Hvatning til borgaralegrar óhlýðni

Við Íslendingar eru góðir í að kvarta og kveina yfir hlutum sem vissulega geta betur farið.  Við erum tuðskjóður, eins og amma mín hefði sagt.

En aðgerðir til að breyta vondu ástandi, eins og t.d. verðhækkunum, byrja og enda yfirleitt með kvartinu og kveininu.  Á kaffistofum, í eldhúsum, hvar sem fleiri en einn koma saman (þar er mótmælafundur hehe), er nöldrað og rosalegri orku er eytt í það.

Núna eru vörubílstjórar búnir að taka listform Íslendingsins, að mótmæla ofan í bringuna á sér, upp á æðra plan.  Þeir eru að gera eitthvað í málunum.  Borgaraleg óhlýðni er dásamlegt fyrirbrigði og í þessu tilfelli, algjörlega nauðsynlegt.

Nú bíð ég eftir að allir atvinnubílstjórar sameinist vörubílstjórunum og að hinn almenni borgari fylgi svo í kjölfarið.

Ég er oft að velta því fyrir mér hvort fólk átti sig ekki á, hversu beitt verkfæri samstaða er?

Fyrir áratug eða svo, var mjólkin hækkuð í Danmörku.  Fólk tók sig saman og hætti að kaupa mjólk.  Það reddaði sér öðruvísi.  Einfalt mál.  Mjólkin var lækkuð. Ekki orð um það meir. Spurningin snérist einfaldlega um að hella niður mjólk eða fá fyrir hana peninga. 

Olíu og bensíni verður vísast ekki hellt niður en þeir gætu lent í geymsluörðugleikum á meðan á aðgerðum stæði.  Prufum, setjum aðgerðir í stað orða.

Og svo eru það matvörukaupmenn, sem ætla að hækka einhver býsn og nota sér efnahagsástandið. Mjólkin á líka að hækka.  Gerum eitthvað.  Verum óhlýðin og uppskerum amk aukna sjálfsvirðingu fyrir tiltækið.

Ég er orðin svo þreytt á að borga brúsann fyrir fólk sem veit ekki hvað lífsbarátta er og lifir lúxuslífi á kostnað venjulegs fólks sem möglunarlaust lætur bæta á byrðarnar.  Aftur og aftur.

Nú er lag.  Gerum eitthvað.

Sagði ekki einhver spekingur í Ameríku einu sinni: "Put your money where your mouth is"?

Það held ég nú.

Sátt náðist í Ártúnsbrekku

Athugasemdir

[Hólmdís Hjartardóttir, 31.3.2008 kl. 09:35]

Íslendingar láta allt yfir sig ganga. Við erum lúshlýðin kúguð þjóð.

[Sigrún Jónsdóttir, 31.3.2008 kl. 09:43]

Tek undir þetta allt hjá þér Jenný Eitthvað verður að gera og það strax.

[Markús frá Djúpalæk, 31.3.2008 kl. 09:50]

Heyr Heyr

[Gísli Baldvinsson (IP-tala skráð) 31.3.2008 kl. 09:51]

Við skulum breiða þetta frá bingu og höku út um landið. Stopp á dýrtíð!

[Elín Sigríður Grétarsdóttir, 31.3.2008 kl. 09:57]

öllum finnst við eiga að gera eitthvað, en ætlumst samt ekki til að við sjálf persónulega þurfum að taka þátt, nú eru bílstjórarnir hættir aðgerðum, hræddir við lögguna, þetta gleymist innan viku, verður bara kjánaleg minning ... það er ekkert til á íslandi sem heitir allir sem einn og heill samfélagsins mun aldrei vera forgangsmál, erum til í að gefa fullt af peningum til fólks sem á bágt, en ef við þurfum að stíga út fyrir persónulegan þægindahring, erum við fljót að líta í hina áttina ... þetta er ekki að fara að breytast ... bensínlítrinn er kominn uppfyrir hundrað og fimmtíukall ... en ég sá ekki betur í morgun að allir væru keyrandi, einir í bílunum ... ekkert breytist með orðunum einum !

[Jenný Anna Baldursdóttir, 31.3.2008 kl. 10:00]

Elín: Með þetta viðhorf og neikvæðni breytist aldrei neitt.  Ég held að bílstjórarnir séu alls ekki að gefast upp og það er erfitt að stíga út fyrir þægindarammann, en við getum gert það.  Látum bara fjúka nógu vel í okkur þannig að við rífum okkur upp úr hægindinu.

Takk öll.

[Hildigunnur Rúnarsdóttir, 31.3.2008 kl. 10:05]

sjá hér. Ekki að ég sé bjartsýn...

[Elín Sigríður Grétarsdóttir, 31.3.2008 kl. 10:17]

ég er ekki neikvæð, heldur raunsæ gerum þetta þá !!! (ég fór á bílnum í morgun, því ég nennti ekki í strætó ... og af því að við vorum tvö í bílnum get ég þusað um að hinir voru einir ... o.s.frv ... hljómar alkalegt hmmm???) ... let's do it

[Jenný Anna Baldursdóttir, 31.3.2008 kl. 10:29]

Flott Elín, ég er til, og húsband alveg í startholum.

Takk Hildigunnur.

[M, 31.3.2008 kl. 10:54]

Finnst þetta flott framtak hjá þeim bílstjórum og kannski byrjun á viðhorfsbreytingu. Fólk verður að standa saman svo einhver breyting verði.  Reyndar hrædd við svona umferðarteppu ef um slys er að ræða.

[Huld S. Ringsted, 31.3.2008 kl. 10:56]

Ég er svo sannarlega með! Búin að fá upp í kok af valdníðslu og hroka ráðamanna

[Kristín Katla Árnadóttir, 31.3.2008 kl. 11:07]

Ég líka ég er búin að fá nóg ég er stolt af bílstjórunum og við ættum að gera það sama ,að mótmæla þessari dýrtíð.

Takk Jenný mín.

[Kjartan Pálmarsson, 31.3.2008 kl. 11:17]

Vörubílstjórar eru ekki hættir PUNKTUR Og munu ekki hætta fyrr en stjórnvöld standa upp úr lasy boy stólnum og fara gera eitthvað vitrænt

[Pétur Kristinsson, 31.3.2008 kl. 11:23]

Og það er lítil von til þess að stjórnvöld geri eitthvað vitrænt. Ef að þeir gera eitthvað til sparnaðar að þá er löggum fækkað, læknar teknir af neyðarbílnum, sjúkraplássum fækkað o.s.frv. En ekki dettur þeim í hug að fækka sendiherrum, vilja fá aðstoðarmenn fyrir hvern og einn þingmann, himinhá eftirlaun o.s.frv.

Gæti verið að þeir hafi ekkert sérstakan áhuga á að sinna almenning í landinu?

[Kjartan Pálmarsson, 31.3.2008 kl. 11:29]

Pétur! Það gæti verið að áhugan skorti

[Óskar Þorkelsson, 31.3.2008 kl. 11:55]

ég er svo sannarlega með

[Högni Jóhann Sigurjónsson, 31.3.2008 kl. 12:22]

Elín!!! Þú þekkir greinilega eingann vörubílstjóra, þeir eru ekki hræddir við lögguna.

[Jóna Á. Gísladóttir, 31.3.2008 kl. 12:50]

OMG ég er svo illa sek þegar kemur að þægindarammanum, að það ætti eiginlega að loka mig inni. Hrýs hugur við að vera bíllaus... enda erfitt að taka klukkutíma strætóferð 2x á dag með Ian. Í rauninni ættu mín mótmæli að standa á einhvern hátt gegn þessu þjóðfélagi sem neyðir mann til að vinna fullan vinnudag til að eiga í sig og á.

[Jenný Anna Baldursdóttir, 31.3.2008 kl. 12:53]

Jóna, þetta hangir allt saman mín kæra.  Allt of hátt bensín, matarverð, tryggingar, þjónusta gerir það að verkum að launin duga ekki til.

Hysja upp um sig.

[Hólmdís Hjartardóttir, 31.3.2008 kl. 12:59]

Ég held að þjóðin ætti að rísa upp gegn háu matvælaverði.

[Jenný Anna Baldursdóttir, 31.3.2008 kl. 13:14]

Nú er spurning gott fólk, hvernig þetta verður útvíkkað.  Hvort leigubílstjórar finna með sér samstöðu.  Hugsið ykkur ef leigararnir myndu ekki keyra í 2 daga?  Almáttugur.  En ég verð að játa að ég hef ekki mikla trú á samstöðu í þessu þjóðfélagi.  Vörubílstjórarnir eru hins vegar með bein í nefinu og þeir eiga alla mína aðdáun.

[DoctorE (IP-tala skráð) 31.3.2008 kl. 13:26]

Alger bylting með nýju stjórnmálaafli er það eina sem dugar í baráttu okkar.
Samfylking og Sjálfstæðisflokkur gætu sameinast í SS flokkinn :)

[Heiður Þórunn Sverrisdóttir, 31.3.2008 kl. 13:45]

Hádegis viðtalið á stöð 2 var við sturlu sem er talsmaður vörubílstjóra gott að mínu mati ég stið bílstjórana heilshugar og gæti vel hugsað mér að koma og láta til mín taka....

[Georg P Sveinbjörnsson, 31.3.2008 kl. 14:17]

Ég er klár þegar byltingin byrjar...og verð vonandi ekki skotinn sem svikari

[Eva Benjamínsdóttir, 31.3.2008 kl. 14:28]

Ég dáist að samstöðu truggaranna, Og löggan reynir að skikka leikinn. 'Og hvað ætla þeir að gera, setja 400 trukkara í fangelsi?' sagði einn þeirra í viðtali í morgun.

Það er engin vandi að mótmæla ef meirihlutinn kemur saman og mótmælir valdbeitingu stjórnvalda. Það segist einsog er að öryrki getur ekki þrifist hér meðal fólksins á lúsarbótum, skömmtuðum einsog skít úr hnefa af þvílíkri mannfyrirlitningu og afarkostum að engu er líkara en sumir eigi aldrei að fá séns á því að sjá dagsins ljós. Hvurslags samfélag er það? Af hverju er alltaf níðst á öryrkjum? Hver sækist eftir því að hafa ekki heilsu? Og það kostar það sama fyrir þá í matinn og fullfríska. Það er ekki heil brú í þessu, ég þekki mörg dæmi og  fatlaða móðirin sem þurfti að reka dóttur sína að heiman því TR kleip af henni heimilisuppbótina. Dóttirin út og heimilisuppbótin inn. Ég verð óð þegar ég hugsa um þessa skerðingu mannréttinda.

Mótmælum hávöruverði á öllum sviðum! 

[Ásthildur Cesil Þórðardóttir, 31.3.2008 kl. 14:36]

Já stöndum einu sinni saman og látum ekki endalaust kúga okkur.

[Rut Rúnarsdóttir, 31.3.2008 kl. 15:32]

Er ekki málið að loka götum í kringum ráðuneyti og fleiri staði þar sem stjórnmálamenn þurfa að mæta?

láta ÞÁ finna fyrir þessu. Láta ÞÁ lenda í umferðateppu og koma of seint og fleira? 

[Hrafnhildur Ýr Vilbertsdóttir, 31.3.2008 kl. 16:31]

Ég er svo innilega sammála....ég er tilbúin að stíga út fyrir minn þæginda ramma og mótmæla gengdarlausu okri er reyndar með langan lista af hlutum sem ég vil mótmæla....

[Signý, 31.3.2008 kl. 17:08]

Rut: Eru ekki alþingismenn í páskafríi? Held þeir séu enþá í fríi... en því líkur í vikunni...

Annars er ég alveg hjartanlega sammála þér Jenný!.. veit ekki hversu oft það gerist... en það greinilega gerist

En ég held að það verði ansi erfitt að ná einhverri samstöðu í íslendinga í einhverju svona, íslendingar eru svo mikilir sjálfhverfispúkar að allt sem er utan þeirra eigin þægindaramma er ekki eitthvað sem þeir nenna að leggja á sig... Við erum nefnilega orðin svo vön góðu... látum aðra vinna skítverkin fyrir okkur...

Getum við ekki bara ráðið pólverja og litháa í mótmælin fyrir okkur líka?

En ég er til! mótmælaspjald/sjöld og allt!! ég á meira að segja "fuck the system" bol... sem ég gerði sjálf þegar ég var reiður unglingur... let's do it...

[Rut Rúnarsdóttir, 1.4.2008 kl. 09:44]

haha... eru þeir enþá í páskafríi? og mér fannst mitt frí vera langt ;)

[Jenný Anna Baldursdóttir, 1.4.2008 kl. 09:52]

Hehe, stelpur, hvernig haldið það yrði ef ég fengi mér svona "fuck the system" bol.  Arg, amman í stuði.

Rut; þeir eru í ógissla löngu fríi.