til að draga athygli frá vandræðum Sjálfstæðisflokksins en bætir sennilega í þau frekar en hitt með þessu

[Jón Steinar Ragnarsson, 19.8.2008 kl. 00:08]

Sennilega gengur hann sjálfur með forsetaembætti undir belti. Skyldi hann bjóða sig fram næst?

Annars afar smekklaust og fullt biturðar, öfundar og illvilja. Ólafur er tækifærissinni og ansi umdeilanlegur í ljósi fortíðarsannfæringar hans, en hann er forseti í dag og ágætur sem slíkur.  Mattías fyrir mér er ekkert annað en menningargrúppía, sem hefur upphefð sína af því að míga utan í þá sem hæst er hampað á sviði listsköpunnar hverju sinni. Hvaðan honum kemur þessi persónulega biturð, er mér algerlega hulið. Ólafur hefur ekki gert honum nokkurn skapaðan hlut.

[Ásdís Sigurðardóttir, 19.8.2008 kl. 00:13]

Þarna fannst mér maðurinn skíta algjörlega í nitina sína, fuss og svei og skömm sé að svona málatilbúningi.  Setja svona fram, vitandi að helmingurinn eða meira er bull, þol þetta bara ekki  arg og garg.

[Hrafnhildur Ýr Vilbertsdóttir, 19.8.2008 kl. 00:33]

Ég segi eins og Jón Ingi...lágkúrulegt.

[Margrét (IP-tala skráð) 19.8.2008 kl. 00:58]

Er aldrei skáldað í dagbækur? :-)

(Það sem Matti skrifar eftir öðrum)

[Lilja G. Bolladóttir, 19.8.2008 kl. 02:40]

Ég verð að segja að ég er alveg sammála þér. Ég hef líka tekið eftir þessu, það er nánast eins og hann haldi að hann upphefji sjálfan sig með þessum skrifum um Ólaf..... ekki það að ég sé sérstakur aðdáandi Ólafs heldur. En þetta er ótrúlega lúalegt og eina nýja sýnin sem ég fæ á menn og málefni eftir að lesa þessar færslur, er hve Matthías sjálfur og hans fylgilið eru ótrúlega miklir skíthælar og rotnir karakterar..... bara mín skoðun!

[Valsól (IP-tala skráð) 19.8.2008 kl. 09:41]

Kannski hefur Ólafur haft rétt fyrir sér þegar hann sagði að Davíð hefði skítlegt eðli, nei ég segi nú bara svona því Davíð og Matthías eru skoðanabræður og líkur sækir líkan heim.

[rut sumarliðadóttir (IP-tala skráð) 19.8.2008 kl. 12:35]

ótruleg lákúra þetta með fyrrverandi forsetafrú. Finn til með börnum þeirra í þessu skítkasti.

[Edda Agnarsdóttir, 19.8.2008 kl. 13:04]

Ég hugsaði það sama Jenný