Að myrða í matinn

Skjálftinn í Kína er harmleikur, svo skelfilegur harmleikur að manni fallast hendur.

Sama gildir um ástandið á Búrma.

Þolendur Róberts Árna Hreiðarsonar, kynferðisafbrotamanns og Guðmundar í Bryginu, kollega hans, eru að ganga í gegnum harmleik.  Það er sorglegt og satt.

Hungur, sjúkdómar, mansal og ofbeldi á konum og börnum eru harmleikir, svo stórir að það er erfitt að leiða hugann að þeim, það hreinlega nístir í sálina.

Svo er það náttúran.  Fæðupíramídinn.  Þar eru engir harmleikir í gangi hvað mig varðar.  Hver þrífst á öðrum, allir þurfa að borða.

Mér finnst þessi taugaveiklunarfrétt um harmleik svananna á Álftanesi sem misstu eggin sín í kjaftinn á mávi ekki nálgast þá merkingu sem ég legg í harmleik.  Hún er allt að því fyndin þegar hún er sett svona upp.

Ég hélt að alvarlegt slys hefði orðið við Bakkatjörn þegar ég sá þessa frétt. 

Auðvitað eru svanir krúttlegir og mávar asnalega uppáþrengjandi og óheflaðir andskotar.

En vó, á ekki að efna til minningarathafnar í kirkjunni á nesinu bara, til að minnast eggjanna sem mávarnir úðuðu í sig? 

Veita álftunum áfallahjálp? 

Hefja söfnun til handa eggjalausu foreldrunum?

Ég get svarið það, hvernig væri að hemja dramatíkina?  Náttúrulögmálin eru ekki harmleikur.  Fjandinn fjarri mér.

Stundum er eins og maður sé staddur í bíómynd eftir Fellini.

Farin að murka lífið úr litlu lambi sem á slatta af systkinum og foreldra á besta aldri.

Muhahaha

Athugasemdir

[Jónína Dúadóttir, 16.5.2008 kl. 09:52]

Og hvað ætlar þú að myrða þér í matinn í dag heillin góð ?

[Hrönn Sigurðardóttir, 16.5.2008 kl. 10:17]

Jamm - væri ekki rétt að taka smá Lúkas á þetta?

[Linda litla, 16.5.2008 kl. 10:40]

Málið er bara að það er ekkert svæsið að gerast á Íslandi, af hverju þá ekki setja eina sorgarfrétt af eggjamorðunum í Bakkatjörn.... HEY. Góð hugmynd af nafni á morðsögu "eggjamorðin í Bakkatjörn"

Hafðu það gott snúllí og góða helgi.

[Guðrún B. (IP-tala skráð) 16.5.2008 kl. 11:35]

Hahahaha  nú skellti ég uppúr heldur betur.  Ferlega skemmtileg lesning.  Ég hélt einmitt líka að að það hefði eitthvað alvarlegt komið fyrir þegar ég sá fyrirsögnina.  En já .. svona er fólki misjafnlega gáfum gætt

Megaknús á þig Jennsla.. hafðu það gott um helgina.

[Þórdís Guðmundsdóttir, 16.5.2008 kl. 11:50]

Þessi fyrirsögn þýddi eitthvað allt annað fyrir mig og örugglega marga fleiri.  Þegar ég var barn og bjó út á Nesi þá drukknuðu tveir jafnaldrar mínir í Bakkatjörn.  Það var það fyrsta sem mér datt í hug og það var ekki notaleg tilfinning.

[Hrafnhildur Ýr Vilbertsdóttir, 16.5.2008 kl. 12:16]

Ég myndi trúa samlöndum mínum til þess að fjölmenna í kertafleytingar eins og gert var í svokallaða lúkas máli.....en að hjálpa flóttafólki..neeeeei

[Jenný Anna Baldursdóttir, 16.5.2008 kl. 12:17]

Þórdís: Ég er sammála þér og ykkur öllum.  Ég var viss um að einhver hefði druknað í tjörninni.  Harmleikir þýða yfirleitt skelfileg slys.

Takk fyrir komment.

[Jenný Anna Baldursdóttir, 16.5.2008 kl. 12:34]

Krumma: Sammála.  Ég get ekki annað en hlegið.  Sé liðið í anda við kertafleytingu á Bakkatjörn.

[Laufey B Waage, 16.5.2008 kl. 14:33]

Á maður ekki að deyja úr samviskubiti yfir öllum eggjunum sem maður hefur borðað frá elsku hjartans hænukrúttunum?

[Jenný Anna Baldursdóttir, 16.5.2008 kl. 16:17]

Laufey: Segðu, eða öllum eggjunum sem maður myrðir við baksturinn?

[Ólína Kjerúlf Þorvarðardóttir, 16.5.2008 kl. 16:33]

sammála

[Tiger, 16.5.2008 kl. 17:51]

Ójá, sammála því að oft á tíðum er mjög yfirdrifin dramatík í fréttafluttningi af hinum undarlegustu smáatriðum, svei mér þá.