"Af hverju drakkstu svona mikið?"

 

SÁÁ blaðið var í pósthólfinu mínu í morgun.  Og ég las það upp til agna.

Ég er ein af þeim tugþúsund Íslendingum sem á SÁÁ líf mitt að launa.  Ég er hvorki meira né minna en sannfærð um að ég sæti ekki hér og rifi kjaft alla daga, hefði þeirra ekki notið við.

Blaðið er stútfullt af fróðleik.  Dæmi:

"Af hverju drakkstu svona mikið pabbi" er viðtal Mikahels Torfasonar við pabba sinn sem hann keyrði í meðferð fyrir einhverjum árum.  Þá fékk ég verk í móðurhjartað.  Það er vont að meiða börnin sín.  Ég lifi með því, get ekki breytt því en ætla að gera allt sem í mínu valdi stendur til að endurtaka það ekki.

Það er grein um nikótín og alkahólista.  Helst æði oft í hendur, eins og undirrituð ætti að vita. 

Gunnar Smári skrifar frábæra grein um "Samfélag á fyllibyttustiginu" og Hörður Svavarsson skrifar um nýja greiningartækni í barna- og unglingageðsjúkdóma.

Og svo mætti áfram telja.

Frá og með morgundeginum og alla helgina er Álfurinn til sölu.  Ágóði sölunnar rennur til rekstrar unglingadeildarinnar á Vogi.  Ekki veitir af.  Við höfum nýlega lesið um að 20 fíklar, ungar mæður, hafi látist frá áramótum.  Það þarf að gefa í hérna.  Almenningur, með kaupum á Álfinum og svo ættu ráðamenn að hysja upp um sig og sjá til þess að SÁÁ sé ekki stöðugt í tilvistarkreppu vegna skorts á fjármagni.

Þessi alki kaupir álfinn og ég vænti þess að það gerir allir sem hér lesa.  Alkahólismi snertir okkur öll, á einhvern hátt.

Athugasemdir

[Guðjón Þór Þórarinsson, 28.5.2008 kl. 13:01]

Já mikið mikð sammála að SÁÁ bjargi mannslífum, ég er einn af þeim og þegar blessaður álfurinn kemur út þá er hann á stírinu á mótorhjólinu og á mælaborðinu í bílnum, klöppum fyrir SÁÁ.

[Sunna Dóra Möller, 28.5.2008 kl. 13:06]

Ég kaupi álfinn á hverju ári og mun gera það líka núna! Þannig finnst mér ég leggja smá á vogarskálar þessa málaflokks sem alltaf berst í bökkum fjárhagslega er svo lífsnauðsynlegur nánast hverri einustu fjölskyldu á Íslandi í dag!!

[Ragnheiður , 28.5.2008 kl. 13:16]

Ég kaupi álfinn..þ.e. rekist ég á sölumann hans. Minnir að enginn hafi komið í fyrra ?

En ég var að senda þér póst

[Guðríður Hrefna Haraldsdóttir, 28.5.2008 kl. 13:27]

Mun kaupa álfinn, ekki spurning!!!

[Edda Agnarsdóttir, 28.5.2008 kl. 13:34]

Gott mál - kaupi álfinn ef hann rekst á mig!

[Heiður Þórunn Sverrisdóttir, 28.5.2008 kl. 14:39]

Ég kaupi álfinn eins og síðustu ár ekki spurning en veistu hvort er hægt að kaupa SÁÁ blaðið ? mig langar að lesa það líka.

[Jenný Anna Baldursdóttir, 28.5.2008 kl. 15:04]

Heiður: Blaðið er borið í öll hús.  Hefði átt að vera í póstinum í morgun.  Ef ekki þá hringirðu í göngudeild SÁÁ og þeir senda þér það, er ég viss um.

[Jóhanna Magnúsar- og Völudóttir , 28.5.2008 kl. 15:19]

Kaupi álf - það er svo kjút að hafa einn á mælaborðinu í bílnum brosandi til mín og mér til yndisauka. Ætli það sé ekki verið að selja álfa í Kringlunni/Smáranum o.fl. ???? ..

Knús og til hamingju með sólina og edrúlífið.

[Andrea, 28.5.2008 kl. 16:45]

Kaupi aldrei álf- sorrý en ég hef enga trú á unglingadeild sáá
hluti skýringar má finna í þessari umræðu http://venus.blog.is/blog/venus/entry/546645/#comments

[Jenný Anna Baldursdóttir, 28.5.2008 kl. 16:47]

Andrea: Þú um það.

Stelpur: Takk.

[Erla (IP-tala skráð) 28.5.2008 kl. 17:55]

Verst er þegar fólk er á því stigi að það neitar að horfast í augu við raunveruleikann - ég þekki eina svoleiðis. Allir í kring sjá sannleikann nema hún, líka börnin hennar. Öllum í kring líður illa og henni líka. Ömurlegt ástand. Og það er ekkert hægt að gera, það finnst mér verst. Það getur enginn hjálpað henni af því að hún vill ekki hjálpa sér sjálf. Hvað er hægt að gera?

Ég mun kaupa álf, ekki spurning!

[Jenný Anna Baldursdóttir, 28.5.2008 kl. 18:02]

Erla: Það er því miður ekkert hægt að gera ef fólk er ekki tilbúið til þess að leita sér hjálpar.  Því er nú ver.  Innilegar stuðningskveðjur til þín og þinna.

[Brjánn Guðjónsson, 28.5.2008 kl. 19:57]

æ, kannski ég sé bara með hroka. ég hef keypt álfinn, en eftir að ég sá nýju höfuðstöðvar SÁA og allan flottræfilsháttinn þar, missti ég áhugann á álfakaupum.

[Jenný Anna Baldursdóttir, 28.5.2008 kl. 20:22]

Brjánn: Af hverju eiga Samtök sem reka sjúkrahús fyrir fíkla og alka að hokra út í horni?  Ég hef sjálf verið í hópum í Voninni (nýja húsinu) og þar er enginn flottræfilsháttur.  Ekki hlut ofaukið.  Þetta verður þú að rökstyðja nánar.

[Andrea, 28.5.2008 kl. 20:35]

Þó það nú væri að það væri flott þarna!  Batteríið fær fleiri hundruð milljónir til rekstursins.
Á meðan eru aðrar meðferðarstofnanir að sýna betri árangur en lepja dauðann úr skel

[Jenný Anna Baldursdóttir, 28.5.2008 kl. 21:14]

Andreaa: Ertu búin að kíkja?  Og hvaða árangur er betri, segðu mér?  Ég er ein augu.

[Andrea, 28.5.2008 kl. 21:41]

Hlaðgerðarkot, Krýsuvík, Götusmiðjan

[Jenný Anna Baldursdóttir, 28.5.2008 kl. 21:47]

Ég ætla ekki að missa mig út í tuð við þig Andrea, en Hlaðgerðarkot, ábyggilega ágætt, rekið af trúarsamtökum.  Ég persónulega vel læknismeðferð fram yfir handaryfirlagningu (og ég veit að þeir hjálpa fólki, persónulegur smekkur). Er Krýsuvík orðið almennt meðferðarúrræði með afvötnun og alles?  Það vissi ég ekki.  Götusmiðjan er flott, en hún viðurkennir ekki alkahólisma sem sjúkdóm, ég skrifa ekki upp á það.

Og svo vil ég gjarnan vita hvaðan þú hefur þá staðreynd að árangur sé betri á þessum stöðum sem þú nefnir?

Hvernig mælir þú árangur?  Í dögum, mánuðum, árum?

Og eru þessir staðir samanburðarhæfir?  Er einhver þeirra með afvötnun t.d.

[Andrea, 28.5.2008 kl. 22:01]

Ég ætla ekki heldur að missa mig út í tuð við þig Jenný. Ég hef kannanir sem þykja viðurkenndar.
Hlaðgerðarkot vinnur ekki með "handayfirlækningar" og hefur náð árangri með fólk sem SÁÁ hefur löngu gefist upp á og það eru ekki svo fáir. Enda er sú meðferðaraðferð sem þar er viðhöfð afskaplega einsleit og hentar ekki fjöldanum.

Umheimurinn er að átta sig á því að alkahólismi er ekki sjúkdómur og Þórarinn Tyrfings hlýtur að catch up bráðum

[Jenný Anna Baldursdóttir, 29.5.2008 kl. 00:08]

Hehemm, God has spoken!  Umheimurinn er að fatta.  Jájá, munurinn en ég, sem er enn að setja spurningamerki við fullt af hlutum.  Dæs.

[Andrea, 29.5.2008 kl. 09:28]

Er ekki allt í lagi að við erum ekki öll sammála? Þannig verða framfarir oft- fólk tekur málin og veltir þeim fram og aftur

Þú sérð ekki neitt athugavert við starfssemi SÁÁ og ég hef helling við hana að athuga
Er það ekki bara allt í þessu fína?
Þurfum ekkert að skella hurðum

[Jenný Anna Baldursdóttir, 29.5.2008 kl. 09:41]

Andrea: Það er gott og blessað, og mér t.d. lífsnauðsynlegt að geta debatterað, þar erum við sammála.  Ég er ekki að skella hurðum en mér finnst þú full yfirlýsingaglöð í þessu máli þegar þú fullyrðið að árangur sé betri annars staðar. 

Annars góð og nú legg ég til að við látum þessu lokið.